Read Kosena Árúku 6 Bible Online

Árúku 6 - Kosena bible

Árúku 6

¹moórá-tawai Yútaa-kwaasi agándon-kanaaraꞌa Ísuwe kwená kwayó-kwáásíyé kígauvimba úwíti-ton-kigauvimba kwégwesa kwená kwayó-kwáásí úwíti-aramba kútúmai ásima pítuwesa kwénowasa

²ámáán-kawaa-kwaasi évakaꞌa tuwánésa sésa agándaan-kanaama aambá áúmbakaawaꞌa nóra era mirá kwéoo suwaná

³Ísu séna naaóváꞌá Tévítimo urómba aúváívimba agaimarón-ainkona ááimba íma ísaraawe. Tévítiye kwená kwaásiye táái kwétinkowana

⁴Tévíti Áánútuna monoꞌ-náúmpáꞌá iyéna Áánútu aúrankaꞌo makón-tomba umairéna kwénena kwená kwaási timúwasa narááwe. mintómbá úwoi-kwaasi íma némáembanivo monoꞌ-máyáí máyón-kwaasi némáembani. Tévíti mintómbá umairéna timúwasa nonkáꞌá Áánútu íma áwááꞌa siráimbanivo kesí kwaási mirá kwéowaꞌa áwááꞌa ímo seráámbá áwááꞌa kwésewe.

⁵kwíyómpakemba kwaási úrandaꞌa póꞌa agándai-kanaaraꞌo kárákwiraundawai úmpo agándai-kanaamo kwaásimo mayáí kwémayaamba kendéímán-iye Ísu siráiye. ayáámba kawévaigurain-kwaasigona kwaasái.

⁶moórá-tawai Yútaa-kwaasi agándon-kaaaraꞌa Ísu monoꞌ-náúmpáꞌá iyéna kwésimatimuwana moóráwai ayáánúrapar-ayaamba kawévaiguron-kwaasi máyowasa

⁷ámáán-kawaa-kwaasiye ámáámba sun-kwáásíyé mésa Ísuntavesa agándairaꞌa póna minkwáásímó kaweꞌó umánkainataamo éta tátoꞌmaiya aaivintá mayankánaumne sésa Ísumba awánomba

⁸Ísu minímáyáámó umbá awánéna ayáámba kawévaiguron-kwaasiyavena séna usásine kemó máyaundaraꞌa umaiyó súwana usásinena Ísunopaꞌa túrankaꞌa umaúwana

⁹Ísu miwíyávéna séna moórá-aintaveꞌa tísaa ónáeꞌa súne. kentáásí ámáán-aimpimba nóin-aina kwáyáiyo. agándai-kanaaraꞌa póta kaweꞌ-máyáíyá kwémayaum. sáwí-mayaiya kwémayaumno. kwaási áwaꞌnaa onanayá kawerá umáíya méni. inkámónanaya puwíníyo tísaa ena súwasa íma aaí suwaná

¹⁰Ísu móyuwana meyuwana éna ayáámba kawévaiguron-kwaasiyavena séna enayáámba árútuwaao súwana ayáámba árútuwowana kaweꞌá umánkowasa

¹¹miwí tirumbá ávááraumai sáwíꞌa úwasa nóra umáíya inkamónaumno sésa kemó máyómpimba iséise uráawe. Ísu kwená kwayóꞌnárawaꞌa tááyarain-kwasai.

¹²minkánáávímbá Ísu enónkaꞌa omápaꞌa uména íma aúmá kwaéna Áánútumpaꞌa námúnaa símaena kwéiyuwana

¹³móirarowana Ísun-ánaaemba kwarón-kwaasi tááyowasa íyúwana minkwáásívínkémbá sísamaivakemba kaeꞌá kumbaimái-kwaasi táámpámarena séna kesí aantá-kwaasin-owe séna túwíꞌa taráiye.

