Read Kosena Árúku 9 Bible Online

Árúku 9 - Kosena bible

Árúku 9

¹naaémba Ísu kwená kwayó-kwáásí sísamaivakemba kaeꞌá kumbaimái-kwaasi tááyowasa tuwaná kwaási tirumpinkémbá taraváá-kwámbá maitíyuꞌmaeꞌa nááóro-asirayamba tiména tíꞌo ún-kwaasi asóvamatinkai-asirayamba tiména

²séna Áánútu kwená kwaási kawááin-aimba kogwésimatimeꞌa tíꞌo índa-kwaasi kwéasovamatinkeꞌa oró séna

³aampaꞌó kwíyamba íma moórá-yantaaꞌa maimaéꞌa koró. tááúmba íma maimaéꞌa kwéꞌa toón-únámbá íma maimaéꞌa kwéꞌa toómbá íma maimaéꞌa kwéꞌa óntamba íma maimaéꞌa koró. moórá-mora-umai unáánkwátói timantenká umái kuvéꞌmaeꞌa koró.

⁴Áánútun-aai simátimenaaontaveꞌa moórá-naopaꞌo kwíyasamo naambó timíyaꞌa mindáúmpáré suꞌmai méꞌa mindánkó avowá arunkó sáwíꞌan-ivai mindáúmpáꞌá méꞌa kentí mayáí maimái ánáseꞌa mindámbá tuwéꞌa óꞌon-daopaꞌa koró.

⁵moórá-naopaꞌo kwíyasamo ímo naambó timíyana Áánútu mindáópaken-kwaasi íma aamoí umátinkanivo umásítaiꞌa éꞌa tísamaivakem-baramo uwáéntemba untéꞌa koró Ísu simátimuwasa

⁶kwená kwayó-kwáásí tuwésa naaóꞌ-naoꞌa kwénaaesa Áánútuna áseí-kwasai simátímaꞌmaesa kwégwesa tíꞌo ún-kwaasi asóvamatinkamae kuráawe. Éróti Ísun-aai ísarain-kwasai.

⁷Ísuna mayáígón-áái símae íyúwana Káríri-marara-kawaanako áwíꞌa Éróti mináímbá iséna anón-imayaa urái. Ísuntavesa évakarawai sésa kwemá Yóni nombó pétinkaraiwai pukáimpinkemba usásinkaiye suwasá

⁸évakarawai sésa kwemá Áánútun-aai simátímakowai áwíꞌa Íráiyaa pukáimpinkemba usásinena máyáiye suwasá évakarawai sésa kwemá naaóváꞌá Áánútun-aai simátímakaawaivinkemba moóráwai pukáimpinkemba usásinkaiye suwaná

⁹Éróti minámápár-áímbá iséna séna kemá simátinkaunasa Yónimba anumarambá arátúwááwana pukáivo mináímbó kwésemba nááwaꞌiyompo awánanaumne Éróti símae iráiye. sáwíva-kwaasi toómbá tímakain-kwasai.

¹⁰Ísuna aantá-kwaasi Ísumo timúm-bayai maisuwésa kwenópaꞌa tésa amápaꞌ-mayaimo un-áímbá simámúwana Ísu miwíyé suꞌmai tíꞌmaena Pétésáítaa-naopaꞌa komáyowasa

¹¹ánivo sáwíva-kwaasi isésa kwaꞌmaésa kuwaná Ísu tuwánéna aamoí éna Áánútu kwená kwaási kawááin-aimba simátimena tíꞌo ún-kwaasi asóvamatinkaraiye.

¹²asóvamatinkowasa enónkaꞌa kwená kwayó-kwáásí sísamaivakemba kaeꞌá kumbaimái-kwaasi Ísunopaꞌa tésa sésa íma sáwíva-kwaasi máyáapaꞌan-ivo enáíndaraꞌa tiꞌmárénasa egwaaꞌ-náópimpaꞌa kwénaaesa toón-ávákáí naan-avákáí oró suwaná

¹³Ísu simátimena séna kemá toómbá tíméro súwasa miwí sésa sáwíyan-tomba évaꞌaaseigwara kaeꞌ-nóyáákwáráꞌá kwáyáivo sáwíva-kwaasivimba íma kanaán-ínívo toómbá komeéyán-oro-aina kwéseno áísaa esa suwasá

