Read Kosena Mátíyu 28 Bible Online

Mátíyu 28 - Kosena bible

Mátíyu 28

¹Yútaa-kwaasimo agándon-kanaa ánásowasarai sontaaráꞌá usá aaváyaavimba aaváúmá usónkaꞌa Máríyaa Mágátáraa-naopaken-ininko úwana araámáó úwasarai Ísumbo utamánkáapaꞌa koawánanae sésarai kuyambá

²anóm-barima tówana Ísóigona kwayóꞌnákó kwíyómpakemba kuména kwenóikakemba aaváúmó usénamo intembá kwéuwana kwená unáánkwátóirakemba ainánkómó intembá kwayáníꞌa kwégowana kuména murí-áigón-óikaꞌa makón-ontamba kunakwátuwena minóntánkáꞌá maraꞌá máyowana

⁴mimbúrí-áíráꞌó kárákwiyuwai ávááraumai tááꞌa kówasa tiyántámbá kwétowana tímáávomba kavúkuraiye.

⁵kárákwiyuwai mirá kwéuwasarai minkáér-ínímbá kuyaná kwíyómpakewai minínínkáí simátimena séna íma tááꞌa kaíno Ísumba taairaꞌá tuvúwówana púwíwaimba taawánayae sékaimo téyamba ísaraumne.

⁶kwemó siráintemba pukáimpinkemba usásinena kówéna íma maankáꞌá máyáivo utamánkaraampimba uawánékai

⁷isaaisékai kwená kwayó-kwáásí kosimátimekai sékai Ísu pukáimpinkemba usásinena kentí aivaꞌá Káríri-ayampaꞌa kwínaꞌa koawánanaaowe. mináímbá kosimátímékaiyo siráiye.

⁸súwasarai minínínkáí avekáámbá utamánkópaꞌa tuwésarai táátavesarai uyaná tirunkó aamoí úwasarai kwená kwayó-kwáásí kosimátimiyantavairai aampaꞌá kuyambá

⁹Ísu minínínkáí tuwánéna séna náávara máyaayano súwasarai anóndakoma iyé-ímáyáá ésarai kwenaísamaivimba tamésarai aísamairaꞌa tátoresarai kwená imáyáa mósá máróyana

¹⁰Ísu simátimena séna kesíváꞌawaawi kosimátimiyasa Káríri-ayampaꞌa komésa suwánaaro Ísu siráiye. utámárópaꞌa kárákwiraawaiti kwaasái.

¹¹Ísu mináímbá súwasarai kwemó súntemba minínínkáí aampaꞌá kuyambá utámárópaꞌo kárákwiyun-i-kwaasi évakarawai Yérúsaremu-naopaꞌa kwésa mono-káwáá-kwáásí paárún-tantaaꞌa kosimátímúwasa

¹²mono-káwáá-kwáásíyé Yútaa-anon-kwaasiye torupamái mésa aaí simái mimbórá-áímbá símaresa utámárópaꞌo kárákwiyun-i-kwaasi anón-ontamba timésa

¹³simátimesa sésa maarán-áímbá simátíméro. noꞌwáámba suún-kwaiguráunasaya Ísuna kwayó-kwáásí tésa kwenáúma umóyámbá maimaésa kóuraawe kosimátímaꞌmaeꞌa nááóro.

¹⁴Páírátimo mináímbó isáínataamo éta moórá-ainkwaraꞌa simáménanaya keinárawaꞌa íma aaivimbá maitinkáníye suwasá

¹⁵miní-kwáásí isésa óntamba maimaésa kurésa sunten-áíné suꞌmai kosimátímaꞌmae nááúwana mináínkó kóyáwé úwasa ísaraamba ívékwaraꞌa Yútaa-kwaasi kwéisaawe. Ísuna kwaási kwembá awánaraan-kwasai.

¹⁶Ísuna kwayó-kwáásí sísamaivakemba moórá kumbaimái-kwaasi Káríri-ayampaꞌa Ísumo minómákáꞌá komáéromo sirón-omakaꞌa komáyówana

¹⁷miwí túrankaꞌa paárúwasa awánésa kwená imáyáa mósá márówasa évakarawai kaer-ímáyáá ésa sésa Ísu pukáimpinkemba usásinkaiyo. óꞌowawa iyó suwaná

¹⁸Ísu miwítí egwaaꞌá taména séna Áánútu asirayámbá siména séna kwíyómpare marapáré kárákwiyuwo simbá

¹⁹póꞌa mindáyaveꞌa amápaꞌ-maravaꞌa kesáái simátímaꞌmae nááíyasa kesí kwaási-iꞌa ésa kesivowé kemá kwenááninkowe kwenamankóé tarúmai máyaiyaꞌa kentáásúwíkaꞌa nombá pétinkeꞌa

²⁰simátímakaunda-aimba kwarésa asiramái tátoraigwae séꞌa simátímaꞌmae íyóro. maramá kwáyaindaraꞌa keinárawate méꞌa ívéꞌo kwáyáin-tantaaꞌo ánásaindaraꞌa keinárawate ménaundayaveꞌa imáyáa úmae íyóro Ísu siráiye. kemá Mátíyu súnda-aimba ánásaiye.