Read Kosena Mááka 9 Bible Online

Mááka 9 - Kosena bible

Mááka 9

¹áraiꞌa simátimeꞌa séꞌa évakaꞌa maankáꞌó máyáan-kwaasi íma aivaꞌá puwéꞌa Áánútu kwená asirayándéí kwégawaaimba awánéꞌa naaémba puwónááowe Ísu siráiye. Ísu óꞌon-kuwawaaꞌa aúkáin-kwasai.

²Ísu mináímbá simásuwena avaꞌmoraé-noꞌwaamba kwaéna Pítaante Yémésinte Yóninte tíꞌmaena anón-omapaꞌa iyúmba miwíyé suꞌmai umésa miwí túrankaꞌa Ísu óꞌoran-auma auvúwana

³kwená unáánkwátóiraꞌa ságayamba kwaéna kwayáníꞌa kéna aaváúmó usénamo intembá mirá úwasa

⁴awánomba kae-kwáásíráí kwíyómpakemba paárésarai mindárai túwíꞌa Íráiyaae Mósesiye Yútaa-kwaasi tíkwáꞌnárai Ísuwe kwaasái kwésuyana

⁵Pítaa Ísuntavena séna anóndakoo maankáꞌó maúndaya kaweꞌá imbá póta kwááyu-namba kaumbomá ónaundaya moórá endéí éta moórá Mósesindei éta moórá Íráiyaandei éta mirá ónaundayaawe súwana

⁶ávááraumai tááꞌa kówana nóin-ainaꞌi síníyena póna mirán-aimba Pítaa siráiye.

⁷mirá kwésunkaꞌa ainánkó kuména káátaguwana mináínámpínkémbá aaigówé suꞌmai séna maawámá kesáánimba isaꞌá kwená imáyáa kwéune. kwenáái ísáaro súwasa

⁸kwená kwayóꞌnárau awánomba mindárai kwíyómpaꞌa íyúwana Ísuwe suꞌmai méraiye.

⁹máyowasa omápakemba kúmúmba Ísu asiramái simátimena séna awánaamba íma simátíméro. kemá kwaási úrandaꞌa kumpaáruraundawai púwóndavinkemba usásinaandaraꞌa awánaamba kanaaráꞌá simátímaꞌmae íyóro súwasa

¹⁰isésa íma simátimesa mináímbá úwoi tátoresa keáímbá sésa púwóndavinkemba usásinanaumne simbá nóran-ainaꞌiyo keáímbá siráawe.

¹¹keáímbá sésa Ísuntavesa áísaa esa sésa ámáámba sen-kwáásí sésa Íráiyaa aivaꞌá paárínana Áánútu usásinankaiwai Yútaa-kwaasiya amuꞌmakáundawaiya naaémba paáriniyemo sembá nóra sésa mináímbá kwéseo suwaná

¹²Ísu séna aivaꞌá Íráiyaa paáréna toꞌmayaa íníye-aimba árair-aimban-iye. moórá-aimba kwaási úrandaꞌa kumpaáruraiwaintavena agaimaréna séna kwembá áíꞌa índaiꞌa umánkesa tínaaemba umánkanaaowe agaimaréna siráiye.

¹³simátimeꞌa séꞌa Íráiyaa áꞌa tiráiye. agaimaróntemba umái kwembá sáwíꞌa umánkanae sésa sáwíꞌa umánkaraawe. mirán-áímbá kwentáváí agaimaróntemba kemá kwaási úrandaꞌa kumpaáruraundawaintavai agaimakáawe Ísu siráiye. Ísu taraváá-kwámbá mayáúkain-kwasai.

¹⁴Ísu simásuwena omápakemba kúmúmba kwená kwayó-kwáásítópaꞌa kúmúwasa sáwíva-kwaasi torupésa ámáámba sun-kwáásíyé Ísuna kwayó-kwáásíyé asirayán-áímpákémbá sésa

¹⁵Ísu túntavesa ivátuwesa paruvará umánkówana

¹⁶Ísu séna nóintavai asirayán-áímbá kwéseo séna tísaa úwana

¹⁷minkwáásíyómpínkémbá moóráwai séna anóndakoo kesáánimba áíꞌmaeꞌa túne. kwenarumpimbá taraváá-kwámbá máyáísana íma aaí kwésisana

