Read Kosena Mááka 14 Bible Online

Mááka 14 - Kosena bible

Mááka 14

¹Ísu mináímbá simátimuwana naaóváꞌó Áánútu Yútaa-kwaasi tíyótaasa í-tánómbá ímo intóráin-tantaakwara-pereti kwéagayon-kanaama ayúnkaraamba kauvónaumpo sésa kae-táwaima úwoi mésa mono-káwáá-kwáásíyé ámáámba sun-kwááíyé sésa nóraumaiya Ísumba aúpáꞌá tátoꞌmai inkamónaundayaꞌiyo.

²amápa-kwaasi ááiꞌa tíyáávainivo tanómbo kauvíyan-kanaaraꞌa íma tuvuwónaumne siráawe. Ísumba áséi-masawemba pérankarain-kwasai.

³suwaná Ísu Pétáni-naopaꞌa koména moóráwai áwíꞌa Sáímonina naaúmpaꞌa áúma kárúkokovaaꞌa uréna ánásarowaina naaúmpaꞌa ména toómbá kwénowana moórá-ininko iyéna áséi-kwiyumba úm-basawemba anón-ontankakemba meéyámbakaim-basawemba maimaéna iyúmba minánávéúnkó óiꞌa móankaisuwena Ísu aꞌnómpímbá atímarowasa

⁴évakarawai keáímbá sésa áwááꞌa aéésa nóra séna mimbásáwémbá úwoi atíyankaiyo.

⁵mimbásáwémbó óꞌowimo timénamo anón-ontambo mairénamo ímo óísambo makáan-kwaasi tíméraambaniye sésa minínínkómbá áwááꞌa áúwana

⁶Ísu séna ivátuweꞌa íma áwááꞌa aééro. kaweꞌá umái pésinkaiye.

⁷ímo óísambo máráan-kwaasi keséma maíꞌmaiꞌa kwéiyaꞌa túwaꞌnaa ónáe séꞌa túwaꞌnaa ónááombanivo kemá keséma marapáꞌá íma maíꞌmaiꞌa ónaumne.

⁸minínínkómá kwená imáyáavinkemba kaweꞌá umái pésinkaiye. púwóndaraꞌa masawémba pésinkesa utamásinkanaaovo minínínkó áꞌa masawémba pésinkaiye.

⁹áraiꞌa súmpo maísááro. kesí áséi-aimba amápaꞌ-mapaꞌa kwésimatimewasa minínínkómá umásinkain-aimba kwésimatimiyasa táákaꞌa maránááowe Ísu siráiye. Yútási Ísuna kuntaruꞌá mairáin-kwasai.

¹⁰súwana Ísuna kwayó-kwáásí sísamaivakemba kaeꞌá kumbaimái-kwaasivinkemba moóráwai áwíꞌa Yútási moórá-awiꞌa Isakéríóti mono-káwáá-kwáásítópaꞌa kwéna séna túwaꞌnaa onaꞌá Ísumba tátoranaaowe súwasa

¹¹isésa aamoí kwéesa sésa mirámó inda-méyámbá óntanta aménaumne suwaná nóraumai Ísumba agaráátínkáanasa tátoranaao-imayaa ááimba ásámai uráiye. tíyótaasa í-tánómbá kauráan-kwasai.

¹²Yútaa-kwaasi ímo intóráin-tantaakwara-pereti kwéagayon-kanaa túntemba tíyótaasa í-tánón-kánáá sipisípi-araaꞌa tuvúꞌmái kwégauvunkaꞌa kwená kwayó-kwáásí Ísumba taáísaa esa sésa náávara tíyótaasa í-tánómbá kogauvónaundayaꞌiyo suwaná

¹³kaeꞌá tiꞌmaréna séna Yérúsaremu-naopaꞌa kwíyana moóráwaimo nonánámó maimaénamo kwíndawaimba kóánaaemba kwáráakaiyo.

¹⁴kwemó naaúmpaꞌo iyínanamo naankó avowámó máyáinakai kosimámekai anóndakoma áísaa ena séna kesí kwayó-kwáásíyé náán-ayampara tíyótaasa í-tánómbá nánaumno kwésiye kosimámékaiyo.

