Read Kosena Mátíyu 8 Bible Online

Mátíyu 8 - Kosena bible

Mátíyu 8

¹táátavesa uwaná Ísu minómápákémbá kumúwasa sáwívarawai ánaaemba kwárówana

²moóráwai áúmo karón-kwaasi Ísunopaꞌa téna anóndakoman-iye séna aísamaivimba takívairena séna kentávénamo ankáínamo e kanaán-umai aúnáiꞌa umásinkaniyone súwana

³Ísu ayáámba aneꞌá tátorena séna mirá ónaumpo enáúraꞌa karevúꞌa kawáúgwiye súwana avekáámbá kawáúguwana

⁴Ísu séna enáúraꞌo umánkaunda-aimba simátimenavo enáúraꞌa kawáúgwimba po naaóváꞌó Mósesimo siráintemba monoꞌ-máyáí-kwáásítópaꞌa kwéma enáúma máagaraatinke póíma tímínasa Áánútuntavesa ísámai tuvúꞌmái agayáíyasa amáparawai awánésa áúrakemba kawáúgwiye sénááowe Ísu siráiye. Árómáani-kwayoꞌnakona kwaasái.

⁵Ísu mináímbá simásuwena Kápénéamu-naopaꞌa kúwana Árómáani-i-kwaasiti kawáánáꞌá ména Ísunopaꞌa téna asiramái séna

⁶anóndakoo kesí kwayóꞌnáꞌá naaúmpaꞌa ména anón-aiꞌa isaná áúwawaako íma úwauwa kwéisana máyáiye súwana

⁷Ísu séna koasóvamankanaumne súwana

⁸kwemá séna kemá sáwíyan-kwaasi úmpo emá anón-kwaasi ómpo kesí naaúmpaꞌa íyínda uwóvíꞌa íníyompo ivátuwe aaiyé suꞌmai sinaná kesí kwayóꞌnáꞌá asóváíno.

⁹kegwáráꞌá kawáá-máyáígóná ááimba awánaraunda kesí kawáánákó sisaꞌá kwená mayáí kwémaeꞌa kesí i-kwáásíyávéꞌa súnasa kesí mayáí kwémayaawe. moóráwaintaveꞌa séꞌa kwaaó súnana kwégwisaꞌa moóráwaintaveꞌa séꞌa tiyó súnana kwétisaꞌa kesí kwayóꞌnátávéꞌa mirá uwómó súndantemba mirá kwéivo úwoi aaiyé suꞌmai sinaná kesí kwayónáꞌá asóváíno súwana

¹⁰Ísu mináímbá iséna áátavena éna kwenánaaembo kwaꞌmaésamo kun-kwáásíyóntávéna séna simátimeꞌa séꞌa minkwáásí Árómáani-kwaasigo kentávéna súwaꞌnaa ií-ásíráyámbá tokáiye kwésivo kesí kwaási Ísareri-kwaasivinkene óꞌon-kwaasivinkene íma mirán-áímbá kwésewe.

¹¹simátíménda ísáaro. aaváúmó usaipakéné kumpéráípakene óꞌon-oꞌon-ayampakene sáwívarawai tóyo ésa Áánútu kwená kwaásimo kawááipaꞌa mésa kentíkwáꞌná Ááváramuwe Áísákaawe Yákópowe toómbá nánááombanivo

¹²mindárau tísaavutantambo uráawai miwí túma maé kwéiyesa sésa Áánútu kawááipata ménaumne kwésewai tíꞌmaena túnkwi-ayampaꞌa tiyuwáínasa iviꞌá kwétesa sáwíꞌa umái mésa túwááyaamba akévundanaaowe Ísu simátimena

¹³Árómáani i-kwáásítí kawáánátávéna séna emó kentávémo séndantemba mirá onaná asóvanivo ená naaúmpaꞌa kwaaó súwana mitáwai kwená kwayóꞌnáꞌá asóvamaguraiye. Ísu tíꞌo ún-kwaasi asóvamatinkarain-kwasai.

¹⁴Ísu Pítaana naaúmpaꞌa uména awánómba Pítaa aísáankomba kokotámba kwéankowana máyowana

¹⁵ayáánkaꞌa tátorowana minkókótámba ánásowana usásinkwena toómbá agaimái tímakaiye.

¹⁶toómbá timúwasa enónkaꞌa taraváá-kwámbó tirumpimbó máyon-kwaasi tíꞌmaesa Ísunopaꞌa mátínkówana aaí séna taraváá-kwámbá tirumpinkémbá maitiyuwówasa kóuwana tíꞌo ún-kwaasi asóvamatinkaraiye.

