Read Kosena Mááka 11 Bible Online

Mááka 11 - Kosena bible

Mááka 11

¹Ísu kwená kwayó-kwáásíyé kumbá Yérúsaremu-naor-ampaꞌa kumbá Óríve-omakar-egwaaꞌ-naokai moórá Pétévasi-naoꞌa úwana moórá Pétáni-naoꞌa úwasa minkáéꞌ-náór-egwaaꞌa kwésa kwená kwayó-kwáásí kaeꞌá mátiꞌmarena

²séna epín-dáópaꞌa kurékai moórá-poigo áwíꞌa tónki koawáneyambo kwaásimo ímo ayáákainda-poi ándáma iyátuwekai áíꞌmaekai tekaiyó.

³moóránankomo tuwánénamo nóra óyáekai óyómo sínakai anóndako ayááꞌmaeꞌa konasá áíꞌmaesa koyauweránááowe siyé simámékaiyo súwasarai

⁴kuyaná mimpóímá ontaráꞌá ándánei anumarampimbá kwímarowana máyowasarai koawánésarai minándá koiyatúwóyana

⁵minkáꞌá máyón-kwaasi sésa nóra sékai mimpóígóná ándáma kwéiyatuwaaiyo suwasaráí

⁶Ísumo sún-aimba simátímúyasa kanaán-ivo mirá okaiyó suwasaráí

⁷áíꞌmaesarai Ísunopaꞌa tuyasá kwená kwayó-kwáásí paákár-únánkwátói ayúꞌmái mimpóígó arósáánumpimba kwandaaí uwíꞌmárówana Ísu ayááꞌmaena kwéguwasa

⁸sáwíva-kwaasi mésa anón-kwaasiye sésa évakarawai paákár-únánkwátói ayúꞌmái évakarawai taayánáma ayáiresa aampaꞌá uwíꞌmaꞌmae kwéguwana minúnánkwátóirare mintááyánáravane augwétámai kwéguwasa

⁹aivaꞌá nááún-kwaasiye Ísun-ánaaemba nááún-kwaasiye anónkar-anonkaꞌa sésa Ísóigo aiꞌmáráísana kunkáiwaimba Áánútu kaweꞌá kwéumankaiye.

¹⁰kentáá síkwáꞌná Tévítimo kawáá-uraintemba miráráámbá íníye. kwenáwíꞌa mósá kwémaraumne anónkar-anonkaꞌa suwaná

¹¹Ísu Yérúsaremu-naopaꞌa kúmba anóm-bonoꞌ-naumpaꞌa uména amápa-tantaaꞌa awánéna enónkaꞌa kwená kwayó-kwáásí sísamaivakemba kaeꞌá kumbaimái-kwaasi tíꞌmaena Pétáni-naopaꞌa kuráiye. taaigóná kwaasái.

¹²Pétáni-naopaꞌa kogwáúmba usá aaváyaavimba mindáópaꞌa tuwésa aampaꞌá kumbá Ísumba ááima ankówana

¹³moórá-taigo áwíꞌa víkima kwáyowana mintáéramba nánáe séna ááimpaꞌa kwéna awánómba arambó iyáí-kánáámó ímo túmba íma iyéna ánáwe suꞌmai kwáyowana avakáá uwááena

¹⁴mintáígóntávéna séna ená arambá íma iyáníyone. moórágwaraꞌa kwaási ená arambá íma nánááowe súwasa kwená kwayó-kwáásí mináímbá ísaraawe. Ísu anóm-bonoꞌ-naumpaꞌa iráin-kwasai.

¹⁵Ísumo sún-aimba isésa Yérúsaremu-naopaꞌa kumbá Ísu anóm-bonoꞌ-naumpaꞌa iyéna monoꞌ-náúmpáꞌó meéyámbó kwémayon-kwaasi tuwánéna utiꞌmátuwena monoꞌ-nánkóná óntambo meéyámbárón-kwaasiti taareimá tawísíyuwena Áánútuntavai imáyáa ésa máái-numama kwéamun-dumama meéyámbárón-kwaasiti taareimá tawísíyuwena

¹⁶simátimena séna ókwaraꞌa íma monoꞌ-náúmpáꞌá mirán-tántááꞌá maimaéꞌa iré kunke oro.

