Read Kosena Mátíyu 23 Bible Online

Mátíyu 23 - Kosena bible

Mátíyu 23

¹Ísu torupamái máyón-kwaasiye kwená kwayó-kwáásíyé simátimena séna

²Áánútu usásintinkaraisasa ámáámba sen-kwáásíyé ámáán-kawaa-kwaasiye Mósesi agaimakáin-aimba awánésa kwésimatimemba

³iséꞌa kwáráaro. Mósesi siráin-amaamba miwí tóikakene suꞌmai sésa íma kwégwaraavo miwímó ontembá íma oró.

⁴umbai-yántááꞌó asááúmakesamo túgwaataꞌmaeꞌa korómó sésamo ímo túwaꞌnaa ontembá miwí umbai-áímbá simátimesa íma túwaꞌnaa ombá úwoi kwáráaro kwésewe.

⁵miwí sésa kwaási suwánésa anón-kwaasin-owe sígwáe sésa Mósesi siráin-amaamba agaimái anavéúmpimba makésa túwayaankare tiyáánkare asááúmaresa miwítí kwátói-arairaꞌa ayáátáákaꞌa taváákarara úmakesa naaópaꞌa avuvumpaꞌá kwénaaesa

⁶tanómbo kaúvópaꞌo máyáapaꞌa kawer-áyámpáꞌá mésa monoꞌ-náúmpáꞌó umáyáapaꞌa anón-kwaasimo maí-áyámpáꞌá umésa

⁷kwaási suwánésa sésa anón-kwaasi monor-áímbá simátíméwain-owe sígwáe sésa naaópaꞌa avuvumpaꞌá kwénaaesa mirámó ontávésa aamoí kwéowe.

⁸miwí mirá kwéombanivo íma mirá oró. keinárawatavesa anón-kwaasi monor-áímbá simátíméwai owémó síyambo éꞌa kímborawai anón-kwaasi isatá kwená kwaásiya mimbóráíꞌa umáíya máyaumne seró.

⁹keinárawapinkemba moóráwaintaveꞌa anón-kwaasi kesivón-iye sevó. kentivó kwíyómpaꞌa máyáiye.

¹⁰keinárawapinkemba moóráwaintaveꞌa kentááraꞌa kárákwiraiwain-iye sevó. Áánútumo usásisinkaiwai keyáá keinárawakaꞌa kárákwiraundawai kemá úne.

¹¹keinárawapinkemba usáyaaitanae síyawai keinárawati kwayóꞌ-máyáí máyáaro.

¹²kentúwíꞌo mósá maráíyawaima Áánútu úwoi-kwaasiraamba umátinkanivo kentúwíꞌo ímo mósá maráíyawaima Áánútu mósá tinkáníye Ísu siráiye.

¹³Ísu mináímbá simásuwena séna ámáámba sen-kwáásíyé ámáán-kawaa-kwaasiye simátíménda ísáaro. kaumbo-káér-ainkwara-kwaasimo éꞌa kárákwiyoro. Áánútu kwená kwaásimo kawááin-amba kwéitatinkaawe. Áánútu kwená kwaásimo kawááin-ampaꞌa íma kónáe séꞌa kónáe kwéowaiti aambá kwéitatinkaawe. [

¹⁴ámáámba sen-kwáásíyé ámáán-kawaa-kwaasiye kaumbo-káér-ainkwara-kwaasi éꞌa ketor-íníntí óísankwara naankwaráꞌá umóyámbá kwémaeꞌa kwaási suwánésa súwíꞌa mósá maráígwáe séꞌa kampakómbá tavisimái-namunaa kwésewe. mindáyaveꞌa kárákwiyoro.]

¹⁵ámáámba sen-kwáásíyé ámáán-kawaa-kwaasiye kaumbo-káér-ainkwara-kwaasi éꞌa simátimunda monor-áímbá kwaráígwáe séꞌa tivakáá úmaeꞌa anón-domba kóateꞌa némpaꞌa kwénaaeꞌa tuwánéꞌa kentí sáwí-mayai agaráátínkáawasa miwítí sáwí-mayaigo kentí sáwí-mayaigomba usáyaaitaraimba póꞌa mindáyaveꞌa kárákwiyoro.

¹⁶aambá íma kaweꞌá umái awáraawai kampaꞌá séꞌa maarán-ámbá kwáráaromo kwésewai kárákwiyoro. keinárawaꞌo monor-áímbó sembá kampaꞌá simátimeꞌa séꞌa anóm-bonoꞌ-nankon-aai tivamíraꞌa marésa sésa mirá ónaumnemo sembá minímáyáámó ivátuwaiyanamo éna kanaán-íníye. ánivo kawer-óntámbá áwíꞌa kóri-ontankon-aai tivamíraꞌa marésa sésa mirá ónaumnemo sembá minímáyáámó ivátuwaiyanamo éna sáwíꞌa íníye kwésewe.