¹⁴sáwíva-kwaasi 5,000 kwaaima uwasá aaraiyé iyámpóíye máyówana Ísu kwená kwayó-kwáásíyávéna séna inkwimaꞌmái taaínkaa taainkaarumai 50 50 umai maraꞌá máéro simátíméro súwasa

¹⁵isésa mirá umátinkowana

¹⁶Ísu évaꞌaasei-tonkwara kaeꞌ-nóyáákwáráꞌá maisokéna kwíyómpaꞌa karákéna Áánútuntavena súwi simásuwena mintómbá topán-topan-umai kwená kwayó-kwáásí timúwasa misáwívá-kwáásí tímúwasa

¹⁷amáparawai nowaná tímúꞌa vówasa Ísuna kwayó-kwáásí mintón-ayai sísamaivakemba kaeꞌá kumbaimái-unampimba áítumai ógwitaraawe. Pítaa Ísuna ááimba siráin-kwasai.

¹⁸moórá-tawai Ísuwe kwená kwayó-kwáásíyé máyówana Ísuwe suꞌmai Áánútumpaꞌa námúnaa simásuwena tísaa ena séna kentávésa amáparawai nóran-kwaasiye kwéseo súwasa

¹⁹miwí sésa évakarawai sésa emá Yóni nombá pétinkaandawai óne sewasá évakarawai sésa naaóváꞌá Áánútun-aai simátímakaandawai áwíꞌa Íráiyaama óne sewasá évakarawai sésa naaóváꞌá Áánútun-aai simátímakaiwai pukáandavinkemba usásinkaandawai óne kwésewe suwaná

²⁰Ísu séna keinárawaꞌa kentávéꞌa nóran-kwaasiye kwéseo súwana Pítaa séna Áánútu usásinankaiwaimba Yútaa-kwaasiya kwéamuꞌmaraundawaiya óne súwana mináímbá íma simátíméro Ísu asiramái siráiye. Ísu pukéꞌa usásinanaumne siráin-kwasai.

²¹Ísu séna mináímbá íma simátíméro simásuwena

²²séna kemá kwaási úrandaꞌa kumpaáruraundawai síꞌa índaiꞌa umásinkesa Yútaa-anon-kwaasiye mono-káwáá-kwáásíyé ámáámba sen-kwáásíyé tínaaemba umásimesa sínkamiyaꞌa puwónaundanivo kaumbo-táwai maisuwéna Áánútu usásisinkaniye Ísu siráiye.

²³Ísu simásuwena amáparawai simátimena séna kesínaaemba kwaránáe síyawai tirááímo táínda-yantaaꞌa íma tátoraaro. kemá puwónaunda-taima súgwaataꞌmaeꞌa kondantembá kesínaaemba kwaránááowaima umbai-yántááꞌá aasiyaasi-táwai timíyasa minúmbáí-yántááꞌá úwoi maimaésa sínaaemba kwaránááowe.

²⁴tirááímo táíndaiꞌo ésa íma kaweꞌá umái ménaaovo kentávésa ísámai tirááímo táínda-yantaaꞌo tuwésa puwésa aúnáiꞌa umái maíꞌmaiꞌa ónááowe.

²⁵marapákémbó amápa-tantaaꞌo kwémaesamo puwíyambo éna mintántáákó íma túwaꞌnaa íníye.

²⁶kesááiyavaigwara kentáváígwáráꞌó tigaemó umásínkáámba póꞌa aáno kemó marapáꞌó kúmónda miwí sigaemá umátinkanaumne. kemá kwaási úrandaꞌa kumpaáruraundawai aáno kesí ságayankwara kesivoná ságayankwara kwíyómpakembo Áánútuna kwayóꞌnárawati ságayankwaraꞌo marapáꞌó kúmónda miwí sigaemá umátinkanaumne.

²⁷áraiꞌa simátimeꞌa séꞌa évakaꞌa maankáꞌó máyáan-kwaasi íma aivaꞌá puwéꞌa Áánútu kwená kwaási kwégawaaimba awánéꞌa naaémba puwónááowe Ísu siráiye. Ísu óꞌon-kuwawaaꞌa aúkáin-kwasai.

