Read Kosena Mááka 7 Bible Online

Mááka 7 - Kosena bible

Mááka 7

¹ámáán-kawaa-kwaasiye ámáámba sun-kwáásíyé Yérúsaremu-naopakemba Ísumo máyopaꞌa tésa

²tuwánomba Ísuna kwayó-kwáásí évakaꞌa tiyáámba íma sese un-tíyáándéí toómbá kwénowasa

³Yútaa-kwaasi ámáán-kawaa-kwaasiye úwoi-kwaasiye tíkwáꞌnáí ámáámba kwáróntavesa tiyáámba sese umásukesa toómbá nésa

⁴máákétirakemba naaópaꞌa iyésa tiyáámba sese umásukesa toómbá nésa tíkwáꞌnáí ámáámba óꞌon-oꞌon-amaamba kwarésa tááveꞌa nonánámá anavéúmbá sese uráawe.

⁵ámáán-kawaa-kwaasiye ámáámba sun-kwáásíyé Ísunkaꞌa torupésa sésa ená kwayó-kwáásí nóra isasá kentáá síkwáꞌnáí ámáámba íma kwarésa tiyáámba íma sese ombá toómbá kwénaao suwaná

⁶Ísu séna kaumbo-káér-ainkwara-kwaasin-owe. naaóváꞌá Áánútun-aai simátímakowai áwíꞌa Áísáya keinárawatavena árair-aimba siráimba agaimaréna séna Áánútu sénamaawímá kesúwíꞌa tóikakene suꞌmai sésa kesí imáyáa íma tirumpimbá kwáyáiye.

⁷kwaásiti ámáámba simái paárombanivo Áánútuna ámáámban-iye kampaꞌá sembá miráráán-umai kesí imáyáa kampar-ímáyáá mósá kwémaraawe Áánútu siráimba aúváívimba agaimakáiye.

⁸Áánútuna ámáámba tuwéꞌa tíkwáꞌnáí ámáámba kwétoraawe.

⁹Áánútun-aai kwétuwaantavai miwá anondá kentááiyavai aamoí kwéowe.

¹⁰naaóváꞌá Mósesi séna kentinóvowi túwíꞌa anómba oró. ánivo anóvowimo sáwíkaambo simátinkaindawaimba tuvuwíyana puwíníye Mósesi siráivo

¹¹keinárawaꞌo siráamba moóráwai anóvowiyavena simátimena séna moórá-yantaaꞌa Áánútundeiman-ivo íma kanaán-umai timénaumne siréna

¹²anóvowima íma kwétuwaꞌnaa-iye. mirámó ontáváí kanaán-iye kwésewe.

¹³mirá-sáwíꞌó ontávéꞌa Áánútun-aai tuwéꞌa kentíkwáꞌnáí ámáámba kwégwareꞌa kentáái kwésimatimewe. mirárááníꞌa kwéowe Ísu siráiye. kwaásimo sáwíꞌo umátínkáin-tantaakona kwaasái.

¹⁴Ísu mináímbá simátímatuwena kwaásiyavena teró súwasa kwenópaꞌa tuwaná séna simátíménda iséꞌa kaweꞌá oró.

¹⁵máápaken-tantaaꞌo naawáí íma kwaási sáwíꞌa kwéumatinkaivo tirumpinkén-áínkó kwaási sáwíꞌa kwéumatinkaiye. [

¹⁶kwéisaawai ísámai kaweꞌá oró] Ísu siráiye.

¹⁷Ísu simásuwena minkwáásíyómbá mátiyuwena naaúmpaꞌa umáyowasa kwená kwayó-kwáásí sésa mináínkóná ááimba simásimiyo suwaná

¹⁸Ísu séna kenkwáráꞌá íma tááko pééi kwéisaꞌa méꞌa ísáambanivo íma ísámai kaweꞌá uráawe. máápaken-tantaaꞌo naawáí kwaási íma sáwíꞌa kwéumatinkaiye.

¹⁹mindá íma imáyáa kunkwaéna tindáámpaꞌa kunáyúsúgwinivo

²⁰aaimó kwésemba tirumpinkén-ímáyááó éna mindá kwaási sáwíꞌa kwéumatinkaiye.

