Read Kosena Árúku 14 Bible Online

Árúku 14 - Kosena bible

Árúku 14

¹moórá-tawai agándon-kanaaraꞌa Ísu ámáán-kawaa-kwaasi anón-kwaasigona naaúmpaꞌa toómbá náíndayavena umáyowasa agándai-kanaaraꞌo Ísumo nóramo índa awánanae sésa umésa awánowana

²moóráwai aíyayaamba kwéintoron-kwaasigo kwená egwaaꞌá máyowana

³Ísu minkwáásígómbá awánéna ámáán-kawaa-kwaasigo ámáámba sun-kwáásíyé tísaa ena séna agándaan-kanaaraꞌa kanaarárá áíꞌo in-kwáásí asóvamankanaundayaꞌiyo súwasa

⁴isésa íma aaí suwaná minkwáásígómbá áíꞌmai kaweꞌá umánkena séna ánivo kuwó súwana kóúwana

⁵tísaa ena séna keinárawapinkemba kentí iyámpóíyaꞌi. kentí pórááraꞌiyo. maipímbó pékainaꞌo éꞌa agándai-kanaaraꞌa ááéma mósá asinánááoo Ísu súwasa

⁶mináímbá íma kanaán-umai anondá siráawe. kwaási íma kentúma maimaé iyí-kwásáí.

⁷aaí íma anondá suwasá toómbó nánáesamo tun-kwáásí aivaꞌá uménaemo sumbá Ísu tuwánéna kwántámai-aimba séna

⁸moóráwai séna aaraimó tokwaa on-tánómbá tamandaaó sína íma aivaꞌá umaiyó. aivaꞌó uménanamo enáwíꞌo usáyaaitaraindawaimo tínanamo éna

⁹tááyaindawai entávéna séna usásinenana maankwáásígó maankáꞌá tamaíno sínana aigaemá umásuwe tínaaempaꞌa kumbéniyone.

¹⁰ánivo tááyainamo tínaaempaꞌo uménanamo tááyainda-kwaasigomo kweyááríkaꞌo entávénamo séna kesí kwaásiyo usásine aivaꞌá umaiyó sínamo umáínasa awánésa enáwíꞌa mósá maránááowe.

¹¹anón-kwaasima úne síyawaima Áánútu miwí túwíꞌa móruna tiyuwánívo sáwíyan-kwaasima úne síyawaima Áánútu miwí túwíꞌa maimaé iyíníye Ísu siráiye.

¹²Ísu simásuwena ááyarowaiyavena séna anón-tanomba kauvónáe sinda-táwai óísankwara-kwaasiye enamááraawe ená akúné ená kwaásiye suꞌmai íma tááyao. mirámó inasamó ésa naaémba ááyewa toómbá komandáníyonda mindá ená toónkóná anondáman-iye.

¹³ánivo anón-tanomba kauvónáe sinda-táwai ímo óísambo makén-kwaasiye tíyayaamba sáwíꞌa urén-kwaasiye aúgavitan-kwaasiye tááyenasa tamandánááombanivo

¹⁴ená toónkóná anondáma íma amíyambanivo enarunkó kaweꞌá ínana Áánútu ená toónkóná anondáma amíníye. naaémba arupí umái mén-kwaasi pukémpinkemba usásinaiya-tawai Áánútu amíníye Ísu siráiye. anón-tanomba kauráin-kwasai.

¹⁵mináímbá súwasa Ísuwe toómbá kwénowai isésa uwaná moóráwai séna Áánútu kwená kwaási kawááipaꞌa toómbá nánááowai tirunkó aamoí íníye súwana

¹⁶Ísu séna áraiꞌa simbánivo simátíménda imáyáa oró. moóráwai anón-tanomba kauvónáe séna sáwíva-kwaasi tááyamakena máyáísana

¹⁷mintánómbó nánááon-kanaa sáwíyankaꞌa tínana kwená mayáí-kwáásígómbá aiꞌmáráísana tááyaraiwaiyavena séna toómbó naí kwétoꞌmayaan-ivo teró sisasá

¹⁸miwí íma tií-áímbá sewaná moóráwai séna maramá meéyán-ureꞌa koawánanaumpo íma tanómba kauvópaꞌa kónaumne siyé kosimámiyo sisaná

¹⁹moóráwai séna siyáánkai-poima meéyán-ureꞌa koawánanaumpo íma tanómba kauvópaꞌa kónaumne siyé kosimámiyo sisaná

