Read Kosena Árúku 8 Bible Online

Árúku 8 - Kosena bible

Árúku 8

¹minkákémbá Ísu naaóꞌ-naoꞌa anón-daopimpare sáwíyan-daopimpare kwénaaena Áánútu kwená kwaási kwégawaain-aimba áséi-aimba simátímaꞌmaena iráiye. Ísuwe kwená kwayó-kwáásí sísamaivakemba kaeꞌá kumbaimái-kwaasi kwénaauwasa

²évakar-ininte kwénaaesa miníníntómbá évakaꞌa tíꞌa úwana Ísu kaweꞌá umátínkaron-inimba uwasá évakaꞌa tirumpinkémbá taraváá-kwámbá maitíyukain-inimba uwaná moórá-inimba Mágátáraa-naopakemba áwíꞌa Máríyaa Ísu kwenarumpinkémbá avakaeté-taravaa-kwamba mayáúkon-ininko úwana

³moórá-ininko áwíꞌa Yóánana awaikó áwíꞌa Súsa kwemá Érótina naankáꞌá kárákwirowai úwana moórá-ininko áwíꞌa Súsáana úwasa évakar-ininkwaraꞌa uwasá miráumai-inimba pósa kentí náaindaampinkemba Ísuwe kwená kwayó-kwáásíyé túwaꞌnaa úmaesa kuráawe. moóráwai ánáyumba tuꞌmakáin-kwasai.

⁴naaóꞌ-naoken-kwaasi sáwívaꞌa Ísunopaꞌa tóyo uwaná Ísu simátimena séna

⁵moóráwai ánáyumba maimaéna kígauvaꞌa kwégwena máyuꞌmaraisana évakar-anayumba aampaꞌá kunkwáyáísasa kwaási tísamaigo tavútukaawana numaómá túkúnasukaiye.

⁶évakar-anayumba óntankwaraꞌ-maravimba kunkwéna karuwéna anoníyaim-baravaꞌa póna aáyánkaraiye.

⁷évakar-anayumba karaampimbá kunkwéna kárúraisana karaan-tantáákó araꞌnásukaiye.

⁸évakar-anayumba kaweꞌ-márávímbá kunkwéna karúmai anón-éna arambá imái sáwívar-aramba iráiye. kwéisaawai ísámai kaweꞌá oró Ísu siráiye.

⁹súwasa Ísuna kwayó-kwáásí Ísuntavesa minkwántámáí-áínkóná ááimba sinatá ísáano suwaná

¹⁰Ísu séna Áánútu kwená kwaási kawááin-ainkona ááimba kwésimatimunda Áánútu keinárawaꞌa imáyáa tímísaꞌa kwéisaavo óꞌon-kwaasi kwántámai-aine suꞌmai kwésimatimumpo kwéisaambanivo íma ísámai kaweꞌá kwéowe. kwéawanaambanivo íma awánamai kaweꞌá kwéowe Ísu siráiye.

¹¹Ísu simátímatuwena séna mináínkóná ááimba súnda ísáaro. moóráwaimo ánáyumbo tuꞌmáráinten-umai Áánútun-aai simátímísana

¹²évakar-anayumbo aampaꞌó kúmímba kwaási tirumpintá kúmísasa Áánútun-aai ísááwana Sáátáánigo imáyáa éna Áánútun-aaiyavesa áraire síyana sáwí-ampakemba kawer-ámpáꞌá métínkáivo séna tirumpinkémbá tamaimái úwoivaꞌa kwétiyuwaiye.

¹³évakar-anayumbo óntankwaraꞌ-maravimba kúmímba kwaási tirumpintá kúmísasa Áánútun-aai isésa aamoí ombánivo íma tirumpimbá tátoꞌmai kaweꞌá ontávésa sáwíyankaꞌa áraire kwésewana óꞌon-oꞌon-tantaako tisasá miwáná imáyáa ésa Áánútun-aai ivátukaawe.

¹⁴évakar-anayumbo karaampimbó kúmímba kwaási tirumpintá kúmísasa Áánútun-aai ísáámbanivo marapár-úmbáí-yántáátávésa imáyáa úmae naaésa óísan-imayaama úmae kwénaaesa óꞌon-oꞌon-tantaaꞌa mayánáe kwésimae naaésa mirán-ímáyááó Áánútun-aai káátasuwaisasa íma Áánútuna mayáí kwémayaawe.

¹⁵évakar-anayumbo kaweꞌ-márávímbó kúmímba kwaási tirumpintá kúmísasa Áánútun-aai isésa kawer-ímáyáágwárá-kwáásí isésa tirumpimbá tátoꞌmai kaweꞌá ésa asiramái mésa Áánútuna mayáí kwémaesa óꞌowima kwétuwaꞌnaa-owe Ísu siráiye. oómbá kúrakain-kwasai.

¹⁶Ísu simásuwena séna oómbó kúraꞌmaraamba íma aúpáꞌá marésa íma asípáa-amendaampaꞌa marésa avoraꞌá mósá makéwasa amáparawai naaúmpaꞌo iyíyamba awánanaaowe.