²⁸Ísu simásuwena avakaumboé-noꞌwaamba kwaéna Pítaante Yóninte Yémésinte tíꞌmaena námúnaa síndayavena omápaꞌa uména

²⁹námúnaa kwésuwana óiꞌa óꞌon-oiꞌa auvúwana kwená unáánkwátóirakemba kwayáníꞌa kéna túgáyáagaya kwéuwasa

³⁰awánomba kae-kwáásíráí kwíyómpakemba paárésarai mindárai túwíꞌa Mósesiye Íráiyaae Yútaa-kwaasi tíkwáꞌnárai Ísuwe kwaasái kwésuyana kwíyómpake-sagayamba kwáyowarasarai naaóváꞌá Áánútu Ísuntavena Yérúsaremuvaꞌa puwíníye siráimba sáwíyankaꞌa mirá íníye-aimba kwésuyasa

³²Pítaae máyóyan-kwaasiye tuún-kwáyómba usásinesa Ísuna ságayamba Ísuwe máyóyan-kwaasi tuwánomba

³³mindárai Ísumba íma auwésarai íyúyana Pítaa Ísuntavena séna anóndakoo maankáꞌó maúndaya kaweꞌá imbá póta kwááyu-namba kaumbomá ónaundaya moórá endéín-éta moórá Mósesindei éta moórá Íráiyaandei éta mirá ónaundayaawe Pítaa íma imáyáa úmba úwoi siráiye.

³⁴mirá kwésunkaꞌa ainánkó kuména káátaguwasa táátavai uwaná

³⁵ainámpínkémbá aaigówé suꞌmai séna maawámá kesáánimba éna kemá usásinankaundawain-ivo kwenáái ísáaro

³⁶simásuwowasa awánomba mindárai kwíyómpaꞌa íyúyana Ísuwe suꞌmai máyowasa awánaraamba minkánáá íma simátimesa mináímbá úwoi tátokaawe. Ísu taraváá-kwámbá mayáúkain-kwasai.

³⁷aaváyaaraamba omápakemba kúmúmba Ísunopaꞌa sáwívarawai tóyo uwaná

³⁸minkwáásíyómpínkémbá moóráwai anónkaꞌa séna anóndakoo maandáꞌá kímbora kesáánimban-ivo arumbá umánkaao.

³⁹moórá-taravaa-kwamba arumpimbá taména kwááꞌa kwétena amentánaanta isaná tanaambá váguvagu kwéena áwááyaamba akékúndena aigareó nonkáánéna aíyayaamba sápísimagwisana mirá úmaena kwéiyena sáwíꞌa kwéumankaisaꞌa

⁴⁰ená kwayó-kwáásíyávéꞌa séꞌa taraváá-kwámbá arupinkémbá mayaúwáaro súnasa íma kanaán-umai mayáúkaawe súwana

⁴¹Ísu séna kentí imáyáa kaeꞌnáér-imayaa isaꞌá kentáváí íma imáyáa kwéowana póna sirumbá umbaí kwétaivo nóraumai-tawaiya kesé ménaumno simásuwena miníyámpóígó avowántávéna séna enáánimba áíꞌmae tiyó Ísu súwana

⁴²áíꞌmaena túwana mintáráváá-kwánkó miníyámpóí améntayuwowana tanaambá vówana aíyayaamba sápísimaguwana aigareó nonkáánúwana Ísu awánéna mintáráváá-kwánkóntávéna séna auwé kóaao séna miníyámpóí kaweꞌá umánkena avowántávéna séna áíꞌmae kwaaó súwasa

⁴³Ísumo mirámó úmba Áánútuna anón-asirayamba awánésa amáparawai táátavai ésa tiyáámba tóipimba áákaawe. Ísu puwínín-aimba siráin-kwasai.

⁴⁴Ísu amápaꞌ-mayaimo mayómba awánésa táátavai uwaná kwená kwayó-kwáásíyávéna séna simátíménda táákaꞌa márááro. kembá kwaási úrandaꞌa kumpaáruraundawaimba óꞌon-kwaasi timíyasa sínkamiyaꞌa puwónaumne súwasa

⁴⁵kwemó sún-ainkona ááimba íma isésa miwítí imáyáa umbaí tówana mináínkóná ááimba aúpáꞌá kwáyowasa íma ísámai kaweꞌá ésa áísaa ónáe sésa umbá tááꞌa kówasa íma áísaa uráawe. nááwa kwéusayaaitaiyo siráan-kwasai.

