Read Kosena Mááka 12 Bible Online

Mááka 12 - Kosena bible

Mááka 12

¹Ísu kwántámai-aimba simátimena séna moóráwai óntan-kurima úmakena ándá-aran-kigau úmarena ándá-arankona tááveꞌa úmarena ándá-arambo mapándáápá ínana anombó kumínín-taaveꞌa úmarena óntan-damba kígauvaꞌo taviyí-námbá úmarena ayáátáákaꞌa óꞌom-baravaꞌa koménae séna maankígáúráꞌó taviyíyawaimo éꞌa kesáváí évakar-aramba maéꞌa évakaꞌa kembá siyúwáaro simátimena óꞌom-bapaꞌa komáyáísana

²arambó ávumo kain-kánáá tisaná aanávómá kesí ándá-aramba komayaaó séna kwená kwayóꞌnáꞌá aiꞌmáráísana minkígáúráꞌó tavíyéwaitopaꞌa tisasá

³tátoꞌmai tuvúꞌmaresa ándá-aramba íma ámémba aiꞌmátuwaawana kówisana

⁴aanávómá moóráwaimba aiꞌmáráísana tisasá minkígáúráꞌó tavíyéwai tátoꞌmai aꞌnómbá tuvámbai sáwíꞌa umánkówana kówisana

⁵aanávómá moóráwaimba aiꞌmáráísana tisasá tátoꞌmai tuvúꞌmárááwana púwísana aanávómá moórá-mora-umai tiꞌmáráintemba tewasá tínkamba tinkamba kwéowasa évakaꞌa púwówasa évakaꞌa tayauwéráawana

⁶aanávómá kímborawai kwenááninkomba póna kwená imáyáama ámakaiwaima máyáimba ayáátáákaꞌa imáyáa eémena kesááninkon-aai isánááowe séna aiꞌmáráísana

⁷tisasá minkígáúráꞌó tavíyéwai awánésa keáímbá sésa aanávómbá ááninko kwétimba póta tuvúwónana puwéna maankígáú íma mayáínata kesáá mayánáe sésa

⁸tátoꞌmai tuvúwówana púwísasa maimái aaumépaꞌa tukáawe.

⁹Ísu mináímbá simásuwena séna minkígáúgó aanávómá mirá íníye. téna kígauraꞌo tavíyéwaima tínkaminasa puwíyana óꞌonkaa-kwaasi kesí kígauraꞌa tavíyéro síníye.

¹⁰Áánútun-aai aúváívimba awánaraawe. maarán-áímbá agaimaréna sénaóntan-damba on-kwáásí moórá-ontantavesa sáwíꞌa kwéiye sésa maisukáawe. aáno minóntánkó ávonkaamba uráiye.

¹¹mindá Ísóigo isatá awánéta séta óꞌoran-kaweꞌa uráiye kwésune agaimaréna siráiye Ísu súwasa

¹²mono-káwáá-kwáásí mináímbá isésa kentááyáváíyá siyé sésa tátoꞌmai tuvuwónáe sésa umbá amápa-kwaasiyavai tááꞌa kówasa ivátuwesa kuráawe. táákísi-aintavai áísaa uráan-kwasai.

¹³mono-káwáá-kwáásí kwésa Ísumba áísaa íyana sáwí-aimbo sínasa aaivimbá mayankánááontavai ámáán-kawaa-kwaasivinkemba évakarawaiye Éróti amááraawivinkemba évakarawaiye tiꞌmárówasa

¹⁴Ísunopaꞌa tésa sésa anóndakoo árai-kwaasi po kwaási táároi íma inkaisé anón-kwaasiye úwoi-kwaasiye táároi íma inkaisé tirumbá airáꞌmái-aimba íma séma Áánútuna aambó kwáráan-aimba arupí umái kwésimatimendaya ísaraumne. emá nóra se kwéisaano. kanaarátááwá táákísi-ontamba Árómáani-kamaani-kwaasiya timénaum. íya timénaumno. timénaundaya Yútaa-kwaasiya kentáásí ámáána araaisénaundayaꞌiyompo

¹⁵timénaum. íya timénaumno suwaná Ísu miwí tááma iséna kaumbo-káér-ainkwara-kwaasin-owe séna kentáváí sáwí-aimbo síndawe séꞌa kwésisaa-owe. moórá-ontamba maimái máagaraasinkaaro súwasa

¹⁶maimái máagaraarankowana séna nááwa óikaana uráinkara áwíꞌa kwáyáiyo súwasa miwí sésa Árómáani-kamaani-kawaanako óikaamba isaná áwíꞌa kwáyáiye suwaná

¹⁷Ísu séna Árómáani-kamaani-kawaanakondei kwembá áméro. Áánútundei Áánútumba áméro súwasa mináímbá ísówana tááꞌa kówasa íma aaí siráawe. pukémpinkemba usásinanaaon-kwasai.

