Read Kosena Mátíyu 21 Bible Online

Mátíyu 21 - Kosena bible

Mátíyu 21

¹Ísu kwená kwayó-kwáásíyé kumbá Yérúsaremu-noar-ampaꞌa kumbá Óríve-omakar-egwaaꞌ-naoꞌa áwíꞌa Pétévasi-naoꞌa egwaaꞌá kwésa kwená kwayó-kwáásí kaeꞌá mátiꞌmarena

²séna epín-dáópaꞌa kurékai awáneyamba moórá-poigo áwíꞌa tónki ánda kwímaraawana áráákwaraꞌa máyáivo koawánékai ándáma iyátuwekai áíꞌmaekai tekaiyó.

³moóránakomo tuwánénamo tísaa ínakai anóndako ayááꞌmaeꞌa kónáe siyé kosimámiyana séna ánivo áíꞌmaekai kokaiyó síníye Ísu siráiye.

⁴naaóváꞌá Áánútun-aai simátímakowai siráintemba Ísu mirá uráiye. Áánútun-aai simátímakowai séna

⁵Sáíyono-noapaken-kwaasiyavai simátime se kentí kawáánáꞌá kentópaꞌa kwempaꞌá teémena tónki-poigo ayááꞌmaena téna tónki-poigon-araako ayááꞌmaena kwétiye simátimiyo siráiye agaimaréna Sáíyono-naoparemo siráimba Yérúsaremu-naopatavena siráiye. mináímbá paáréna Ísu kaeꞌnárai tiꞌmarówasarai

⁶Ísumo súntemba mirá ésarai

⁷tónki-poi áráákwaraꞌa áíꞌmaesarai Ísunopaꞌa tuyasá kwená kwayó-kwáásí paákár-únánkwátói ayúꞌmái mimpóígó arósáánumpimba kwandaaí uwíꞌmárówana Ísu ayááꞌmaena kwéguwasa

⁸sáwíva-kwaasi mésa anón-kwaasiye sésa évakarawai paákár-únánkwátói ayúꞌmái évakarawai taayánáma ayáiresa aampaꞌá uwíꞌmaꞌmae kwéguwana minúnánkwátóirare mintááyánáravane augwétámai kwéguwasa

⁹aivaꞌá nááún-kwaasiye Ísun-ánaaemba nááún-kwaasiye anónkar-anonkaꞌa sésa Tévítin-andarakewai áwíꞌa mósá kwémaraumne. Ísóigo aiꞌmáráísana kunkáiwaimba Áánútu kaweꞌá kwéumankaiye. kwíyómpakewai kwenáwíꞌa mósá kwémaraumne anónkar-anonkaꞌa suwaná

¹⁰Ísu Yérúsaremu-naopaꞌa kúwasa isaaisésa tóyo kwéesa nááwa kwétiyo suwasá

¹¹évakarawai sésa Ísu Áánútun-aai simátímíwai Káríri-ayampakemba Násáreti-naopakewaiman-iye siráawe. Ísu anóm-bonoꞌ-naumpaꞌa iráin-kwasai.

¹²suwaná Ísu Yérúsaremu-naopaꞌa anóm-bonoꞌ-naumpaꞌa Áánútuna naaúmpaꞌa iyéna monoꞌ-náúmpáꞌó meéyámbó kwémayon-kwaasi tuwánéna utiꞌmátuwena monoꞌ-nánkóná óntambo meéyámbárón-kwaasiti taareimá tawísíyuwena Áánútuntavesa imáyáa ésa máái-numama kwéamun-dumama meéyámbárón-kwaasiti taareimá tawísíyuwena

¹³simátimena séna Áánútun-aai aúváí-kwandaaivimba agaimaréna séna kesí naatavésa sésa Áánútumpaꞌo námúnaamo sen-dámbán-iye kwésewe agaimaréna siráiye. ánivo umóyán-dáúmpáꞌó ontenkáámbá uráawe Ísu siráiye.

¹⁴Ísu mináímbá simásuwena anóm-bonoꞌ-naumpaꞌa máyowasa túrambo kavíkówaiye aíyayaambo tausokówaiye kwenópaꞌa tuwaná asóvamatinkowasa

¹⁵iyámpói mésa anónkar-anonkaꞌa sésa Tévítin-andarakewai áwíꞌa mósá kwémaraumne sumbá mono-káwáá-kwáásíyé ámáámba sun-kwáásíyé isésa Ísumo óꞌoran-kaweꞌ-mayaimo mayómba awánésa tirumbá sáwíꞌa umánkesa

¹⁶Ísuntavesa sésa iyámpóímo sáwí-aimbo kwésemba íya kwéisaano suwaná Ísu séna áꞌa kwéisaunda Áánútun-aai aúváívimba agaimakáin-aimba awánaraawe. maarán-áímbá séna túwaꞌnaa óndayavesa pósa iyámpóíye umarané enáwíꞌa mósá kwémaraawe agaimaréna siráiye Ísu simásuwena

¹⁷tiyuwéna máápaꞌa kuména mindáópaꞌa tuwéna Pétáni-naopaꞌa kwéna mindóꞌwáámbá koméraiye. taaigó aáyánkarain-kwasai.

