Read Kosena Mááka 6 Bible Online

Mááka 6 - Kosena bible

Mááka 6

¹minkákémbá Ísu kwenamáápaꞌa kwéena kwená kwayó-kwáásíyé kumbá

²Yútaa-kwaasi monor-áímbá kwéison-kanaaraꞌa monoꞌ-náúmpáꞌá iyéna aaí simátimuwasa sáwíva-kwaasi isésa táátavai ésa sésa náávakena kawer-ímáyáá mairéna kawer-áímbá kwésimasimenayaawa nááwawa asirayámbá ámísana kaweꞌ-máyáí ímo awánáúnda-mayai kwémayaiyo.

³kwentáámó awánáúnda taaineí évaka-tantaaꞌo kwéiwaiman-iye. Máríyaa áánimba éna Yémési Yósisi Yútási Sáímoni tuwaaómán-iye. kwenáúnavaꞌa maankáꞌá máyáawe. maankákéwáímá póna úwoi-kwaasiman-ivo náávakena mináímbá isénawa minásíráyámbá mairénawa kwésiyo sésa kayorésa tínaaemba umámúwana

⁴Ísu simátimena séna Áánútun-aai simátímíwai óꞌon-oꞌon-daopaꞌa kwénaaisasa kwenáwíꞌa mósá kwémaraavo kwená naaópaꞌa komáyáimba kwenamááraa sésa kesáámó úndanten-kwaasiman-iye sésa kwenáwíꞌa íma mósá kwémaraawe Ísu siráiye.

⁵kesáámó úndanten-kwaasima éna íma súwaꞌnaa íníye suntávéna ímo awánom-bayai moórá-mora-mayaiye suꞌmai mairáiye. moórá-mora tíꞌo ún-kwaasi tineꞌá ayáándei tátorena asóvamatinkena

⁶kwenamáápaken-kwaasi sésa íma súwaꞌnaa íníye sun-áíntávéna imáyáa uwááena naaóꞌ-naoꞌa Áánútun-aai simátímapaꞌa kuráiye. Ísu kwená kwaási mayáíráꞌá tiꞌmákain-kwasai.

⁷Ísu kwená kwayó-kwáásí sísamaivakemba kaeꞌá kumbaimái-kwaasi tááyowasa tuwaná kwaási tirumpinkémbá taraváá-kwámbá maitíyuꞌmaeꞌa nááóro-asirayamba tiména séna kaesé umásuweꞌa nááóro séna

⁸asiramái simátimena séna aampaꞌó kwíyamba íma moórá-yantaaꞌa maimaéꞌa koró. toómbá íma maimaéꞌa kwéꞌa toón-únámbá íma maimaéꞌa kwéꞌa óntamba íma maimaéꞌa koró. tááúmba vaimaéꞌa

⁹tísamai-anaamba kwimaéꞌa moórá-mora-umai unáánkwátói timantenká umái kuvéꞌmaeꞌa koró.

¹⁰Áánútun-aai simátimenaaontaveꞌa moórá-naopaꞌo kwíyasamo naambó timíyaꞌa mindáúmpáré suꞌmai méꞌa kentí mayáí maimái ánáseꞌa mindámbá tuwéꞌa óꞌon-daopaꞌa koró.

¹¹moórá-naopaꞌo kwíyambo naambó ímo timésamo kentááimo ímo isáíyanamo éna Áánútu mindáópaken-kwaasi íma aamoí umátinkanivo umásítaiꞌa éꞌa tísamaivakem-baramo uwáéntemba untéꞌa koró Ísu simátimuwasa

¹²kwená kwayó-kwáásí isésa naaóꞌ-naoꞌa kwénaaesa kosimátimesa sésa sáwí-imayaa tínaaemba umámeꞌa Áánútumpaꞌa teró sésa

¹³taraváá-kwántómbá kwaási tirumpinkémbá komaitiyuwésa tíꞌo ún-kwaasi taaéraampinken-domba atínkávaꞌa kuwasá asóvamatinkavaꞌa kuráawe. Yóni nombó pétinkaraiwai pukáin-kwasai.

