Read Kosena Mátíyu 2 Bible Online

Mátíyu 2 - Kosena bible

Mátíyu 2

¹Yútiyaa-maravaken-kawaanako áwíꞌa Éróti máyon-kanaavimba Pétáremu-naopaꞌa Máríyaa Ísumba maránkarowasa némpakemba aaváúmó usópaken-kwaasi kawer-ímáyáágwárá-kwáásí teémesa Yérúsaremu-naopaꞌa tésa

²sésa Yútaa-kwaasiraꞌa kárákwiyinine sénamo maránkáín-iyampoi náávara ánkaraao. aaváúmó usaipáꞌá méta awánáúndaya moórá-oꞌa paárisata awánéta séta iyámpói maránkaraimba póta awánéta kwenáwíꞌa mósá maránáe séta teémeta túne siráawe.

³suwaná marará-káwáánákó Éróti mináímbá isówana arunkó sáwíꞌa úwasa Yérúsaremu-naopakewaigwaraꞌa ísówana tirunkó sáwíꞌa úwana

⁴Éróti mono-káwáá-kwáásíyé ámáámba sun-kwáásíyé tááyowasa torupamái máyówana séna Áánútu aiꞌmaráníwaimba Káráísitimba marankánímba náávara ankáníyo súwasa

⁵sésa Yútiyaa-maravaꞌa Pétáremu-naopaꞌa ankáníye. Áánútun-aai simátímakowai agaimaréna séna

⁶Yútiyaa-maravaꞌa Pétáremu-naopaken-kwaasiyono. Yútiyaa-maravaꞌa kárákwiraawaivimba kentí naaópaꞌo kárákwiraawai íma tínaaempaꞌa máyáawe. kentí naaópakemba moóráwai paárurena kesí kwaási Ísareri-kwaasiraꞌa kaweꞌá umái kárákwiyiniye agaimaréna siráiye suwaná

⁷Éróti iséna aaváúmó usópaken-kwaasi aúpáꞌá tááyowasa tuwaná tísaa ena séna nósa-tawai minóꞌá paárisara awánaraao súwasa simámúwana

⁸Éróti séna Pétáremuvaꞌa miníyámpóí koavakáá-umai awánéꞌa tasimásimiyaꞌa kesé kuréꞌa kwenáwíꞌa mósá máráano súwasa

⁹isésa kumbá aaváúmó usópaꞌo mésamo awánaraan-oꞌa awánowana minókómá aivaꞌá kwégwena miníyámpóímó máyonkaꞌa kogwaúwasa

¹⁰ávááraumai aamoí ésa

¹¹mindáúmpáꞌá iyésa anówante miníyámpóíyé tuwánésa kívairesa miníyámpóígó áwíꞌa mósá marésa unáámbá óin-tokésa kawe-tántááꞌá kóri-ontamba óimai amésa kawer-úmúmbó ií-yántááꞌá óimai amésa áséi-kwiyum-basawenkwaraꞌa óimai ámakaawe.

¹²ámatuwesa tuún-kwáúwana Áánútu kaainampáꞌá simátimena séna Érótimba íma kosimáméro súwasa óꞌon-ampakemba kentí naaópaꞌa kóuraawe. Ísumba áíꞌmaesarai Ísípivaꞌa kurááyan-kwasai.

¹³kóúwana kwíyómpakemba Ísóigona kwayóꞌnákómbá Yósépi kaainampáꞌá awánówana séna Éróti miníyámpóí tuvuwíndayavena kwéavakaa-ivo usásine anówante miníyámpóíyé tíꞌmae Ísípi-maravaꞌa koménaꞌa aáno simáméꞌa áíꞌmae tiyó sénaumne súwana

¹⁴mindóꞌwáámbá usásinena anówante miníyámpóíyé tíꞌmaena Ísípi-maravaꞌa kwémena

¹⁵miváꞌá komáyowana Éróti pukáiye. naaóváꞌá Áánútun-aai simátímakowai sirónkaꞌa póna mirá uráiye. kwemá agaimaréna séna Ísóigo sénaÍsípi-maravakemba kesáánimba máyainaꞌaááyaanana koyauweráníye siráiye agaimaréna sirónkaꞌa póna mirá uráiye. iyámpói tínkankaan-kwasai.

¹⁶Éróti awánómba aaváúmó usópaken-kwaasi kampaꞌá simáuwesa kóúwana Éróti arunkó áyámba úwana aaváúmó usópaken-kwaasi simámakon-aintavaiye oꞌá paáruraiyemo sirón-aintavaiye imáyáa éna évakarawai tiꞌmaréna séna Pétáremu-naor-ayampaꞌ-naopimpaꞌa kaer-ímó ten-íyámpóíyé ímo kaer-ímó tarén-iyampoiye tivakáá-umai tínkantuwaaro súwasa mirá uráawe.

¹⁷naaóváꞌá Áánútun-aai simátímakowai áwíꞌa Yérémaya sirónkaꞌa póna mirá uráiye. kwemá agaimaréna séna

¹⁸Áráma-kwaasi ávááraumaimo iviꞌó taráamba ísaraawe. Áréseo aísaavutantamba uráan-kwaasi miwítí iyámpóíyavesa iviꞌá taawasá iyámpóímo pukáantavesa timambá aráápamai tínkaraawasa úwoi iviꞌá támae iráawe agaimaréna siráiye. Ísípivakemba tiráin-kwasai.

¹⁹Éróti puwúmba Yósépi Ísípi-maravaꞌa ména kwíyómpakemba Ísóigona kwayóꞌnákómbá kaainampáꞌá awánówana séna

²⁰miníyámpóígómbá tuvuwónáe sen-kwáásí áꞌa púwóvo usásine anówante miníyámpóíyé tíꞌmae Ísareri-maravaꞌa kwaaó súwana

²¹usásinena awainínkónte ááninkonte tíꞌmaena Ísareri-maravaꞌa kúmba

²²Éróti ááninko áwíꞌa Ákéreasi kwemá avowáná anondá Yútiyaa-ayampaꞌa kawáá-máyáí kwémayowana Yósépi iséna mináyámpáꞌó koménintavena inkaisúwana kaainampáꞌá Áánútu simámuwana Káríri-ayampaꞌa

²³Násáreti-naopaꞌa tíꞌmaena koméraiye. naaóváꞌá Áánútun-aai simátímakowai sirónkaꞌa póna mirá uráiye. kwemá Ísuntavena sénaNásáretivaken-kwaasiye sénááowe agaimaréna sirónkaꞌa póna mirá uráiye.