¹⁵kwemá avóvomayaaꞌ-nankomba anón-ayampaꞌa agaráátinkaniye. kísuvuꞌo umándanaaon-tantaaꞌa mimpímbá kwáyáiye. amápa-tantaaꞌa arúsámarekai minkáꞌá kausínkáakaiyo súwasarai

¹⁶mindárai isésarai Yérúsaremu-naopaꞌa kwésarai Ísumo sún-tantaaꞌa kwáyowasarai minkáꞌá tanómba mágauwankaraaiye.

¹⁷tanómba mágaumakoyasa enónkaꞌa Ísu kwená kwayó-kwáásíyé mindáúmpáꞌá umésa

¹⁸toómbá kwémandesa uwaná Ísu séna keinárawapinkemba moóráwai keséya toómbá kwénaiwaima kembá namuro-kwáásíráꞌá agaráátinkaniye súwana

¹⁹tirunkó umbaí tówasa moórá-mora-umai áísaa esa sésa kewáꞌiyo sinté kuwaná

²⁰Ísu séna moóráwai kwená toón-ayai maimaéna kesé moórá-taavepimba tuꞌmái náíndawai kwemá kembó namuro-kwáásíráꞌó agaráátinkaniwaiman-iye.

²¹naaóváꞌá Áánútun-aai aúváívimba agaimaréna séna kwaási úrandako kumpaáríndawai puwíníye siráintemba póꞌa púwónana namuro-kwáásíráꞌó agaráátinkaniwai sáwí-meyamba mayáníye. kwembó ímo maránkaraankakaankasi kaweꞌá isinó Ísu siráiye. Ísu kwená kwayó-kwáásí toómbá tímakain-kwasai.

²²súwasa toómbá kwénowana Ísu péréti maisoréna Áánútumpaꞌa súwi séna topámbai tímatuwena séna mindá kesúman-ivo maimái naaró séna

²³ándá-aran-dombo kwáyon-anaveumba maisoréna Áánútumpaꞌa súwi séna timúwasa amáparawai nowaná séna mindá kesí naaemán-iye.

²⁴kesí naaemá sáwívarawaiyavai kumínímba póna Áánútu kesé tarúmai máyáawe séna mináúná-áímbá simái tarúmakaiye.

²⁵simátimeꞌa séꞌa ókwaraꞌa ándá-aran-domba íma nánaumpo Áánútu kwená kwaási kwégawaaipaꞌa méꞌa ándá-aran-domba aúná-nomba nánaumne Ísu súwasa

²⁶Áánútuntavai ísámai monor-ímá simásuwesa mindáúmpáꞌá tuwésa Óríve-omapaꞌa iráawe. Pítaa ánaaemba umásinkaniye siráin-kwasai.

²⁷Óríve-omapaꞌa umáyówana Ísu simátimena séna Áánútun-aai aúváívimba agaimaréna séna Áánútu sénasipisípiraꞌo kawááiwaimba tuvúwónana puwínasasipisípiyomba kóyáwé ónááowe Áánútu siráiye siráimba póna tááꞌa káínaꞌa siyuwéꞌa kóyáwé ónááowe.

²⁸ánivo púwónasa utamásinkaiyaꞌa usásineꞌa kentí aivaꞌá Káríri-ayamapaꞌa konaꞌá kesínaaemba kónááowe Ísu súwana

²⁹Pítaa séna amáparawai auwésa kóyáwé íyambanivo kemá íma mirá ónaumne súwana

³⁰Ísu séna áraiꞌa simámeꞌa séꞌa ívéꞌ-noꞌwaamba kokórigo íma kaekáꞌá áái siráindaraꞌa emá kaumboráꞌá kentáváí se íma awánáúnda-kwaasiye síníyone Ísu Pítaantavai súwana

³¹Pítaa asiramái séna entémo sínkamonae íyaꞌo éꞌa íma auwéꞌa kónaumne súwasa kwená kwayó-kwáásí amápaꞌa mirá simásaraawe. Ísu Kétésémanivaꞌa námúnaa siráin-kwasai.