¹⁴Ísuna mayáígón-áái símae íyúwana Káríri-marara-kawaanako áwíꞌa Éróti mináímbá ísarai. Ísuntavesa évakarawai sésa Yóni nombó pétinkaraiwai pukáimpinkemba usásinkena póna kwempímbá asirayámbá kwáyáísana mirám-báyáí kwémayaiye suwasá

¹⁵évakarawai sésa kwemá Áánútun-aai simátímakowai áwíꞌa Íráiyaa pukáimpinkemba usásinena máyáiye suwasá évakarawai sésa kwemá naaóváꞌá Áánútun-aai simátímakowairaamba máyáiye suwaná

¹⁶Éróti iséna séna kwemá Yóni nombó pétinkaraiwaiman-iye. kemá simátinkaunasa Yóni anumarambá arátúwááwana pukáisana usásinankaisana máyáiye Éróti siráiye.

¹⁷ááéma Éróti kwenáváko awainínkómbá áwíꞌa Erotíyasimba mairówana Yóni séna enáváko awainínkómbá aambá áúmbakaawa mayááne simásimaꞌa úwana Éróti tiꞌmarówasa Yónimba koáíꞌmaesa ándávimba máánkarowana Erotíyasima Yóni ááiyavena aaisambá séna inkamónáe súwana

²⁰Éróti séna ímaniye séna Yóni kawer-ímáyáágwárá-kwáásí úntavena Éróti kwenáároi inkaiséna kwenkáꞌá tavíkéna Erotíyasima inkámívo séna kwenkáꞌá tavíkéna kwenááima ísámai kaumbo-káér-imayaa umánkena aasiyaasí koísaraiye.

²¹ánivo naaémba Erotíyasina kanaamá túmba Éróti anón-tanomba kaumái kwená kawáá-kwaasi ááipin-anon-kwaasi Káríri-ayampaken-anon-kwaasi tímúwasa nowaná

²²Erotiyási ayáámúnko téna araimá marówasa Érótiye toómbá naráan-kwaasiye aamoí umánkówana Éróti minárásígóntávéna séna nóintantaatavena ankáíya simásímínaꞌa áméno séna

²³áraiꞌa súnda póꞌa sísainaꞌa áméno. kesí maramó arááímo táíndamo e sísainaꞌa tasá-áméno súwana

²⁴anówamba koáísaa ena séna nóintantaara komayánaumno súwana Yóni nombá pétinkaraiwai aꞌnómbá koáísaa-e mayaaó súwana

²⁵avekáán-úwana Érótinopaꞌa téna taáísaa ena séna ívéꞌa Yóni nombá pétinkaraiwai aꞌnómbá aráꞌmái táávepimba maré simiyó súwana

²⁶iséna arumbá kwéumbanivo aivaꞌá asirayán-áímbá siráin-aimba imáyáa éna toómbó naan-kwáásígwáráꞌá ísaraantavaiye séna íma aꞌáo sénáe séna

²⁷i-kwáásí moórá aiꞌmarówana ándávinkemba Yónimba anumarambá aráꞌmái aꞌnómbá

²⁸táávepimba maréna maimaéna minárásígómbá máamuwana maimaéna anówamba máamuwasa

²⁹Yónina kwayó-kwáásí isésa anómba komaimái utamánkaraawe. naaémba Éróti Ísuna mayáígón-áái iséna séna minkwáásígó Yóni nombó pétinkaraiwai éna pukáimpinkemba usásinankaisana máyáiye Éróti siráiye. Ísu sáwíva-kwaasi toómbá tímakain-kwasai.

³⁰Ísumo mayáíráꞌó tiꞌmákain-kwaasi mimbáyáí maisuwésa Ísunopaꞌa tésa amápaꞌ-mayaimo máyón-aimba aaimó sun-áímbá simámúwasa

³¹Ísunopaꞌa sáwíva-kwaasi kuré ire untávésa toómbá íma kaweꞌá umái nowaná mindáyavena kwená kwayó-kwáásíyávéna séna kwaásimo ímo máyaiyapata kométa agándaano súwasa

³²nompí-sípívímbá usámaaisesa kwaásimo ímo máyáapataawe sésa kuwasá

³³sáwíva-kwaasi tuwánésa aúyésa naaóꞌ-naokemba marapáꞌá kóyo uwasá Ísun-iyai nompí-sípívímbá kumbá

³⁴marapáꞌá ásávena misáwívá-kwáásí tuwánéna arumbá umátinkena sipisípi-poi-ayuraamba miwítí kawáá íma máyówasa kewé suꞌmai máyóntavena Ísu arumbá umátinkena ayáátáár-aai kwésimatimuwasa

³⁵enónkaꞌa kwená kwayó-kwáásí kwenópaꞌa tésa sésa íma sáwíva-kwaasi máyáapaꞌan-ivo enáíndaraꞌa

