Read Kosena Mátíyu 19 Bible Online

Mátíyu 19 - Kosena bible

Mátíyu 19

¹Ísu mináyáátáár-áímbá simátímatuwena Káríri-ayampaꞌa tuwéna Yútiyaa-ayampaꞌa Yótáni-nonkona menávápár-áyámpáꞌá komáyowasa

²sáwívarawai tóyo uwaná tíꞌo ún-kwaasi asóvamatinkaraiye.

³asóvamatinkowasa ámáán-kawaa-kwaasi sésa Ísumo sáwí-aimbo sínda isánáe sésa Ísunopaꞌa tésa sésa moórá-kwaasigo maanáíntáváíyáꞌi. óꞌon-oꞌon-aintavaiyaꞌi. awainínkómbá kanaarárá auwáníyo. mirámó énamo éna ámáán-aimba araaisíni. íya araaisíníyo suwaná

⁴Ísu séna naaóváꞌó Mósesimo agaimakáin-aimba awánaraawe. maarán-áímbá agaimaréna séna Áánútu kwíyómba maramá taróruronkaꞌa aaraigwárá kwaaigwáráꞌá taróruraiye.

⁵tarórurena séna aaraigwárá kwaaigwáráꞌá tatóruraundayavesa tinóvowi tiyuwésa awaikóe awainínkóe tágárotamai mimbórá-túmá maꞌmái kwémaewe Áánútu siráiye.

⁶mindáyavesa awaikóe awainínkóe íma kae-kwáásíráámbá ésa mimbóráíꞌa kwéowe. Áánútu aarai-kwaaí moóráiꞌa umátínkaraintavesa íma tasáéro Ísu súwasa

⁷miwí sésa naaóváꞌá Mósesi maará séna moóráwai awainínkómbá aiꞌmátuwaindawai aúváívimba agaimaréna séna kesuwainímbá aiꞌmátuwaumne séna agaimái amiíno siráiye. nóra séna mirán-áímbá siráiyo suwaná

⁸Ísu séna kentíkwáꞌná tirumbá makáamba pósa Áánútun-aai íma ísóntavena mindáyavena Mósesi minámáámbá siráimbanivo Áánútu kwíyómba maramá taróruronkaꞌa íma mirá siráiye.

⁹simátimeꞌa séꞌa moóráwaimo awainínkó íma moórá-kwaasigoe kwénaaisana awaikó óꞌon-aintavena aiꞌmátuwenamo óꞌon-inimbo kwémayaimba umóyámbá kwémayaiye Ísu siráiye.

¹⁰Ísu mináímbá simásuwena máyowasa kwená kwayó-kwáásí sésa aaraimó kwémayaamba sénda-aimba kwáyáinkaꞌa pósa mirá kwéovo ímo aaraimó maésamo úwoimo kwémaemba kaweꞌá kwéowe suwaná

¹¹Ísu séna amáparawai sen-áímbá íma kaweꞌá umái ísáawasa aaraimó ímo mayánááontavesa Áánútu asirayámbá tímakaiwai mináímbá kwéisaawe.

¹²évakarawai moórá-mora-aintavesa íma aaraí máyáawasa évakarawai tinóvowi sáwí-kwaasi tínkaraawai aaraí íma máyáawasa évakarawai túmo sáwíꞌo umátínkaraawai aaraí íma máyáawasa évakarawai Áánútu kwená kwaásimo kawááin-aimba isésa Áánútuntavesa imáyáa ésa aaraí íma kwémayaawe. kanaán-umai mirá ónaumnemo kwésewai mináímbá isánááowe Ísu siráiye. Ísu iyámpói kaweꞌá umátínkarain-kwasai.

¹³Ísu simátimuwasa évakarawai Ísu tátorena kaweꞌá umátinkena Áánútumpaꞌa námúnaa sínkwáe sésa iyámpói tíꞌmaesa tuwasá kwená kwayó-kwáásí sésa tíꞌmaeꞌa kóro suwaná

¹⁴Ísu simátimena séna íma kóro séꞌa tiyuwáíyasa kesópaꞌa iyámpói úwoi teró. miníyámpóímó kesópaꞌo tentembá Áánútu kwená kwaásimo kawááimba miráráán-umai kwégawaaimba iyámpóímo kesópaꞌo tí-amba íma ítátinkaaro séna

¹⁵miníyámpóíráꞌá ayáámba tátorena túwaꞌnaa umai námúnaa simásuwena tíyukaiye. óísankwara-kwaasigona kwaasái.