¹⁷naaóváꞌá Áánútun-aai simátímakowai áwíꞌa Áísáya agaimaréna Ísuntavena sénasíꞌo kwéimba asóvasinkenasíꞌo kwéimba ánásamasinkaraiye agaimaréna sirónkaꞌa póna Ísu mirá uráiye. Ísun-ánaaemba kwaránáe siráan-kwasai.

¹⁸moórá-tawai sáwívarawai tóyo ésa Ísuna egwaaꞌá máyówana tuwánéna kwená kwaásiyavena séna monkwaaúnkóná menávápátá kónáe súwana

¹⁹moóráwai ámáámba sún-kwaasigo téna séna amápaꞌ-naopaꞌo nááíndavaꞌa esé naaónaumne súwana

²⁰Ísu minkwáásígómbá áísaa umai isánáe séna emó sénda súnda-aimba imáyáa uwo. kwaankó taaiyaivimbá kwégwaisana numaómá ánáamba úmarena kwégwaivo kemá kwaási úrandaꞌa kumpaáruraundawai íma naambá úmareꞌa kwégwaumne súwana

²¹moóráwai kwenánaaemba kwakówai séna anóndakoo máyáanana kesivo puwínaꞌa utamánkeꞌa enánaaemba kwaránaumne súwana

²²Ísu séna ímanivo kesáái ímo isésamo pukáan-kwaasiraamba owáímá puwíyan-kwaasi utamátinkanaaovo emá kesínaaemba kwaraaó Ísu siráiye. anón-unda torówana Ísu maivairáin-kwasai.

²³Ísu mináímbá simásuwena kwená kwayó-kwáásíyé nompí-sípívímbá usáatena nonkwaaúnkóná menávápáꞌá kúmba

²⁴Ísu aún-kwaigurówana minkwaaúmpáꞌá anón-unda torówana nonkó tuvántááva éna nompí-sípívímbá ógwitowasa kunávekunavo sésa

²⁵inkaisésa Ísumba koaúsesa sésa Ísóigo puwúnavaiya súwaꞌnaa uwo suwaná

²⁶nóintavaiya kwéinkaiseo. kentávéꞌa nóra séra íma kesí imáyáa onkákémbá kwéseo séna usásinena asiramái séna úndáonte nonkóntéyavena maiváyáakaiyo súwasarai úndáoe nonkóe maiváyóyana nonkómá kararépaguwana

²⁷tááꞌa kówasa keáímbá sésa nóran-kwaasiya énawa úndáoe nonkóe kwenáái kwéisaiyo sésa tiyáámba uvakésa táátavesa ésa siráawe. taraváá-kwámbá maitíyukain-kwasai.

²⁸simásuwesa mindómpí-sípívímbá kumbá Káríri-marama tínaaempaꞌa kwáyowana Kégésaa-marama túrampaꞌa kwáyowasa mimbáráváꞌá kumbá Ísu mindómpí-sípívínkémbá ásávowasarai kaeꞌnárai kwenópaꞌa tiráái. minkáéꞌnárai taraváá-kwámbá tirumpimbá máyowasarai kwaásimo utamátínkóm-buri-aivaꞌa mésarai túwáávite kwéuyasa kwaási inkaisésa minkáéꞌnáraimo máyóyapaꞌa íma kwéguwasarai minkáéꞌnárai Ísunopaꞌa tésarai

²⁹anónkaꞌa sésarai Áánútu ááninkoo sínkami-kanaa íma tiráisasa sínkaminiyerai kwéteno suyasá

³⁰egwaaꞌá sáwíva-poima mésa umá kwénowasa

³¹minkáéꞌnárai tirumpinkén-táráváá-kwántómbá Ísuntavesa sésa siꞌmátuweyaamo e mimpóí tirumpimbá siꞌmaraaó suwaná

³²mirán-oro súwasa taraváá-kwántómbá minkáéꞌnárai tirumpinkémbá kárúwesa póí-tirumpimba kovérówasa mimpóíyómbá amápaꞌa ámémpakemba isaaisésa nonkwaaúmpíntá kumpérómba putásowasa

³³póíraꞌo tavíkówai awánésa avekáán-umai naaópaꞌa kwésa póígomo úne Ísumo minkáéꞌnáraimo umátinkone mósimatim-besimati uwasá

³⁴isésa koawánanae sésa kumbá koawánésa Ísuntavesa sésa maambáráváꞌá ivá siyuwéya kóaao siráawe.