Read Kosena Árúku 22 Bible Online

Árúku 22 - Kosena bible

Árúku 22

¹naaóváꞌó Áánútu Yútaa-kwaasi tíyótaasa í-tánómbá ímo intóráín-tantaakwara-pereti kwéagayon-kanaama sáwíyankaꞌa túwasa

²mono-káwáá-kwáásíyé ámáámba sun-kwáásíyé Ísuna ámááyu-aimba suwaná úwoi-kwaasiyavena tááꞌa kówasa íma avoraꞌá tátoranaumne siráawe.

³suwaná Ísuna kwayó-kwáásí sísamaivakemba kaeꞌá kumbaimái-kwaasivinkewai áwíꞌa Yútási moórá-awiꞌa Isakéríóti póna Sáátáánigo kwenarumpimbá koména imáyáa amúwana

⁴mono-káwáá-kwáásítópare monoꞌ-nákáꞌó kárákwirowaitopare kwéna séna túwaꞌnaa onaꞌá Ísumba tátoranaaowe súwasa

⁵isésa aamoí kwéesa sésa mirámó inda-méyámbá óntanta aménaumne suwaná

⁶Yútási owé séna ímo kwaásimo mépaꞌo éꞌa nóraumai Ísumba agaráátínkáanasa tátoranaao-imayaa ááimba ásámai uráiye. tíyótaasa í-tánómbá kauráan-kwasai.

⁷Yútaa-kwaasi ímo intóráin-tantaakwara-pereti kwéagayon-kanaa túntemba tíyótaasa í-tánón-kánáá sipisípi-araaꞌa tuvúꞌmái kwégauvunkaꞌa

⁸Ísu Pítaante Yóninte tiꞌmaréna séna tíyótaasa í-tánómbá kogwégauviyata komandaanó súwasarai

⁹mindárai sésarai náávara kogauvóyauyo suyaná

¹⁰Ísu séna Yérúsaremu-naopaꞌa kwíyana moóráwaimo nonánámo maimaénamo kwíndawaimba kóánaaemba kwáráakaiyo. kwemó naaúmpaꞌo iyínanamo

¹¹naankó avowámó máyáinakai kosimámekai anóndakoma áísaa ena séna kesí kwayó-kwáásíyé náán-ayampara tíyótaasa í-tánómbá nánaumno kwésiye kosimámékaiyo.

¹²kwemá avóvomayaaꞌ-nankomba anón-ayaampaꞌa agaráátinkaniye. kísuvuꞌo umándanaaon-tantaaꞌa mimpímbá kwáyáiye. amápa-tantaaꞌa arúsámarekai minkáꞌá kausínkáakaiyo súwasarai

¹³mindárai isésarai Yérúsaremu-naopaꞌa kwésarai Ísumo sún-tantaaꞌa kwáyowasarai minkáꞌá tanómba mágauwankaraaiye. Ísu kwená kwayó-kwáásí toómbá tímakain-kwasai.

¹⁴tanómba nánááon-kanaa túwasa Ísuwe kwená aantá-kwaasiye toómbó naíváꞌá komáyówana

¹⁵Ísu simátimena séna sáwíyankaꞌa síꞌa índaiꞌa umásinkanaaon-kanaa íma tiráinaꞌa ááéma tíyótaasa í-tánómbá keinárawate nánaumne-imayaa úmae iráunda ívéꞌa minkánáá paárimba póta nánaumne.

¹⁶simátimeꞌa séꞌa marapáꞌá maantánómbá íma ókwaraꞌa nánaumpo Áánútu kwená kwaási kwégawaaipaꞌa maantánónkóná ááimba avoraꞌá kwáyainaꞌa nánaumne séna

¹⁷ándá-aran-dombo kwáyon-anaveumba maisoréna Áánútumpaꞌa súwi séna maimái moórá-mora-umai naaró.

