Read Kosena Mátíyu 4 Bible Online

Mátíyu 4 - Kosena bible

Mátíyu 4

¹súwana Sáátáánigo Ísumba áísaa umai isáníntavena Áánútun-amanko Ísumba simámuwana kavóná-maravaꞌa

²koména toómbá íma néna ayáátáákaꞌa 40 noꞌwaamba kwaúwana ávááran-aai ankówana

³Sáátáánigo Ísu sáwíꞌo índa awánanae séna Ísunopaꞌa téna séna emá Áánútu áánimba úne kwésempo maanóntánkóntáváí toómbá aúrénaꞌa naanó siyó súwana

⁴Ísu séna Áánútun-aai aúváí-kwandaaivinkemba sénatoómbó náíyawaiye suꞌmai kwaási íma tátoraivoÁánútu siráiniꞌa amápaꞌa íyana tátoraniye siráimba póꞌa emó sénda íma mirá ónaumne súwana

⁵Sáátáánigo Ísumba áíꞌmaena Yérúsaremu-naopaꞌa kwéna anóm-bonoꞌ-nankona ávúmayaapaꞌa móankena

⁶séna Áánútun-aai aúváí-kwandaaivimba sénaÁánútu kwíyómpakemba kwená kwayóꞌnárawaꞌa tiꞌmaráínasa enkáꞌá kárákwiresa pósa óntankaꞌa aísamaima turaráanavo sésa tiyáándei aramónááowe siráiye. mindáyavai emá Áánútu áánimba úne kwésempo maankákémbá ásávenasa kwíyómpakendarawaꞌa arámbaesa marapáꞌá móru ankánááowe Sáátáánigo súwana

⁷Ísu séna Áánútun-aai aúváí-kwandaaivinkemba áꞌa mirá siréna moórá-ainkwaraꞌa sénakentí Ísóigo Áánútumbaáísaa umai isánáe íma seró siráimba emó séndantembo mirámó ékai Áánútumba áísaa umai isáúsino. mindáyavai emó sénda íma mirá ónaumne Ísu súwana

⁸Sáátáánigo Ísumba áíꞌmaena anón-omapaꞌa iréna móankena amápaꞌ-maravaꞌa kárákwiron-kwaasiye miwítí anón-asirayane agaráárankena

⁹séna kenkáꞌó kívairemo kesí imáyáamo mósá márénaꞌo éꞌa kárákwiyi-mayai áména kárákwiyiniyone Sáátáánigo súwana

¹⁰Ísu séna Sáátáánigo kówaao. Áánútun-aai aúváí-kwandaaivinkemba sénakentí Ísóigo Áánútumpaꞌa imáyáa éꞌa kwenáwíresuꞌmai mósá maréꞌa kwená mayáíyé suꞌmai máyáaro siráimba póꞌa emó sénda íma mirá ónaumne súwana

¹¹Sáátáánigo auwéna kúwasa kwíyómpakemba Áánútuna kwayóꞌnárawaꞌa kumésa Ísumba áwaꞌnaa uráawe. Ísu kwená mayáímó ááimba ásárain-kwasai.

¹²Yóni marará-káwáánákó áwíꞌa Érótintavena séna sáwíꞌa uráiye siróntavena ándávaꞌa máankowana máyon-aimba Ísu iséna Káríri-ayampaꞌa kwéna

¹³Násáreti-naopaꞌa íma koména Kápénéamu-naopaꞌa koméraiye. mindáópaꞌa Káríri-nonkwaaunkon-awampaꞌ-naopaꞌa Sépiyuraaniye Návataraiye tísaavutantamba uráawaiti maraváꞌá kwáyon-daopaꞌani.

¹⁴Ísu Kápénéamu-naopaꞌa komáyomba naaóváꞌá Áánútun-aai simátímakowai áwíꞌa Áísáya agaimaréna sirónkaꞌa póna mirá uráiye. kwemá agaimaréna séna

¹⁵Sépiyuraaninte Návatarainte mindárai tísaavutantamba uráawaiti maraváꞌá nonkwaaúnkón-awampaꞌa Yóntáni-nonkona menávápáꞌ-máráó áwíꞌa Káríri-maravaꞌa máyáawai óꞌon-oꞌon-kwaasiyaveꞌa súnda

¹⁶minkwáásí túnkwi-ayampaꞌa mésa sámo kaípaꞌa awánanaaowe. Áánútuna némpaꞌo túnkwi-ayampaꞌo máyáawai sán-kamátinkaniye agaimaréna sirónkaꞌa póna Ísu paáréna mirá uráiye.

¹⁷minkánáá Ísu simátimindayavena ááimba ásámai simátimena séna Áánútu kwená kwaási kawááimba ááimba kwéasaivo kentí sáwí-imayaa tuwéꞌa Áánútunopaꞌa teró siráiye. Ísu éíyain-kwaasi tááyarain-kwasai.

¹⁸Ísu Káríri-kwaaunkon-awampakavamba kúmba kae-kwáásíráí mésarai awaaó áwíꞌa Sáímoni moórá-awiꞌa Pítaa úwana áváko áwíꞌa Éndaru umái mésarai miwítí mayáímá pósarai noyááꞌa toꞌmái tímapaꞌa kwénaaesarai kwase-únámbá nompí tukóyana

¹⁹Ísu simátimena séna kesé tekaiyó. noyááꞌo toꞌmáímo tímapaꞌo kwénaaoyantemba aúná-mayai tíménakai kwénaaekai kesáái simátímapaꞌa kwénaaiyasa kesópaꞌa teró súwasarai

²⁰minkwásé-únámbá tuwésarai kwesé kurááiye.

²¹kwesé kuyaná Ísu kómarena kúmba kae-kwáásíráí mésarai Sépéti ááninkai awaaó áwíꞌa Yémési úwana áváko áwíꞌa Yóniye tivowámpi kwimái nompí-sípívímbá mésaya kwase-únámbá toꞌmayaa kwéuwana Ísu minkáéꞌnárai tááyowasarai

²²avekáámbá tivowámbá mindómpí-sípívímbá auwésarai Ísuwe kurááiye. Ísu sáwíva-kwaasivimba mayáí mairáin-kwasai.

²³Ísu Káríri-ayampaꞌa naaóꞌ-naoꞌa kwénaaena monoꞌ-náúmpímpáꞌá Áánútu kwená kwaási kawááin-aimba mináséí-kwásáí kosimátímapaꞌa kwénaaena óꞌon-oꞌon-tiꞌo ún-kwaasi asóvamatinkavaꞌa kúwana

²⁴kwenááigo Síriyaa-maravaꞌa naaóꞌ-naoꞌa kóyáwé úwasa óꞌon-oꞌon-tiꞌo ún-kwaasiye taraváá-kwámbó tirumpimbó máyon-kwaasiye tíyayaambo árúkun-kwaasiye tíyayaambo pukón-kwaasiye mirámó un-kwáásí taagwiyaꞌmaésa Ísunopaꞌa mátínkówana asóvamatinkena

²⁵aambó kwénaaumba sáwívarawai Káríri-ayampakene Tékáporisi-ayampakene Yérúsaremu-naopakene Yútiyaa-ayampakene Yóntáni-nonkona menávápákén-kwáásíyé miráumai-naoken-kwaasi kwenópaꞌa tóyo uráawe.