¹⁴miwí túwíꞌa téna moóráwai áwíꞌa Sáímoniye séna aúná-kwiꞌa tamámena Pítaawe súwana séna moóráwai Pítaa áváko áwíꞌa Éndaru moóráwai áwíꞌa Yémési moóráwai áwíꞌa Yóni moóráwai áwíꞌa Vírípi moóráwai áwíꞌa Pátóromu

¹⁵moóráwai áwíꞌa Mátíyu moóráwai áwíꞌa Tómáasi moóráwai Árávíási ááninko áwíꞌa Yémési moóráwai áwíꞌa Sáímoni kwemá Árómáani-kamaani-kwaasi tiꞌmátuwanae siráiwai

¹⁶moóráwai Yémési ááninko áwíꞌa Yútási moóráwai Yútási Isakéríóti kwemá naaémba Ísumba kwená namuro-kwáásíráꞌá agaráátínkaraiwai miráumai-kwaasi Ísu tááyaraiye. Ísu sáwíva-kwaasivimba mayáí mairáin-kwasai.

¹⁷omápakemba Ísu miwísé arúváꞌá kumbáyowasa kwenánaaemba kwarón-kwaasi sáwívarawaiye Yútiyaa-ayampakemba Yérúsaremu-naopakemba uwí-nón-awampakemba Táyaa-naopakemba Sáíntóni-naopakemba sáwíva-kwaasiye tamésa

¹⁸Ísun-aai isánáe sésa tíꞌa ún-kwaasigwaraꞌa asóvamatinkainkwae sésa tóyo ésa taraváá-kwámbá tirumpimbá máyón-kwaasigwaraꞌa tóyo uwaná Ísu taraváá-kwámbá tirumpinkémbá maitiyuwówasa

¹⁹tíꞌa ún-kwaasi Ísun-aneꞌa tátoraanana síꞌa ánásainkwae sésa mirá uwaná asirayámbá tokéna póna mintíꞌá asóvamatinkaraiye. tirunkó kaweꞌá éna sáwíꞌa éna ínín-kwasai.

²⁰Ísu mirá umátiyuwena kwená kwayó-kwáásí tuwánéna séna keinárawaꞌa Áánútu súwaꞌnaa ínkwáe sewáí Áánútu kaweꞌá kwéumatinkena kwégawaaiye.

²¹ívéꞌa táái kwétinkaiwai tirumbá etóyóí umái máéro. Áánútu kanaa umátinkaniye. ívéꞌa tirumbá sáwíꞌa kwéisasa iviꞌá kwétaawai tirumbá etóyóí umái máéro. tirumbá kaweꞌá ínaꞌa kwíráái sénááowe.

²²keinárawaꞌa kemá kwaási úrandaꞌa kumpaáruraundawaintaveꞌa asiramái máyáawai kwaási tínaaembo umátinkesa tíyámbo umátinkesa sáwí-aimbo simátinkesa sáwí-kwaasin-owe sénááomba tirumbá etóyóí umái máéro.

²³mirá íyaꞌa tirunkó kaweꞌá kwéinaꞌa imá kwéteꞌa kwíyómpakemba kentí kaweꞌ-méyámbá mayánááowe. naaóváꞌá miwítíkwáꞌná mirá ésa Áánútun-aai simátímakowai sáwíꞌa umátínkaraawe.

²⁴ánivo marapákén-tántááꞌá makáawaima kárákwiyoro. tirunkó kaweꞌá kwéin-tantaaꞌa áꞌa makáamba póꞌa íma moóráma kaweꞌ-méyámbá mayánááowe.

²⁵ívéꞌa tímúꞌa vaiwáí kárákwiyoro. naaémba táái tinkáníye. ívéꞌa kwíráái kwésewai kárákwiyoro. naaémba iviꞌá tánááowe.

²⁶naaóváꞌá kentíkwáꞌná kampar-áímbá simátímakowai túwíꞌa mósá makáamba pósa mirámó kwésesamo kentúwíꞌo mósá kwémarewaꞌo éꞌa kárákwiyoro Ísu siráiye. namuro-kwáásí kaweꞌá umátínkáaro-kwasai.