⁴⁶Ísuna kwayó-kwáásí keáín-keaimba sésa kentáávínkémbá nááwa aiva-kwáásí-íꞌa íníyo sésa keíyáí kwésuwana

⁴⁷Ísu miwítí imáyáamo umbá awánéna moórá-iyampoi áíꞌmai akwámpaꞌa ankéna

⁴⁸simátimena séna kentáváí imáyáa kwéesa iyámpói áwaꞌnaa onten-umái kwésuwaꞌnaa-owe. súwaꞌnaa onten-umái Áánútu siꞌmákaiwaimba kwéawaꞌnaa-owe. keinárawapinkemba évakarawai séꞌa kemá sáwíyan-kwaasima úne kwésiyawai Áánútu minkwáásíyávéna kwéusayaaitaawe kwésiye Ísu siráiye. kentí mayáí íma sáwíꞌa kwéiwaina kwaasái.

⁴⁹súwana Yóni Ísuntavena séna anóndakoo moóráwai kwénaaena taraváá-kwántóntávéna séna Ísuna asirayámbá kwáyáintavena auwé kóaao simátímapaꞌa kwégwisasa mintáráváá-kwámbá kóuraawe. minkwáásígó íma kentáávínkén-kwáásímá ómpo íma miráne étuwaaoya siráumne Yóni súwana

⁵⁰Ísu séna íma tuvínankaaro. kentáásí maiyáígómbá íma sáwíꞌa kwéowai úwoi kwésuwaꞌnaayaan-owe Ísu siráiye. Sámériyaa-kwaasi Ísumba íma naambá ámakaan-kwasai.

⁵¹Áánútu Ísumba airáínana kwíyómpaꞌa iyínín-kanaama sáwíyankaꞌa tíníye úwana Ísu kwenarumpin-ímáyáá éna asiramái séna Yérúsaremu-naopaꞌa kónáe séna kwéna

⁵²kwená kwaásiyavena kogwaénááon-damba koavakáá kwéiyaro séna tiꞌmarówasa aivaꞌá Sámériyaa-kwaasiti naaópaꞌa kuwasá

⁵³Ísu Yérúsaremu-naopaꞌa kwíníye-aimba isésa tirunkó sáwíꞌa úwasa íma naambá tímúwasarai

⁵⁴kwená kwayó-kwáásívínkémbá kae-kwáásíráí Yémésiye Yóniye mináímbá isésarai sésarai Ísóigo Áánútu kwíyómpakemba iramá tuwáínana kuména minkwáásí kavúkoro-aimbo kwésuyamba kwéankaiyo suyaná

⁵⁵Ísu mégwantena asiramái séna íma mirá sekaiyó súwasa

⁵⁶mindáópaꞌa tuwésa óꞌon-daopaꞌa kuráawe. Ísun-ánaaemba kwaránáe siráan-kwasai.

⁵⁷aampaꞌá kwéguwana moóráwai Ísuntavena séna amápaꞌ-naopaꞌo nááíndavaꞌa esé naaónaumne súwana

⁵⁸Ísu minkwáásígómbá áísaa umai isánáe séna kwaankó taaiyaivimbá kwégwaisana numaómá ánáamba úmarena kwégwaivo kemá kwaási úrandaꞌa kumpaáruraundawai íma naambá úmareꞌa kwégaumne séna

⁵⁹minkákémbá moóráwaintavena séna kesínaaemba kwaꞌmaé kwíníyone súwana anóndakoo máyáanana kesivo puwínaꞌa utamánkeꞌa enánaaemba kwaránaumne súwana

⁶⁰Ísu séna ímanivo kesáái ímo isésamo pukáan-kwaasiraamba owáímá puwíyan-kwaasi utamátinkanaaovo emá Áánútumo kwená kwaásimo kwégawaain-aimba simátímaꞌmae kwíníyone súwana

⁶¹moóráwai Ísuntavena séna anóndakoo enánaaemba kwaránaunda póꞌa aivaꞌá kesimááraa siyáámba tímatuweꞌa naaémba enánaaemba tágwaranaunda kanaawáꞌiyo súwana

⁶²Ísu séna Áánútuna mayáímó ááimbo ásámaimo kwémaesamo ivátuwesamo óꞌon-imayaamo owáí Áánútu kwená kwaási kwégawaaipaꞌa íma kanaán-umai mayáí mayánááowe Ísu siráiye.