Read Kosena Mááka 4 Bible Online

Mááka 4 - Kosena bible

Mááka 4

¹ókwaraꞌa Ísuma Káríri-nonkwaaunkon-awampaꞌa koména aaí kwésimatimuwasa sáwívarawai tóyo ésa kwená egwaaꞌá tamáyóntavena nompí-sípívímbá usámaaisena máyowana nompí-sípímá kwaaún-avovomayaaꞌa kwáyowasa minkwáásíyómbá nonkwaaúnkón-awampaꞌa máyówana

²óꞌon-oꞌon-aimba kwántámai simátimena séna

³maísáaro. moóráwai ánáyumba maimaéna kígauvaꞌa kwégwena

⁴máyuꞌmaraisana évakar-anayumba aampaꞌá kunkwáyáísana numaómá túkúnasukaiye.

⁵évakar-anayumba óntankwaraꞌ-maravimba kunkwéna paákáꞌ-márávímbá póna avekáán-umai anón-isana

⁶aaꞌá kaisaná ánúꞌa ayáátáákaꞌa íma kunkéna aáyánkaguraiye.

⁷évakar-anayumba karaampimbá kunkwéna kárúraisana karaan-tantáákó araꞌnásúwáísana íma arambá iráiye.

⁸évakar-anayumba kaweꞌ-márávímbá kunkwéna kárúrena anón-éna arambá imái sáwívar-aramba iyéna évakaꞌa usáyaaitayan-aramba íyáísana évakaꞌa umaimái-aramba iráiye.

⁹kwéisaawai ísámai kaweꞌá oró Ísu siráiye.

¹⁰Ísu súwasa naaémba kwená kwayó-kwáásíyé évaka-kwaasiye mésa Ísuntavesa sésa minkwántámáí-áínkóná ááimba sinatá ísáano suwaná

¹¹Ísu séna Áánútu kwená kwaásimo kawááin-ainkona ááimba kwésimatimunda Áánútu keinárawaꞌa imáyáa tímísaꞌa kwéisaavo óꞌon-kwaasi kwántámai-aine suꞌmai kwésimatimumpo

¹²kwéisaambanivo íma ísámai kaweꞌá kwéowe.kwéawanaambanivo íma awánamai kaweꞌá kwéowe.isékai Áánútunopaꞌa tewaná Áánútu miwítísáwí-imayaa maitiyúwáísino. mindáyaveꞌa kwántámai-aimba kwésimatimune Ísu siráiye.

¹³Ísu simátímatuwena séna maankwántámáí-áímbó simátimunda íma isáíyankakemba póꞌa óꞌon-oꞌon-kwantamai-aimbo sendá íma isánááowe.

¹⁴mináínkóná ááimba súnda ísáaro. moóráwaimo ánáyumbo tuꞌmáráinten-umai Áánútun-aai simátímísana

¹⁵évakar-anayumbo aampaꞌó kúmímba kwaási tirumpintá kúmísasa Áánútun-aai ísáawana Sáátáánigo téna tirumpinkémbá maimái úwoivaꞌa kwétiyuwaiye.

¹⁶évakar-anayumbo óntankwaraꞌ-maravimba kúmímba kwaási tirumpintá kúmísasa avekáán-umai Áánútun-aai isésa aamoí ombánivo

¹⁷íma tirumpimbá tátoꞌmai kaweꞌá owasá Áánútun-aaiyavai umbai-yántááríꞌa umátinkaantavai Áánútun-aai ivátukaawe.

¹⁸évakar-anayumbo karaampimbó kúmímba kwaási tirumpintá kúmísasa Áánútun-aai ísáámbanivo

¹⁹marapár-úmbáí-yántáátáváí imáyáa úmae naaésa óísan-imayaa úmae kwénaaesa óꞌon-oꞌon-tantaaꞌa mayánáe kwésimae naaésa mirán-ímáyááó Áánútun-aai káátasuwaisasa íma Áánútuna mayáí kwémayaawe.

²⁰évakar-anayumbo kaweꞌ-márávímbó kúmímba kwaási tirumpintá kúmísasa Áánútun-aai isésa tirumpimbá tátoꞌmai kaweꞌá ésa asiramái mésa Áánútuna mayáí kwémaesa kwétuwaꞌnaa-owasa évakarawai usáyaaitamai-mayai kwémaesa kwétuwaꞌnaa-owe Ísu siráiye. oómbá kúrakain-kwasai.

