Read Kosena Árúku 5 Bible Online

Árúku 5 - Kosena bible

Árúku 5

¹moórá-tawai Ísu nonkwaaúnkón-awampaꞌa áwíꞌa Kénésáréti-kwaaunkon-awampaꞌa máyowasa Áánútun-aai isánáe sésa tóyo ésa kwenkuvaráꞌá úmaesa tuwaná

²kaeꞌá sáwíyan-dompi-sipi nonáámááívaꞌa kwáyowana moórá Sáímonindei kwáyowana awánówasa noyááꞌa tóróyan-kwaasi mindómpí-sípí tuwésa kwase-únámbá kwésese uwaná misípí úwoi kwáyowana awánéna Sáímonina nompí-sípívímbá usáatena Sáímonintavena séna egwaaꞌá maimaé kwaaó súwana egwaaꞌá avúsúmaena nonawámpáꞌá kúwana Ísu mimpímbá maraꞌá ména amápa-kwaasi simátímakaiye.

⁴simásuwena Sáímonintavena séna nompí-sípí avúsúmae nonavuvumpáꞌá kuré egwárá ená kwaásigwaraꞌa kwase-únámbá túwéwana nompímbá kumínaꞌa noyááꞌa asínáaro súwana

⁵Sáímoni séna anóndakoo ívéꞌ-noꞌwaamba mirá úmae iyúndaya íya noyááta asinéta úwoiya máyaundayaanivo emó séndantemba ónaumne séna

⁶nonavuvumpáꞌá kwésa kwase-únámbá túwówana nompímbá kumúwana sáwívaꞌ-noyaaꞌa minúnámpímbá ógwitena tarárááraꞌnaraamba úwasa

⁷moórá-nompi-sipivimba miwítí kwaási máyówasa awánésa tiyáán-tuwaaꞌa ésa tasúwaꞌnaa oro suwasá tésa minkáé-sípívímbá noyááꞌa mósá márówana ógwitena umbaí téna nompímbá kunávekoraꞌnaraamba úwana

⁸Sáímoni Pítaa mirámó úmba awánéna Ísuma anóndakoman-iye séna aísamaivimba kívairena séna Ísóigoo sáwí-kwaasi úmpo siyuwé kwaaó siráiye.

⁹sáwívaꞌ-noyaaꞌa asínóntavena Pítaawe kwesé máyón-kwaasiye táátavai uwasá

¹⁰Sáímoniye noyááꞌa toꞌmaésarai nááúyawai Sépéti ááninkai túwíꞌa moóráwai Yémési úwana moóráwai Yóni mindáraiye táátavai uyaná Sáímoni Pítaa Ísuntavena séna Ísóigoo sáwí-kwaasi úmpo siyuwé kwaaó súwana Ísu séna íma ááꞌa kaíno. noyááꞌo toꞌmaé kwénaaomba mimbáyáí ivátuweꞌa ívéꞌa kwaási tavisíyasa kesirááíma kwáráaro súwasa

¹¹mindómpí-sípí tavisímaesa nonáámááívaꞌa mámaresa miwítí mayáímá ivátuwesa Ísun-ánaaemba kwaꞌmaésa kwénaaowe. Ísu áúma karón-kwaasi kaweꞌá umánkarain-kwasai.

¹²moórá-tawai Ísu moórá-naopaꞌa máyowana moóráwai amápa-kuvaꞌa áúma karón-kwaasi Ísumba awánéna anóndakoman-iye séna aísamaivimba takívairena séna kentávénamo ankáínamo e kanaán-umai aúnáiꞌa umásinkaniyone súwana

¹³Ísu ayáámba aneꞌá tátorena séna mirá ónaumpo enáúraꞌa karevúꞌa kawáúgwiye súwana avekáámbá kawáúguwana

¹⁴Ísu asiramái séna enáúraꞌa kawáúgwimba po naaóváꞌó Mósesimo siráintemba monoꞌ-máyáí-kwáásítópaꞌa kwéma enáúma máagaraatinke póíma tímínasa Áánútuntavesa ísámai tuvúꞌmái agayáíyasa amáparawai awánésa áúrakemba kawáúgwiye sénááowe. ánivo enáúraꞌo umánkaunda-aimba simátimunavo se kwaaó Ísu súwana

¹⁵ivátuwena kaweꞌá umánkon-aimba simátímaꞌmaena iyúwana mináínkó naaóꞌ-naoꞌa kóyáwé úwasa sáwívarawai tóyo ésa kwenáái kwéiseꞌa onaná tíꞌo in-kwáásí asóvamatinkainkwae sésa tóyo uwaná

¹⁶ánivo Ísu Áánútumpaꞌa námúnaa síndayavena kavóná-maravaꞌa kóyo uráiye. Ísu aísamai pukówaimba kaweꞌá umánkarain-kwasai.

¹⁷moórá-tawai évakarawai ámáán-kawaa-kwaasiye ámáámba sun-kwáásíyé Yérúsaremu-naopakemba Káríri-ayampakemba Yútiyaa-ayampakemba tóyo ésa Ísu moórá-naumpaꞌa aaí kwésimatimumba taísaraawe. Áánútu Ísumba asóvamatinkanin-asirayamba ámakowana máyowasa

¹⁸évakarawai aísamaimo pukówaimba kwandaaivímbá marésa taagwiyaꞌmaésa tésa Ísunopaꞌa máánkáananaya kaweꞌá ínkwáe sésa tumbá

¹⁹mindáúmpáꞌá sáwíva-kwaasi sisipáá uwasá íma kanaán-umai íyóraꞌnaraan-esa naanamivaꞌá taagwiyaꞌmaésa umésa avaaꞌá akósámaresa ándára tátoresa túwówana kumeémena kwaásivimbo Ísumo máyompimba aúrankaꞌa kumúwana

²⁰Ísu taagwiyaꞌmaésamo tun-kwáásímó áraiꞌa kaweꞌá umánkaniye-imayaamo umbá Ísu tuwánéna aísamaimo pukón-kwaasiyavena séna kesí kwaásiyo ená sáwí-imayaa mayauwáúmne súwasa

²¹ámáán-kawaa-kwaasiye ámáámba sun-kwáásíyé iséise esa sésa Áánútu kweyáá sáwí-imayaa maitiyuwánívo kwaási íma mirá ónááovo Áánútumba akáꞌáámba kwésimankaiye suwaná

²²Ísu minímáyáámó umbá awánéna séna nóra éra mirán-ímáyáá kwéoo.

