Read Kosena Mátíyu 9 Bible Online

Mátíyu 9 - Kosena bible

Mátíyu 9

¹suwaná Ísu kwená kwayó-kwáásíyé nompí-sípívímbá usámaaisena kúmba kwená naaópaꞌa marapáꞌá ásávowasa

²évakarawai aísamaimo pukówaimba kwandaaivímbá marésa taagwiyaꞌmaésa tésa Ísunopaꞌa máánkówana Ísu tuwánéna taagwiyaꞌmaésamo tun-kwáásímó áraiꞌa kaweꞌá umánkaniye-imayaamo umbá Ísu tuwánéna aísamaimo pukón-kwaasiyavena séna kesí kwaásiyo ená sáwí-imayaa mayauwáúmne súwasa

³ámáámba sun-kwáásí keáímbá sésa Áánútu kweyáá sáwí-imayaa maitiyuwánívo minkwáásígó Áánútumba akáꞌáámba kwésimankaiye suwaná

⁴Ísu miwítí imáyáa tuwánéna nóra séra mirá-sáwí-ímáyáá kwéoo.

⁵moóráwaimo aísamaimo pukáindawaintavenamo sénamo ená sáwí-imayaa mayauwáúmne sínasamo ésa áraira sií. kampará siíyo sénááowe. ánivo moóráwaimo aísamaimo pukáindawaintavenamo sénamo usásine eyááríkaꞌa kwaaó sínasamo ésa áraira sií. kampará siíyo awánanaaowe.

⁶kemá kwaási úrandaꞌa kumpaáruraundawai marapáꞌá máyaunda kwaásiti sáwí-imayaa maitiyuwáúnda-asirayamba tokáunda póꞌa agaráátínkáanda awánanaaowe séna aísamaimo pukón-kwaasiyavena séna usásinke ená kwandaaimá maimaé ená naaópaꞌa kwaaó súwana

⁷usásinena kwená naaópaꞌa kúwasa

⁸máyówai Ísumo úmba awánésa táátavesa ésa Áánútu áwíꞌa mósá marésa sésa Áánútu minkwáásígómbá asirayámbá ámísana póna mirá uráiye sésa táátavesa ésa tiyáámba tóipimba áákaawe. Ísu Mátíyumba ááyarain-kwasai.

⁹suwaná Ísu tuwéna kwéna awánómba moóráwai áwíꞌa Mátíyu táákísimo máyón-daumpaꞌa máyowana awánéna séna usásine kesé tiyó súwana usásinena kwenánaaemba kwaꞌmaéna kúwasa

¹⁰Ísu kwená kwayó-kwáásíyé Mátíyuna naaúmpaꞌa umésa toómbá nowasá sáwívarawai táákísimo máyón-kwaasiye sáwíꞌo un-kwáásíyé mindáúmpáꞌá umésa nowasá

¹¹ámáán-kawaa-kwaasi awánésa Ísuna kwayó-kwáásíyávésa tísaa esa sésa kentí anóndako nóra sénawa táákísimo máyáan-umoyan-kwaasiye sáwíꞌo on-kwáásíyé toómbá kwénaiyo suwaná

¹²Ísu iséna séna sontaa-kwáásígó kaweꞌó umáímo máyáan-kwaasi íma kwétuwaꞌnaa-ivo tíꞌo in-kwáásí kwétuwaꞌnaa-iye.

¹³mindáyaveꞌa arupí umáímo máyáan-kwaasi tááyaanasa Áánútunopaꞌa tígwáe séꞌa íma kunkáumpo sáwíꞌo umáímo máyáan-kwaasi tááyaanasa Áánútunopaꞌa tígwáe séꞌa kunkáumne. Áánútun-aai aúváívimba agaimaréna séna Áánútu sénapóímo tuvúꞌmáímo agaimáímo símémba kanaán-ivo tirumbó kwéumatinkaamba anón-aamoi kwéune siráimba mindáyaveꞌa imáyáa éꞌa mirá kwéumpo mináínkóná ááimba iséꞌa mirán-oro Ísu siráiye. toómbá aawesuráan-kwasai.

¹⁴súwasa Yóni nombó pétinkowaina kwayó-kwáásí Ísunopaꞌa tésa áísaa esa sésa keséya ámáán-kawaa-kwaasiye moórá-mora-tawai Áánútuntaveta imáyáa éta toómbá íma kwéneta námúnaawe suꞌmai kwésumpo ená kwayó-kwáásí íma mirá ésa toómbá úwoi kwénaawe. nóra esa mirá kwéoo suwaná

¹⁵Ísu séna moóráwai aaraí mayáíndawai amááraawi tanómba kautimínímba miwísé máyainasa aamoí ésa mintómbá íma aꞌáo sénááovo úwoi nánááowe. naaémba minkwáásígómbá áíꞌmaesa kówíyasa minkánáámá amááraawi tirunkó sáwíꞌa ínasa toómbá aꞌáo sénááowe Ísu séna kwemó ménamo naaémbo tiyuwénamo iyíníntavena mináímbá siráiye.

¹⁶Ísu mináímbá simásuwena séna ááéraan-ampantaamo avaaꞌó kwáyáísasamo ombá aúná-ampanta íma kárámai kwéaraapaawe. mirámó íyana aúná-ampanta sáwíꞌa ínana ááéraan-ampantao aúná-ampantaraaniꞌa íma íníye.

