Read Kosena Mátíyu 27 Bible Online

Mátíyu 27 - Kosena bible

Mátíyu 27

¹iviꞌá tówasa aaváúmá usónkaꞌa mono-káwáá-kwáásíyé Yútaa-anon-kwaasiye Ísumbo tuvuwíyanamo puwínín-aimba mimbórá-áímbá símaresa

²Ísumba ayáánkaꞌa asááúmaresa áíꞌmaesa Árómáani-kamaani-kawaanako áwíꞌa Páírátinopaꞌa máankaraawe. Yútási pukáin-kwasai.

³Páírátinopaꞌa máánkarowana Yútási Ísuna kuntaruꞌá mairówai Ísumbo tuvuwónááomba awánéna séna ímo mirá oráámbá kemá sáwíꞌa úne séna kuntaruꞌó ésamo ámakon-ontamba 30 ontamba maimaéna mono-káwáá-kwáásíyé Yútaa-anon-kwaasiye miwítopaꞌa kwéna séna

⁴íma sáwíꞌa uráin-kwaasi agaráátinkaunaꞌa tuvuwónáeꞌa kwéomba kemá mindá sáwíꞌa úne súwasa miwí sésa íma kendéíyáán-ivo endéímán-iye suwaná

⁵Yútási minóntámbá anóm-bonoꞌ-naumpaꞌa metuwéna tiyuwéna ánda maimaéna ándákwamba varáiye.

⁶Yútási minóntámbá anóm-bonoꞌ-naumpaꞌa metuwówasa mono-káwáá-kwáásí maésa sésa maanóntámbá kuntarur-óntámbá póta amápa-kwaasimo Áánútuntavesamo imáyáamo ésamo máráan-ontampimbo máráandaya kentáásí monor-ámáámbá karánaumne simásuwesa

⁷minóntánkón-áái kwésesa mimbórá-áímbá sésa minóntándéí moórá-marama saweimó kwéom-barama meéyámbakaanasaya mimbárávímbá óꞌom-baravaken-kwaasi puwíyan-kwaasi utanááowe siráawe.

⁸mirá uráantavesa mimbáráyávésa sésa kuntaruꞌ-márámán-iye siráawasa ívékwaraꞌa mirá kwésewe.

⁹mono-káwáá-kwáásí mirán-áímbá kwésesa mimbárámá meéyámbakaamba Áánútun-aai simátímakowai áwíꞌa Yérémayamo siráin-aimba paáruraiye. Yérémaya sénaÍsareri aísaavutantamba uráawai évakarawai mimbórá-áímbá sésa moóráwaimbo kuntaruꞌó ónááon-ontamba 30 ontamba maimaésa

¹⁰saweimó kwéom-barama meéyámbakaamba Ísóigo simásímakaintemba mirá ónááowe Yérémaya siráimba pósa mirá uráawe. Páíráti Ísumba áísaa uráin-kwasai.

¹¹Ísumba Árómáani-kamaani-kawaanakonopaꞌa máánkówana kwenaúrankaꞌa máyowana áísaa ena séna Yútaa-kwaasiti kawáánárá oónó súwana Ísu séna áꞌa séne súwasa

¹²mono-káwáá-kwáásíyé Yútaa-anon-kwaasiye óꞌon-oꞌon-aintavesa aaivimbá mayánkówana Ísu iséna íma aaí súwana

¹³Páíráti Ísumba áísaa ena séna sáwívar-aimba kwésimankaavo íya kwéisaano súwana

¹⁴Ísu iséna amápar-aintavena íma anondá aaí súwana kámááni-kawaanaꞌa Páráíti sáwívar-imayaa uráiye. Ísumba arááꞌa tuvúwóro siráin-kwasai.

¹⁵naaóváꞌá Áánútu Yútaa-kwaasi tíyótaasa í-tánón-kánáá tóyo úntemba Árómáani-kamaani-kawaanako séna amáparawai torupamái mésa aamoí ésa ándávaꞌo máyáin-kwaasi áwíꞌa tewaꞌá ayúrankanaumne séna minkánáá miráumai ándá-kwaasi kwéayurankaiye.

