Read Kosena Mátíyu 22 Bible Online

Mátíyu 22 - Kosena bible

Mátíyu 22

¹moórágwaraꞌa Ísu aaí simátimindayavena kwántámai-aimba simátimena séna

²Áánútu kwená kwaásimo kawááin-aimba maarán-áímbán-iye. moóráwai kárákwiraiwai ááninko aaraí mayáníntavena anón-tanomba kauvónáe séna

³sáwíva-kwaasi tááyena séna aáno tanómba tamandaaró séna ména tanómba kaumaréna kwená mayáí-kwáásí tiꞌmaréna séna tamandaaró kosimátíméro sisasá mirá owasá ivátuwesa íma tewaná

⁴óꞌomba mayáí-kwáásí tiꞌmaréna séna tááyaraundawai kosimátimeꞌa séꞌa toómbó naí kwétoꞌmayaa éꞌa purumakané naanté-póíyé tuvúꞌmái kwégauvumpo tamandaaró. kesááninko aaraí mayáindaraꞌa tamandaaró. kosimátíméro séna tiꞌmáráísasa mirá kosewasá

⁵ivátuwesa íma tésa moóráwai kwená kígauvaꞌa kówisana moóráwai óntambo kwémayaim-bayaivaꞌa kówisasa

⁶évakarawai kárákwiraiwaina mayáí-kwáásíyómbá tátoꞌmai tínkamowasa púwówana

⁷kárákwiraiwai áwááꞌa séna kwená i-kwáásí tiꞌmáráísasa miwí tínkamowasa púwówasa miwítí naampimpáꞌá iramá agagaowaná kágwisana

⁸kárákwiraiwai kwená mayáí-kwáásíyávéna séna tanómba kauvéꞌa tááyaraundawai kesááninkona tanómba tamandaígómbá uwóvíꞌan-owe.

⁹aantááꞌo kwaásimo torupamáímo máyáapaꞌa kotivakáá-umai óꞌon-oꞌon-kwaasi tuwánéꞌa simátimiyasa tanómba tamandaaró sisasá

¹⁰kwená mayáí-kwáásí isésa aampaꞌá kwénaaesa kwaási tivakáá-umai tuwánésa sáwí-kwaasiye kawe-kwáásíyé torupamátinkesa tíꞌmaesa tésa toómbó naí-náúmpáꞌá sisipáá uráawe.

¹¹Yútaa-kwaasi aaraimó máyáankaꞌo ombá tanómbo nánáesamo ten-kwáásí ontaráꞌó tewasá mayáí-kwáásí kawer-únánkwátói tíméwasa urésa mindáúmpáꞌá umésa toómbá kwénaavo minúnánkwátóimo ímo urésamo ésa íma toómbá umandánááowe. toómbó naí-náúmpáꞌá sisipáá owaná kárákwiraiwai tuwánaimba moóráwai íma kawer-únánkwátói uréna máyáísana awánéna

¹²séna nóra éwa kawer-únánkwátói íma uréwa iráano sisaná íma aaí sisaná

¹³kárákwiraiwai kwená mayáí-kwáásíyávéna simátimena séna aíyayaankaꞌa asááumai máápaꞌa túnkwi-ayampaꞌa aúwéwana iviꞌá téna áíꞌo índayavena áwááyaamba akévundaniye siráiye Ísu siráiye.

¹⁴Ísu mináímbá simásuwena séna Áánútu sáwíva-kwaasi tááyain-kwaasivinkemba évakarawaiye suꞌmai kwená kwaási-iꞌa kwéumatinkaiye siráiye. táákísi-aintavesa áísaa uráan-kwasai.

¹⁵Ísu súwasa ámáán-kawaa-kwaasi máápaꞌa kumbésa keáímbá sésa nóran-ainta áísaa onanayá sáwí-aimbo sínata aaivintá mayankánaumno sésa

¹⁶miwí tínaaembo kwárón-kwaasiye Éróti amááraawiye tiꞌmárówasa Ísunopaꞌa tésa sésa anóndakoo árai-kwaasi po Áánútuna aambó kwáráan-aimba arupí umái kwésimatimendaya ísaraumne. kwaási táároi íma inkaisé anón-kwaasiye úwoi-kwaasiye táároi íma inkaisé tirumbá airáꞌmái-aimba íma séma arupí umái kwésimatimendaya ísaraumne.

¹⁷simáménda-ainta isaaó. kanaarátááwá táákísi-ontamba Árómáani-kamaani-kwaasiya timénaum. íya timénaumno. timénaundaya Yútaa-kwaasiya kentáásí ámáámba araaisénaundayaꞌiyompo nóran-imayaamo émo e simásimiyo suwaná

¹⁸Ísu miwí tááma iséna imáyáa éna arumpimbá séna Árómáani-kamaani-kwaasi táákísi-ontamba tíméromo senasamó ésa Yútaa-kwaasi áwááꞌa sésa Árómáani-kamaani-kwaasi sáwíꞌo umásínkáawaiya óntamba tíméro kwésiye sénááowe séna Árómáani-kamaani-kwaasi táákísi-ontamba íma tíméromo senasamó ésa Árómáani-kamaani-kwaasi áwááꞌa sésa táákísi-ontamba íma tíméro kwésiye sésa aaivimbá maisinkánááowe-imayaa éna áísaa un-kwáásíyávéna séna kaumbo-káér-ainkwara-kwaasi póꞌa kentávéꞌa sáwí-aimbo síndawe séꞌa kwésisaa-owe.