¹⁷mirámó onten-umái aúpáꞌó kwáyáin-tantaaꞌa amápaꞌa avoraꞌá paárínasa awánanaaowe. túnkaipaꞌa kwáyáin-tantaaꞌa avoraꞌá paárínasa awánanaaowe.

¹⁸kwéisaan-aimba imáyáa umái kaweꞌá oró. Áánútun-aaimo ísámaimo kaweꞌó kwéowai Áánútu túwaꞌnaa ínasa moórá-ainkwaraꞌa isánááowe. Áánútun-aaimo ímo ísámaimo kaweꞌó ésa kampaꞌá sésa kaweꞌá umái kwéisaumne kwésewai tirumpinkémbá maimayáínana íma kwéniye. mindáyaveꞌa ísáan-aimba imáyáa umái kaweꞌá oró Ísu siráiye. Ísun-anówawe áúnavaꞌmaati kwaasái.

¹⁹súwasa Ísun-anówawe Ísun-áúnavaꞌmaate tésa sáwíva-kwaasi Ísuwe mésa sisipáá uróntavesa íma naaúmpaꞌa íyúmba máápata tamáyówana

²⁰mindáúmpáꞌó máyon-kwaasigo Ísuntavena séna enanówe enáúnavare embá awánanae sésa máápaꞌa tamáyáawe súwana

²¹Ísu amáparawaiyavena séna Áánútun-aaimo isésa kaweꞌá kwéowai kesinówe kesúnavaꞌmaaꞌan-owe Ísu siráiye. anón-unda torówana Ísu maivairáin-kwasai.

²²moórá-tawai Ísu kwená kwayó-kwáásíyé nompí-sípívímbá usáatena nonkwaaúnkóná menávápáꞌá kónáe séna miwísé kúmba

²³Ísu aún-kwaigurówana minkwááúmpáꞌá anón-unda torówana nonkó tuvántááva éna nompí-sípívímbá ógwitowasa kunávekunavo sésa

²⁴inkaisésa Ísumba koaúsesa sésa anóndakoo puwúnavaiyaawe suwaná Ísu usásinena asiramái séna úndáonte nonkóntéyavena maiváyáakaiyo súwasarai úndáoe nonkóe maiváyóyana nonkómá kararépaguwana

²⁵Ísu simátimena séna kentávéꞌa nóra séra íma kesí imáyáa onkákémbá kwéseo súwana tááꞌa kówasa keáímbá sésa nóran-kwaasiya énawa úndáoe nonkóe kwenáái kwéisaiyo sésa tiyáámba uvakésa táátavesa ésa siráawe. taraváá-kwámbá arumpinkémbá mayáúkain-kwasai.

²⁶simásuwesa mindómpí-sípívímbá kumbá Káríri-marama tínaaempaꞌa kwáyowana Kégésaa-marama túrampaꞌa kwáyowasa

²⁷mimbáráváꞌá kumbá Ísu mindómpí-sípívínkémbá mimbáráváꞌá ásávowana moóráwai mindáópakewai Ísunopaꞌa téna kwenarumpimbá taraváá-kwámbá máyowana póna ayáátáákaꞌa unáánkwátói-iyaaimba ména íma kwená naaúmpaꞌa maéna kwaásimo utamátínkóm-buri-aivaꞌa máyowana

²⁸sáwíva-tawai mintáráváá-kwánkó sáwíꞌa umánkowasa kwaási kárákwiresa aíyayaankaꞌa asááúmarowana minándá tarátuwena mintáráváá-kwánkó áíꞌmaena kavóná-maravaꞌa máánkarowana ména Ísumo túmba awánéna kwááꞌa túwana Ísu taraváá-kwánkóntávéna séna auwé kóaao súwana Ísuma anóndakoman-iye séna aísamaivimba kumbéna anónkaꞌa séna Ísuwo usáyaaitamai-Isoigo ááninko ómpo sínkamonavainivo nóra umásinkaniyono súwana

³⁰Ísu séna enáwíꞌa nááwaꞌono súwana minkwáásígó sáwíva-taravaa-kwamba kwenarumpimbá máyontavena séna kesúwíꞌa sáwívarawai úne séna máyowasa

³¹omákaꞌa sáwíva-poima mésa umá kwénowasa minkwáásígó arumpinkén-táráváá-kwántómbá Ísuntavesa asiramái sésa kwaántái naaópaꞌa íma siꞌmaraaó. mimpóí tirumpimbá siꞌmaraaó suwaná mirá oró súwasa

³³taraváá-kwántómbá minkwáásígó arumpinkémbá kárúwesa póí tirumpimbá kovérówasa mimpóíyómbá amápaꞌa ámémpakemba isaaisésa nonkwaaúmpíntá kumpérómba putásowasa

³⁴póíraꞌo tavíkówai úmba awánésa avekáán-umai naaópaꞌa kwésa kígauvimpaꞌo máyón-kwaasi mósimati mesimati uwasá