¹⁶Ísumba Páírátinopaꞌa máánkónkaꞌa moóráwai áwíꞌa Párápási amáparawai kwenáái ísarowai ándávaꞌa máyowasa

¹⁷sáwíva-kwaasi torupamái máyówana Páíráti tísaa ena séna ándávaꞌo máyáan-kwaasivinkemba moóráwai áwíꞌa tewaꞌá ayúránkáano. Párápásiyaꞌi. Ísu Áánútumo usásinankaiwaiye kwésewainaꞌiyo séna

¹⁸Páíráti imáyáa éna séna mono-káwáá-kwáásí Ísuntavesa íma anón-kwaasi-iꞌa ínkwáe sésa tátoꞌmaesa kesópaꞌa máankaraawe séna mináímbá tísaa uráiye.

¹⁹Páíráti mináímbá kwétisaa-ena aaimó ísón-daumpaꞌa máyowana awainínkó moóráwaimba aiꞌmarówana kwenópaꞌa téna séna enawainínkó séna noꞌwáámba kaaimbá awánáúnda minkwáásígó íma sáwíꞌa uráisana sirunkó umbaí kwétaivo íma aaivimbá mayankaaó siyé simámakaiye.

²⁰awainínkón-áái kwésimamumba mono-káwáá-kwáásíyé Yútaa-anon-kwaasiye úwoi-kwaasi sáwívarawai kwakwiyésa sésa Páírátintaveꞌa séꞌa Párápásimba ayúránkénasa Ísumba tuvuwíyana puwíno simáméro simátímúwana

²¹Páíráti moórágwaraꞌa tísaa ena séna minkáé-kwáásívínkémbá nááwana ayúrankanaumno súwasa miwí sésa Párápásimba ayúrankaao suwaná

²²Páíráti séna Ísumba Áánútumo usásinankaiwainemo sewáímbá nóra ónaumno súwasa amáparawai sésa taairaꞌá tuvuwíyana puwíno suwaná

²³Páíráti séna nóra-sawira uráinaꞌiyo súwasa anónkaꞌa sésa taairaꞌá tuvuwíyana puwíno símae iráawe.

²⁴mináímbá símae íyúwana Páíráti miwí táái íma kanaán-umai karánaumne-imayaa éna amáparawai ááiꞌa tíyáavo séna táávepimba nombá atímarena amáparawai túrankaꞌa umásítaiꞌa éna ayáámba sese éna séna mindákómó puwínín-umbai-yantaaꞌa kesiyáámpimba íma kwáyáivo kentiyáámpimba kwáyáiye súwasa

²⁵amáparawai sésa puwínata mimbéyámbá kentáásísaavutantambo ónááowaiseya mayánaumne suwaná

²⁶Páráíti Párápásimba ayúrankena i-kwáásí simátimuwasa Ísumba áwí-andanei áwírukuꞌnowana Páíráti séna áíꞌmai taairaꞌá tuvuwíyana puwíno séna Ísumba i-kwáásíráꞌá tímakaiye. i-kwáásí Ísumba simái sáwíꞌa uráan-kwasai.

²⁷Páíráti Ísumba kwená i-kwáásíráꞌá timúwasa áíꞌmaesa kámááni-kwaasiti naaúmpaꞌa móankesa amápar-i-kwaasi tááyowasa tamésa

²⁸kwená unáánkwátói ayúꞌmaesa naaeyanyán-únánkwátói anón-kwaasiti unáánkwátóiman-iye sésa Ísumba umánkesa

²⁹anón-kwaasiti kánumoꞌan-iye sésa áwí-andama owepamái Ísu aꞌnómpímbá kuvérankesa tááúmba ayáánúrapaꞌa torankésa kanaárááꞌa ankésa moórá-mora-umai kívairesa sésa Yútaa-kwaasiti kawáánáꞌá óne sésa

³⁰tuwirááíma kwirankésa ayáámpimbo toránkón-taumba mairésa aꞌnónkáꞌá tuvántoꞌna kwéesa

³¹kanaárááꞌa ánkáyuwesa naaeyayán-únánkwátói ayúꞌmaesa kwená unáánkwátói umánkesa tuvuwíyanamo puwíndavaꞌa áíꞌmaesa kuráawe. Ísumba arááꞌa tuvúkáan-kwasai.

