Read Kosena Árúku 20 Bible Online

Árúku 20 - Kosena bible

Árúku 20

¹moórá-tawai Ísu anóm-bonoꞌ-naumpaꞌa uména Áánútuna áséi-kwasai kwésimatimuwasa mono-káwáá-kwáásíyé ámáámba sun-kwáásíyé Yútaa-anon-kwaasiye tésa

²sésa nááwa aiꞌmákaisa tiréwa nááwampinkena mairéwa égési-mayai kwémayaanda simásimiyo suwaná

³Ísu séna aivaꞌá moórá-aimba tísaa onaꞌá simásíméro.

⁴ááéma Yóni nombá pétinkaraiwaima Áánútuwa simámakaisana nombá pétinkarai. kwaásiya simámakaawana nombá pétinkaraiyo súwasa

⁵miwímá keáímbá sésa nórayaawa sénaumno. Áánútu simámakaisana nombá pétinkaraiyemo senanayáámó éna nóra séra Yónin-aaiyaveꞌa íma áraire siráao síníye.

⁶kwaási simámakaawana nombá pétinkaraiyemo senasayáámó ésa úwoi-kwaasi sínkamonaaowe. úwoi-kwaasi sáwíva-kwaasi Yónintavesa sésa Áánútun-aai simásímakaiwai uráiye kwésemba pósa óntantamba mairésa sínkamonaaowe.

⁷Ísuntavesa sésa emó sísaa ónda-ainta íma ísaraumne suwaná

⁸Ísu séna ímo simásimiyaꞌa nááwampinkena mairéraꞌi. égési-mayai kwémayaunda-aimba íma simátimenaumne Ísu siráiye. ándá-aran-kigauraꞌo tavíyéwaiti kwaasái.

⁹Ísu kwántámai-aimba simátimena séna moóráwai ándá-aran-kigau úmarena ayáátáákaꞌa óꞌom-baravaꞌa koménae séna maankígáúráꞌó taviyíyawaimo éꞌa kesáváí évakar-aramba maéꞌa évakaꞌa kembá siyúwáaro simátimena óꞌom-bapaꞌa komáyáísana

¹⁰arambó ávumo kain-kánáá tisaná aanávómá kesí ándá-aramba komayaaó séna kwená kwayóꞌnáꞌá aiꞌmáráísana minkígáúráꞌó tavíyéwaitopaꞌa tisasá tátoꞌmai tuvúꞌmaresa ándá-aramba íma ámémba aiꞌmátuwaawana kówisana

¹¹aanávómá moóráwaimba aiꞌmáráísana tisasá minkígáúráꞌó tavíyéwai tátoꞌmai tuvúꞌmaresa sáwíꞌa umánkesa ándá-aramba íma ámémba aiꞌmátuwaawana kówisana

¹²aanávómá moóráwaimba aiꞌmáráísana tisasá tátoꞌmai tuvúꞌmárááwana naaemá kúmísasa awéntayuwaawana kówisana

¹³aanávómá séna nóra ónaumno. kesááninko imáyáa ámakaundawaimba aiꞌmáráanana kwínasa kwenáái isánááowe séna aiꞌmáráísana tisasá

¹⁴minkígáúráꞌó tavíyéwai awánésa keáímbá sésa aanávómbá ááninko kwétimba póta tuvúwónana puwéna maankígáú íma mayáínata kesáá mayánáe sésa

¹⁵tátoꞌmai ándá-aran-kigauvakemba awéntáyuwesa tuvúwówana pukáiye. Ísu mináímbá simásuwena séna minkígáúgó aanávómá mirá íníye.

¹⁶téna kígauraꞌo tavíyéwaima tínkaminasa puwíyana óꞌonkaa-kwaasi kesí kígauraꞌa tavíyéro síníye Ísu súwasa mináímbá isésa sésa íma mirá oró suwaná

¹⁷Ísu árimba tuwánéna tísaa umai isánáe séna imáyáa oró séna Áánútun-aai aúváí-kwandaaivimba maarán-áímbá agaimaréna sénaeróntan-damba on-kwáásí moórá-ontantavesa sáwíꞌa kwéiye sésa maisukáawe. aáno minóntánkó ávonkaamba uráiye agaimaréna siráimba mináíntávéꞌa imáyáa oró.

¹⁸kwíyamba minóntánkáꞌá tanaambá kovésa sáwíꞌa umái ménaaovo minóntánkó tuvúꞌmái sáwíꞌa umásuwaniye Ísu súwasa

¹⁹mono-káwáá-kwáásíyé ámáámba sun-kwáásíyé simbá kentááyávéna siyé sésa tátoꞌmai tuvuwónáe sésa umbá amápa-kwaasiyavena tááꞌa kówasa ivátukaawe. táákísi-aintavesa áísaa uráan-kwasai.

²⁰ivátuwesa tátoranaaon-kanaa kárákwiyesa évakarawai tiꞌmarésa sésa Ísun-aai kwéisaan-kwaasimo ontembá téꞌa áísaa íyana sáwí-aimbo sínata tátoꞌmai kámááni-kawaanakonopaꞌa móankanaumne sésa tiꞌmárówasa Ísunopaꞌa tésa

²¹sésa anóndakoo árair-aimba kwése kwaási táároi íma inkaisé anón-kwaasiye úwoi-kwaasiye táároi íma inkaisé tirumbá airáꞌmái-aimba íma séma Áánútuna aambó kwáráan-aimba arupí umái kwésimatimendaya ísaraumne.

