Read Kosena Mátíyu 26 Bible Online

Mátíyu 26 - Kosena bible

Mátíyu 26

¹Ísu minóꞌón-óꞌón-áímbá kwená kwayó-kwáásíyávéna simátímakaiye. naaóváꞌó Áánútu Yútaa-kwaasi tíyótaasa í-tánón-kánáá imáyáa éna séna kaeꞌ-nóꞌwáámbá kwaésa tíyótaasa í-tánón-kánáá tínímba kembá tátoꞌmai taairaꞌá sínkamiyaꞌa puwónaumne Ísu kwená kwayó-kwáásíyávéna simátímakaiye.

³simátimuwasa mono-káwáá-kwáásíyé Yútaa-anon-kwaasiye aivaꞌ-mónó-káwáánákó áwíꞌa Káyavaasina naaúmpaꞌa torupamái mésa

⁴sésa nóraumaiya aúpáꞌá Ísumba tátoꞌmai inkamónaundayaꞌiyo.

⁵amápa-kwaasi ááiꞌa tíyáávainivo tanómbo kauvíyan-kanaaraꞌa íma tuvuwónaumne siráawe. Ísumba áséi-masawemba pérankarain-kwasai.

⁶suwaná Ísu Pétáni-naopaꞌa koména moóráwai áwíꞌa Sáímonina naaúmpaꞌa áúma kárúkokovaaꞌa uréna ánásarowaina naaúmpaꞌa ména toómbá kwénowana

⁷moórá-ininko iyéna áséi-kwiyumba úm-basawemba anón-ontankakemba meéyámbakaim-basawemba maimaéna iyúmba Ísu aꞌnómpímbá atímarowasa

⁸kwená kwayó-kwáásí awánésa áwááꞌa sésa nóra séna mimbásáwémbá úwoi atíyankaiyo.

⁹mimbásáwémbó óꞌowimo timénamo anón-ontambo mairénamo ímo óísambo makáan-kwaasi tíméraambaniye suwaná

¹⁰Ísu iséna ivátuweꞌa íma áwááꞌa aééro. kaweꞌá umái pésinkaiye.

¹¹ímo óísambo máráan-kwaasi keséma maíꞌmaiꞌa kwéiyaꞌa túwaꞌnaa ónáe séꞌa túwaꞌnaa ónááombanivo kemá keséma marapáꞌá íma maíꞌmaiꞌa ónaumne.

¹²púwóndaraꞌa masawémba pésinkesa utamásinkanaaovo minínínkó áꞌa masawémba pésinkaiye.

¹³áraiꞌa súmpo maísáaro. kesí áséi-aimba amápaꞌ-mapaꞌa kwésimatimesa minínínkómó umásinkain-aimba kwésimatimiyasa táákaꞌa maránááowe Ísu siráiye. Yútási Ísuna kuntaruꞌá mairáin-kwasai.

¹⁴súwana Ísuna kwayó-kwáásí sísamaivakemba kaeꞌá kumbaimái-kwaasivinkemba moóráwai áwíꞌa Yútási moórá-awiꞌa Isakéríóti mono-káwáá-kwáásítópaꞌa kwéna

¹⁵séna Ísumbo tátoraiyantavaimo agaráátínkáanaꞌo éꞌa nóraumai-meyana siménááoo súwasa moórá-kwaai aíyayaan-umai siyáánkai-ontamba 30 ontamba táámpamai ámúwana Yútási maimaéna

¹⁶kwéna nóraumai Ísumba agaráátínkáanasa tátoranaao-imayaa ááimba ásámai uráiye. tíyótaasa í-tánómbá kauráan-kwasai.

¹⁷Yútaa-kwaasi ímo intóráin-tantaakwara-pereti kwéagayon-kanaa aiva-táwai túntemba kwená kwayó-kwáásí Ísumba taáísaa esa sésa náávara tíyótaasa í-tánómbá kogauvónaundayaꞌiyo suwaná

¹⁸Ísu séna Yérúsaremu-naopaꞌa kwékai moórá-kwaasigontavekai sékai kentáásí anóndako séna kesí kanaamá tisatá kesí kwayó-kwáásíyé ená naaúmpaꞌa tíyótaasa í-tánómbá nánaumne kwésiye kosimámékaiyo súwasarai

¹⁹Ísumo súntemba mirá ésarai minkáꞌá tanómba mágauwankaraaiye.

