Read Kosena Mátíyu 25 Bible Online

Mátíyu 25 - Kosena bible

Mátíyu 25

¹Ísu mináímbá simásuwena aaraimó kwémayaawainá ááimba imáyáa éna séna naaén-kanaamo tínímba Áánútu kwená kwaásimo kawááin-aimba maarán-áímbán-iye. aaraimó mayáníwaimba toómbá náíyanesa siyáánkai-inaamaru oómbá kúraꞌmaesa aampakémbá koáíkaawe.

²minárásíyómbá évaꞌaasei sáwí-imayaagwaraꞌa owasá évaꞌaasei kawer-ímáyáágwáráꞌá owasá

³sáwí-imayaagwarar-arasi oómbá kúraresa óꞌon-anaveumpimba iramó kánín-domba íma atíyoraawasa

⁴kawer-ímáyáágwárár-árásí oómbá kúraresa óꞌon-anaveumpinkwaraꞌa iramó kánín-domba atíyoresa

⁵aaraimó mayáníwaimba koamuꞌmakáawana íma ááéma tisasá túgávaaꞌa isasá tuún-kwaiguráawe.

⁶tuún-kwáyáawana noꞌwáán-avuntamba moóráwai aayamái séna kwétivo koairánáisaiye sisasá

⁷misíyáánkáí-árásí usásinesa oómbá toꞌmaésa kombá

⁸sáwí-imayaagwarar-arasi kawer-ímáyáágwárár-árásíyávésa sésa kentáásí iramá pisinánívo nombá atísimero sewasá

⁹kesáágwáráꞌá miráumai kwéanasaivo nombó atíyén-daumpakemba komeéyámbáráaro sewasá

¹⁰kwégowana aaraimó mayáníwai tisasá évaꞌaasei-arasi toꞌmayaan-umai máyáawai kwesé toómbó náíyanesa naaúmpaꞌa íyówana

¹¹onta umásúwáísasa minéváꞌááséí-árásí nombó atiyénáesamo kówai tésa anónkaꞌa sésa anóndakoo onta tisinkaaó sewaná

¹²íma awánáúnda-arasi ombá póꞌa íma onta titinkánaumne siráiye.

¹³Ísu simásuwena séna miráumai kemó kúmónda-kanaa íma ísarenkaꞌa kumónaumpo kárákwimai máéro Ísu siráiye. kaumbo-máyáí-kwáásítí kwaasái.

¹⁴Ísu mináímbá simásuwena séna naaén-kanaamo tínímba Áánútu kwená kwaásimo kawááin-aimba maarán-áímbán-iye. moórá-anondako némpaꞌa kwááyu koménae séna éna kwená mayáí-kwáásí tááyena séna kesí óntankaꞌa kárákwiyoro séna

¹⁵moóráwai kwená mayáí kaweꞌ-máyáí máyáísana awánaiwaintavena séna kesí óntamba évaꞌaasei-unamba kárákwiyuwo séna aména moóráwai kwená mayáí sáwíyankaꞌa kaweꞌ-máyáí máyáiwaintavena séna kesí óntamba kaer-únámbá kárákwiyuwo séna aména moóráwai kwená mayáí sáwíyam-bayai máyáiwaintavena séna kesí ónamba moórá-unamba kárákwiyuwo séna aména tiyuwéna námpaꞌ-maravaꞌa kówisana

¹⁶évaꞌaasei-unan-ontamba mairáiwai minóntándéí mayáí maimaé kwégwena óꞌomba évaꞌaasei-unan-ontamba máyáísana

¹⁷moóráwai kaer-únán-óntámbá mairáiwai minóntándéí mayáí kwémaena óꞌomba kaer-únámbá máyáísana

¹⁸moóráwai moórá-unan-ontamba mairáiwai minóntándéí íma mayáí maéna úwoi maravímbá utámakaiye.

¹⁹utámakaisasa mirá kwéowana miwítí anóndako ayáátáákaꞌa kuróm-bapaꞌa miváꞌá ména naaémba téna kwááyumo tímakaunda-ontamba torupamái awánanae séna tááyaisasa

²⁰tésa évaꞌaasei-unan-ontamba mairáiwai maimaéna máagaraarankena séna évaꞌaasei-unan-ontambo símakaandavinkemba mayáí kwémaeꞌa óꞌomba évaꞌaasei-unan-ontamba mairáumne sisaná

²¹anóndako séna kesí mayáí-kwáásígó kaweꞌá óne. kentávémo imáyáamo émo sáwíyan-tantaakaꞌo kaweꞌó umáímo kárákwiraandantemba sáwíva-tantaakaꞌa kárákwiyiniyone. kesirunkómó aamoimó intembá kesé taménana enarunkó aamoí íno sisaná

²²kaer-únán-óntámbá mairáiwai maimaéna máagaraarankena séna kaer-únán-óntámbó símakaandavinkemba mayáí kwémaeꞌa óꞌomba kaer-únán-óntámbá mairáumne sisaná

²³anóndako séna kesí mayáí-kwáásígó kaweꞌá óne. kentávémo imáyáamo émo sáwíyan-tantaakaꞌo kaweꞌó umáímo kárákwiraandantemba sáwíva-tantaakaꞌa kárákwiyiniyone. kesirunkómó aamoimó intembá kesé taménana enarunkó aamoí íno sisaná

²⁴moórá-unan-ontamba mairáiwai maimaéna máagaraarankena séna emá asirayán-kwáásí éma óꞌowiti mayáívínkémbá toómbá kwéne óꞌowiti kígaurakemba úwoi kwénaae kwémandaanaꞌa

²⁵enáároi inkaiséꞌa ená óntandei mayáí íma mayáúnda úwoi aúpáꞌá makáunda po ená óntamba mayáníyone sisaná

²⁶anóndako séna sáwí-mayai-kwaasigo kavóná-kwaasi po kentávémo sémo óꞌowiti mayáívínkémbá toómbá kwéne óꞌowiti kígaurakemba úwoi kwénaae kwémandaanaꞌa óne sénda po

²⁷kesí óntambo amápa-kwaasiti óntambo máráan-daumpaꞌo makáandarakai tiréꞌa kesí óntankwara aaꞌwáá-ontankwaraꞌa mayáúsino séna

²⁸kwená mayáí-kwáásíyávéna séna minóntámbá mairéꞌa siyáánkai-unan-ontambo tokáiwaimba áméro.