²²emá nóra se kwéisaano. kanaarátááwá táákísi-ontamba Árómáani-kamaani-kwaasiya timénaum. íya timénaumno. timénaundaya Yútaa-kwaasiya kentáásí ámáána araaisénaundayaꞌiyompo timénaum. íya timénaumno suwaná

²³Ísu miwí tááma iséna séna

²⁴moórá-ontamba maimái máagaraasinkaaro súwasa maimái máagaraarankowana séna nááwa óikaana uráinkara áwíꞌa kwáyáiyo súwasa Árómáani-kamaani-kawaanako óikaamba isaná áwíꞌa kwáyáiye suwaná

²⁵Árómáani-kamaani-kawaanakondei kwembá áméro. Áánútundei Áánútumba áméro súwasa

²⁶mináímbá ísówana tááꞌa kówasa íma aaí siráawe. Ísu kwaási túrankaꞌa ména íma sáwí-aimba súwasa pósa íma aaí sésa tátokaawe. pukémpinkemba usásinanaaon-kwasai.

²⁷íma tátowasa Sátúsi-monor-aimbo sun-kwáásí púwómpinkemba íma usásinanaaowe kwésun-kwaasi pósa Ísunopaꞌa tésa

²⁸sésa anóndakoo naaóváꞌá Mósesi séna moóráwai aaraí maimakéna iyámpói íma ankéna púwísana ávákoma maimakéna awaaóná anondáwe séna iyámpói ankáníye siráiye.

²⁹moórá-aimba isaaó. moórá-tawai avakaeté-avarawainonda mésa tuwaaómá aaraí maimakéna iyámpói íma ankéna púwísana

³⁰kwenánaaenkewai kwareꞌá maimakéna iyámpói íma ankéna púwísana

³¹kwenánaaenkewai kwareꞌá maimakéna iyámpói íma ankéna púwísana mirá eémesa avakaeté-kwaasi putásaawana

³²minínímbá naaémba pukáiye simásuwesa

³³Ísumba áísaa esa sésa mirámó ombá kwaásimo puwíyampinkembo usásinaiya-tawai minínímbá avakaeté-kwaasi tuwainímbá póna nááwa mayáníyo suwaná

³⁴Ísu séna marapáꞌá máyáan-kwaasi aaraí máyáawasa kwaaí máyáawasa tiyáámúmbaaꞌa kwétokwaa-esa kwéowe.

³⁵Áánútu tááyena séna pukémpinkemba usásineꞌa kwíyómpaꞌa uménaaowe siráimba minínínákwáꞌá kwíyómpaꞌa uménaaomba aaraí íma mayáíyasa kwaaí íma mayáíyasa ónááowe.

³⁶Áánútuna kwayóꞌnárawaꞌo kwíyómpaꞌo mésamo ímo kwévuwontemba minkwáásí mirá ésa íma ókwaraꞌa puwónááowe. pukémpinkemba usásinanaaomba Áánútuna kwaásiman-owe.

³⁷kwaási pukémpinkemba usásinanaaomba Mósesi mináíntávéna agaimakáiye. aúváívimba agaimaréna séna áru-tairaꞌa iramá kaimbá íma mintáímá kágwisana mintáívínkémbá Áánútu Mósesintavena séna Áánútu úne. enaíkwáꞌná Ááváramune Áísákaane Yákópone miwítí Áánútu úne siráiye. Áánútú mináímbá siráimba minkáúmbó-kwáásí áꞌa púwúwasa utamátínkaraambanivo

³⁸mináímbá siráimba pósa miwí úwoi máyáawe. Áánútu aúrankaꞌa amáparawai máyáawe Ísu súwasa

³⁹ámáámba sun-kwáásí sésa anóndakoo kawer-áímbá simásimakaane suwaná

⁴⁰Ísun-aaiyavena tááꞌa kóntavesa íma áísaa úmaesa iráawe. Áánútumo usásinankaiwai Káráísitina kwaasái.

⁴¹íma áísaa úmaesa íyúwana Ísu séna Káráísitima Tévíti-andaraken-kwaasiman-iye kwésevo

⁴²naaóváꞌá Tévítima Káráísitintavena séna kesí Ísóigoman-iye siráimba monor-ímá agaimakón-auvai-kwandaaivimba Tévíti agaimaréna séna erkesí Ísóigontavena Áánútu sénakesiyáánúrapaꞌa asirayán-áyámpáꞌá

⁴³maraꞌá ménaꞌa ená namuro-kwáásí usáyaaitaanasa miwí ánásanaaowe Áánútumo siráin-aimba Tévíti siráiye.

⁴⁴miráumai Tévíti Káráísitintavena séna kesí Ísóigoman-iye siráimbanivo nóraumaiya kwemá Tévítin-andaraken-kwaasiman-iye Ísu súmba Káráísiti Tévítina Ísóigoma éna Tévítin-andaraken-kwaasigoman-iye. ámáámba sen-kwáásítí aambá kwáráavo siráin-kwasai.

⁴⁵sáwíva-kwaasi mináímbá kwéisowana Ísu kwená kwayó-kwáásíyávéna séna

⁴⁶évakaꞌo ámáámbo sen-kwáásítí aambá kwáráávo. minkwáásí ayáátáár-ampantama iyésa naaópaꞌa avuvumpaꞌá kwénaaowasa pósa kwaási tuwánésa sésa anón-kwaasiman-owe kwésewe. minkwáásí monoꞌ-náúmpáꞌó umáyáapaꞌa anón-kwaasimo maí-áyámpáꞌá umésa tanómbo kaúvópaꞌo máyáapaꞌa kawer-áyámpáꞌá mésa kawe-tómbá kwénaawe.

⁴⁷minkwáásí ketor-íníntí óísankwara naankwaráꞌá umóyámbá kwémaesa kwaási suwánésa súwíꞌa mósá maráígwáe sésa kampakómbá tavisimái-namunaa kwésewe. mirámó owáíná anondá umbai-yántááꞌá mayánááowe Ísu siráiye.