¹⁸Pétáni-naopaꞌa kogwáúmba usásinesa Yérúsaremu-naopaꞌa tumbá Ísumba áái ankówana

¹⁹moórá-taigo áwíꞌa víkima aankón-awampaꞌa kwáyowana mintáéramba nánáe séna ááimpaꞌa kwéna awánómba ánáwe suꞌmai kwáyowana mintáígóntávéna séna ená arambá íma iyáníyone súwana mintáímá aáyánkaraiye.

²⁰mintáí aáyánkówasa Ísuna kwayó-kwáásí awánésa táátavesa ésa tiyáámba tóipimba aavésa sésa víki-tai ááéma aáyánkagwiye suwaná

²¹Ísu séna áraiꞌa simátimeꞌa séꞌa Áánútuntaveꞌo ímo kaer-ímáyáámó éꞌo asirayán-ímáyáámó éꞌo éꞌa víki-taigontaveꞌo súnanamo aáyánkaintemba kanaán-umai mirá éꞌa miráwé suꞌmai íma éꞌa maanómátávéꞌa séꞌo iré mapámbai nompáꞌá kumuwómó síyanamo éna mirá íníye.

²²Áánútumpaꞌa námúnaa séꞌa óꞌon-oꞌon-tantaataveꞌa áísaa eꞌa sembá áraiꞌa Áánútu kanaán-umai súwaꞌnaa umásinkaniye sembá kanaán-umai kwétuwaꞌnaa-iye. nááwa aiꞌmákaisa tiráano siráan-kwasai.

²³Ísu mináímbá simásuwena anóm-bonoꞌ-naumpaꞌa uména Áánútuna áséi-kwasai kwésimatimuwasa mono-káwáá-kwáásíyé Yútaa-anon-kwaasiye tésa sésa nááwa aiꞌmákaisa tiréwa nááwampinkena mairéwa asirayám-báyáí kwémayaanda simásimiyo suwaná

²⁴Ísu séna aivaꞌá moórá-aimba tísaa onaꞌá anondámo síyaꞌo éꞌa sísaa on-áímbá simátimenaumne.

²⁵ááéma Yóni nombá pétinkaraiwaima Áánútuwa simámakaisana nombá pétinkarai. kwaásiya simámakaawana nombá pétinkaraiyo súwasa miwímá keáímbá sésa nórayaawa sénaumno. Áánútu simámakaisana nombá pétinkaraiyemo senanayáámó éna nóra séra Yónin-aaiyaveꞌa íma áraire sirááo síníye.

²⁶kwaási simámakaawana nombá pétinkaraiyemo senasayáámó ésa úwoi-kwaasi sínkamonaaowe. úwoi-kwaasi sáwíva-kwaasi Yónintavesa Áánútun-aai simásímakaiwai uráiye kwésemba pósa áwááꞌa siyénááowe mirá keáímbá sésa

²⁷Ísuntavesa sésa emó sísaa ónda-ainta íma ísaraumne suwaná Ísu séna ímo simásimiyaꞌa nááwampinkena mairéra asirayám-báyáí kwémayaunda-aimba íma simátimenaumne Ísu siráiye. moóráwai ááninkaiti kwaasái.

²⁸Ísu mináímbá simásuwena séna simátíménda-aimba imáyáa oró. moóráwai kaer-íyámpóí tínkaraiwai aivakéwáíntávéna séna kesááninkoo kesí ándá-aran-kigauvaꞌa mayáí komayaaó sisaná

²⁹aivakéwáí séna íma sínkáiye séna ména moórá-imayaa éna mayáí komáyáísana

³⁰naaénkewaintavena séna kesí ándá-aran-kigauvaꞌa mayáí komayaaó sisaná owé simái ivátuwena íma mayáí mairáiye

³¹Ísu simásuwena tísaa ena séna nááwa tivowán-áái kwéisaiyo súwasa aivakéwáí avowán-áái kwéisaiye suwaná Ísu séna mináímbá imáyáa éꞌa simátíménda-aimba ísáaro. táákísi-umoyan-kwaasiye eénánkáꞌó kwénaaon-inine sáwíꞌa kwéon-kwaasin-owe kwésembanivo miwímá Áánútu kwená kwaásimo kawááin-ampaꞌa ááéma kwégovo keinárawaꞌando.

