Read Kosena Mááka 1 Bible Online

Mááka 1 - Kosena bible

Mááka 1

¹Áánútu ááninko Ísu Káráísiti kwená áséi-kwasai maarámán-iye.

²naaóváꞌá moóráwai áwíꞌa Yóni íma máyonkaꞌa Áánútun-aai simátímakowai áwíꞌa Áísáya Yónin-aai simái agaimaréna sénaÁánútu séna isaaó. moóráwaimba aiꞌmáráanana kesáái maimaéna ená aivaꞌá kwéna ená aambá kwirankéna

³kavóná-maravaꞌa ména aayamáírakemba séna ísóigona aambá kwirankánááomba kwená aambá arupí íyana minámpáꞌá kwíno Áánútu siráiye Áísáya agaimaréna sirónkaꞌa Yóni paárúwana mináímbá paáruraiye.

⁴Yóni nombá pétinkowai kavóná-maravaꞌa komáyowasa Yútiyaa-ayampake Yérúsaremu-naopaken-kwaasi amápaꞌa Yóninopaꞌa tuwaná simátimena séna kentí sáwí-imayaa tuwéꞌa Áánútumpaꞌa tíyana sáwí-imayaa maitiyuwáínaꞌa nombá pétinkanaumne súwasa sáwíꞌo uráamba paárumai avoraꞌá simámúwana Yóni Yótáni-nompimba nombá pétinkaraiye.

⁶Yóni póígo áwíꞌa káámeri kwená áyáu-kwatoi iréna aúwarasinei ámúr-anda uréna aꞌnóríné kwantáámíkóná aúwé mintóné suꞌmai kwénena

⁷simátimena séna moóráwai kesínaaemba tíníwai kwemá anóndakoma kembá usáyaaitaraimba póꞌa kwemó aaimó síndavimba kemá aaimá sendamá uvóvíꞌa ónaumne.

⁸kemá nombá pétinkaundanivo kwemá Áánútu amankómbá aiꞌmaráínana kuména keinárawapimba anómba umátinkaniye siráiye. Ísumba nombá pérankarain-kwasai.

⁹minkánáá Káríri-ayampakemba Násáreti-naopakemba Ísu túwana Yótáni-nompimba Yóni kwembá nombá pérankowana

¹⁰Ísu nompínkémbá usásinowana sokón-tawaai taaínkar-úwana Yóni awánómba Áánútun-amanko mááiraamba úmaena Ísu aneꞌá kumbáyowana

¹¹kwíyómpakemba aaigówé suꞌmai séna emá kesááninko ónaꞌa ená imáyáa kwéeꞌa ávááraumai aamoí umánkaumne siráiye. Sáátáánigo Ísumba áísaa umai awánanae siráin-kwasai.

¹²súwana Áánútun-amankoma Ísumba simámuwana kavóná-maravaꞌa komáyowana

¹³kae-kwááí aíyayaan-doꞌwaamba 40 noꞌwaamba komáyowana Sáátáánigo Ísu sáwíꞌo índa awánanae séna óꞌon-oꞌon-aimba súwana Ísu íma sáwíꞌa éna aváá-kwánkáán-umai máyowasa kwíyómpakemba Áánútuna kwayóꞌnárawaꞌa kumbésa áwaꞌnaa umánkaraawe. Ísu éíyain-kwaasi tááyarain-kwasai.

¹⁴naaémba Yóni Káríri-marara-kawaanako áwíꞌa Érótintavena séna sáwíꞌa uráiye siróntavena Yónimba ándávaꞌa máankowana máyowana Ísu Káríri-ayampaꞌa kwéna Áánútuna áséi-kwasai simátimena séna

¹⁵Áánútu kwená kwaásiraꞌo kawááimba ááimba kwéasaivo kentí sáwí-imayaa tuwéꞌa Áánútuna áséi-aintaveꞌa áraire seró siráiye.

¹⁶mináímbá simásuwena Káríri-kwaaunkon-awampakavamba kúmba kae-kwáásíráí mésarai awaaó áwíꞌa Sáímoni úwana áváko áwíꞌa Éndaru umái mésarai miwítí mayáímá pósarai noyááꞌa toꞌmái tímapaꞌa kwénaaesarai kwase-únámbá nompí tukóyana

¹⁷Ísu simátimena séna kesé tekaiyó. noyááꞌo toꞌmáímo tímapaꞌo kwénaaoyantemba aúná-mayai tíménakai kwénaaekai kesáái simátímapaꞌa kwénaaiyasa kesópaꞌa teró súwasarai

¹⁸minkwásé-únámbá tuwésarai kwesé kurááiye.

¹⁹kwesé kuyaná Ísu sáwíyankaꞌa kúmba kae-kwáásíráí mésarai Sépéti ááninkai awaaó áwíꞌa Yémési úwana áváko áwíꞌa Yóniye nompí-sípívímbá mésarai kwase-únámbá toꞌmayaa kwéuyana

²⁰Ísu tuwánéna tááyowasarai mindómpí-sípívímbá tivowáné kwená mayáí-kwáásíyé tiyuwésarai Ísuwe kurááiye. arumpimbá taraváá-kwámbá máyowaina kwaasái.