³⁶tiꞌmárénasa egwaaꞌ-náópimpaꞌa kwénaaesa toómbá meéyámbáráaro suwaná

³⁷Ísu simátimena séna kemá toómbá tíméro súwasa sáwívar-ontankaken-tomba 200 kinaaraken-tomba meéyámbaꞌmaiya timúsina. óntamba íma kwáyáiye suwaná

³⁸nóraumai-tona káyáiya koawánaaro súwasa koawánésa tésa sésa sáwíyan-tomba évaꞌaasei-tonkwara kaeꞌ-nóyáákwáráꞌá kwáyáiye suwaná

³⁹Ísu kwená kwayó-kwáásíyávéna séna inkwimaꞌmái maraꞌá máéro súwasa

⁴⁰moórávaꞌa 50 kwaasi máúwasa moórávaꞌa 100 kwaasi máúwasa miráumai-kwaasi kwimakówana

⁴¹Ísu évaꞌaasei-tonkwara kaeꞌ-nóyáákwáráꞌá maisokéna kwíyómpaꞌa karákéna Áánútuntavena súwi simásuwena mintómbá topán-topan-umai kwená kwayó-kwáásí timúwasa misáwívá-kwáásí tímúwasa noyááꞌa topán-topan-umai timúwasa misáwívá-kwáásí tímúwasa

⁴²amáparawai nowaná tímúꞌa vówasa sáwíva-kwaasi 5,000 kwaasi nowaná tímúꞌa vówasa kwená kwayó-kwáásí mintón-ayai sísamaivakemba kaeꞌá kumbaimái-unampimba áítumai ógwitaraawe. Ísu non-avóvomayaapaꞌa kuráin-kwasai.

⁴⁵áítumai ógwitowana minkákémbá Ísu kwená kwayó-kwáásí tiꞌmaréna séna kesí aivaꞌá nompí-sípívímbá usámaaiseꞌa menávápáꞌ-náópaꞌa Pétésáítavaꞌa koró. misáwívá-kwáásí kwétiꞌmareꞌa séꞌa kentí naaóꞌ-naoꞌa koró simátimenaumne séna

⁴⁶misáwívá-kwáásí tiꞌmarówasa miwítí naaóꞌ-naoꞌa kuwaná Áánútumpaꞌa námúnaamo síndayavena omápaꞌa umáyowana

⁴⁷noꞌwáámba aúkúwana Ísu kweyáá marapáꞌá máyowasa kwená kwayó-kwáásí nompí-sípívímbá non-avóvomayaapaꞌa máyówana maramá nénkaꞌa kwáyowana

⁴⁸Ísu awánómba anón-unda toꞌmaé kwétena misípí tayátoꞌmarowasa nombó tuwíntámaesamo kun-támayoꞌa nonkó tavímayowasa íma kumbá irataróꞌa Ísu non-avóvomayaapaꞌa kwénaaena kwená kwayó-kwáásímó máyónkaꞌa téna táyaaitaguwasa

⁴⁹awánésa táátavesa ésa tiyántámbá kwétowasa sésa kwaántáo kwénaaiye suwaná Ísu avekáán-umai séna tááꞌa kaivó aáno máéro. kemá úne séna

⁵¹nompí-sípívímbá usámaaisena kwegwáráꞌá umáyowana anón-undaoma maivaiyówasa táátavesa ávááraumai uwaná

⁵²íma táákoma kaweꞌá umái méra. sáwíyan-tompinkembo sáwíva-kwaasi taaín-timuwasamo nowáíná ááimba íma táákoma kaweꞌá umái méraawe. Ísu Kénésárétivaꞌa tíꞌo ún-kwaasi asóvamatinkarain-kwasai.

⁵³táátavesa ávááraumai ésa kwaaúnkóná menávápáꞌá Kénésáréti-maravaꞌa kumbá non-awámpáꞌá nompí-sípí ándánei avíkwímaresa

⁵⁴marapátá ásávowasa mimbápákén-kwáásí Ísumba aúyésa

⁵⁵naaóꞌ-naoꞌa simátimesa Ísumo tamaún-aimba isésa tíꞌo ún-kwaasi kúkutaavimba tíꞌmaesa tóyo uwaná

⁵⁶Ísu kítoꞌ-naoꞌa anón-daoꞌa kwaivá kwénaauwasa tíꞌo úwai tíꞌmai marukáꞌá marésa sésa ená unáánkwátói-araairaꞌa tátoraiyana tíꞌa étinkainkwae suwasá tátórówana tíꞌa étínkaraiye.