²⁰tanómba mágaumakoyasa enónkaꞌa Ísu kwená kwayó-kwáásíyé kwésa mindáúmpáꞌá umésa

²¹toómbá kwémandesa uwaná Ísu séna keinárawapinkemba moóráwai kembá namuro-kwáásíráꞌá agaráátinkaniye súwana

²²tirunkó umbaí tówasa moórá-mora-umai áísaa esa sésa Ísóigoo kewáꞌiyo sinté kuwaná

²³Ísu séna moóráwai kwená toón-ayai maimaéna kesé moórá-taavepimba tuꞌmái náíndawai kwemá kembó namuro-kwáásíráꞌó agaráátinkaniwaiman-iye.

²⁴naaóváꞌá Áánútun-aai aúváívimba agaimaréna séna kwaási úrandako puwíníye siráintemba póꞌa púwónana namuro-kwáásíráꞌó agaráátinkaniwai sáwí-meyamba mayáníye. kwembó ímo maránkaraankakaankasi kaweꞌá isinó Ísu súwana

²⁵Yútási kwembó agaráátinkaniwai séna anóndakoo kentáváíyá kwéseno súwana Ísu séna áꞌa séne siráiye. Ísu kwená kwayó-kwáásí toómbá tímakain-kwasai.

²⁶súwasa toómbá kwénowana Ísu péréti maisoréna Áánútumpaꞌa súwi séna topámbai kwená kwayó-kwáásí tímatuwena séna mindá kesúman-ivo maimái naaró séna

²⁷ándá-aran-dombo kwáyon-anaveumba maisoréna Áánútumpaꞌa súwi séna tiména séna amáparawai naaró.

²⁸mindá kesí naaemán-iye. kesí naaemá sáwívarawaiyavena kumínímba póna Áánútu sáwí-imayaa maitiyuwéna séna kesé tarúmai máyáawe séna mináúná-áímbá simái tarúmakaiye.

²⁹simátimeꞌa séꞌa ókwaraꞌa ándá-aran-domba íma nánaumpo kesivo kwená kwaásimo kwégawaaipaꞌa kesé ménaaomba ándá-aran-domba aúná-nomba nánaumne Ísu súwasa

³⁰Áánútuntavesa ísámai monor-ímá simásuwesa mindáúmpáꞌá tuwésa Óríve-omapaꞌa iráawe. Pítaa ánaaemba umásinkaniye siráin-kwasai.

³¹Óríve-omapaꞌa umáyówana Ísu simátimena séna Áánútun-aai aúváívimba agaimaréna séna Áánútu sénasipisípiraꞌo kawááiwaimba tuvúwónana puwínasasipisípiyomba kóyáwé ónááowe Áánútu siráiye siráimba póna ívéꞌ-noꞌwaamba tááꞌa káínaꞌa siyuwéꞌa kóyáwé ónááowe.

³²ánivo púwónasa utamásinkaiyaꞌa usásineꞌa kentí aivaꞌá Káríri-ayampaꞌa konaꞌá kesínaaemba kónááowe Ísu súwana

³³Pítaa séna amáparawai auwésa kóyáwé íyambanivo kemá íma mirá ónaumne súwana

³⁴Ísu séna áraiꞌa simámeꞌa séꞌa ívéꞌ-noꞌwaamba kokórigo íma áái siráindaraꞌa emá kaumboráꞌá kentáváí se íma awánáúnda-kwaasiye síníyone Ísu Pítaantavena súwana

³⁵Pítaa séna entémo sínkamonae íyaꞌo éꞌa íma auwéꞌa kónaumne súwasa kwená kwayó-kwáásí amápaꞌa mirá simásaraawe. Ísu Kétésémanivaꞌa námúnaa siráin-kwasai.

³⁶amápaꞌa mirá simásuwesa Ísuwe kwená kwayó-kwáásíyé taai-kanáágúnéyómbá áwíꞌá Kétésémanivaꞌa komésa Ísu simátimena séna mankáꞌá máyaiyaꞌa Áánútumpaꞌa námúnaa kosénaumne séna

³⁷Pítaawe Sépéti ááninkaiye tíꞌmaena komáyowana umbai-yántáákómá arumbá sáwíꞌa kwéuwana

³⁸simátimena séna kesirunkómá umbaiyé taisaꞌá póꞌa puwóraꞌnaraamba umái máyaumne. maankáꞌá méꞌa kesé kárákwimai máéro séna

³⁹tiyuwéna egwaaꞌá kwéna Áánútu anóndaꞌan-iye séna maraꞌá kumbaéna námúnaavinkemba séna kesivoó emó kanaán-iye sémo e maanúmbáí-yántááꞌó kesópaꞌo tínímba maisiyuwéma ánivo kesí imáyáa íma kwarénaꞌa ená imáyáa kwáráano Ísu siráiye.