³²amápaꞌa mirá simásuwesa Ísuwe kwená kwayó-kwáásíyé taai-kanáágúnéyómbá áwíꞌa Kétésémanivaꞌa komésa Ísu simátimena séna maankáꞌá máyaiyaꞌa Áánútumpaꞌa námúnaa kosénaumne séna

³³Pítaawe Yémésiye Yóniye tíꞌmaena komáyowana umbai-yántáákómá arumbá sáwíꞌa kwéuwana

³⁴simátimena séna kesirunkómá umbaiyé taisaꞌá póꞌa puwóraꞌnaraamba umái máyaumne. maankáꞌá méꞌa kárákwimai máéro séna

³⁵tiyuwéna egwaaꞌá kwéna Áánútu anóndaꞌan-iye séna maraꞌá kumbaéna námúnaavinkemba séna kesivoó amápa-tantaaꞌa kanaán-umai kwéonda po kanaán-iye sémo e maanúmbáí-yántááꞌó kesópaꞌo tínímba maisiyuwéma ánivo kesí imáyáa íma kwarénaꞌa ená imáyáa kwáráano Ísu siráiye.

³⁷Ísu námúnaa simásuwena kwená kwayó-kwáásíráútópaꞌa téna tayuwánómba tuún-kwaigurówana tayúsena Pítaantavena séna Sáímoniyo aún-kwaiguréma íma kanaaráꞌá sáwíyankaꞌa kárákwimai máyáane.

³⁸Sáátáánigo tísaa umai isánáe-aimba kentópaꞌa síyáváínivo Áánútumpaꞌa námúnaa seró. imáyáago kató isaná áúgomo umbaimó taimbá mindá aúgávaaꞌa kwéiye simásuwena

³⁹moórágwaraꞌa tiyuwéna egwaaꞌá kwéna kéꞌnaamba Áánútumpaꞌa námúnaa kosimásuwena

⁴⁰kwená kwayó-kwáásítópaꞌa téna tayuwánómba tuún-kwaigurésa túgávaate kwéuwasa nóran-ainaꞌi. anondá íma simámuwana

⁴¹tiyuwéna kéꞌnaamba námúnaa kosimásuwena koyauweréna minkáúmbónárauyavai séna tuúmó kwaiguréꞌo máyáamba áꞌanivo kemá kwaási úrandakomba sáwíꞌo kwéon-kwaasiraꞌa agaráátinkainasa tátoranaaon-kanaa kwétivo

⁴²usásinewata kwétiyapata konó. kembó agaráátinkaniwai kwétiye Ísu siráiye. Ísumba tátokaan-kwasai.

⁴³Ísu mináímbá kwésuwana kwená kwayó-kwáásí sísamaivakemba kaeꞌá kumbaimái-kwaasivinkemba moóráwai áwíꞌa Yútási túmba kwesé sáwíva-kwaasi taánasatagwara ánáyatankwaraꞌa maimaésa tumbá mono-káwáá-kwáásíyé ámáámba sun-kwáásíyé Yútaa-anon-kwaasiye miwímá tiꞌmárówasa tumbá

⁴⁴ááéma Yútási Ísumbo agaráátinkanintavai simátimena séna paruvará umánkáandawaimba tátoꞌmai áíꞌmaeꞌa tavíꞌmaeꞌa koró siráimba

⁴⁵póna Yútási Ísunopaꞌa téna séna anóndakoo máyaano kwésena paruvará kwéumankowasa

⁴⁶kwesé tuwáí Ísumba tátórówana

⁴⁷Ísuna kwayó-kwáásívínkémbá moóráwai taánasatama maimaéna aivaꞌ-mónó-káwáánákóná kwayó-kwáásígó ááꞌa agáúsuwowana

⁴⁸tun-kwáásíyávéna séna kentáváí umóyán-kwáásímán-iye séꞌa póꞌa taánasatagwara ánáyatankwaraꞌa maimaéꞌa kembá tátoranae séꞌa kwétewe.

⁴⁹sáwíva-tawai anóm-bonoꞌ-naumpaꞌa kesé méꞌa kesáái kwésimatimundaraꞌa íma kembá tátokaawe. naaóváꞌá Áánútun-aai aúváívimba agaimakáan-aimba kembó mirámó umásínkéneꞌa kwétewe súwasa

⁵⁰kwená kwayó-kwáásí amápaꞌa inkaisésa auwésa kóyáwé uwasá tun-kwáásí Ísumba áíꞌmaesa kwéguwana

⁵¹moórá ívé-kwaasigo ampaantawé suꞌmai úsúrena Ísun-ánaaemba kwéguwasa tátorankowana

⁵²ampaantamá kwatuwéna kwátóiyaaimba kuráiye. anón-kwaasi Ísumba aaí simánkaraan-kwasai.