²¹Ísu simásuwena séna oómbó kúraꞌmaraamba íma aúpáꞌá marésa íma aasípáa-amendaampaꞌa marésa avoraꞌá mósá kwémaraawe.

²²mirámó onten-umái aúpáꞌó kwáyáin-tantaaꞌa amápaꞌa avoraꞌá paárínasa awánanaaowe. túnkaipaꞌa kwáyáin-tantaaꞌa avoraꞌá paárínasa awánanaaowe.

²³kwéisaawai ísámai kaweꞌá oró.

²⁴tíménten-umai Áánútu miráumai tiména moórágwaraꞌa timíníye. mindáyaveꞌa ísáan-aimba imáyáa umái kaweꞌá oró.

²⁵Áánútun-aaimo ísámaimo kaweꞌó kwéowai Áánútu túwaaꞌnaa ínasa moórá-ainkwaraꞌa isánááowe. Áánútun-aaimo ímo ísámaimo kaweꞌó kwéowai tirumpinkémbá maimayáínana íma kwéniye. mindáyaveꞌa ísáan-aimba imáyáa umái kaweꞌá oró Ísu siráiye. ánáyumba tukáisana arambá iyáin-kwasai.

²⁶Ísu simátimena séna Áánútu kwená kwaásimo kwégawaain-aimba maarán-áímbán-iye. moóráwai ánáyumba tuꞌmaréna

²⁷íma áwaꞌnaa ena kwaéna iraréna kwéisana ánáyumba kweyááríkaꞌa kwéanon-iye.

²⁸maragómá ánáyunkomba áwaꞌnaa isaná áruma kwíkéna anón-umai arambá iréna

²⁹ávuma kaisaná ákáꞌnanaaon-kanaa tisasá ákáꞌmai kwénaawe Ísu siráiye. taaérankona kwaasái.

³⁰Ísu séna Áánútu kwená kwaásimo kwégawaaimba nóinkara kwégawaaiyompo maarán-áímbá simátíménaꞌa isánááowe.

³¹Áánútu kwená kwaási kwégawaaimba maarámán-iye. sáwíyan-taeranko áwíꞌa másátati mintáígó arambá ímo aneꞌó awánaraan-taeramba maravímbá uꞌmakáawana mimpínkémbá kwíkéna

³²anón-taima anón-éna amaimá anón-amaima móivarena kóyáwé uráisana numaómá mimpímpáꞌá ánáamba úmarena kwémaiye Ísu siráiye.

³³Ísu kwaásiyomba aaí simátimenae sénamo úmba íma avoraꞌá siráivo kwántámai-aine suꞌmai simátimuwasa taaímbai súntemba móisaiyuwowana mináyáírákémbá simátimuwasa móisowana miráumai simátimena ánivo kwená kwayó-kwáásí kwesé máyonkaꞌa mináínkóná ááimba simátímaꞌmae iráiye. anón-unda torówana Ísu maivairáin-kwasai.

³⁵mitáwai enónkaꞌa Ísu kwená kwaásiyavena séna nonkwaaúnkóná menávápátá kónáe súwasa

³⁶óꞌon-kwaasi tiyuwésa Ísumba áíꞌmaesa nompí-sípívímbá usáatesa kuwasá évakaꞌ-nompi-sipigwaraꞌa kumbá

³⁷Ísu misípígó ayááíváꞌá aún-kwaigurówana anón-unda torówana nonkó tuvántááva éna nompí-sípívímbá ógwitowasa kunávekunavo sésa inkaisésa Ísumba koaúsesa sésa anóndakoo kesí imáyáa íma inatá puwúnavaiya súwaꞌnaa uwo suwaná

³⁹usásinena asiramái séna úndáonte nonkóntéyavena maiváyáakaiyo súwasarai úndáoe nonkóe maiváyóyana nonkómá kararépaguwana

⁴⁰Ísu simátimena séna nóintavaiya kwéinkaiseo. kentávéꞌa nóra séra íma kesí imáyáa onkákémbá kwéseo súwana

⁴¹tááꞌa kówasa keáímbá sésa nóran-kwaasiya énawa úndáoe nonkóe kwenáái kwéisaiyo sésa tiyáámba uvakésa táátavesa ésa siráawe.