³²i-kwáásí Ísumba áíꞌmaesa kumbá moóráwai Sáíríni-naopakewai áwíꞌa Sáímoni aampaꞌá kwétuwasa i-kwáásí tátoresa Ísumbo tuvuwónááon-taima áúgwaatarankesa sésa áwaꞌnaa umai tiyó suwaná mirá úwasa

³³kwésa moórá-marago áwíꞌa Kórígótaavaꞌa kwésa mináwíkóná ááimba aꞌnómayaampare supaꞌá kwésa

³⁴ándá-aran-domba mairésa áíꞌa ánásainkwae sésa ikaaꞌó vaí-yántááꞌá mimpímbá marésa Ísumba ámúwana óikaꞌa maꞌmai awánéna íma naráiye.

³⁵Ísu íma nówasa áíꞌmaesa taairaꞌá aíyayaampimba tuvúsúmaresa kwená unáánkwátói mayánáe sésa aávéiya kwétiyaananaya nááwa usáyaaitaindawai mayáníyo sésa mirá ésa

³⁶maraꞌá mésa Ísunkaꞌa kárákwiresa

³⁷Ísumbo tuvúwúwanamo puwún-ainkona ááimba aúváívimba agaimarésa sésa Ísu Yútaa-kwaasiti kawáánáꞌán-iye agaimarésa aꞌnónká-táíráꞌá mósá marésa

³⁸umóyántémo uyan-kwáásíráí tíꞌmaesa Ísumba évarevar-akwampaꞌa taairaꞌá tuvúsúmaresa maraꞌá mésa minkwáásíráꞌá kárákwirowasa

³⁹évakarawai tésa tiyáámba tóipimba áákesa timánáantataꞌa umánkesa akáꞌáámba simánkesa sésa

⁴⁰úwé emá séma anóm-bonoꞌ-namba tawísíyuweꞌa kaumbo-táwai maisuwéꞌa óꞌomba ónaumne siráampo Áánútu ááninkomo émo e esáváí enáúma áwaꞌnaa ema eyááríkaꞌa taairakémbá taútuwe marapáꞌá kumuwó siráawe.

⁴¹suwasá miráumai mono-káwáá-kwáásíyé ámáámba sun-kwáásíyé Yútaa-anon-kwaasiye kanaárááꞌa ankésa

⁴²sésa óꞌowi túwaꞌnaa ena kwesáváí kwenáúma íma kanaán-umai áwaꞌnaa íníye. Ísareri-kwaasiti kawáánáꞌá úne seémáyáimba póna áraiꞌo seémáyáindamo éna kweyááríkaꞌa taairakémbá kumínata awánéta séta áraiꞌa Áánútu áánimban-iye sénaumne.

⁴³Áánútuntaveꞌa asiramái máyaunda Áánútu áánimba úne seémáyáimba Áánútumo áwaꞌnaa ónáe sénaraai ívéꞌa áwaꞌnaa isinó suwasaráí

⁴⁴miwímó suntembá umóyántémo uyan-kwáásíráí évarevar-akwampaꞌa taairaꞌá tuvúsúmarowairai kanaárááꞌa Ísumba ánkaraaiye. Ísu pukáin-kwasai.

⁴⁵Ísumba kanaárááꞌa ánkówana kwáyáꞌwái amápaꞌ-mapaꞌa túnkwena auváúmá kaapa marówana túnkumba

⁴⁶Ísu anónkaꞌa Yútaa-kwaasi tááivinkemba séna eroi eroi rama sapakataniyemo sún-aimba maarán-áímbá séna Áánútu kesí Áánútuwo nóra séwa siyuwáánó súwasa

⁴⁷minkáꞌó máyón-kwaasi isésa évakarawai sésa naaóváꞌá Áánútun-aai simátímakaiwaimba Íráiyaamba kwéaayaiye suwaná

⁴⁸moóráwai isaaiséna paru-táyánáma maimaéna ándá-aran-domba ikaaꞌ-nómpímbá tuꞌmaéna oviyen-támayopimba kinúvaimena naínkwáe séna Ísu óikaꞌa mósá marówasa

⁴⁹évakarawai sésa Íráiyaama kuména áwaꞌnaa íni. íya áwaꞌnaa íníyo séta amuꞌmaréta máyaumne suwaná

⁵⁰Ísu moórágwaraꞌa anónkaꞌa kwésena avowa ayáámpimba kwenamambá toꞌmaréna pukáiye.