²⁹sáwíva-tantaakaꞌo kaweꞌó umáímo kárákwisinkaiwaimba moórá-mora-yantaaꞌa áménana kárákwisinkanivo ímo kaweꞌó umáímo kárákwisinkaindawaimpakemba makáimba máyáanaꞌa

³⁰misáwí-máyáí-kwáásígómbá áíꞌmaeꞌa máápaꞌa móru auwáíyana túnkwi-ayampaꞌa tíꞌo kwéisasamo iviꞌó kwétesamo túwááyambo akévundaresamo máyáapaꞌa kwíníye siráiye Ísu siráiye. Ísu máyáawaina ááintavena tísaa ínín-kwasai.

³¹Ísu mináímbá simásuwena séna kemá kwaási úrandako naaémba kúmóndaraꞌa ságayankwara kwíyómpaken-kwayoꞌnarawakwaraꞌa kárákwiraundawai póꞌa kúmónasa

³²amápaꞌ-maravaken-kwaasi kesúrankaꞌa torupamái máyaiyaꞌa sipisípi-poiye méme-poiraremo kárákwiraiwaimo taaímbaraintemba minkwáásíyómbá miráumai taaímbakeꞌa

³³évakarawai siyáánúrapaꞌa mótinkeꞌa évakarawai siyáánepaꞌa métinkeꞌa

³⁴kárákwiraundawai siyáánúrapaꞌo maíyan-kwaasiyaveꞌa séꞌa kesivo kaweꞌá umátínkáiwain-owe. Áánútu maramó taróruronkaꞌa kentí imáyáa éna kentí maruꞌá toꞌmayaa úmakaivo miváꞌá tamáéro.

³⁵kaweꞌá umásinkeꞌa kembó sááimo sinkómbo toómbá siméꞌa nombá siméꞌa óꞌom-bapaken-kwaasimo ówánda aamoí umásinkeꞌa kentí naaúmpaꞌa mógwésinkeꞌa

³⁶unáánkwátói-iyaaimbo ówánda kwésimeꞌa síꞌo úmba kwégarakwiyeꞌa ándávaꞌo maéwánda kwésuwaꞌnaa-eꞌa mirá umásínkaraawe. mirán-áímbá senasá

³⁷arupí umái máyáawai sísaa esa sésa Ísóigo nósa-tawaiya embó ááimo ankómba toóné noné améta

³⁸nósa-tawaiya óꞌom-bapaken-kwaasiraambo undá aamoí umánketa kentáásí naaúmpaꞌa móanketa nósa-tawaiya unáánkwátói-iyaaimbo undá améta

³⁹nósa-tawaiya áíꞌo úmba áwaꞌnaa eta nósa-tawaiya ándávaꞌo maúnda áwaꞌnaa uráumno síyaꞌa

⁴⁰kárákwiraundawai séꞌa áraiꞌa simátimeꞌa séꞌa kesí kwaási úwoi-kwaasi miráumaimo túwaꞌnaa uráamba mindá kembán-iye simátimenaumne.

⁴¹mirá simátímatuweꞌa siyáánepaꞌo maíyan-kwaasiyaveꞌa séꞌa Áánútu sáwíꞌa umátinkaniwain-ovo siyuwéꞌa kóro. Áánútu Sáátáánigone kwená kwayóꞌnáraware imáyáa éna anón-irama toꞌmayaa umátínkaraisana kaíkaiꞌa éna íma pisínáípaꞌa miváꞌá komáéro.

⁴²kembó sááimo sinkómbo toóné noné íma siméꞌa

⁴³óꞌom-bapaken-kwaasimo ówánda íma aamoí umásinkeꞌa kentí naaúmpaꞌa íma mósinkeꞌa unáánkwátói-iyaaimbo ówánda íma siméꞌa síꞌo úmba íma súwaꞌnaa eꞌa ándávaꞌo maéwánda íma súwaꞌnaa eꞌa mirá umásínkaraawe. mirán-áímbá senasá

⁴⁴sísaa esa sésa Ísóigo nósa-tawaiya embó ááimo ankómba toóné noné íma améta nósa-tawaiya óꞌom-bapaken-kwaasiraambo undá íma aamoí umánketa kentáásí naaúmpaꞌa íma móanketa nósa-tawaiya unáánkwátói-iyaaimbo undá íma améta nósa-tawaiya áíꞌo úmba íma áwaꞌnaa eta nósa-tawaiya ándávaꞌo maúnda íma áwaꞌnaa uráumno síyaꞌa

⁴⁵kemá séꞌa áraiꞌa simátimeꞌa séꞌa kesí kwaási úwoi-kwaasi íma túwaꞌnaa uráamba mindá kembán-iye simátimenaumne.

⁴⁶mirán-áímbá simátímatuweꞌa aaí senasá miwítí sáwí-meyambo ímo ánásenamo kwaíkwaiꞌo ínín-ayampaꞌa komaíꞌmaiꞌa ónááovo arupí umái máyáawai aúnáiꞌa umái maíꞌmaiꞌa ónááowe Ísu siráiye.