²¹tirumpin-ímáyáávínkémbá sáwí-imayaa ésa tínkamiyasamo puwónááoniꞌa ésa aarai-úmóyámbá ésa kwaai-úmóyámbá ésa amápa-tantaaꞌa umóyámbá ésa

²²túran-anda ésa mirá-mira-sawiꞌa ésa kampar-áímbá sésa aosaambá kwimaé naaésa kaweꞌ-máyáímó kwémayaantavesa tirunkó simái sáwíꞌa kwéumatinkesa tívókariꞌa ésa uwoꞌaóríꞌa ésa

²³mirá-sáwíꞌó kwéomba tirumpinkén-ímáyááó kwaási sáwíꞌa kwéumatinkaivo tiyáámbo ímo sese ombó toómbó kwénaamba mindáo kwaási íma sáwíꞌa kwéumatinkaiye Ísu siráiye. ánivo Ísumo kwemó siráimba amápa-tomba kaweꞌá umái kwénaawe siráiye. Kénááni-maravaken-ininkona kwaasái.

²⁴Ísu mináímbá simásuwena kwená kwayó-kwáásíyé miváꞌá tuwéna Táyaa-naopare Sáítóni-naopare mináyámpáꞌá kúmba moórá-naumpaꞌa uména séna kemó tamaúnda íma simátíméro súwasa ánivo évaka-kwaasi tamáún-aimba ísówana

²⁵moórá-ininko ayáámúnko arumpimbá taraváá-kwámbá máyowana minínínkó Ísumo tamáún-aimba iséna avekáán-umai kwenópaꞌa iyéna maraꞌá kumbaéna

²⁶kwemá íma Yútaa-inimba póna Síriyaa-maravaꞌa Vínísiyaa-naopaken-ininko Ísunopaꞌa iyéna maraꞌá kumbaéna asiramái séna kesiyáámúnko arumpinkémbá taraváá-kwámbá mayauwaaó súwana

²⁷Ísu simámena séna aivaꞌá iyámpói toómbá timénaumne. iyámpóíti toómbá maimái iyámbá timúnavo miráumai Ísareri-kwaasimo túwaꞌnaa úndantemba emá óꞌonkaa-inimba ónda póꞌa áwaꞌnaa únavo kwésune súmbanivo

²⁸minínínkó séna anóndako áraiꞌa sémpo iyámpóíti toón-ayai iyánkó tamandáníye. miráumai óꞌonkaa-ininkoman-iye sinaná kanaán-ína súwaꞌnaa íníyone súwana

²⁹Ísu séna kawer-áímbá séndayavai enayáámúnko arumpinkémbá taraváá-kwámbá mayáúkaumpo ená naaópaꞌa kwaaó súwana

³⁰kwená naaópaꞌa kwéna koawánómba taraváá-kwámbá kóúrowana ayáámúnko kaweꞌá umái tuvaikáꞌá méraiye. Ísu sáwívarawai asóvamatinkarain-kwasai.

³¹Ísu Táyaa-naopar-ayampakemba Sáítóni-naopar-ayampaꞌa táúkúmaena Tékáporisi-ayampaꞌa táúkúmaena Káríri-nonkwaaumpaꞌa kúmba

³²évakarawai aívóꞌnaꞌa áíꞌmaesa tésa sésa enayáándei tátoꞌmai asóvamankaao suwaná

³³kwaásivinkemba áíꞌmai kweyáávaꞌa ankéna ayáánánánei áápimba maréna awirááíma kwiꞌmaréna amáávíraꞌa tátorena

³⁴kwíyómpaꞌa karákéna sirumbá kwéiye séna kwenááivinkemba séna epaata mináímbá kwántámai séna ááꞌo kaúnímba intíyuwaumne súwana

³⁵ááꞌa kaweꞌá úwana amáávíma etóyóí úwana aaí kaweꞌá umái súwana

³⁶Ísu asiramái séna íma simátíméro súwasa íma ísónkakemba simátímapaꞌa kuwasá

³⁷ísówana ávááraumai tááꞌa kówasa sésa amápa-tantaaꞌa kaweꞌá unté kwéiyena tááꞌo kaúnín-kwaasi kaweꞌá kwéumatinkena aaimó ímo kaweꞌó umáímo sen-kwáásí kaweꞌá kwéumatinkaiye siráawe.