²⁷Ísu simásuwena séna kemó simátíménda-aimba ísáaro. kesááimo iséꞌo éꞌa kentí namuro-kwáásí tirumbá kaweꞌá umátinkeꞌa tíyámbo umátínkéwai kaweꞌá umátínkáaro.

²⁸sáwí-aimba simátínkéwai kaweꞌá umátínkáaro. sáwíꞌa umátínkéwaimo éꞌa Áánútumpaꞌa námúnaa simái miwí túwaꞌnaa oro.

²⁹tááꞌo tuwausíyaꞌo éꞌa íma tinkaméꞌa ókwaraꞌa kwántá-timiyasa tuwausónááowe. kentí unáánkwátói mairésa sésa ókwaraꞌa mayánáe síyaꞌo éꞌa íma aꞌáo seró.

³⁰moórá-yantaatavaimo simiyó síyaꞌo éꞌa úwoi tíméro. kendéímo moórá-yantaaꞌo máyáíyaꞌo éꞌa íma usisiꞌá síméro seró.

³¹kembó tirááímo táínda-iꞌo umáímo kwétuwaꞌnaa-iyaꞌa miwí miráumai túwaꞌnaa oro Ísu siráiye.

³²Ísu simásuwena séna amáparawai kentí kwaásiti imáyáamo kwéowasamo ombá anondá miwítí imáyáa kwéowe. sáwíꞌo kwéon-kwaasi íma kawe-kwáásí ombánivo miwítí kwaásiti imáyáamo kwéowasamo ombá anondá miwítí imáyáa kwéowe. miráumaimo kentí kwaásiti imáyáawe suꞌmaimo kwéiyanamo éna Áánútu íma kaweꞌ-méyámbá timínívo kentí namuro-kwáásígwáráꞌá imáyáa tíméro.

³³amáparawai kaweꞌá kwéumatinkaan-kwaasi kaweꞌá kwéumatinkaawe. sáwí-kwaasigwaraꞌa mirá kwéowe. mirámó onten-umái kaweꞌó kwéumatinkaan-kwaasiye suꞌmaimo kaweꞌó umátínkéwanamo éna Áánútu íma kaweꞌá owé síníye. kentí namuro-kwáásígwáráꞌá kaweꞌá umátínkáaro.

³⁴sáwí-kwaasi naaémba siménááowe-imayaa ésa kwétimewe. naaémbo timénááon-kwaasiye suꞌmaimo timíyanamo éna Áánútu íma kaweꞌá owé síníye. naaémba siménááowe-imayaa íma éꞌa úwoi tíméro.

³⁵kentí namuro-kwáásí kaweꞌá umátinkeꞌa imáyáa tíméro. anondá simígwáe-imayaa íma éꞌa úwoi tíméro. mirámó íyambo éꞌa Áánútumpakemba kaweꞌ-méyámbá mayánááowe. Áánútu kwentávésa íma súwi sen-kwáásí úwoi kwétuwaꞌnaa-ena sáwí-kwaasigwaraꞌa mirá kwéisasa pósa kwaási keinárawaꞌa mirámó ombá tuwánésa sésa Áánútu kwíyómpakewai áánimbaaꞌa owé sénááówe.

³⁶kentivomá arumbá kwéumatinkaintemba mirá oró Ísu siráiye. íma sáwí-aimba simátíméro siráin-kwasai.

³⁷tuwánéꞌo éꞌa sáwí-kwaasiye síyanamo éna Áánútu kentáváígwáráꞌá mirá sínívo tuwánéꞌo éꞌa sáwí-kwaasiye sevó. umbai-yántááꞌó timíyanamo éna Áánútu kenkwáráꞌá mirá ínívo umbai-yántááꞌá tímévo. sáwíꞌo umátinkaiyaꞌo éꞌa mináímbá íma táákaꞌa maréꞌa tuwinkásuwaaro. mirámó íyanamo éna Áánútu kemó sáwíꞌo ombá maitiyuwáníye.

