Read Kosena Árúku 21 Bible Online

Árúku 21 - Kosena bible

Árúku 21

¹simásuwena Ísu anóm-bonoꞌ-naumpaꞌa ména tuwánómba óntambo túwón-anaveumpimba sáwívar-oisankwara-kwaasi sáwívar-ontamba túwówana

²moórá-ketor-ininko íma óísamba makón-ininko téna sáwíyan-ontamba kae-tóyáráámbá tuwómba Ísu awánéna

³kwená kwayó-kwáásíyávéna séna áraiꞌa simátimeꞌa séꞌa minkétór-ínínkómó túwáin-ontankoma amápa-kwaasimo tukáan-ontankomba usáyaaitaiye.

⁴miwímá sáwívar-oisampinkemba évakaꞌa tukáavo kwemá sáwíyan-oisampinkemba mútúꞌa túwáimba póna óísan-iyaaimba méniye Ísu siráiye. anóm-bonoꞌ-namba tawisí-áímbá siráin-kwasai.

⁵súwasa évakarawai anóm-bonoꞌ-nantavesa sésa kawer-óntánkákémbá úmakaawe. Áánútumba ámakaaan-tantaaꞌa konaarirí úmakaawata awánéta aamoiyá kwéune suwaná

⁶Ísu séna aáno kwaási tésa awánaan-tantaaꞌa amápaꞌa tawísíyuwesa amápar-ontankwarare tawísíyuwanaaowe Ísu siráiye. sáwí-kanaa tíníye siráin-kwasai.

⁷Ísu mináímbá súwasa áísaa esa sésa anóndakoo emó sénda nósa-tawaiya tíníyo. nóran-awaamera ínata séta ákíraꞌa Ísumo simbá mirá íníyeya sénaumno suwaná

⁸Ísu séna kampar-áímbá iséꞌa áraire sevó kárákwiyoro. sáwíva-kwaasi tóyo ésa kesúwíꞌa mágwétesa sésa Áánútumo usásisinkaiwai únda póna minkánáá sáwíyankaꞌa tíníye sénááowe. mirán-áímbá síyawai tínaaemba íma kwáráaro.

⁹ááiꞌo tíyáán-aimba némpakenaꞌi. egwaakénáꞌi. isáíyana íma tááꞌa kaíno. mirán-kánáámó tínda mindá íma amápa-tantaaꞌa ánásai-awaameꞌan-iye.

¹⁰moórá-ayampa-kwaasimo ésa óꞌon-ayampa-kwaasiye ááiꞌa tiyánááowe. moórá-kawaa-kwaasigomo éna moórá-kawaa-kwaasigona amááraayavena usásimbai ááiꞌa tíyáaro sínasa usásinesa ááiꞌa tiyánááowe.

¹¹óꞌon-oꞌom-baravaꞌa anóm-barima táníye. óꞌon-oꞌom-baravaꞌa ayawaimá táníye. sáwíva-kwaasi tíꞌa íníye. kwíyómpaꞌa óꞌon-oꞌon-tantaaꞌa paárínaꞌa awánéꞌa táátavai ónááowe.

¹²mintántááꞌó ímo paárínasa keinárawaꞌa tátoꞌmai sáwíꞌa umátinkesa monoꞌ-náúmpáꞌá mono-káwáá-kwáásí aaivimbá maitinkésa ándávaꞌa mótinkanaaowe. kentáváímó asiramáímo máyáantavesa tátoꞌmai anón-kwaasitopare kámááni-kawaa-kwaasitopare mótinkesa aaí simátinkaiyaꞌa

¹³minánón-kwáásí kesáái simátimenaaowe.

¹⁴aaimó simátínkénkaꞌa nóran-aina sénaumno-imayaa íma anómba íyana tirunkó íma umbaí taíno.

¹⁵minkánáá kawer-ímáyáá timéꞌa aaí táákaꞌa tínkáanaꞌa síyasa kentí namuro-kwáásí íma kanaán-umai kentááí araaisésa íma usáyaaitanaaowe.

¹⁶kentinóvowiye kentíváꞌawaawiye kentimááraawiye kentí kwaásiye tíꞌmaesa anón-kwaasitopaꞌa mótinkesa aaí simátinkaiyasa keinárawapinkemba évakarawai tínkamiyaꞌa puwónááowe.

¹⁷kentáváímó asiramáímo máyáantavesa amáparawai tíyámba umátinkanaaowe.

¹⁸mirá ésa íma timambá tínkambai ánásanaaowe.

¹⁹asiramáímo maéꞌo éꞌa kaweꞌá umái ménaaowe Ísu siráiye. sáwí-kanaagona kwaasái.