¹⁸suwasá Sátúsi-monor-aimbo sun-kwáásí púwómpinkemba íma usásinanaaowe kwésun-kwaasi pósa Ísunopaꞌa tésa sésa

¹⁹anóndakoo naaóváꞌá Mósesi séna moóráwai aaraí maimakéna iyámpói íma ankéna púwísana ávákoma maimakéna awaaóná anondáwe séna iyámpói ankáníye siráiye.

²⁰moórá-aimba isaaó. moórá-tawai avakaeté-avarawainonda mésa tuwaaómá aaraí maimakéna iyámpói íma ankéna púwísana

²¹kwenánaaenkewai kwareꞌá maimakéna iyámpói íma ankéna púwísana kwenánaaenkewai kwareꞌá maimakéna iyámpói íma ankéna púwísana mirá eémesa

²²avakaeté-kwaasi putásaawana minínímbá naaémba pukáiye simásuwesa

²³Ísumba áísaa esa sésa mirámó ombá kwaásimo puwíyampinkembo usásinaiya-tawai minínímbá avakaeté-kwaasi tuwainímbá póna nááwa mayáníyo suwaná

²⁴Ísu séna Áánútun-aai aúváívimba agaimakón-aimba íma kaweꞌá umái iséꞌa Áánútuna asirayámbá íma awánéꞌa póꞌa miráumai sáwísawaa-aimba kwésewe.

²⁵pukémpinkemba usásinesa kwíyómpaꞌa uménaaon-kanaa aaraí íma mayáíyasa kwaaí íma mayáíyasa ésa Áánútuna kwayóꞌnárawaꞌo kwíyómpaꞌo máéwaimo ontembá minínínákwáꞌá miráumai aaraí íma mayáíyasa kwaaí íma mayáíyasa ónááowe.

²⁶kwaási pukémpinkemba usásinaaomba Mósesi mináíntáváí agaimakáiye. aúváívimba agaimaréna séna áru-tairaꞌa iramá kaimbá íma mintáímá kágwisana mintáívínkémbá Áánútu Mósesintavena séna Áánútu úne. enaíkwáꞌná Ááváramune Áísákaane Yákópone miwítí Áánútu úne siráiye. Áánútu mináímbá siráimba minkáúmbó-kwáásí áꞌa púwúwasa utamántínkaraambanivo

²⁷mináímbá siráimba pósa miwí úwoi máyáawe. ánivo kentááima sáwísawaa-aimba siráawe Ísu siráiye. aivar-ámáánkóná kwaasái.

²⁸súwana ámáámba sún-kwaasigo ména amápa-kwaasimo sumbá iséna Ísuna usáyaaitamai-kwasai iséna Ísumba áísaa ena séna Áánútuna ámáámpinkemba nóran-amaana aivar-ámáámbán-iyo súwana

²⁹Ísu séna aivar-ámáámbá sénaumpo Áánútun-aai aúváívimba agaimaréna sénaÍsareri-kwaasi maísáaro. Áánútu kentáásí Ísóigo éna mimbórá-Ísóígómán-iye.

³⁰Áánútumpaꞌa kentí Ísóigomba kentiruné kentí imáyáawe kentimané kentí asirayáné áméro agaimaréna siráiye.

³¹miwá ánaaenken-amaamba sénaumpo ísáaro. Áánútun-aai aúváívimba agaimaréna sénakesáváí-ímáyáámó ontembá kentíkwaásiti imáyáagwaraꞌa oró agaimaréna siráiye. minkáér-ámáánkómá amápar-amaamba usáyaaitaraiye Ísu simámuwana

³²minkwáásígó séna anóndakoo áraiꞌa sénda Áánútu kweyáá Ísóigoman-ivo óꞌon-oꞌon-isoima íma máyáawe.