¹⁸simátimeꞌa séꞌa ándá-aran-domba íma nánaumpo Áánútu kwená kwaási kwégawaaipaꞌa méꞌa ókwaraꞌa nánaumne séna

¹⁹péréti maisoréna Áánútumpaꞌa súwi séna topámbai tímatuwena séna mindá kesúman-ivo keinárawataveꞌa ísámai kesúma tuwánaumne. miráumai kentávéꞌa imáyáa kwéeꞌa námae íyóro súwasa

²⁰toómbá násúwówana ándá-aran-dombo kwáyon-anaveumba maisoréna pérétimo timúntemba miráumai ándá-aran-domba tiména séna mindá kesí naaemán-iye kesí naaemá keinárawatavena kumínímba póna Áánútu séna kesé tarúmai máyáawe séna mináúná-áímbá simái tarúmakaisaꞌa miráumai kentávéꞌa imáyáa kwéeꞌa námae íyóro.

²¹kembó namuro-kwáásíráꞌó agaráátinkaniwai keséya ména toómbá kwénaiye.

²²naaóváꞌá Áánútu séna kwaási úrandako puwíníye siráintemba póꞌa púwónana namuro-kwáásímó agaráátinkaniwai sáwí-meyamba mayáníye Ísu súwasa

²³kwená kwayó-kwáásí keáímbá sésa nááwa mirá ínísana siyó siráawe. aiva-kwáásítí kwaasái.

²⁴Ísuna kwayó-kwáásí keáín-keaimba sésa kentáávínkémbá nááwa aiva-kwáásí-íꞌa íníyo kwésuwana

²⁵Ísu séna marapár-ánón-kwáásíyómbá usáyaaitamai asirayán-áímbá simáti simati kwéuwasa kwenkóyai kwentáyaiꞌa ésa sésa kentáásí anón-kwaasi kaweꞌá kwéowe siráawe.

²⁶keinárawaꞌa miráumaimo anón-kwaasimo ontembá íma mirá oró. keinárawapinkemba anómba ménae síyawai amáparawaiti mayáí túwaꞌnaa oró. usáyaaitanae síyawai óꞌowiti kwayóꞌá márááro.

²⁷marapá-kwáásívínkémbó toómbó ménamo kwénaiwai anón-kwaasin-ivo kísuvuꞌo kwéumamiwai sáwíyan-kwaasi imbánivo kemá kentí anóndako íma mirá éꞌa kentí kwayóꞌnákááníꞌa kwéune.

²⁸mirá únaꞌa kembó sáwíꞌo umásínkáankaꞌa kesé méꞌa íma síyukaawe.

²⁹kesivo kentávéna séna kwaási kawááuwo siráintemba keinárawataveꞌa mirán-áímbá simátimenaumne.

³⁰kwaási kawáá ondaráꞌá méꞌa toómbá kwéneꞌa kawáá ondaráꞌá méꞌa Ísareri áánimbaaꞌa sísamaivakemba kaeꞌá kumbaimái-aanimbaati minándárákén-kwáásí táái iséꞌa taaínkaaꞌa ónááowe Ísu siráiye. Pítaa ánaaemba umásinkaniye siráin-kwasai.

³¹Ísu Sáímonimba arumbá umánkena séna Sáímoniyo isaaó. owáímó toꞌmáímo tuvimpí owanamó arúꞌó marapá kúmísasamo anónkaꞌa mósá máyáantemba kawe-tántááꞌá mósá maéꞌa sáwí-yantaaꞌa úwoi kwáyaindayavena Sáátáánigo tísaa umai isánáe sínaꞌa

³²mindáyaveꞌa Áánútumpaꞌa námúnaa séꞌa kesémo aráápamai máyaanda siyuwáanavo séꞌa námúnaa siráumne. emá siyuwé koyauweré kesí kwaási asiramátinkaao Ísu súwana

³³Pítaa séna Ísóigoo ándávaꞌo áíꞌmaesamo kwíyaꞌo éꞌa kesé kóyauye. tuvuwíyamo puwínaꞌo éꞌa kesé puwóyauye Pítaa súwana

³⁴Ísu séna Pítaao simámeꞌa séꞌa ívéꞌa kokórigo íma áái siráindaraꞌa emá kaumboráꞌá kentáváí se íma awánáúnda-kwaasiye síníyone Ísu Pítaantavena siráiye.