⁴⁰Ísu námúnaa simásuwena kwená kwayó-kwáásíráútópaꞌa téna tayuwánómba tuún-kwaigurówana tayúsena Pítaantavena séna íma kanaaráꞌá sáwíyankaꞌa kesé kárákwimai máyáane.

⁴¹Sáátáánigo tísaa umai isánáe-aimba kentópaꞌa síyáváínivo Áánútumpaꞌa námúnaa seró. imáyáago kató isaná áúgomo umbaimó taimbá mindá áúgávaaꞌa kwéiye simásuwena

⁴²moórágwaraꞌa tiyuwéna egwaaꞌá kwéna Áánútumpaꞌa námúnaavinkemba séna minúmbáí-yántááꞌá enópaꞌa úwoi tíníyemo sinaꞌó éꞌa emó sindantembá mirá ónaumne siráiye.

⁴³Ísu námúnaa kosimásuwena kwená kwayó-kwáásíráútópaꞌa téna tayuwánómba tuún-kwaigurésa túgávaate kwéuwana

⁴⁴moórágwaraꞌa tiyuwéna egwaaꞌá kwéna kéꞌnaamba námúnaa kosimásuwena koyauweréna

⁴⁵minkáúmbónárauyavena séna tuúmó kwaiguréꞌo máyáamba kemá kwaási úrandakomba sáwíꞌo kwéon-kwaasiraꞌa agaráátinkainasa tátoranaaon-kanaa kwétivo

⁴⁶usásinewata kwétiyapata konó. kembó agaráátinkaniwai kwétiye Ísu siráiye. Ísumba tátokaan-kwasai.

⁴⁷Ísu mináímbá kwésuwana kwená kwayó-kwáásí sísamaivakemba kaeꞌá kumbaimái-kwaasivinkemba moóráwai áwíꞌa Yútási túmba kwesé sáwíva-kwaasi taánasatagwara ánáyatankwaraꞌa maimaésa tumbá mono-káwáá-kwáásíyé Yútaa-anon-kwaasiye miwímá tiꞌmárówasa tumbá

⁴⁸ááéma Yútási Ísumbo agaráátinkaintavena simátimena séna paruvará umánkáandawaimba tátoraaro siráimba

⁴⁹póna Yútási Ísunopaꞌa téna séna anóndakoo máyaano kwésena paruvará kwéumankowana

⁵⁰Ísu séna kesí kwaásiyo ónáe sindáíꞌa uwó súwasa kwesémo tuwáí Ísumba tátórówana

⁵¹Ísuna kwayó-kwáásívínkémbá moóráwai taánasatama ámúrandavinkemba taúꞌmaena aivaꞌ-mónó-káwáánákóná kwayó-kwáásígó ááꞌa agáúsuwowana

⁵²Ísu kwentávéna séna ená taánasatama ámúrandavimba kwiyuwó. taánasataneimo tínkamiyan-kwaasi anondámo ésa taánasatanei tínkamiyasa puwónááowe.

⁵³maaráyávéꞌa imáyáa oró. kesivontávéꞌo séꞌo súwaꞌnaa uwómó senanamó éna kwíyómpaken-kwayoꞌnarawaꞌa sáwívarawai íma kanaán-umai táámpanaaowai avekáámbá tiꞌmaráínasa súwaꞌnaa ónááowe.

⁵⁴mirámó súndarakai Áánútun-aai aúváívimba agaimakáin-umbai-yantaaꞌa kesópaꞌa íma tisinó. ánivo siráintemba miráumai paáriniye Ísu siráiye.

⁵⁵Ísu mináímbá simásuwena tun-kwáásíyávéna séna kentávéꞌa umóyán-kwáásímán-iye séꞌa póꞌa taánasatagwara ánáyatankwaraꞌa maimaéꞌa kembá tátoranae séꞌa kwétewe. sáwíva-tawai anóm-bonoꞌ-naumpaꞌa kesáái kwésimatimundaraꞌa íma kembá tátokaawe.

⁵⁶naaóváꞌá Áánútun-aai simátímakowai aúváívimba agaimakáan-aimba kembó mirámó umásínkéneꞌa kwétewe súwasa kwená kwayó-kwáásí amápaꞌa inkaisésa auwésa kóyáwé uráawe. anón-kwaasi Ísumba aaí simánkaraan-kwasai.