³³kesáámá Áánútumpaꞌa kesirumbá imáyáama kesí asirayámbá kwempáꞌá tuwéta mirá onó. kesáváí-ímáyáámó úndantenta kesí kwaásiti imáyáagwaraꞌa onó. minkáér-ámáánkómá amápar-amaamba usáyaaitaraiye. toómbá sipisípima iravímbá agaimái Áánútumba amúndanivo mindágwaraꞌa usáyaaitaraiye séna

³⁴mindáꞌó súmba kawer-ímáyáávínkémbá súwana póna Ísu iséna séna Áánútumo kawááimba kwená egwaaꞌá máyáane súwasa ísómba Ísun-aaiyavai tááꞌa kóntavai íma áísaa úmaesa iráawe. Áánútumo usásinankaiwai Káráísitina kwaasái.

³⁵íma áísaa úmaesa íyúwana Ísu anóm-bonoꞌ-naumpaꞌa uména kwésimatimena séna ámáámbo sen-kwáásí sésa Káráísitima Tévíti-andaraken-kwaasiman-iye kwésevo

³⁶naaóváꞌá Áánútun-amanko Tévítimba imáyáa amúwana Tévíti Káráísintavai séna kesí Ísóigoman-iye siráimba monor-ímá agaimakón-auvaivimba Tévíti agaimaréna sénakesí Ísóigontavena Áánútu séna kesiyáánúrapaꞌa asirayán-áyámpáꞌá maraꞌá ménaꞌa ená namuro-kwáásí usáyaaitaanasa miwí ánásanaaowe Áánútumo siráin-aimba Tévíti siráiye.

³⁷miráumai Tévíti Káráísitintavai séna kesí Ísóigoman-iye siráimbanivo nóraumaiya kwemá Tévítin-andaraken-kwaasiman-iye Ísu súmba Káráísiti Tévítina Ísóigoma éna Tévítin-andaraken-kwaasigoman-iye. úwoi-kwaasi amápaꞌa Ísun-aai isésa aamoí uráawe. ámáámba sen-kwáásítí aambá kwáráavo siráin-kwasai.

³⁸úwoi-kwaasi amápaꞌa Ísun-aai isésa aamoí kwéuwana Ísu kwésimatimena séna évakaꞌo ámáámbo sen-kwáásítí aambá kwáráavo. minkwáásí ayáátáár-ampantama iyésa naaópaꞌa avuvumpaꞌá kwénaauwasa pósa kwaási tuwánésa sésa anón-kwaasin-owe kwésewe.

³⁹minkwáásí monoꞌ-náúmpáꞌó umáyáapaꞌo anón-kwaasimo maí-áyámpáꞌá umésa tanómbo kaúvópaꞌo máyáapaꞌa kawer-áyámpáꞌá mésa kawe-tómbá kwénaawe.

⁴⁰minkwáásí ketor-íníntí óísankwara naankwaráꞌá umóyámbá kwémaesa kwaási suwánésa súwíꞌa mósá maráígwáe sésa kampakómbá tavisimái-namunaa kwésewe. mirámó owáíná anondá umbai-yántááꞌá mayánááowe Ísu siráiye. ketor-ínínkó Áánútumpaꞌa óntamba tukáin-kwasai.

⁴¹simásuwena Ísu anóm-bonoꞌ-naumpaꞌa ména óntambo túwón-anaveunkona egwaaꞌá ména tuwánómba kwaásiyomba tésa óntamba túwómba sáwívar-oisankwara-kwaasi sáwívar-ontamba túwówana

⁴²moórá-ketor-ininko íma óísamba makón-ininko téna sáwíyan-ontamba kae-tóyáráámbá tuwówana

⁴³Ísu kwená kwayó-kwáásí tááyena séna áraiꞌa simátimeꞌa séꞌa minkétór-ínínkómó túwáin-ontankoma amápa-kwaasimo tukáan-ontamba usáyaaitaiye.

⁴⁴miwímá sáwívar-oisampinkemba évakaꞌa tukáavo kwemá sáwíyan-oisampinkemba mútúꞌa túwáimba póna óísan-iyaaimba méniye Ísu siráiye.