¹⁸mintáráváá-kwánkó tátoꞌmai amentánaanta isaná tanaambá váguvagu kwéena áwááyaamba akékúndena aigareó nonkáánéna aíyayaamba sápísimagwisana mirá úmaena kwéiyisaꞌa ená kwayó-kwáásíyávéꞌa séꞌa taraváá-kwámbá arumpinkémbá mayaúwáaro súnasa íma kanaán-umai mayáúkaawe súwana

¹⁹Ísu séna kentáváí íma imáyáa kwéowana póna sirumbá umbaí kwétaivo nóraumai-tawaiya kesé ménaumno simásuwena séna ánivo enáánimba áíꞌmae tiyó súwasa

²⁰áíꞌmaesa tuwaná mintáráváá-kwánkó Ísumba awánéna miníyámpóí améntáyuwowana tanaambá véna kwárereꞌa éna aigareó monkáánúwana

²¹Ísu avowántávéna séna nósatawai ánkaraiyo súwana umarankaꞌá ánkaraiye.

²²tuvuwíndayavena póna sáwívakaꞌa améntámai irá káúvóraꞌna éna améntámai nompímbá túwáaraꞌna kwéiye. emó kanaamó e arumbá maisinkéya súwaꞌnaa uwo súwana

²³Ísu séna nóra séwa emó kanaamó e súwaꞌnaa uwo kwéseno. Áánútumpaꞌa agevamái máyaawai amápa-tantaaꞌa kanaaráꞌá ónááowe súwana

²⁴miníyámpóígó avowámá avekáán-umai anónkaꞌa séna kemá Áánútumpaꞌa agevamái máyaundanivo kemá Áánútuntavai íma asiramái kwémaunda-yantaaꞌa súwaꞌnaa uwo súwana

²⁵Ísu awánómba sáwíva-kwaasi sisipáá uwaná taraváá-kwántávéna séna aívó-taravaa-kwankoo auwé kóaao. íma koyauwérénda ákaꞌa kóaao súwana

²⁶kwááꞌa téna miníyámpóí améntáyuwowana tanaambá vówana arumpinkémbá kóúwana miníyámpóí púwóraꞌna umai máyowasa évakarawai sésa áꞌa púwíye suwaná

²⁷Ísu ayáánkwanda tátoꞌmai usásinakowana kokuꞌá méraiye.

²⁸kokuꞌá máyowana Ísu naaúmpaꞌa umáyowasa Ísumo kweyáá máyonkaꞌa kwená kwayó-kwáásí umésa sésa nóra séta mintáráváá-kwámbá íma kanaán-umaiya mayáúkaumno suwaná

²⁹námúnaa kwésemba póꞌa miráumai mirán-táráváá-kwámbá mayauwánááovo óꞌon-tantaaꞌneimo éꞌa íma kanaán-umai mayauwánááowe Ísu siráiye. Ísu puwínín-aimba siráin-kwasai.

³⁰Ísu simásuwena tuwéna Káríri-ayampaꞌa aampaꞌá kwégwena sáwíva-kwaasi torupaavó séna kesí kwayó-kwáásíyé suꞌmai aaí simátimenae séna aampaꞌá kwégwena séna kembá kwaási úrandaꞌa kumpaáruraundawaimba óꞌon-kwaasi timíyasa sínkamiyaꞌa puwéꞌa kaumbo-táwai maisuwéꞌa usásinanaumne súwasa

³²kwemó sún-ainkona ááimba íma isésa áísaa ónáe sésa umbá tááꞌa kówasa íma áísaa uráawe. nááwa kwéusayaaitaiyo siráan-kwasai.

³³íma áísaa esa Kápénéamu-naopaꞌa kumbá naaúmpaꞌa umáúwana Ísu tísaa ena séna aampaꞌá kwéteꞌa nóin-aina siráao súwasa

³⁴aampaꞌá kwégwesa sésa kentáávínkémbá nááwa kwéusayaaitaiyo sésa iséise úmae kwégwesa pósa íma aaí suwaná

³⁵Ísu maraꞌ-maéna kwená kwaási sísamaivakemba kaeꞌá kumbaimái-kwaasiyavena séna maísáaro. usáyaaitanae síyawai tínaaeniꞌa ésa amáparawaiti kwayóꞌá máráaro simásuwena

³⁶moórá-iyampoi áíꞌmai avumpimbá usásinankena taparéna simátimena séna

³⁷kentáváí imáyáa kwéesa iyámpói áwaꞌnaa onten-umái kwésuwaꞌnaa-owe. súwaꞌnaa onten-umái Áánútu siꞌmákaiwaimba kwéawaꞌnaa-owe Ísu siráiye. kentí mayáí íma sáwíꞌa kwéiwaina kwaasái.