⁵¹Ísu puwúwana anóm-bonoꞌ-naumpaꞌa ampanta-óntámá úmakomba sanaan-áyáírákémbá utavááꞌmaena marapáꞌá móru taváákaar-umai kaesé umágúwana póna Áánútunopaꞌa iyónááon-amba kwiꞌmarówana anóm-barima tówana anón-ontantomba tawákaaꞌa kwéuwana

⁵²utámáróm-buri-aivimba awááumaron-ontamba akwákúwasa Áánútuna kwaási sáwívarawai pukómpinkemba usásinesa

⁵³utámáróm-buri-aivinkembausásine-mesa Ísu pukéna usásinon-tawai Yérúsaremu-naopaꞌa paárúwasa sáwívarawai awánaraawe.

⁵⁴Ísu puwúmba i-kwáásítí kawáánákówé kwená i-kwáásíyé Ísumbo kárákwimaresamo máyówai marímo tówanamo amápa-tantaaꞌo paárúmba awánésa ávááraumai táátavesa ésa sésa áraiꞌa kwemá Áánútu ááninkoman-iye siráawe.

⁵⁵mináímbá sumbá sáwívar-inimba awánanae sésa tumbá némpaꞌa tamésa awánara. miníníntómbá Káríri-ayampakembo Ísun-ánaaembo kwaꞌmaésamo áwaꞌnaa úmaesamo Yérúsaremuvaꞌo tiráan-inintompinkemba

⁵⁶moórá-inimba Mágátáraa-naopaken-ininko áwíꞌa Máríyaa úwana moórá-inimba Yémésinte Yósépinte tinówa áwíꞌa Máríyaa úwana moórá-inimba Sépéti ááninkai tinówa úwasa évakar-inintonkwaraꞌa tamésa awánaraawe. Ísumba utamánkaraan-kwasai.

⁵⁷miníníntómbá tamáyówana enónkaꞌa moóráwai óísankwarawai áwíꞌa Yósépi Árímátíyaa-naopakewai Ísun-aaiyavena áraire súwai

⁵⁸Páírátinopaꞌa téna séna Ísun-auma utánáivo simiyó súwana kwená i-kwáásíyávéna séna Ísun-auma maimái áméro súwasa mirá uwaná

⁵⁹Yósépi Ísun-auma tamaimái aúná-ampantavimba asááumai

⁶⁰maimaéna kemó púwónasamo utamásínkéne sénamo aúsámakon-ontam-buri-aivimba mámarena óikaꞌa anón-ontandei awááumasuwena kúwasarai

⁶¹Máríyaa Mágátáraa-naopaken-ininko úwana araámáó úwasarai maraꞌá mésarai Ísumbo utamánkóm-buri-aivimba karátuwesarai méraaiye. Páíráti utamánkáapaꞌa kárákwiyoro siráin-kwasai.

⁶²minínínkáí karáꞌmatuwesarai máyóyasa usá aaváyaavimba savaatiráꞌá mono-káwáá-kwáásíyé ámáán-kawaa-kwaasiye Páírátinopaꞌa tóyo ésa

⁶³sésa anóndakoo úwoimo aúvamai máyáinkaꞌa kampar-áíntémó siwáí séna kaumbo-táwai maisuwéꞌa púwóndavinkemba usásinanaumne siráimba ísaraundaya sáákaꞌa makáúndaya po

⁶⁴i-kwáásí tiꞌmárénasa kaumbo-táwai utámáráam-buri-aivimba kogárákwiresa awánaaro. kwená kwayó-kwáásí kwenáúma asímbaesa aúpáꞌá utámaresa sésa pukáimpinkemba usásinkaiye seváínivo. mirán-áímbó síyanamo éna minkámpár-áínkó ááémo siráin-kampar-ainkomba usáyaaitaivainivo suwaná

⁶⁵Páíráti séna kentí i-kwáásí tiꞌmáréwasa senteníꞌa umái mimbúrí-áívímbá kaweꞌá umái kárákwiyoro súwasa

⁶⁶kwésa kwaási murí-áívímbá usáveraavo sésa sanómbá maimaésa móaraapamaranae sésa kurésa mirá maúmaresa i-kwáásí mátiyuwesa kóuraawe.