Read Kosena Yóni 1 Bible Online

Yóni 1 - Kosena bible

Yóni 1

¹ááinkaꞌa maramá íma kwáyonkaꞌa Áánútuna imáyáama agaráátínkáiwaima kwenáwíꞌa Áánútun-aaigoman-iye. Áánútun-aaigoma aasiyaasí ména Áánútuwe ména kwemá Áánútuma póna

²ááinkaꞌa Áánútun-aaigoma Áánútuwe ména

³amápa-tantaaꞌa úmarowana Áánútu imáyáama amúwana amápa-tantaaꞌa minkánáá paárurain-tantaaꞌa úmakaiye.

⁴Áánútun-aaigoma kwaásimo maíꞌmaiꞌo ónááowaina ááimban-iye. miraúmai kwemá kwaásivimba sáma kamátinkena

⁵túnín-ayampaꞌa sáma kaisaná túnín-tantaakoma sámo kain-tántáákómbá íma usáyaaitena uvisínkaiye.

⁶moóráwai áwíꞌa Yóni máyowana Áánútuma aiꞌmaréna

⁷sámo kain-áímbá maimaé amápa-kwaasivaꞌa kwinasá mináímbá isésa sésa áraiꞌa Ísu Káráísitima kwaási sáma kamátinkaiwaiman-iye sígwáe súwana

⁸Yóni kwemá íma sámo kamátinkainaꞌa póna sámo kamátinkaindawain-aai maimaéna kuráiye.

⁹Áánútun-aaigoma amápa-kwaasivimba sáma kamátinkaiwaiman-iye. Yóni simátímakainkaꞌa Áánútun-aaigoma marapá-kwáásívímbá kumpaáruraiye.

¹⁰Áánútun-aaigoma maramá tarórumakena marapáꞌá kumbáyowasa marapá-kwáásí kwená ááimba íma kaweꞌá umái awánaraawe.

¹¹kwenamáápaꞌa kumbáyowasa kwenamááraa íma paru umánkombanivo

¹²évakarawai paru umánkesa kwentávésa sésa áraiꞌa Áánútunopakemba kunkáiye suwaná póna miwíyávéna séna Áánútuna iyámpóíyomban-owe siráiye.

¹³kwaási kentí imáyáavinkeniꞌa umái kwématinkaavo Áánútuna iyámpói íma miráumai Áánútuna iyámpóíraaniꞌa kwéowe. Áánútu kwená imáyáavinkemba umátínkáimba pósa Áánútuna iyámpóíraaniꞌa kwéowe.

¹⁴Áánútun-aaigoma kwaásima aúkena marapáꞌá ména kentáávímbá máyowata awánaraumne. paru-yántáákwárá arupí-yantaakwaraꞌa kwempímbá sáwívaꞌa kwáyon-kwaasi póna ságayankwara-kwaasi úwata awánaraumne. avowámá ááninkomba kímborawaimba póna ságayamba amúwana miságáyánkwáráꞌá máyowata awánaraumne.

¹⁵Yónima kwentávéna amápa-kwaasi simátimena séna kembá íma masínkaraankaꞌa kesínaaembo tíníwaima kweinónkáámbá paárurena ména póna kembá usáyaaitaraiye siráunda-aimba minkwáásíyávéꞌa siráumne siráiye.

¹⁶paru-yántááꞌá kwempímbá sáwívaꞌa kwáyáiwaima póna kentáá kaweꞌá kwéumasinkavata kwiyé.

¹⁷naaóváꞌá Áánútu Mósesimba aiꞌmaréna séna kesí ámáámba simátimiyo séna naaémba Ísu Káráísitimba aiꞌmaréna séna parumó ií-yántááꞌá arupí-yantaaꞌa móruntimiyo siráiye.

¹⁸naaóváꞌ-naovakwara ívékwaraꞌa marará-kwáásí Áánútun-aneꞌa íma awánaraambanivo kímborawai ááninkoma kwesé ména mimbóráíꞌa umái ména póna kwéagaraasinkaintaawe. Yóni nombó pétinkaraiwaina kwaasái.