³⁸súwana Yóni Ísuntavena séna anóndakoo moóráwai kwénaaena taraváá-kwántóntávéna séna Ísuna asirayámbá kwáyáintavai auwé kóaao simátímapaꞌa kwégwisasa mintáráváá-kwámbá kóuraawe. minkwáásígó íma kentáávínkén-kwáásímá ómpo íma miráne étuwaaoya siráumne Yóni súwana

³⁹Ísu séna íma tuvínankaaro. ímo awánaam-bayaimo máyáawai úwoi kesúwíꞌa íma sáwíꞌa simásinkanaaowe.

⁴⁰kentáásí mayáígómbá íma sáwíꞌa kwéowai úwoi kwésuwaꞌnaa-owe.

⁴¹áraiꞌa simátimeꞌa séꞌa keinárawaꞌa tuwánésa sésa Ísu Káráísitina kwaási ombá póꞌa túwaꞌnaa ónáe sésa sáwíyan-tantaaꞌa nombá timíyawaima Áánútu kaweꞌ-méyámbá timíníye Ísu siráiye. sáwíꞌa kwéon-kwasai.

⁴²Ísu mináímbá simásuwena séna iyámpóígomo kesááiyavaimo áraire sintenkáán-umai évakarawai áraire kwésewe. évakarawai tésa kesááiyavaimo áraire kwésewaima kampar-áímbá tasimátimiyasa isésa sáwí-ampaꞌa kówíyasa Áánútu kampaꞌó síyawai sáwí-meyamba anómba timínívo miwímó tinumarampimbó anón-ontambo aríkwímaresamo nompímbó túwáawasamo kumésamo kumpuwésarakai kampar-áímbá íma simátíméwasa sáwí-ampaꞌa íma kosinó. mindá kanaán-iye.

⁴³tiyáánkomo sáwíꞌo ínaꞌa misáwí-ámpáꞌá kúnavo séꞌa moórá-tiyaamba arátúwáaro. kae-tíyáámbó kwáyainaꞌo éꞌa sáwí-marupaꞌo iramó kaíkaiꞌo kwéipaꞌa kónááomba mindá sáwíꞌan-iye. sáwíꞌo uráinda maisuwéꞌo máyáamba mindá kaweꞌán-iye.

⁴⁴tísamaigomo sáwíꞌo ínaꞌa misáwí-ámpáꞌá kúnavo séꞌa moórá-tisamaima arátúwáaro. kae-tísámáímó kwáyainaꞌo éꞌa sáwí-marupaꞌo iramó kaíkaiꞌo kwéipaꞌa kónááomba mindá sáwíꞌan-iye. sáwíꞌo uráinda maisuwéꞌo máyáamba mindá kaweꞌán-iye.

⁴⁷túrankomo sáwíꞌo ínaꞌa misáwí-ámpáꞌá kúnavo séꞌa moórá-turamba pítuwaaro. kae-túrándéímo awánéꞌo éꞌa sáwí-marupaꞌo iramó kwégaipaꞌa kónááomba mindá sáwíꞌan-iye. sáwíꞌo uráinda maisuwéꞌo máyáamba Áánútu kwená kwaási kawááipaꞌa máyáamba mindá kaweꞌán-iye.

⁴⁸iramó kwégaipaꞌa marinkómó éna kwaíkwaiꞌa kwéinana iramó éna íma pisináínda kaíkaiꞌa kwéiye Ísu siráiye.

⁴⁹Ísu simásuwena séna uwímó toónkáꞌó úmárááwanamo kaweꞌó intembá Áánútuma kwaásiraꞌa iramó kaintenkáán-umai maráínasa kaweꞌá umái ménaaowe.

⁵⁰uwímá kawe-tántááꞌá imbánivo anómba ánásaisana ayáántámba kwáyáimbanivo óꞌa uwímó káíꞌa íma úmaranaaowe. uwígómó áséimo intenkáámbá kwéeꞌa paru umái ménaaowe Ísu siráiye.