³⁵Ísu simásuwena kwená kwayó-kwáásíyávéna séna óntambo inaainaaimó sií-únámbá íma maimaéꞌa toón-únámbá íma maimaéꞌa kwéꞌa tísamai ánáamba íma maimaéꞌa koró mináímbá ááéma séꞌa tiꞌmákaunda moórá-yantaataveꞌa aáváán-kuráinaꞌiyo súwasa miwí sésa ímaniye suwaná

³⁶Ísu séna ívéꞌa óntan-unamba makáiyawai minúnámbá maimaésa koró. toón-únámbá makáiyawai minúnámbá maimaésa koró. taánasatama íma makáiyawai miwítí paákákén-únánkwátói óꞌowima timésa óntamba mairésa taánasatama meéyán-uresa koró.

³⁷simátimeꞌa séꞌa naaóváꞌá Áánútun-aai aúváí-kwandaaivimba Áísáya agaimaréna sénaeráíꞌmaesa sáwíꞌa uráan-kwaasi ermépaꞌa móankaraawe agaimaréna siráimba kentávéna siráimba póna paáriniye Ísu súwasa

³⁸kwená kwayó-kwáásí sésa Ísóigoo kae-tánasatama makáumne suwaná kwemó sún-ainkona ááimba íma ísóntavena séna áꞌaniye Ísu siráiye. Ísu Kétésémanivaꞌa siráin-kwasai.

³⁹Ísu simásuwena máápaꞌa kuména Óríve-omapaꞌa umaéꞌmae kwéuntemba iyúwasa kwená kwayó-kwáásí ánaaemba kwaꞌmaésa

⁴⁰íyúwana Ísu simátimena séna Sáátáánigo tísaa umai isánáe-aimba kentópaꞌa síyáváínivo Áánúmpaꞌa námúnaa seró séna

⁴¹tiyuwéna egwaaꞌá kwéna Áánútu anóndaꞌan-iye séna maraꞌá kumbaéna námúnaavinkemba

⁴²séna kesivoó embó ankáinamo e maanúmbáí-yántááꞌó kesópaꞌo tínímba maisiyuwéma ánivo kesí imáyáa íma kwárénaꞌa ená imáyáa kwáráano súwana

⁴³Áánútuna kwayóꞌnáꞌá kwíyómpakewai paáréna asiramánkarowana

⁴⁴arunkó anón-umbai tówana Áánútumpaꞌa námúnaa asiramái kwésuwana umisimá naaeráámbá marapáꞌá úmae kumúwana

⁴⁵námúnaa simásuwena usásinena kwená kwayó-kwáásíráútópaꞌa téna tayuwánómba tirunkó umbaí tówasa tuún-kwaigurówana

⁴⁶tayúsena tasimátimena séna tuúmó kwáyáamba usásineꞌa námúnaa seró. Sáátáánigo tísaa umai isánáe-aimba kentópaꞌa síyáváínivo Áánútumpaꞌa námúnaa seró Ísu siráiye. Ísumba tátokaan-kwasai.

⁴⁷Ísu mináímbá kwésuwana sáwíva-kwaasi kwétuwana Ísuna kwayó-kwáásí sísamaivakemba kaeꞌá kumbaimái-kwaasivinkemba moóráwai áwíꞌa Yútási kwemá misáwívá-kwáásívímbá aivaꞌá téna Ísumba paruvará umánkaindayavena Ísuna egwaaꞌá túwana

⁴⁸kampakómbá kwéuntavena Ísu séna Yútásiyo kemá kwaási úrandakomba kesí namuro-kwáásíráꞌó agaráátínkéndayavai paruvará kwéumasinkaane súwasa

⁴⁹Ísuwe máyówai moórá-yantaaꞌo paárinin-imayaa ésa sésa Ísóigoo taánasataneiya karánaumno suwaná

⁵⁰Ísuna kwayó-kwáásívínkémbá moóráwai taánasata maimaéna aivaꞌ-mónó-káwáánákóná kwayó-kwáásígón-ááꞌa agáúsuwowana

⁵¹Ísu étuwaao séna minkwáásígón-ááꞌa maimái kaweꞌá umánkaraiye.