¹⁷minkórí-óntánkó anóm-bonoꞌ-nankomba íma usáyaaitaraivo mindáúmpáꞌó kwénimba mindá kaweꞌán-iye. keinárawaꞌa monor-áíntávéna tááko íma pééi sisaꞌá kwéisaawe. sáwí-imayaagwara-kwaasi simátímén-aimba kampar-áímbán-iye.

¹⁸keinárawaꞌo monor-áímbó sembá kampaꞌá simátimeꞌa séꞌa Áánútuntavesamo póímo tuvúꞌmáímo agáyáan-taareigon-aai tivamíraꞌa marésa sésa mirá ónaumnemo sembá minímáyáámó ivátuwaiyanamo éna kanaán-íníye. ánivo mintááréíráꞌó Áánútumbo kwéame-poigon-aai tivamíraꞌa marésa sésa mirá ónaumnemo sembá minímáyáámó ivátuwaiyanamo éna sáwíꞌa íníye kwésewe.

¹⁹Áánútumbo ámém-poigo mintááréígómbá íma kwéusayaaitaivo mintááréígó usáyaaitarena ámém-poi kaweꞌá kwéiye. keinárawaꞌa monor-áíntávéna tááko íma pééi sisaꞌá kwéisaawe. sáwí-imayaagwara-kwaasi simátímén-aimba kampar-áímbán-iye.

²⁰asirayán-áímbó sembá Áánútuntavesamo póímo tuvúꞌmáímo agáyáan-taareigon-aaimo tivamíraꞌo marésamo sésamo ésa mintááréígón-ááigwaraꞌa Áánútumbo kwéamem-poigon-aaigwaraꞌa kwésewe.

²¹asirayán-áímbó sembá anóm-bonoꞌ-nankon-aaimo tivamíraꞌo marésamo sésamo ésa mindánkón-ááigwara Áánútu mindáúmpáꞌá máyáiwain-aaigwaraꞌa kwésewe.

²²kwíyónkon-aaimo tivamíraꞌo marésamo sésamo ésa Áánútu miváꞌá kárákwiraiwain-aaigwaraꞌa kwésewe.

²³ámáámba sen-kwáásíyé ámáán-kawaa-kwaasiye kaumbo-káér-ainkwara-kwaasimo éꞌa kárákwiyoro. naaóváꞌó Mósesimo siráintemba kentí kígauvakemba sáwíyan-tonkwaraꞌa taaínkaar-umai siyáánkai makéꞌa moórá Áánútumba kwéameꞌa kaweꞌá kwéeꞌa mirán-ámáámbá ísámai iyéꞌanivo Mósesimo siráin-amaamba anón-amaamba iváꞌá tuꞌmaréꞌa póꞌa kwaási íma arupí umátinkeꞌa tirumbá íma umátinkeꞌa íma Áánútuntaveꞌa asiramáí-imayaa éꞌa mirá ontávéꞌa póꞌa minánón-ámáántómbá iváꞌá tukáawe.

²⁴aambá íma kaweꞌá umái awáraawai kampaꞌá séꞌa maarán-ámbá kwáráaro kwésemba sáwíyan-amaamba kwaréꞌa anón-amaamba tukáawe. mirámó ombá toómpímbá kankambá kwáyáísaꞌa kíto-kankamba túkúyuweꞌa anón-kankamba mindágwaraꞌa kwénaantenkaan-kwaasin-owe.

²⁵ámáámba sen-kwáásíyé ámáán-kawaa-kwaasiye kaumbo-káér-ainkwara-kwaasimo éꞌa kárákwiyoro. anavéúne táávere paákáré suꞌmai kwésese owain-ovo andáámpaꞌa sáwíꞌa uráisaꞌa póꞌa kempímbá sáwíva-tantaaꞌa anómba kwáyáiye.

²⁶ámáán-kawaa-kwaasiyono. monor-áíntávéna tááko íma pééi sisaꞌá kwéisaawe. anavéúne táávere andáámpaꞌo sese owanamó andáámpare paákáré kaweꞌó kwéintemba kentí sáwí-imayaa tuwéꞌa kawer-ímáyáá umái máéro.