¹⁹Yérúsaremu-naopakemba Yútaa-kawaa-kwaasi monoꞌ-máyáí-kwáásínté Árívái-andaraken-kwaasiyonte tiꞌmárówasa Yóninopaꞌa tésa áísaa esa sésa emá nááwaꞌono suwaná

²⁰Yóni íma umémpaꞌa tuwómba avoraꞌá séna Áánútumo usásinankaiwaima Káráísitima íma kemá úne súwasa

²¹emá nááwaꞌo. Íráiyaa naaóváꞌá Áánútun-aai simátímakaiwaiyaꞌono suwaná Yóni séna ímaniye súwasa miwí sésa naaóváꞌá Áánútu séna kesáái simátiminiwai Mósesiraan-kwaasi aiꞌmáráanana kumíníye siráimba kwemá ewáꞌono suwaná Yóni séna ímaniye súwasa

²²miwí sésa nááwaꞌono súnaya simásimenda-aimba siꞌmákaawaiya kosimátimenaumne suwaná

²³Yóni simátimena séna Áánútun-aai simátímakowaima áwíꞌa Áísáya naaóváꞌá agaimaréna sénakavóná-maravaꞌa moóráwai ména aayamáírakemba séna Ísóigona aambá kwirankánááomba kwená aambá arupí íyana minámpáꞌá kwíno siráimba mindá kemá úne Yóni súwasa

²⁴taáísaa-un-kwaasivinkemba évakaꞌa ámáán-kawaa-kwaasi miwímá

²⁵Yónimba áísaa esa sésa emó sémo Áánútumo usásinankaiwaima íma kemá úne. íma kemá Íráiyaama úne. Áánútun-aai simátiminiwaima Mósesiraan-kwaasi íma kemá úne. emó siráandanivo nóintavai nombá kwévetinkaano suwaná

²⁶Yóni séna kemá noné suꞌmai kwévetinkaunana kentí avumpimbó moóráwaimo máyáimba íma kwéawanaamba póna

²⁷aáno kesínaaemba tíndawaima kwemó aaimó síndavimba kemá aaimá sendamá uwóvíꞌa ónaumne. kwená mayáímá kwémayaundayaveꞌa póꞌa kemá úwoi-kwaasi úne Yóni siráiye.

²⁸Yótáni-nonkona menávápáꞌá Pétáni-naopaꞌa Yóni nombá kwévetinkowasa áísaa uwaná Yóni mináímbá siráiye. Ísuna kwaasái Yóni simátímakain-kwasai.

²⁹simásuwena usá aaváyaaraamba Ísumo túmba Yóni awánéna simátimena séna kentí sáwí-imayaayavesa ísámai sipisípi-araaꞌo tuvúwówanamo púwísasamo Áánútumbo áméntemba kwétin-kwaasi amápa-kwaasiti sáwí-imayaayavena ísámai maitiyuwáíndayavena póna puwíníye. mindáyavena Áánútu aiꞌmáráísana kúmímba póna puwíníye.

³⁰kembá íma masínkaraankaꞌa kesínaaembo tíníwaima kweinónkáámbá ména kembá kwéusayaaitaiyemo siráunda-aimba minkwáásíyávéꞌa siráumne.

³¹Áánútumo usásinankaiwain-aai iséꞌa nááwantavesa seéo siráunda isaꞌá nombá kwévetinkaunda pósa Ísareri-kwaasi kwembá kaweꞌá umái awánanaaowe Yóni siráiye.

³²Yóni awánaron-aimba simátimena séna Áánútumo usásinankaiwaintaveꞌa séꞌa nááwaꞌiyo siráunda kwíyómpakemba Áánútun-amankoma mááiraamba úmaena kwenaneꞌá kumbáísaꞌa awánéꞌa sáákaꞌa makáunda póna Áánútu siꞌmákaiwaima séna nombá kwévetinkenana kesimankómá moórá-kwaasigo aneꞌá kumbaína emá awáné se Áánútun-amankoma tirumpimbá anómba umátinkaniwaiman-iye siráin-aimba sáákaꞌa makáundaraꞌa póna mirámó imbá awánéꞌa simátimeꞌa séꞌa kwemá Áánútu ááninkoman-iye Yóni siráiye. Éndaruwe Pítaae Ísun-ánaaemba kwakááyan-kwasai.