³²Yóni nombá pétinkaraiwai téna kawer-ámbá agaráátinkowaꞌa kwenááiyaveꞌa íma áraire siráavo táákísi-umoyan-kwaasiye eénánkáꞌó kwénaaon-inine Yónin-aaiyavesa áraire suwaꞌá keinárawaꞌa miwí tuwánéꞌa Yónin-aaiyaveꞌa íma áraire séꞌa kentí sáwí-imayaa íma tuwéꞌa Áánútunopaꞌa íma tiráawe Ísu siráiye. ándá-aran-kigauraꞌo tavíyéwaiti kwaasái.

³³Ísu mináímbá simásuwena séna moórá kwántámai-aimba simátíménda ísáaro. moóráwai anóm-baragwarawai ména óntan-kurima úmakena ándá-aran-kigau úmarena ándá-arankona tááveꞌa úmarena ándá-arambo mapándáápá ínana anombó kumínín-taaveꞌa úmarena óntan-damba kígauraꞌo taviyí-námbá úmarena ayáátáákaꞌa óꞌom-baravaꞌa koménae séna maankígáúráꞌó taviyíyawaimo éꞌa kesáváí évakar-aramba maéꞌa évakaꞌa kembá siyúwáaro simátimena óꞌom-bapaꞌa komáyáísana

³⁴arambó ávumo kain-kánáá tisaná aanávómá kesí ándá-aramba komáyáaro séna kwená kwayóꞌnárawaꞌa tiꞌmáráísasa minkígáúráꞌó tavíyéwaitopaꞌa tewasá

³⁵tátoꞌmai moóráwaimba tuvuwésa moóráwaimba tuvúꞌmaraawana púwísasa moóráwaimba óntandei tuvuwésa ándá-aramba íma tímémba tiꞌmátuwaawasa kowaná

³⁶aanávómá aivaꞌá kwená kwayóꞌnárawaꞌa évakaꞌa tiꞌmaréna naaémba sáwívarawai tiꞌmáráísasa tewasá minkígáúráꞌó tavíyéwai tátoꞌmai aivaꞌó uráantemba mirá ésa sáwíꞌa umátinkesa ándá-aramba íma tímémba tiꞌmátuwaawasa kowaná

³⁷aanávómá ména naaémba séna kesááninkomba aiꞌmáráanana kwínasa kwenáái isánááowe séna aiꞌmáráísana tisasá

³⁸minkígáúráꞌó tavíyéwai awánésa keáímbá sésa aanávómbá ááninko kwétimba póta tuvúwónana puwéna maankígáú íma mayáínata kesáá mayánáe sésa

³⁹tátoꞌmai ándá-aran-kigauvakemba awéntayuwesa tuvúwówana pukáiye.

⁴⁰Ísu mináímbá simásuwena séna minkígáúgó aanávómá tínímba kígauraꞌo tavíyéwai nóra síníyo súwasa

⁴¹miwí sésa misáwí-kwáásí tínkaminasa puwíyana óꞌon-kwaasi kesí kígauraꞌa tavíyéro sínasa minkígáúráꞌá taviyésa arambó ávumo kain-kánáá tíndantemba aanávómbá minárámbá aménááowe siráawe.

⁴²suwaná Ísu simátimena séna Áánútun-aai aúváívimba awánaraawe. maarán-áímbá agaimaréna sénaóntan-damba on-kwáásí moórá-ontantavesa sáwíꞌa kwéiye sésa maisukáawe. aáno minóntánkó ávonkaaamba uráiye. mindá Ísóigo isatá awánéta séta óꞌoran-kaweꞌa uráiye kwésune agaimaréna siráiye.

⁴³mináímbá imáyáa éꞌa simátimeꞌa séꞌa Áánútu keinárawaꞌa Yútaa-kwaasiyavena maará séna kenkáꞌá íma kawáá-ónaumne séna tiyuwéna óꞌonkaa-kwaasiyavena kenkáꞌá kawáá-ónaumne sínasa kwená mayáí mayánááowe.[

⁴⁴minóntánkáꞌá tanaambá kovésa sáwíꞌa umái ménaaovo minóntánkó tuvúꞌmái sáwíꞌa umásuwaniye Ísu séna kwenááiyavesamo ímo áraire síyawai imáyáa éna mináímbá siráiye. ]

⁴⁵Ísu súwasa mono-káwáá-kwáásíyé ámáán-kawaa-kwaasiye isésa tááko pééi súwasa sésa moóráwai ááninkai kwaasáimo simbá kentááyávéna siyé sésa ándá-aran-kigauraꞌo tavíkáawaiyavenamo simbá kentááyávéna siyé sésa óntankowemo simbá kentááyávéna siyé sésa

⁴⁶tátoꞌmai tuvuwónáe sésa umbá amápa-kwaasi Ísuntavesa sésa Áánútun-aai simásímíwaiman-iye sun-kwáásí táároi inkaisésa Ísumba íma tátoresa ivátukaawe.