¹⁹táákísi-ontamba moórá maimái máagaraasinkaaro súwasa maimái máagaraarankowana

²⁰séna nááwa óikaana uráinkara áwíꞌa kwáyáiyo súwasa

²¹miwí sésa Árómáani-kamaani-kawaanako óikaamba isaná áwíꞌa kwáyáiye suwaná Ísu séna Árómáani-kamaani-kawaanakondei kwembá áméro. Áánútundei Áánútumba áméro súwasa

²²mináímbá ísówana tááꞌa kówasa íma aaí sésa auwésa kuráawe. pukémpinkemba usásinanaaon-kwasai.

²³kuwasá Sátúsi-monor-aimbo sun-kwáásí púwómpinkemba íma usásinanaaowe kwésen-kwaasi pósa mitáwai Ísunopaꞌa tésa

²⁴sésa anóndakoo naaóváꞌá Mósesi séna moóráwai aaraí maimakéna iyámpói íma ankéna púwísana ávákoma maimakéna awaaóná anondáwe séna iyámpói ankáníye siráiye.

²⁵moórá-aimba isaaó. moórá-tawai maankáꞌá avakaeté-avarawainonda mésa tuwaaómá aaraí maimakéna iyámpói íma ankéna púwísana

²⁶kwenánaaenkewai kwareꞌá maimakéna iyámpói íma ankéna púwísana kwenánaaenkewai kwareꞌá maimakéna iyámpói íma ankéna púwísana mirá eémesa avakaeté-kwaasi putásaawana

²⁷minínímbá naaémba pukáiye simásuwesa

²⁸Ísumba áísaa esa sésa mirámó ombá kwaásimo puwíyampinkembo usásinaiya-tawai minínímbá avakaeté-kwaasi tuwainímbá póna nááwa mayáníyo suwaná

²⁹Ísu séna Áánútun-aai aúváívimba agaimakón-aimba íma kaweꞌá umái iséꞌa Áánútuna asirayámbá íma awánéꞌa póꞌa miráumai sáwísawaa-aimba kwésewe.

³⁰pukémpinkemba usásinesa kwíyómpaꞌa uménaaon-kanaa aaraí íma mayáíyasa kwaaí íma mayáíyasa ésa Áánútuna kwayóꞌnárawaꞌo kwíyómpaꞌo máéwaimo ontembá minínínákwáꞌá miráumai aaraí íma mayáíyasa kwaaí íma mayáíyasa ónááowe.

³¹kwaási pukémpinkemba usásinanaaomba simátíménda ísáaro. Áánútu simátímakomba aúváívimba agaimakón-aimba awánaraawe.

³²Áánútu Mósesintavena maarán-áímbá séna Áánútu úne. enaíkwáꞌná Ááváramune Áísákaane Yákópone miwítí Áánútu úne siráiye. Áánútu mináímbá siráimba minkáúmbó-kwáásí áꞌa púwúwasa utamátínkaraambanivo mináímbá siráimba pósa miwí úwoi máyáawe Ísu súwasa

³³kwesémo máyón-kwaasi isésa táátavesa ésa sésa ááin-kwasai kwésimasimiye siráawe. aivar-ámáánkóná kwaasái.

³⁴suwaná Ísun-aaigo Sátúsi-monor-aimbo sun-kwáásí táái usáyaaitomba ámáán-kawaa-kwaasi isésa torupamái mésa

³⁵miwívínkémbá moóráwai ámáámba kaweꞌá umái ísarowai Ísumo sáwí-aimbo sínda isánáe séna áísaa ena séna

³⁶anóndakoo Áánútuna ámáámpinkemba nóran-amaana aivar-ámáámbán-iyo súwana

³⁷Ísu séna Áánútun-aai aúváívimba agaimaréna sénaÁánútumpaꞌa kentí Ísóigomba kentirunékentí imáyáawe kentimané áméro agaimaréna siráiye.

³⁸minámáámbá aivar-ámáámbá isaná

³⁹miwá ánaaenken-amaamba anón-amaamba maarán-ámáámbán-iye. Áánútun-aai aúváívimba agaimaréna sénakesáváí-ímáyáámó ontembá kentí kwaásiti imáyáagwaraꞌa oró agaimaréna siráiye.

⁴⁰minkáér-ámáánkó ávonkaamba uráisana Mósesimo óꞌon-amaambo siráine Áánútun-aai simátímakowai siráan-amaane megwí-megwiraamba éna kaer-ámáánkó ávonkaamba uraínkaꞌa tagwéaraapaiye Ísu siráiye. Áánútumo usásinankaiwai Káráísitina kwaasái.

⁴¹súwasa ámáán-kawaa-kwaasi torupamái máyówana Ísu miwí tísaa ena séna

⁴²Áánútumo usásinankaiwai Káráísiti nááwan-andaraken-kwaasiyaꞌiyo súwasa kentáásíkwáꞌná Tévítin-andaraken-kwaasiman-iye suwaná

⁴³Ísu séna naaóváꞌá Áánútun-amanko Tévítimba imáyáa amúwana Tévíti Káráísitintavena séna kesí Ísóigoman-iye siráimba

⁴⁴monor-ímá agaimakón-auvai-kwandaaivimba Tévíti agaimarena sénakesí Ísóigonatavena Áánútu séna kesiyáánúrapaꞌa asirayán-áyámpáꞌá maraꞌá ménaꞌa ená namuro-kwáásí usáyaaitaanasa miwí ánásanaaowe Áánútumo siráin-aimba Tévíti siráiye.

⁴⁵miráumai Tévíti Káráísitintavena séna kesí Ísóigoman-iye siráimbanivo nóraumaiya kwemá Tévítin-andaraken-kwaasiman-iyo Ísu súmba

⁴⁶Káráísiti Tévítina Ísóigoma éna Tévítin-andaraken-kwaasigoman-iye súmbanivo miwí íma kanaán-umai aaí sésa táátavesa ésa minkánáárákémbá íma áísaa úmaesa iráawe.