²⁷ámáámba sen-kwáásíyé ámáán-kawaa-kwaasiye kaumbo-káér-ainkwara-kwaasimo éꞌa kárákwiyoro. kwaásimo maipímbó utámakaawanamo kaviraisasamó kwaási ímo awánaantemba kentirumpímbá mirá isaꞌá sáwíꞌa kwéowasa kwaási íma kwétuwanaawe. kwaásimo maipímbó utámakesamo kanaagunémo owasá awánésamo sésamo kaweꞌá kwéowe sentembá keinárawaꞌa tuwánésa kawe-kwáásímán-owe sembánivo kentirumpimbá mirá-sáwí-yántááꞌá kwáyáísaꞌa kaumbo-káér-ainkwara-kwaasiman-owe.

²⁹ámáámba sen-kwáásíyé ámáán-kawaa-kwaasiye kaumbo-káér-ainkwara-kwaasimo éꞌa kárákwiyoro. kentíkwáꞌná Áánútun-aai simátímakowai tínkamuwasa púwúwaꞌa utamátínkaraapaꞌa konaarirí kwéowe. arupí umái máyón-kwaasi tínkamuwasa púwúwaꞌa utamátínkaraapaꞌa konaarirí kwéeꞌa

³⁰séꞌa miwí tísaavutantamba uráawai séꞌa minkánáávímbó métaraiya kentáá síkwáꞌnámo uráantemba íma miráyá uráusino kwésewe.

³¹mirán-áímbó kwésembo maarán-áímbá séꞌa Áánútun-aai simátímakowai tínkamesa mirá-sáwíꞌá uráawai tírááta úne kwéseꞌa miwímó uráantemba mirá kwéowe.

³²kentíkwáꞌnámo uráantembo mirámó kwéeꞌa ánásanaaowe.

³³ánásanaaomba iyánkó póígon-araaꞌan-owe. Áánútu keinárawaꞌa aaivimbá matinkáínaꞌa sáwí-meyambo mayánááopaꞌa iramó kwégaipaꞌa tuꞌmaáꞌnámo ímo kwáyáipaꞌa kónááowe.

³⁴miráumai kesáái simátimenaaowaiye agaráátinkanaaowaiye kawer-ímáyáágwárá-kwáásíyé tiꞌmáráanasa keinárawapimba kwénaaiyaꞌa évakarawai tínkamiyasa puwíyaꞌa évakarawai taairaꞌá tínkamiyasa puwíyaꞌa évakarawai kentí monoꞌ-náúmpímpáꞌá taándéí tínkameꞌa moórá-mora-naopimpaꞌo kwénaaiyaꞌo éꞌa tiꞌmátuꞌmaeꞌa naaónááowe.

³⁵mirámó íyana arupí-kwaasimo tínkamom-beyamba amáparawaiti meéyámbá kentópaꞌa tíníye. aivaꞌó tuvúwanamo pukáin-kwaasigo áwíꞌa Épeo naaémba moóráwai Pérékaya ááninko áwíꞌa Sékáraya anóm-bonoꞌ-naumpaꞌa máyowana moórá-ayampaꞌa Áánútuntavesamo ísámaimo póímo tuvúꞌmáímo agáyáan-onta-tarei kwáyowana moórá-ayampaꞌa aivaꞌ-mónó-káwáánákówé suꞌmai iyún-ontama kwáyowana avumpimbá Sékáraya umáyowasa túvúwana pukáiye.

³⁶minkáé-kwáásíráítí avumpimbó agairáan-kwaasi tínkamuwasa pukáawaigwaraꞌa miwítí sáwí-meyamba ívéꞌo máyáan-kwaasi mayánááowe Ísu siráiye. Ísu arumbá umátínkarain-kwasai.

³⁷Ísu mináímbá simátímatuwena Yérúsaremu-naopaken-kwaasi arumbá umátinkena séna Yérúsaremu-naopaken-kwaasiyono. Áánútun-aai simátímakowai tínkambaeꞌa kwéiyuwasa pukáawe. Áánútu tiꞌmarówasa kurówai óntantamba tínkambaeꞌa kwéiyuwasa pukáawe. kokórigomo áráátombo ayóí-ándámpáꞌó tínkarenamo káátamatinkaintemba aasiyaasi-táwai kemá mirá ónaumne kwésundanivo tínaaemba kwéumasimewe.

³⁸ísáaro. Áánútu tiyuwáínaꞌa tuꞌnankáámbá ónááowe.

³⁹simátimeꞌa séꞌa íma úwoi suwánanaaovo naaémbo séꞌo Áánútu aiꞌmáráísana kunkáiwaimba Áánútu kaweꞌá kwéumankaiye síyankaꞌa moórágwaraꞌa suwánanaaowe Ísu siráiye.