³⁵simásuwena usá aaváyaaraamba Yóniye kwená kwayó-kwáásíráíyé mésaya

³⁶Ísumo kúmba awánésaya uwaná Yóni séna minkwáásí Áánútu aiꞌmákain-kwaasi póna amápa-kwaasiti sáwí-imayaayavena ísámai puwíníye. kentí sáwí-imayaayavesa ísámai sipisípi-araaꞌo tuvúwówanamo púwísasamo Áánútumbo áméntemba amápa-kwaasiti sáwí-imayaayavena ísámai puwíníye súwasarai

³⁷mindárai isésarai Ísun-ánaaemba kwáróyana

³⁸Ísu kogwanténa métuwanena séna nóintavaiyaꞌoyo súwasarai miwí tááivinkemba sésarai Araapaiyo náávara kwémaeno kwántámai sésarai anóndakoo náávara kwémaeno suyaná

³⁹Ísu séna taawánaakaiyo súwasarai kwesé kuyambá mindáúmpáꞌá komésaya aaváúmá toraétáápaꞌa marónkaꞌa komáyáawe.

⁴⁰Yóni siráin-aimba iséna Ísun-ánaaemba kwakón-kwaasi moóráwai áwíꞌa Éndaru kwemá Sáímoni Pítaa ávákoma póna

⁴¹aivaꞌá awaaómá avakáá-umai awánéna séna Áánútumo usásinankaiwaima Mésíyaa máyáísaꞌa awánaraumne sirái. Mésíyaawe-kwiꞌa kwántámai Kíríki-kwaasi tááivinkemba Káráísitiye sembá mináwíkóná ááimba Áánútumo usásinankaiwaiman-iye kwésewe.

⁴²Sáímonimba áíꞌmaena Ísunopaꞌa tuyaná Ísu awánéna séna Yóni ááninkoma úne. enáwíꞌa Sáímoniye. moórá-kwiꞌa Pítaawe simánkaumne Ísu siráiye. miwí tááivinkemba Pítaawemo sembá anón-ontankowe kwésewe. Vírípiye Nátáníyoe Ísun-ánaaemba kwakááyan-kwasai.

⁴³usá aaváyaaraamba Ísu séna Káríri-ayampaꞌa kónáe séna Vírípimba avakáá-umai áíꞌmaena séna kesínaaemba kwaraaó siráiye.

⁴⁴kwemá Pétésáítavakemba Éndarunte Pítaantei naaópaken-kwaasiman-iye.

⁴⁵Vírípima Nátáníyomba avakáá-éna séna Mósesiye Áánútun-aai simátímakowaiye Áánútun-aai aúváívimba agaimarésamo siráan-kwaasigonta awánaraumne. kwemá Násáreti-naopakemba Yósépi ááninko áwíꞌa Ísuman-iye súwana

⁴⁶Nátáníyo séna kesáámó súndaya Násáreti-naopakemba íma kawe-kwáásímán-iye kwésune súwana Vírípi séna taawánaao súwasarai

⁴⁷kuyambá Ísu Nátáníyomba awánéna séna mendá áraiꞌa Ísarerinaꞌa íma kampar-ímáyáámá kwáyáindaꞌa kwétiye súwana

⁴⁸Nátáníyo áísaa ena séna nóintavaiya kesí imáyáama suwánéwa seénó súwana Ísu séna Vírípima íma ááyarainkaꞌa ená naaópaꞌa víki-taaigona ááinkaꞌa máyaanaꞌa kesí imáyáavinkemba awánaraumne súwana

⁴⁹Nátáníyo séna anóndakoo emá Áánútu ááninko e Ísareri-kwaasi kentáásí kawáánáꞌá óne súwana

⁵⁰Ísu séna víki-taigona ááinkaꞌa máyaanaꞌa kesí imáyáavinkemba awánaraumne súndayavai kentáváí se áraire Áánútu ááninko óne kwésene. ená naaópaꞌa máyaanaꞌa imáyáavinkemba awáraundayavai sénda po mintántáákómbá usáyaaitanin-tantaaꞌa naaémba awánaniyone.

⁵¹áraiꞌa simátimeꞌa séꞌa kwíyómpaꞌa sokón-tawaai taaínkaaꞌa ínasa kwíyómpakemba kwaási úrandaꞌa kumpaáruraundawaisopaꞌa kwíyómpaken-kwayoꞌnarawaꞌa iré kunke íyaꞌa tuwánanaaowe Ísu siráiye.