⁵²kaweꞌá umánkowasa mono-káwáá-kwáásíyé monoꞌ-nánká-káwáá-kwáásíyé anón-kwaasiye Ísumba tátoraiyanesa tamáyówana Ísu simátimena séna kentávéꞌa umóyán-kwáásímán-iye séꞌa póꞌa taánasatagwara ánáyatankwaraꞌa maimaéꞌa kembá tátoranae séꞌa kwétewe.

⁵³sáwíva-tawai anóm-bonoꞌ-naumpaꞌa kesé máyaundaraꞌa íma kembá tátokaawe. ívéꞌa kentí kanaamá tisaꞌá tunínkóná asirayánkwáráꞌá méꞌa kembá tátoranaaowe Ísu siráiye. Pítaa íma awánáúnda-kwaasiye siráin-kwasai.

⁵⁴súwasa Ísumba tátoresa áíꞌmaesa aivaꞌ-mónó-káwáánákóná naaúmpaꞌa móankowana Pítaa tínaaemba nénkaꞌa teémáyomba

⁵⁵mindánkóná naamaúvaꞌa iramá agaimarésa máyówana Pítaa miwísé maraꞌá tamáyowana

⁵⁶iramá kaweꞌá umái kwégowana moórá-kwayor-arasigo téna Pítaamba takarákéna séna minkwáásígó kwesé máíwain-iye súwana

⁵⁷Pítaa séna ímanivo kemá íma awánáúnda-kwaasiman-iye súwana

⁵⁸sáwíyankaꞌa moóráwai Pítaamba taawánéna séna kwená kwaásivinkendaꞌa óne súwana Pítaa séna kemá ímaniye súwana

⁵⁹sáwíyankaꞌa moóráwai Pítaantavena asiramái séna áraiꞌa súne. Kárírivakendaꞌa póna kwená kwayó-kwáásívínkéndáꞌán-iye súwana

⁶⁰Pítaa séna emó sénda-aimba íma kwéisaumne kwésuwana kokórigoma áái súwana

⁶¹Ísóigo kwanténa Pítaamba awánówana Pítaa Ísóigo simámun-aimba áákaꞌa maréna mirá siráinkaꞌa ívéꞌo kokórigomo ááimo ímo siráindaraꞌa emá kaumboráꞌá kentáváí se íma awánáúndanaꞌan-iye síníyone siráimba mináímbá áákaꞌa maréna

⁶²máápaꞌa kuména ávááraumai iviꞌá taráiye. Ísumba kanaárááꞌa ánkaraan-kwasai.

⁶³Pítaa iviꞌá tówasa Ísunkaꞌa kárákwirowai kanaárááꞌa ankésa tuvuwésa

⁶⁴aúrampaꞌa ampantanéí káátamakesa kwétuvuwesa sésa esáváí se Áánútumo usásisinkaiwai úne séndawai ómpo kemá nááwa kwétuvuwuna simásimiyo kwésesa

⁶⁵óꞌon-oꞌon-aimba simái sáwíꞌa umánkaraawe. monor-ánón-kwáásítópaꞌa Ísumba ánkaraan-kwasai.

⁶⁶aaváúmá usónkaꞌa Yútaa-kwaasiti anón-kwaasiye mono-káwáá-kwáásíyé ámáámba sun-kwáásíyé torupamái máyówasa Ísumba áíꞌmaesa móankowasa

⁶⁷sésa Áánútumo usásinankaiwai Káráísitiyaꞌona simásimiyo suwaná simátíménaꞌo éꞌa íma kaweꞌá umái isánááowe.

⁶⁸moórá-aimbo tísaa onaꞌó éꞌa íma simásimenaaowe.

⁶⁹kemá kwaási úrandako Áánútu asirayáwáíná ayáánúrapaꞌa asirayán-áyámpáꞌá uménaumne súwasa

⁷⁰amáparawai sésa ewá sé Áánútu ááninko úne kwéseno suwaná Ísu séna áꞌa sewé súwasa

⁷¹miwí sésa kwesáváí siráimba póta mináíntávéta aavintá mayankéta óꞌon-aimbo simánkáamba avakáá únda póta ivátá tuwánaumne siráawe.