¹⁷Áánútun-aai aúváí-kwandaaivimba agaimaréna séna kesí naantaváí sésa Áánútumpaꞌo námúnaamo sen-dámbá isasá óꞌon-oꞌom-barapaken-kwaasi tésa námúnaa kwésewe agaimaréna siráiye. ánivo umóyán-dáúmpáꞌó ontenkáámbá uráawe Ísu siráiye.

¹⁸Ísu súwasa mono-káwáá-kwáásíyé ámáámba sun-kwáásíyé Ísuna ámááyu-aimba kwésesa sáwíva-kwaasimo Ísun-aaimo ísámae kwéiyuntavai táátavai ésa Ísumba tuvuwónááon-amba kwéavakaa-uwasa

¹⁹enónkaꞌa Ísu kwená kwayó-kwáásíyé Yérúsaremu-naopaꞌa tuwésa kuráawe. taaigó aáyánkarain-kwasai.

²⁰Ísu kwená kwayó-kwáásíyé kogwaésa usásinesa aampaꞌá kumbá víki-taima awánomba ánúka toꞌmai amápaꞌa móayankagurowana

²¹Pítaa Ísumo sún-aimba áákaꞌa maréna séna awánaao. aaimó simámakaanda-taima áꞌa aáyánkagwiye súwana

²²Ísu séna Áánútunkaꞌa aráápamai máéro.

²³áraiꞌa simátimeꞌa séꞌa maanómátáváímo séꞌo iré mapámbai nompáꞌá kumuwómó síyawai ímo kaer-ímáyáámó tokésamo súndantemba áraiꞌa íníye síyanamo éna áraiꞌa mirá íníye.

²⁴mindáyavai Áánútumpaꞌa námúnaa séꞌa óꞌon-oꞌon-tantaatavai áísaa eꞌa sembá áraiꞌa Áánútu kanaán-umai súwaꞌnaa umásinkaiye sembá kanaán-umai kwétuwaꞌnaa-iye.

²⁵Áánútumpaꞌa námúnaa sembá sáwíꞌo umátínkaraamba anondá sáwíꞌa ónaumne-imayaa íma éꞌa ivátuwaaro. mirámó íyanamo éna kentivo kwíyómpakewai keinárawaꞌa sáwíꞌo kwéomba maitiyuwáníye. [

²⁶ánivo sáwíꞌo umátínkaraamba úwoimo imáyáamo úmae iyéꞌo ímo ivátuwaiyanamo éna kentivo kwíyómpakewai sáwíꞌo kwéomba íma maitiyuwáníye] Ísu siráiye. nááwa aiꞌmákaisa tiráano siráan-kwasai.

²⁷Ísu kwená kwayó-kwáásíyé ókwaraꞌa Yérúsaremu-naopaꞌa kumbá anóm-bonoꞌ-naumpaꞌa kwénaauwasa mono-káwáá-kwáásíyé Yútaa-anon-kwaasiye ámáámba sun-kwáásíyé Ísunopaꞌa tésa

²⁸sésa nááwa aiꞌmákaisa tiréwa nááwampinkena mairéwa asirayám-báyáí kwémayaanda simásimiyo suwaná

²⁹Ísu séna aivaꞌá moórá-aimba tísaa onaꞌá anondámo síyaꞌo éꞌa sísaa on-áímbá simátimenaumne.

³⁰ááéma Yóni nombá pétinkaraiwaima Áánútuwa simámakaisana nombá pétinkarai. kwaásiya simámakaawana nombá pétinkaraiyo súwasa

³¹miwímá keáímbá sésa nórayaawa sénaumno. Áánútu simámakaisana nombá pétinkaraiyemo senanayáámó éna nóra séra Yónin-aaiyavai íma áraire siráao síníye.

³²kwaási simámakaawana nombá pétinkaraiyemo senasayáámó ésa úwoi-kwaasi sínkamonaaowe. úwoi-kwaasi sáwíva-kwaasi Yónintavai sésa Áánútun-aai simásimakaiwai uráiye kwésemba pósa áwááꞌa siyénááowe mirá keáímbá sésa

³³Ísuntavesa sésa emó sísaa ónda-ainta íma ísaraumne suwaná Ísu séna ímo simásimiyaꞌa nááwampinkena mairéraꞌi. asirayám-báyáí kwémayaunda-aimba íma simátimenaumne Ísu siráiye.