²³moóráwaimo aísamaimo pukáindawaintavaimo sénamo ená sáwí-imayaa mayauwáúmne sínasamo ésa áraira sií. kampará siíyo sénááowe. ánivo moóráwaimo aísamaimo pukáindawaintavaimo sénamo eyááríkaꞌa usásine kwaaó sínasamo ésa áraira sií. kampará siíyo awánanaaowe.

²⁴kemá kwaási úrandaꞌa kumpaáruraundawai marapáꞌá máyaunda kwaásiti sáwí-imayaa maitiyuwáúnda-asirayamba tokáunda póꞌa agaráátínkáanda awánanaaowe séna aísamaimo pukón-kwaasiyavena séna isaaó. usásinke ená kwandaaimá maimaé ená naaópaꞌa kwaaó súwana

²⁵túrankaꞌa usásinkwena kwená kwandaaimá kwémaena Áánútu áwíꞌa mósá kwémarena kwená naaópaꞌa kúwasa

²⁶amáparawai táátavai ésa Áánútu áwíꞌa mósá marésa sésa íma awánaraundaiꞌa isaꞌá awánáúmne sésa táátavai ésa tiyáámba tóipimba áákaawe. Ísu Áríváimba ááyarain-kwasai.

²⁷naaémba Ísu aampaꞌá kwégwena awánómba táákísi-mayai kwémayowai áwíꞌa Árívái táákísimo máyón-daumpaꞌa máyowana Ísu awánéna séna usásine kesé tiyó súwana

²⁸usásinena amápa-tantaaꞌa tuwéna kwenánaaemba kwaꞌmaéna kwéna

²⁹Ísuwe náíndayavena kwená naaúmpaꞌa anón-tomba agayówasa táákísimo máyón-kwaasiye óꞌon-oꞌon-kwaasiye Áríváina naaúmpaꞌa tamésa mindáraiye tamésa tagwémandowasa

³⁰ámáán-kawaa-kwaasiye miwítí ámáámba sun-kwáásíyé Ísuna kwayóꞌnárawatavesa áwááꞌa tiyésa tísaa esa sésa táákísi máyáan-umoyan-kwaasiye sáwíꞌa on-kwáásíyé toómbá kwénaao suwaná

³¹Ísu iséna séna sontaa-kwáásígó kaweꞌó umáímo máyáan-kwaasi íma kwétuwaꞌnaa-ivo tíꞌo in-kwáásí kwétuwaꞌnaa-iye.

³²mindáyaveꞌa arupí umái máyáan-kwaasi tááyaanasa Áánútunopaꞌa tígwáe séꞌa íma kunkáumpo sáwíꞌo umáímo máyáan-kwaasi tááyaanasa Áánútunopaꞌa tígwáe séꞌa kunkáumne Ísu siráiye. toómbá aawesuráan-kwasai.

³³suwasá évakarawai Ísuntavesa sésa Yóni nombó pétinkaiwaina kwayóꞌnárawaꞌa moórá-mora-tawai Áánútuntavesa imáyáa ésa toómbá íma kwénesa námúnaawe suꞌmai kwésewasa ámáán-kawaa-kwaasiti kwayóꞌnárawakwaraꞌa mirá kwéovo ená kwayóꞌnárawaꞌa íma mirá ésa toómbá nombá úwoi kwénaawe. nóra ésa mirá kwéoo suwaná

³⁴Ísu séna moóráwai aaraí mayáíndawai amááraawi tanómba kauntimínímba miwísé máyainasa aamoí ésa mintómbá íma aꞌáo sénááovo úwoi nánááowe.

³⁵naaémba minkwáásígómbá áíꞌmaesa kówíyasa minkánáámá amááraawi tirunkó sáwíꞌa ínasa toómbá aꞌáo sénááowe Ísu séna kwemó ménamo naaémbo tiyuwénamo iyíníntavena mináímbá siráiye.

³⁶Ísu mináímbá simásuwena maarán-áímbá kwántámai-aimba séna ááéraan-ampantamo avaaꞌó kwáyáísasamo ombá aúná-ampanta íma kárámai kwéaraapaawe. mirámó íyana aúná-ampanta sáwíꞌa ínana ááéraan-ampantao aúná-ampantaraaniꞌa íma íníye.

³⁷aúná-anda-aran-domba ááéraa-sipisipi-auwarasi-anaveumpimba íma kwéatimaraawe. mirámó íyanamo éna aúná-anda-aran-domba anón-éna ááéraan-anaveumba kavámbaena sáwíꞌa ínana mindómbá úwoivaꞌa atígwiniye.

³⁸mindáyavesa aúná-anda-aran-domba aúná-sipisipi-auwarasi-anaveumpimba kwéatimaraawe.

³⁹ááéraan-anda-aran-domba naawáímó ombá sésa ááéraan-anda-aran-domba áséi kwéiye kwésesa aúná-anda-aran-domba íma kwésinkaiye kwésewe.