⁵⁷kwená kwayó-kwáásí auwésa kuwasá Ísumba tátorowai áíꞌmaesa aivaꞌ-mónó-káwáánákó áwíꞌa Káyavaasina naaúmpaꞌa móankesa mindáúmpáꞌá ámáámba sun-kwáásíyé Yútaa-anon-kwaasiye torupamái máyón-daumpaꞌa móankowana

⁵⁸Pítaa tínaaemba nénkaꞌa teémáyomba aivaꞌ-mónó-káwáánákóná máápar-ontavinkemba iréna naamaúvaꞌa ména Ísun-aneꞌo paáríndamo awánáíndayavena i-kwáásíyé méraiye.

⁵⁹Pítaa máyowasa mono-káwáá-kwáásíyé Yútaa-anon-kwaasiye amáparawai Ísumba tuvuwíyana puwíní-ainkona ááimba avakáá-uwana

⁶⁰íma kwáyowasa Ísuntavesa mósi-mesi-aimba sésa íma moórá-aimba suwasaráí kae-kwáásígóráí usásinesarai

⁶¹kampaꞌá sésarai kwemó sisatáámó isáúndaya anóm-bonoꞌ-namba Áánútuna naambá kanaán-umai tawísíyuweꞌa kaumbo-táwai maisuwéꞌa ónaumne siráiye suyaná

⁶²aivaꞌ-mónó-káwáánákó usásinena Ísumba áísaa ena séna mindáraimo simánkaayan-aimba anondá íya síníyono súwana

⁶³Ísu iséna íma aaí súwana aivaꞌ-mónó-káwáánákó séna Áánútu asirayánkwáráwáí aúrankaꞌa mé áísaa onda-áímbá árair-aine suꞌmai simásimiyo. Áánútumo usásinankaiwai Káráísiti Áánútu ááninkowaꞌonompo simásimiyo súwana

⁶⁴Ísu séna áꞌa sémpo simátimeꞌa séꞌa naaémba suwánáínaꞌa kemá kwaási úrandako Áánútu asirayáwáíná ayáánúrapaꞌa asirayán-áyámpáꞌá uméꞌa ainámpímbá kumónaumne Ísu súwana

⁶⁵aivaꞌ-mónó-káwáánákó arumbá sáwíꞌa kwéuwana kwená unáánkwátói tarátuwena séna Áánútumba akáꞌáámba simánkena kwesáváí simbá póta mináíntávéta aaivimbá mayankéta óꞌon-aimbo simánkáamba avakáá únda póta ivátá tuwéta Áánútumbo simáímo sáwíꞌo umánkáintaveta

⁶⁶nóraya ónaumno súwasa sáwíꞌan-ivo tuvuwíyana puwíno sésa

⁶⁷Ísumba tuwirááíma kwirankésa tuvuwésa tiyáándei tuvúwún-kwaasi

⁶⁸akáꞌáámba sésa esáváí se Áánútu usásisinkaiwai úne séndawai ómpo kemá nááwa kwétuvuwuna simásimiyo siráawe. Pítaa íma awánáúnda-kwaasiye siráin-kwasai.

⁶⁹Pítaa naamaúvaꞌa máyowana aivaꞌ-mónó-káwáánákóná kwayór-árásígó awánéna kwenópaꞌa téna séna Káríri-ayampakewaise maéndawai óne súwana

⁷⁰Pítaa amáparawai túrankaꞌa séna emó sénda-aimba sáákoma íma kaweꞌán-iye simásuwena

⁷¹máápar-ontavimba komáyowana óꞌomba kwayór-ínáámárúgó awánéna máyón-kwaasiyavena séna minkwáásígómá Ísu Násáreti-naopakewaiye maíwaiman-iye súwana

⁷²Pítaa aikaꞌá maréna séna íma awánáúnda-kwaasiman-iye simásuwena máyowasa

⁷³sáwíyankaꞌa máyómba Pítaanopaꞌa tésa sésa Ísuna kwayó-kwáásí mirán-kwáásí máyáawata awánemayaundantenkaan-kwaasiraamba éma mináyámpákén-kwáásí tááiraamba kwésene suwaná

⁷⁴Pítaa séna kampar-áímbó kwésenanamo éna Áánútu sínkaminiye. síyawaimba íma awánáúndanaꞌan-iye kwésuwana kokórigoma áái súwana

⁷⁵Pítaa Ísumo simámun-aimba áákaꞌa maréna mirá siráinkaꞌa kokórigomo ááimo ímo siráindaraꞌa emá kaumboráꞌá kentáváí se íma awánáúnda-kwaasiman-iye síníyone siráimba mináímbá áákaꞌa maréna máápaꞌa kuména ávááraumai iviꞌá taráiye.