Read Kosena Árúku 17 Bible Online

Árúku 17 - Kosena bible

Árúku 17

¹Ísu kwená kwayó-kwáásíyávéna séna óꞌon-oꞌon-tantaaꞌa kwaásitopaꞌa tínasa kesáái tuwánááowe. évakarawai tésa kesáái kwéisaawaima kampar-áímbá tasimátimiyasa kesáái tuwésa kówíyasa kampaꞌó síyawainopaꞌa sáwí-meyamba tíníye.

²miwímó tinumarampimbó anón-ontambo aríkwímaresamo nompímbó túwááwasamo kumésamo kumpuwésarakai kampar-áímbá íma simátíméwasa kesááimo ísaraan-iyampoi kesáái íma tuwésa sáwíꞌa osinó.

³mindáyaveꞌa kentúraꞌa kárákwiyoro. kentí kwaásimo kembó sáwíꞌo umátinkaiyaꞌo éꞌa keinárawapaꞌa mindáyaveꞌa simátimiyasa sáwíꞌa únemo síyaꞌo éꞌa íma moórágwaraꞌa imáyáa éꞌa iváꞌá túwáaro.

⁴kentí kwaásigomo kembó sáwíꞌo umántínkávaꞌo kwéiyesamo kentópaꞌo tésamo sáwíꞌa únemo símae kwéiyiyaꞌo éꞌa íma moórágwaraꞌa imáyáa éꞌa iváꞌá túwáaro. mimbórá-táwaimo avakaetéraꞌo mirámó íyaꞌo éꞌa íma imáyáa éꞌa iváꞌá túwáaro Ísu siráiye. Ísuwe aráápamai máyáan-kwasai.

⁵suwasá Ísóigona aantá-kwaasi kwentávésa sésa esé aráápamaiya máyaundaya súwaꞌnaa inatá esé aráápamaiya máyaundaya asiramáíya máéno suwaná

⁶Ísóigo séna moórá-taigo áwíꞌa másátati sáwíyan-aramba toꞌmakáawana áruma kwikéna anón-tainamba kwéiyintemba kesé kítokaꞌa aráápamai máyáamba póꞌa naaémba anónkaꞌa kesé aráápamai méꞌa anón-taiyaveꞌo séꞌo taawíꞌmae anón-dompimba kunkaruwuwómó síyanamo éna mirá íníye. Ísu mináímbá siráimba kwesé aráápamai máyáamba kwená mayáí mayánááontavena siraíye. mayáí-kwáásítí mayáígóná kwaasái.

⁷Ísu kwená kwayó-kwáásíyávéna séna mayáí-kwáásígómbá aiꞌmárááwana mayáímá kwémaena kígauvakenaꞌi. póíraꞌa kárákwiraindavakenaꞌi. timbá ená toómbá emá agaimái naaó íma sésa

⁸kavegavé umái kawer-únánkwátói uré toómbá agai-símíꞌa nasúwáana naaémba ená toómbá agaimái náníyone mirán-áímbá kwésewe.

⁹sintembá mayáí-kwáásí mirá kwéesa úwoi miwítí mayáí isasá mirá kwéomba pósa íma túwíꞌa mósá kwémaraawe.

¹⁰miráumai keinárawaꞌa mirá kwéeꞌa simátíméndantemba umái méꞌa ánásanaaokaꞌa séꞌa úwoi kwená mayáí-kwáásíyá úndaya póta úwoi kentáásí mayáíyá mairáumne séꞌa íma kentúma maimaéꞌa íyóro Ísu siráiye. Ísu túma karón-kwaasi kaweꞌá umátínkarain-kwasai.

¹¹Ísu Yérúsaremu-naor-ampaꞌa kúmba Sámériyaa-marawe Káríri-marawe avumpin-ámpáꞌá kwéena

¹²moórá-naopaꞌa kwéguwasa túma karón-kwaasi siyáánkai-kwaasi kwétesa némpaꞌo Ísumo túmba awánésa

¹³aayamái sésa anóndako Ísuwo kentáá arumbá umásinkaao suwaná

¹⁴Ísu tuwánéna séna monoꞌ-máyáí-kwáásítópaꞌa kwéꞌa kentúma máagaraatinkewasa tuwánésa túma kawáúgwiye sénááowe súwasa aampaꞌá kumbá túma kaweꞌá umátinkowana

¹⁵miwívínkémbá moóráwai áúma kaweꞌá umánkomba awánéna koyauweréna anónkaꞌa tasiréna Áánútu áwíꞌa mósá maréna

¹⁶Ísu anóndakoman-iye séna aísamaivimba takívairena súwi séna minkwáásí íma Yútaa-kwaasi Sámériyaa-maravaken-kwaasigo súwi súwana

¹⁷Ísu séna siyáánkai-kwaasi túma kaweꞌá umátinkaunda avaréíyain-kwaasi íma koyauwérááwana

¹⁸kímborawai óꞌom-baravaken-kwaasigo koyauweréna Áánútu áwíꞌa mósá kwémaraiye simásuwena

¹⁹minkwáásígóntávéna séna kentáváí súwaꞌnaa íníwaiman-iye sénda póna enáúma kaweꞌán-ivo kwaaó Ísu siráiye. Áánútu kwená kwaási kawááin-kwasai.