³⁸timíyantemba Áánútu anondá kembá timíníye. toómbó tíméwasamo nawááesamo aráávaraꞌo ontembá Áánútu mirá umái sáwíva-tantaaꞌa timíníye. miráumai tíméntemba Áánútu miráumai timíníye Ísu siráiye.

³⁹Ísu simásuwena kwántámai-aimba séna moórá aúgavitawai moórá aúgavitawaimba ayáán-toꞌmaesarai íma kanaán-umai kóyááoivo mirámó ésaraimo ésarai aísavaꞌa tuvamóyááoiye.

⁴⁰kwená iyámpóímo agaráátínkáiwaimbo ombá íma kwembá kwéusayaaitaavo kwenáái ísámaesa kwemó inteníꞌa kwéowe Ísu siráiye.

⁴¹Ísu simásuwena séna kentúrampimba irarumbá kwáyáísaꞌo ombá íma awánaamba kentí kwaási tuwánéꞌa enaúrampimba ayaantambá kwáyáiye kwésevo íma mirá seró.

⁴²kentúrampimbo irarumbó ímo awánaamba nóra sera kentí kwaási túrampinkemba tiyaantambá maitiyuwánáe kwéseo. kaumbo-káér-ainkwara-kwaasin-ovo kentúrampinkemba irarumbá maisukéꞌa tuwánéꞌa kentí kwaási túrampinkemba tiyaantambá kanaán-umai maitiyuwánááowe Ísu siráiye. taaigónté arankóntéi kwaasái.

⁴³Ísu simásuwena séna kawe-táígó íma sáwí-aramba iyáísana sáwí-taigo íma kawer-árámbá kwéiyaivo

⁴⁴mintáígó arambá awánésa sáwí-taiye kawe-táíyé kwésewe. tekómo éna íma áwí-yantaaꞌa iyánívo téꞌa iyáníye. ampaantarígo avoꞌárén-aramba íma iyánívo ampaantarí-aramba iyáníye.

⁴⁵miráumai kawe-kwáásí kawer-ímáyáávínkémbá kaweꞌ-máyáí kwémayaavo sáwí-kwaasi sáwí-imayaavinkemba sáwí-mayai kwémayaawe. tirumpimbá kwáyáin-imayaanei kwésewe Ísu siráiye. naambá kwéoyawairaiti kwaasái.

⁴⁶Ísu simásuwena séna kentáváí anóndako óne kwésembanivo kemó simátimunda-aimba íma kwaꞌmái kaweꞌá kwéowe.

⁴⁷kesópaꞌo tésa kesáái isésa kaweꞌá umái kwégwaraiyawai mirán-kwáásímó simátíméndaraꞌa ísáaro.

⁴⁸naambá ónáe sésa maravímbá maiꞌá uꞌmaésa kumeémesa óntamba kunavakáá-ésa minkáꞌá naamayáámba aimái naambá úmaraiyana aaꞌá téna anón-kavirayan-domba kumínana mindámbá íma tawisínda asiramái kwéena óntankaꞌ-namba póna úwoi kwéniye. miráráán-umai kwaásimo kesópaꞌo tésa kesáái isésa kaweꞌá umái kwégwaraawai asiramái ménaaowe.

⁴⁹ánivo kesáímo isésamo ímo kaweꞌó umáímo kwéisaawaima mirán-kwáásímó simátíméndaraꞌa ísáaro. naambá ónáe sésa íma maiꞌá ukésa íyamba paákáꞌá úmakaiyana anón-aꞌa téna kavirayán-dómbá kuména mindámbá tawísíyuwainana sáwíꞌa íníye. miráráán-umai ímo kesááimo ísámaimo kaweꞌó íyawai íma asiramái ménaaowe Ísu siráiye.