²¹Kápénéamu-naopaꞌa komáyómba Yútaa-kwaasi monor-áímbó kwéison-kanaa túwana Ísu monoꞌ-náúmpáꞌá uména kwenáái simátimuwasa

²²isésa asiramái súntavesa sésa ámáámba sentenkááníꞌa íma kwésivo anón-kwaasigoraamba kwésiye sésa táátavai uráawe.

²³táátavai uwaná mimbónóꞌ-náúmpáꞌá moóráwai kwenarumpimbá taraváá-kwámbá máyon-kwaasigo ména

²⁴anónkaꞌa séna Ísu Násáretivakewaima óne. kentáá nóra taéwa tasínkambaiya ánásaniyono. embá awánáúndawai Áánútuna kawe-kwáyóꞌnáꞌá óne súwana

²⁵Ísu taraváá-kwántánéna asiramái séna aaiseré minkwáásí tiyuwé kóaao súwana

²⁶mintáráváá-kwánkó minkwáásí tokáꞌmái tuvámbarowana aíyayaanko sápísimaguwana kwááꞌa túmaena arumpinkémbá kóúwasa

²⁷awánésa táátavai ésa keáímbá sésa mindóraꞌiyo. aúnáiꞌan-iye. kwemá taraváá-kwántávéna asiramái kwésisasa sintembá kwéowe suwaná

²⁸mirá úwasa Káríri-ayampaꞌa Ísun-aai kóyáwé úwasa ísaraawe. Ísu tíꞌo ún-kwaasi asóvatinkarain-kwasai.

²⁹ísówasa monoꞌ-náúmpáꞌá tuwésa Sáímoninte Éndaruntei mindáraiti naaúmpaꞌa íyúmba Yémésiye Yóniye Ísuwe umái íyúmba

³⁰Sáímoni aísáankomba kokotámba kwéankowana máyowasa Ísumba simámúwana

³¹iséna kwenópaꞌa téna ayáánkaꞌa tátoꞌmai usásinankowana kokotámba ánásowana usásinkwena toómbá agaimái tímakaiye.

³²toómbá agai-timúwasa enónkaꞌa tíꞌo ún-kwaasiyonkwara taraváá-kwámbó tirumpimbó máyón-kwaasiyonkwaraꞌa tíꞌmaesa Ísunopaꞌa mátínkówasa

³³mindáópaken-kwaasiyomba amápaꞌa ontaráꞌá torupowaná

³⁴Ísu óꞌon-oꞌon-tiꞌo ún-kwaasiyomba asóvamatinkena taraváá-kwámbá tirumpinkémbá maituyuwówasa mintáráváá-kwántómbá Ísuntavesa Áánútu ááninkoman-iye sésa kwembá awánontavena aaiséráaro Ísu súwasa kóuraawe. Ísu Kárírivaꞌa simátímakain-kwasai.

³⁵kóuwana irataróꞌá Ísu usásinena mindáópaꞌa tuwéna námúnaa síndayavena íma kwaási máyópaꞌa koména námúnaa kwésena máyowana

³⁶Sáímoni kwená kwaásiye Ísumba avakáá-umai

³⁷awánésa sésa amápa-kwaasi embá kwéavakaa-owe suwaná

³⁸Ísu séna óꞌon-daopimpakwarata kwénaaeta kesáái simátímapaꞌa koónaumne. mirá ónaundayaveꞌa túne séna

³⁹Káríri-ayampaꞌa monoꞌ-náúmpímpáꞌá kosimátímapaꞌa kwénaaena tirumpinkémbá taraváá-kwámbá maitiyuwówasa kóuraawe. Ísu áúma karón-kwaasi kaweꞌá umánkarain-kwasai.

⁴⁰moórá-tawai Ísunopaꞌa áúma karón-kwaasigo téna anóndakoman-iye séna aísamaivimba takívairena séna kentávénamo ankáínamo e kanaán-umai aúnáiꞌa umásinkaniyono súwana

⁴¹Ísu arumbá úwana ayáándei aneꞌá tátorena séna mirá ónaumpo enáúraꞌa karevúꞌa kawáúgwiye séna

⁴²avekáámbá kaweꞌá umánkowana kawáúguwana

⁴³Ísu asiramái séna enáúraꞌa kawáúgwimba po Mósesimo siráintemba monoꞌ-máyáí-kwáásítópaꞌa kwéma enáúma máagaraatinke póíma tímínasa Áánútuntavesa ísámai tuvúꞌmái agayáíyasa amáparawai awánésa áúrakemba kawáúgwiye sénááowe. ánivo enáúraꞌo umánkaunda-aimba simátimunavo se kwaaó Ísu súwana

⁴⁵minkwáásígó ivátuwena kaweꞌá umánkon-aimba simátímaꞌmae iyúwana mináínkó kóyáwé úwasa sáwívarawai Ísu tíníye sésa kentí naaópimpaꞌa torupamái máyówana mindáyavena Ísu íma naaóꞌ-naoꞌa kúmba kwaási íma máyónkavamba máyowasa naaóꞌ-naoken-kwaasi kwenópaꞌa tóyo uráawe.