²⁰súwasa ámáán-kawaa-kwaasi Ísumba áísaa esa sésa Áánútu kwená kwaási kwégawaain-kanaama nósa-tawaiya tíníyo suwaná Ísu séna Áánútu kwená kwaási kwégawaaimba íma kanaán-umai túrandei awánanaaovo

²¹Áánútu kwená kwaási kwégawaaimba kwaási túraꞌa ááimba ásáraimba pósa maankáꞌá ópaꞌa kárákwiraiye íma kanaán-umai sénááowe Ísu siráiye.

²²Ísu simásuwena kwená kwayó-kwáásíyávéna séna naaémba kemá kwaási úrandako kúmónda-kanaa awánanae síyambanivo íma mirán-kánáámá suwánanaaowe.

²³évakarawai sésa maaváꞌá máyáivo tawánaaromo síyasa óꞌowima sésa maaváꞌá máyáivo tawánaaromo síyaꞌo íma áraire séꞌa kóyáwé oró.

²⁴kwíyómpaꞌo tawáombo úmae kwisasamó awánaantemba kemá kwaási úrandako miráumai avoraꞌá ókwaraꞌa kumónaumne.

²⁵misúnda-aimba íma paárurainasa aivaꞌá ívéꞌo máyáan-kwaasi tínaaemba umásinkesa síꞌa índaiꞌa umásinkanaaowe.

²⁶naaóváꞌá moóráwai áwíꞌa Nówaa máyonkaꞌa kwaási íma Áánútuna imáyáa ésa maémáentemba naaémba kemá kwaási úrandako kúmónda mirá ónááowe.

²⁷Nówaa máyonkaꞌa nombá toómbá kwénesa tiyáámúmbaaꞌa kwétokwaa-esa aaraí máyówasa kwaaí máyówasa kwéuwana Nówaa naaúmpaꞌa non-avóvomayaaꞌo kún-daumpaꞌa umáyowana anón-aꞌa téna kavirayán-dónkó amápa-kwaasi tínkamuwasa putásaraawe.

²⁸naaóváꞌá moóráwai áwíꞌa Áróti máyonkaꞌa íma Áánútuna imáyáa kwéesa mésa nombá toómbá kwénesa kwémeya úmae kwénaaesa kígauma naambá úmae naaémáémba

²⁹Áróti Sótómu-naopaꞌa tiyuwónkaꞌa Áánútu óntankwara iraronkwáráꞌá kwíyómpakemba tuwówana kuména tínkamuwasa putásaraawe.

³⁰Áróti máyonkaꞌa kwaási íma Áánútuna imáyáa ésa maémáyáantemba kemá kwaási úrandako ókwaraꞌa kumpaárondaraꞌa mirá ónááowe.

³¹ókwaraꞌa kúmóndaraꞌa ontaráꞌó máyaiyan-kwaasi naaúmpakemba náaindaamba íma óꞌa umayánááowe. kígauvaꞌo máyaiyan-kwaasi náaindaamba naaúmpaꞌo kwáyainda óꞌa íma umayánááowe.

³²Áróti awainínkón-áái imáyáa oró. kwená náaindaamba tuwón-imayaa éna mógwantowana óntankwara iraronkwáráꞌá kuména tuvuwúwana pukáiye.

³³tirááímo táíndaiꞌo ésa íma kaweꞌá umái ménaaovo kentávésa imáyáa ésa tirááímo táínda-yantaaꞌa tuwésa puwésa aúnáiꞌa umái kwíyómpaꞌa maíꞌmaiꞌa ónááowe.

³⁴simátimeꞌa séꞌa ókwaraꞌa kúmóndaraꞌa mindóꞌwáámbá kae-kwáásí mimbóráváꞌá tuúmá kwéreyana Áánútu moóráwaimba auwéna moóráwaimba airáníye.

³⁵minkánáá kaer-ínínkáí toómbá kwégwanteyana Áánútu moórá-inimba auwéna moórá-inimba airáníye. [

³⁶kaekóráí kígauvaꞌa méyana Áánútu moóráwaimba auwéna moóráwaimba airáníye Ísu súwasa]

³⁷kwená kwayó-kwáásí sésa Ísóigoo emó sénda-aimba náávatavai seénó suwaná póímo awáímó kaviraipáꞌó náíndayavenamo evontáán-dúmáómó torupamáímo máyáintenba Áánútu sínana súnda-aimba paáriniye Ísu siráiye.