⁵³kúwasa Ísumba tátorowai áíꞌmaesa aivaꞌ-mónó-káwáánákóná naaúmpaꞌa móankesa mindáúmpáꞌá mono-káwáá-kwáásíyé Yútaa-anon-kwaasiye ámáámba sun-kwáásíyé torupamái máyón-daumpaꞌa móankowana

⁵⁴Pítaa tínaaemba nénkaꞌa teémáyomba aivaꞌ-mónó-káwáánákóná máápar-ontavinkemba iréna naamaúvaꞌa ména i-kwáásíyé iraráꞌá koména irá kwégauviye.

⁵⁵Pítaa irá kwégauvuwasa mono-káwáá-kwáásíyé Yútaa-anon-kwaasiye amáparawai Ísumba tuvuwíyana puwíní-ainkona ááimba avakáá-uwana íma kwáyowasa

⁵⁶Ísuntavesa mósi-mesi-aimba sésa íma moórá-aimba suwasá

⁵⁷évakarawai usásinesa kampaꞌá sésa

⁵⁸kwemó sisatáámó isáúndaya anóm-bonoꞌ-namba kwaási uráan-damba tawísíyuweꞌa kaumbo-táwai kwaisuwéꞌa kwaásimo ímo íyan-damba ónaumne siráiye suwasá

⁵⁹minkwáásí íma moórá-aimba suwaná

⁶⁰aivaꞌ-mónó-káwáánákó usásinena Ísumba áísaa ena séna simánkáan-aimba anondá íya síníyono súwana

⁶¹Ísu iséna íma aaí súwana aivaꞌ-mónó-káwáánákó áísaa ena séna kesáámó áwíꞌo mósá maráúndawai ááninko e Áánútumo usásinankaiwai Káráísitiyaꞌona simásimiyo súwana

⁶²Ísu séna kemá úne. suwánáínaꞌa kemá kwaási úrandako Áánútu asirayáwáímá ayáánúrapaꞌa asirayán-áyámpáꞌá uméꞌa ainámpímbá kumónaumne Ísu súwana

⁶³aivaꞌ-mónó-káwáánákó arumbá sáwíꞌa kwéuwana kwená unáánkwátói tarátuwena séna Áánútumba akáꞌáámba simánkena kwesáváí simbá póta mináíntáváí aaivimbá mayankéta óꞌon-aimbo simánkáamba avakáá únda póta ivátá tuwéta

⁶⁴Áánútumbo simáímo sáwíꞌo umánkáintavaiya nóraya ónaumno súwasa sáwíꞌan-ivo tuvuwíyana puwíno sésa

⁶⁵Ísumba tuwirááíma kwirankésa aúrampaꞌa ampantanéí káátamakesa kwétuvuwesa sésa esáváí se Áánútu usásisinkaiwai úne séndawai ómpo kemá nááwa kwétuvuwuna simásimiyo kwésuwasa i-kwáásí áíꞌmai tiyáándei tuvúkáawe. Pítaa íma awánáúnda-kwaasiye siráin-kwasai.

⁶⁶Pítaa naamaúvaꞌa ména iraráꞌá kwégauvuwana aivaꞌ-mónó-káwáánákóná kwayór-árásígó téna Pítaamba takarákéna séna Ísu Násáretivakewaise maéndawai óne súwana

⁶⁸emó sénda-aimba sáákoma íma kaweꞌán-iye simásuwena máápar-ontavimba komáyowana

⁶⁹minárásígó moórágwaraꞌa awánéna máyón-kwaasiyavena séna evíwána kwaásivinkendaꞌan-iye súwana

⁷⁰moórágwaraꞌa Pítaa séna ímaniye simásuwena máyowasa sáwíyankaꞌa máyómba Pítaantavesa sésa áraita súne. Kárírivakendaꞌa po kwená kwayó-kwáásívínkéndáꞌá óne suwaná

⁷¹Pítaa aikaꞌá maréna séna kampar-áímbó kwésenanamo éna Áánútu sínkaminiye. síyawaimba íma awánáúndanaꞌan-iye kwésuwana

⁷²kokórigoma moórágwaraꞌa áái súwana Pítaa Ísumo simámun-aimba áákaꞌa maréna mirá siráinkaꞌa kokórigomo kaekáꞌó ááimo ímo siráindaraꞌa emá kaumboráꞌá kentáváí se íma awánáúnda-kwaasiman-iye síníyone siráimba mináímbá áákaꞌa maréna ávááraumai iviꞌá taráiye.