²⁰moóráwai séna ívéꞌa aaraí mairáunda póꞌa tanómba kauvópaꞌa íma kónaumne siyé kosimámiyo sisaná

²¹mimbáyáí-kwáásígó kwená anóndakonopaꞌa téna mirá sewé tasimámísana arunkó sáwíꞌa isaná séna avekáámbá naaóꞌ-naoꞌa kwénaae tíyayaamba sáwíꞌa uráinda-kwaasiye túramba kavíkáinda-kwaasiye óísamba íma makén-kwaasiye tivakáá-umai tíꞌmae tiyó séna aiꞌmáráísana

²²mimbáyáí-kwáásígó mirá kosimái koyauweréna taséna simásimendantemba kosimái tíꞌmaeꞌa túnda ená naaúmpaꞌa paaí karekóꞌa umái máyáawe sisaná

²³kwená anóndako séna amápa-kwaasi kesí naaúmpata sisipáá oró. amápar-ampaꞌa kwénaae kwaásimo tivakáá-e asiramái simái tíꞌmae tiyó siráiye.

²⁴Ísu séna simátimeꞌa séꞌa aivaꞌó tááyaraiwai íma tésa kwená toómbá íma tamandánááowe Ísu mináímbá kwántámai-aimba siráiye. imáyáa kaweꞌá urésa Ísu-ánaaemba kwaránááon-kwasai.

²⁵súwasa Ísuwe aampaꞌá kuwaná mégwantena simátimena séna

²⁶kesínaaemba kwaránáe síyawai aivaꞌá kembá imáyáa simésa naaémba anóvowiye awainínkówé kwená iyámpóíye kwenávárawaawe kwenáúnavare kwesáváíyé imáyáa oró. ímo mirámó íyamba uwóvíꞌa ónááovo mirámó ésamo ésa kesínaaemba kwarésa kesí kwayó-kwáásí-íꞌa ónááowe.

²⁷kemó puwónaunda-taimo súgwaataꞌmaeꞌo kondantembá kesínaaemba kwaránááowaima umbai-yántááꞌá timíyasa minúmbáí-yántááꞌó ímo maimaésamo sínaaembo kwáráamba uwóvíꞌa ombá pósa íma kesí kwayó-kwáásí-íꞌa ónááowe.

²⁸moórá-aimba ísáaro. ayáátááꞌ-namba ónáe síyawai aivaꞌá óntambo tuwésamo ónááon-imayaa ésa óntamba táámpamai awánáíyambo kanaamó ínasamo ésa mináyáátááꞌ-námbá ónááowe.

²⁹ímo táápamaimo awánaresamo mindámbó íyamba minóntámbá ánásagwinana mindámbá úwoi kwáyainasa kwaási awánésa íma áságwimai umásukaawe sésa tuwírááima sénááowe.

³¹moórá-aimba ísáaro. moórá ááiꞌa tiyáívín-ánón-kwáásígó ááiꞌa tiyánáe séna aivaꞌá kwená i-kwáásí táámpainda sáwíva-kwaasi 10,000 kwaasi ínana óꞌon-i-kwaasiti anóndako kwená i-kwáásí táámpainda ávááraumai sáwíva-kwaasi 20,000 kwaasi ínana imáyáa éna kembá usáyaaitanaao. íya usáyaaitanaaoo séna

³²íma kanaán-umai usáyaaitanaumne-imayaamo énamo éna anón-kwaasi némpaꞌa máyainana aantá-kwaasi tiꞌmaréna séna íma ááiꞌa tiyánaundayaanivo úwoiya ménaum. nóraya ónaumno siyé kosimáméro síníye.

³³Ísu mináímbá simásuwena séna aivaꞌá ónááon-imayaa urésa naaémba síyantemba ónááowe. miráumai kesínaaemba kwaránáe síyawai aivaꞌá makáan-tantaatavesa imáyáa urésa íma mintántááꞌá tuwánaumnemo sésamo ésa kesínaaemba íma kwaránááovo mintántááꞌá tuwánaumnemo sésamo ésa kesínaaemba kwarésa kesí kwayó-kwáásí-íꞌa ónááowe Ísu siráiye. uwígóná kwaasái.

³⁴Ísu simásuwena séna uwímá kawe-tántááꞌá imbánivo anómba ánásaisana ayáántámba kwáyáimbanivo óꞌa uwímó káíꞌa íma úmaranaaowe.

³⁵ayáántámba íma agámoꞌa maráíyana kaweꞌá ínívo úwoivaꞌa tuwánááowe. kwéisaawai ísámai kaweꞌá oró Ísu siráiye.