¹⁶tiyuwówana moóráwai ívé-kwaasigo Ísunopaꞌa téna séna anóndakoo nóran-kawera umáíya aúnáiꞌa umái kwíyómpaꞌa maíꞌmaira ónaumno súwana

¹⁷Ísu séna nóra se kaweꞌ-máyáíyáváíyá sísaa oónó. mimbóráwáí Áánútu kweyáá kaweꞌnáꞌán-iye. aúnáiꞌa úmai maíꞌmaiꞌa ónáe sémo e Áánútuna ámáámba kaweꞌá umái kwaraaó súwana

¹⁸mindákó áísaa ena séna nóin-amaana kwaránaumno súwana Ísu séna tínkamiyasamo puwónááoniꞌa íma uwó. íma aarai-úmóyámbá uwó. íma umóyámbá mayaaó. kampar-áímbá íma simátinkaao.

¹⁹kentinóvowi túwíꞌa anómba uwó. esáváí-ímáyáámó óndantemba ená kwaásiti imáyáagwaraꞌa uwó. miráumai-amaamba kwaraaó Ísu súwana

²⁰mindákó séna minámáámbá kwaꞌmaéꞌa kwéiyumpo nóran-amaankona íma kaweꞌá kwéuno súwana

²¹Ísu séna amápa-tantaaꞌo kanaamó émo e ená náaindaamba óꞌon-kwaasi kwétime óntamba mairé ímo makéwai tímatuwenana ená kaweꞌ-méyámbá Áánútu kwíyómpaꞌa ankáníye. tímatuwemo e kesínaaemba kwaráníyone súwana

²²mináímbá iséna sáwívaꞌ-naaindaamba makóntavena anón-imayaa úwana arunkó sáwíꞌa kwéuwana kuráiye.

²³kúwana Ísu kwená kwayó-kwáásíyávéna séna áraiꞌa simátimeꞌa séꞌa sáwívar-oisambo makén-kwaasi Áánútumo kwená kwaásimo kawááipaꞌa kwíyamba umbaí táníye.

²⁴moórá-poigo áwíꞌa káámeri mimpóígó kwaigóná avaapimbá íma kanaán-umai kóveraniye. káámeri-poigomo kwaigóná avaapimbó kóverainkakai sáwívar-oisamba makén-kwaasi Áánútumo kawááipaꞌa kosinó Ísu súwasa

²⁵kwená kwayó-kwáásí mináímbá isésa táátavesa ésa sésa umbaí taintávésa nóran-kwaasiya Áánútumo kawááipaꞌa ménaaoo suwaná

²⁶Ísu tuwánéna séna kwaási miwítí mayáínéí íma meéyámbaresa kónááovo Áánútu amápa-tantaaꞌa úwoi kanaán-umai kwéiye súwana

²⁷Pítaa séna isaaó. kentáásí amápa-tantaaꞌa tuwéta enánaaemba kwégwaraumpo nóram-beyana mayánaumno súwana

²⁸Ísu séna áraiꞌa simátimeꞌa séꞌa Áánútu amápa-tantaaꞌa aúnáiꞌa úmaraindaraꞌa kemá kwaási úrandako kumpaáruraundawai ságayankwarawai méꞌa kárákwiyonaꞌa keinárawaꞌa sísamaivakemba kaeꞌá kumbaimái-kwaasi kesínaaemba kwégwaraawai Ísareri-kwaasi mayáíyávéꞌa tísaa ónááowe. Ísareri sísamaivakemba kaeꞌá kumbaimái tínkaraiwai-andarakewai tísaa ónááowe.

²⁹kentávésa imáyáa ésa Áánútun-aai kosimátimenaaontavesa naambáruꞌa tuwésa tuwaaísái tiyuwésa tíváꞌmaaꞌa tiyuwésa tímánaaꞌmaaꞌa tiyuwésa tinóvowi tiyuwésa táánimbaaꞌa tiyuwésa tiyáámúmbaaꞌa tiyuwésa miwítí maramá túwáawaina anondáma túwáan-tantaaꞌa mirán-tántááꞌá sáwívaꞌa mémaesa aúnáiꞌa umái kwíyómpaꞌa maíꞌmaiꞌa ónááowe.

³⁰ívéꞌa évakaꞌa aivakéwáí aáno tínaaeniꞌa íyasa ívéꞌa évakaꞌa tínaaenkewai aáno aivaríꞌa ónááowe Ísu siráiye.