¹⁷aúná-anda-aran-domba ááéraa-sipisipi-auwarasi-anaveumpimba íma kwéatimaraawe. mirámó íyanamo éna aúná-anda-aran-domba anón-éna ááéraan-anaveumba kavámbaena sáwíꞌa ínana mindómbá úwoivaꞌa atígwiniye. mindáyavesa aúná-anda-aran-domba aúná-sipisipi-auwarasi-anaveumpimba kwéatimaraawana minándá-árán-dóné misípísípí-áúwárásí-anaveune kaweꞌá umái kwáyáiye Ísu siráiye. inaamarúgónté aaraigóntéi kwaasái.

¹⁸Ísu mináímbá kwésimatimumba moóráwai monoꞌ-nánkáꞌó kárákwirowai téna Ísu anóndakoman-iye séna aísamaivimba kumbéna séna kesiyáámúmba kwévuwivo tiré aneꞌá koyátorenana usásinaino súwana

¹⁹Ísu usásinena kwená kwayó-kwáásíyé mindákóe kumbá

²⁰moórá-ininkomba áíꞌa kwéun-ininko sísamaivakemba kaeꞌá kumbaimái-ima naaeyámba kwéankowana minínínkó Ísun-ánaaemba kwaꞌmaéna kwégwena kwená unáánkwátói árááiraꞌa koyátorena

²¹imáyáa éna séna kwená unáánkwátói árááiraꞌa koyátóráánanama síꞌa ésinkaniye-imayaa éna koyátorowana

²²Ísu kwanténa awánéna séna kesímánaako ááꞌa íma kaíno. kentáváí se áraiꞌa súwaꞌnaa íníwaiman-iye sénda póna áíꞌa éránkáiye súwana minkánáá kaweꞌá umái méraiye.

²³kaweꞌá umái máyowana Ísu kwéna monoꞌ-nánkáꞌó kárákwirowaina naambó kwáyonkaꞌa kwéna awánómba torupamáímo máyón-kwaasi uwíremba kwésesa anón-iviꞌa kwétowana Ísu tuwánéna

²⁴séna máápaꞌa kúmóro. minárásígó íma pukáivo úwoi aúmá kwaiguráiye súwasa Ísuna awíráái suwaná

²⁵Ísu tiꞌmátuwowasa máápaꞌa kunákárúwowana minárásígó pukópaꞌa iyéna ayáánkaꞌa tátorowana minárásígó usásinowana

²⁶Ísumo ún-aimba kóyáwé uráiye. Ísu túramba kavíkóndarai kaweꞌá umátínkarain-kwasai.

²⁷mináímbá kóyáwé úwana minkákémbá Ísu aampaꞌá kúmba kaeꞌnárai túramba kavíkóndarai kwenánaaemba kwaꞌmaésarai kwésarai anónkaꞌa sésarai Tévítina akún-ándárákéwáí ómpo arunkáí umásinkaao suyaná

²⁸kwégwena naaúmpaꞌa umáyowasarai minkáéꞌnárai kwesé umáyóyana Ísu tísaa ena séna kentávékai sékai súramba kanaán-umai kaweꞌá umásinkaniyewa kwéseyo Ísu súwasarai anóndakoo kanaán-umai mirá íníyone suyaná

²⁹kentávékai miráyavekai áraire séyamba póna túramba kaweꞌá íno súwasarai

³⁰túramba awánamai kaweꞌá uyaná Ísu asiramái simátimena séna kemó únda íma simátímékaiyo súwasarai

³¹ivátuwesarai kwemó úmba mósimatim-besimatimba uyaná kóyáwé uráiye. Ísu ááma turuvíyán-kwaasi kaweꞌá umánkarain-kwasai.

³²minkáéꞌnárai kuyasá évakarawai moóráwaimba áíꞌmaesa Ísunopaꞌa máánkara. kwenarumpimbá taraváá-kwámbá máyontavena minkwáásígó íma aaí kwésuwasa áíꞌmaesa Ísunopaꞌa máánkówana

³³Ísu mayauwówana kóúwana minkwáásígó aaí súwasa sáwívarawai awánésa táátavesa ésa sésa Ísareri-kwaasiya éta naaóváꞌá mirám-báyáí íma awáraundaya ívékwarata íma kwéawanaumne sumbánivo

³⁴ámáán-kawaa-kwaasi sésa taraváá-kwántóntí kawáánáꞌá asirayámbá ámísana tokéna póna taraváá-kwámbá kwémaitiyuwaiye siráawe. Ísu arumbá umátínkarain-kwasai.

³⁵Ísu naaóꞌ-naoꞌa anón-daopimpare sáwíyan-daopimpare kwénaaena monoꞌ-náúmpímpáꞌá uména Áánútu kwená kwaásimo kawááin-aimba áséi-aimba simátímaꞌmaena iyéna óꞌon-oꞌon-tiꞌo ún-kwaasi asóvamatinkaraiye.

³⁶Ísu mirá kwéuwasa sáwívarawaimo tóyo umbá tuwánéna séna sipisípiraꞌo ímo kárákwiraiwaimo ímo máyáísasamo sipisípimo sáwíꞌo umáímo nááóntemba mirá owasá íma túwaꞌnaa úmae kwénaaowasa sáwíꞌa kwéowe séna arumbá umátinkena

³⁷kwaásima Áánútumpaꞌa tígwáe-imayaa éna kwená kwayó-kwáásíyávéna séna kígauvaꞌa sáwíva-tomba ávu karáisasa mintómbá akaránááon-kwaasi esimáí-kwaasi máyáamba póꞌa

³⁸kígaugona avowámpaꞌa námúnaa síyana mayáí-kwáásí tiꞌmaráínasa mintómbá akaránááowe Ísu siráiye.