²⁰Ísu mináímbá simásuwena séna Yérúsaremu-naopaꞌa namuro-kwáásí taúkúmaraiyaꞌa séꞌa amápa-tantaaꞌa tawísíyuwanaaon-kanaa tiyé sénááowe.

²¹Yútiyaa-maravaꞌo máyaiyan-kwaasi omápata isaaisésa iyónááowe. naaópaꞌo máyaiyan-kwaasi mindáópaꞌa tuwésa kóyáwé ónááowe. kígauvaꞌo máyaiyan-kwaasi íma naaópaꞌa iyónááowe.

²²minkánáá Áánútu sáwí-meyamba timínana Áánútun-aai aúváí-kwandaaivinken-aimba paáriniye.

²³tímúkwarar-inimba ívér-iyampoigwarar-inimba minkánáá sáwíꞌa ónááowe. Áánútu maankwáásíyávéna áwááꞌa tiyínana anón-umbai táníye.

²⁴óꞌom-baravakewai évakarawai ayáátááꞌ-mankaraꞌnei tínkamesa évakaꞌa tíꞌmaesa óꞌon-oꞌon-kwaasiti maraváꞌá mótinkesa óꞌonkaa-kwaasi Yérúsaremu-naopaꞌa kárákwiyesa sáwíꞌa íyana Áánútu séna kentí kanaamá ánásaiye síníye Ísu siráiye. Ísu marapáꞌá kumínín-kwasai.

²⁵Ísu mináímbá simásuwena séna aaváúráꞌá kwíyónkaꞌa okáꞌá óꞌon-oꞌon-tantaaꞌa paáriniye. marapáꞌá óꞌon-oꞌom-bapaken-kwaasi umbaí tiyáníye. uwí-nónkó anónkaꞌa áái kwésena tuvántááva ínasa kwaási inkaisénááowe.

²⁶kwíyónko toraꞌnaáraꞌa ínasa kwaási sésa nóra íníyo sésa tiyántámbá kwétainasa táátavai kwéesa anón-imayaa ónááowe.

²⁷kemá kwaási úrandako anón-asirayankwara ságayankwaraꞌa ainámpímbá kúmónaꞌa suwánanaaowe.

²⁸kemó súnda-yantaaꞌa ááimba ásámai paárínaꞌa mósá awánanaaowe. Áánútu kawer-ámpáꞌá métinkanin-kanaa sáwíyankaꞌa tínímba póꞌa toꞌmayaa umái méꞌa mósá awánaaro Ísu siráiye.

²⁹Ísu mináímbá simásuwena séna moórá-tai naí-táígó áwíꞌa víki mindágwara óꞌon-taigwaraꞌa imáyáa oró.

³⁰aráságáyómó agayáínda awánéꞌa séꞌa áúꞌo sínín-kanaa sáwíyankaꞌa tíníye sénááowe.

³¹mirámó intembá kemá súnda-yantaaꞌa ínaꞌa awánéꞌa séꞌa Áánútu kwená kwaási kwégawaaimba sáwíyankaꞌa tíníye sénááowe.

³²áraiꞌa simátimeꞌa séꞌa ívéꞌo máyáan-kwaasi évakaꞌa íma pukáiyankaꞌa kemó súnda-yantaaꞌa paáriniye.

³³kwíyómba maramá ánásainana kesáái íma ánásena úwoi kwaíkwaiꞌa íníye Ísu siráiye.

³⁴Ísu simásuwena séna kentúraꞌa kárákwiyoro. uwoꞌaóꞌ-nómbá néꞌa kavóná méꞌa marapá-tántááꞌá anón-imayaa ováínivo. mirámó kwéꞌo éꞌa íma imáyáa kwéiyankaꞌa kumúnavainivo kárákwiyoro.

³⁵kívoꞌo aumakáawanamo ímo imáyáa imbó kwaígomo tavágwintemba óꞌon-oꞌom-baravaken-kwaasi íma kwéisenkaꞌa kumúnavainivo

³⁶kárákwiyoro. námúnaa símae kwéiyiyana kemó súnda-yantaaꞌa kentópaꞌo tínaꞌo éꞌa asiramái éꞌa kwaási úrandako súrankaꞌa ménaaowe Ísu siráiye.

³⁷minkánáávímbá aasiyaasi-táwai Ísu anóm-bonoꞌ-naumpaꞌa uména kwenáái simátímaꞌmaena kwéiyena enónkaꞌa máápaꞌa kumbéna Óríve-omapaꞌa noꞌwáámba umaíꞌmai kwéuwasa

³⁸sáwíva-kwaasi aaváyaavimba ááéma Ísun-aai isánáe sésa anóm-bonoꞌ-naumpaꞌa umaíꞌmaiꞌa úmae iráawe.