³⁵isésa koawánanae sésa kumbá Ísunopaꞌa koyorupésa awánomba taraváá-kwámbá arumpinkémbá kóun-kwaasigo unáánkwátói úmarena Ísu aísamaivimba kaweꞌá umái máyowasa koawánésa táátavai uwasá

³⁶Ísumo minkwáásígómbó kaweꞌó umánkowasamo awánon-aimba simátímúwasa

³⁷isésa ávááraumai táátavai ésa pósa Kégésaa-maravaken-kwaasi amáparawai Ísuntavesa sésa maambáráváꞌá ivá siyuwéya kóaao suwaná nompí-sípívímbá usámaaisowana

³⁸taraváá-kwámbó arupinkémbó mayauwón-kwaasigo Ísuntavena asiramái séna esé kónáe súwana ímanivo

³⁹ená naaópaꞌa kuré Áánútumo embó kaweꞌó umánkáin-aimba kosimátimiyo súwana Ísumo umánkon-aimba mindáópaꞌa simátímaꞌmaena kuráiye. inaamarúgónté aaraigóntéi kwaasái.

⁴⁰Ísuma Káríri-kwaaunkona menávápákémbá nompí-sípívímbá koyauweréna túmba sáwíva-kwaasi amuꞌmarésa máyówana túwasa aamoí uwaná

⁴¹moóráwai monoꞌ-nánkáꞌó kárákwirowai áwíꞌa Yáírasi téna Ísu anóndakoman-iye séna aísamaivimba kumbéna asiramái séna kímbora kesiyáámúmba puwíndayavena kwéivo tiré aneꞌá koyátorenana asóváíno súwana minínáámárúgó sísamaivakemba kaeꞌá kumbaimái-ima tásukain-arasigontavena avowá tasúwana Ísu kwesé kúmba sáwíva-kwaasi Ísumba taúkúraaꞌnamai kwaꞌmaé kuwaná

⁴³moórá-ininkomba áíꞌa kwéun-ininko sísamaivakemba kaeꞌá kumbaimái-ima naaeyámba kwéankowasa íma kanaán-umai asóvamankowana mináíꞌá úwoi kwáyowana

⁴⁴minínínkó sáwíva-kwaasivimba Ísun-ánaaemba kwaꞌmaéna kwégwena kwená unáánkwátói-ayaairaꞌa koyátorowana mindááéyánkoma érankowana

⁴⁵Ísu séna nááwawa kesí unáánkwátóiraꞌa tátorainaꞌiyo súwasa amáparawai sésa ímaniye suwaná Pítaa séna anóndakoo sáwíva-kwaasi kwenkuvaráꞌa úmaesa íyómpimba tátokaawe súwana

⁴⁶Ísu séna kempínkén-ásíráyánkó moóráwaimba kaweꞌá umánkáimba awánareꞌa séꞌa moóráwai kesí unáánkwátóiraꞌa tátokaiye kwésune súwana

⁴⁷minínínkó imáyáa éna íma aúpáꞌá úmpo áꞌa suwánaraiye-imayaa éna ayántámbá kwétowana Ísu aísamaivimba kumbaéna amáparawai túrankaꞌa kwená unáánkwátóiraꞌo tátorowanamo asóvamankon-aimba simátimuwana

⁴⁸Ísu séna kesímánaako kentáváí se áraiꞌa súwaꞌnaa íníwaiman-iye sénda póna áíꞌa éránkáivo kaweꞌá umái kwaaó Ísu siráiye.

⁴⁹Ísu mináímbá kwésuwasa monoꞌ-nánkáꞌó kárákwirowaina naaópaken-kwaasi tésa Yáírasintavesa sésa enayáámúnko pukáivo anóndakontavai ténavo simámiyo suwaná

⁵⁰Ísu mináímbá iséna Yáírasintavena séna mináíntáváí íma áákar-aakaꞌa éma kentáváí ísénana enayáámúmba kaweꞌá umái méniye Ísu séna kúmba

⁵¹Yáírasina naan-egwááꞌá kwéna kwaꞌmaésamo kun-kwáásíyóntávéna maankáꞌá méwaro séna Pítaawe Yóniye Yémésiye minárásígó anóvowiye tíꞌmaena naaúmpaꞌa usávéꞌmai iyúmba

⁵²mindáúmpáꞌó máyón-kwaasi anón-iviꞌa kwétowana Ísu séna íma iviꞌá taaró. minárásígó íma pukáivo úwoi aúmá kwaiguráiye súwasa

⁵³minkwáásíyómbá áꞌa pukuráiye-imayaa ésa Ísuna awíráái suwaná

⁵⁴Ísu minárásígó ayáánkaꞌa tátorena séna inaamarúgóo usásinaao súwana

⁵⁵minárásígón-amanko arupimbá túwana avekáámbá usásinowana Ísu séna toómbá amíyana naíno súwasarai

⁵⁶anóvowi táátavai uyaná Ísu asiramái séna kemó únda-aimba íma simátímékaiyo siráiye.