Read Kosena Yóni 10 Bible Online

Yóni 10 - Kosena bible

Yóni 10

¹Ísu séna áraiꞌa simátimeꞌa súmpo ísáaro. sipisípi kusaváꞌó kónáe síyawai ímo sipisípigona ontavímbó usávekesamo ésa kusarákémbó maatésamo ésa miwí umóyándáraware sénááowe.

²sipisípiraꞌa kárákwiraiwai ontavímbá usá kwéveraiye.

³miráumai ontará kawáánáꞌá onta tiyánkáísana usáverena kwená sipisípi túwíꞌa utaisasá kwenáái isésa kwenópaꞌa kowaná

⁴sipisípi kusavínkémbá tíꞌmaena aivaꞌá kwisasá kwenáái ísáantavesa ánaaemba kwégwaraawe.

⁵ánivo óꞌon-kwaasi táái íma ísámai tínaaemba íma kwaꞌmaésa kwéesa inkaisésa kóyáwé kwéowe

⁶Ísu mirá simátimuwasa mináínkóná ááimba íma ísaraawe. Ísu sipisípiraꞌa kárákwirain-kwasai.

⁷mináínkóná ááimba íma ísóntavena Ísu séna áraiꞌa simátimeꞌa séꞌa sipisípigona ontamá kemá úne.

⁸íma kunkáundaraꞌa évakarawai tiráawai umóyándáraware. miwí táái sipisípiyonko íma ísaraawe.

⁹kemá ontamá úne. kesópaꞌo tíyaꞌo éꞌa usáveraaro senasá usáveraiyaꞌa kárákwiyonaumne. toómbó naíyávésamo ésa kunákárúwaresa násuwesa óꞌa usáveranaaowe.

¹⁰umóyán-ámpá-kwáásímó tíyawaimo ésa kwaási tínkambai áwáávi-tantaaꞌa ónááombanivo kemá kunkáunda pósa óꞌoran-kaweꞌa umái maíꞌmaiꞌa ónááowe.

¹¹sipisípiraꞌa kaweꞌá umái kárákwiraundanaꞌa úne. sipisípiraꞌo kaweꞌó umáímo kárákwiraindaꞌa séna kesí sipisípi túwaꞌnaa ónaumne séna puwíníye.

¹²ánivo óntantavaiye sésa sipisípiraꞌa tavíkáawai áwáávite in-íyánkómbá awánésa sipisípi ivátiyuwesa kóuwana sipisípiyomba vamái kwatúwáísasa kówitawaaꞌa umáguraawe.

¹³miwí sipisípiraꞌo taviyí-ímáyáámá tuwésa óntane suꞌmaimo mayáí-ímáyáá kwéowe.

¹⁴sipisípiraꞌa kaweꞌá umái kárákwiraundanaꞌa úne. kesivo kembá súyaisaꞌa kemá kesivombá aúyáunana mirámó úndantemba kesí sipisípi amápaꞌa túyáunasa kembá kwésuyaawe. kesí sipisípima túwaꞌnaa ónaundayaveꞌa póꞌa kemá puwónaumne.

¹⁶kesí sipisípi évakaꞌa óꞌon-kusavaꞌa máyáamba póꞌa kotíráanasa kesáái ísámai tésa mimbóráíꞌa umái máyaiyaꞌa amáparawairaꞌa kárákwiyonaumne.

¹⁷púwóndavinkemba usásinanaunda-imayaama kesivomá símísaꞌa kemá owé súndayavena kwenarumbá kwésimiye. kemó ímo owé súndarakai íma kanaán-umai sínkamosino. kesí imáyáavinkemba puwónaunda póꞌa kanaaráꞌá puwónaumne. púwóndavinkemba kanaán-umai usásinanaumne. kesivomá simásimena séna mirán-uwo séna mirámó ónaunda-asirayamba símakaiye Ísu siráiye.

¹⁹Ísu mináímbá súntavesa Yútaa-anon-kwaasi imáyáa ésa taaínkaar-uwasá

²⁰évakarawai sésa taraváá-kwámbá arupimbá máyáintavena uwoꞌaóꞌá kwéiye. nóra séra kwenáái kwéisaao suwasá

²¹évakarawai sésa taraváá-kwámbó arupimbó máyáinkakai íma mirá-áímbá sisinó. taraváá-kwámbó arumpimbó máyáinkakai íma aúgavitan-kwaasi aúramba kaweꞌá umái awánéna máísino siráawe. Yútaa-anon-kwaasi tínaaemba umánkaraan-kwasai.

²²Yútaa-kwaasi anóm-bonoꞌ-nambo uráan-kanaamo túntemba Yérúsaremu-naopaꞌa tanómba kwégauvunkaꞌa minkánáá táúgwi-kanaa póna túwana

²³Ísu anóm-bonoꞌ-naumpaꞌa ména Sórómoni áúgwimai úmakopaꞌa kwéguwasa

²⁴Yútaa-anon-kwaasi torupésa taúkúmaresa áísaa esa sésa entávéta sáwívar-imayaaya kwéune. Áánútumo usásinankaiwai kwéamuꞌmaraundawaima ewá ónómpo arupí umái sinatá ísáano suwaná

²⁵Ísu séna simátimunaꞌanivo íma ísaraawe. kesivo simásímakaim-bayaima kwémayaunda póna kesí ááimba avoraꞌá kwévaariye.

²⁶keinárawaꞌa íma kesí sipisípiyomba póꞌa kesááiyaveꞌa íma áraire kwésewe.

²⁷kesí sipisípi túyáúnasa kesáái ísámai kesínaaemba kwégwaraawaꞌa

²⁸imáyáama timúnasa aúnáiꞌa umái maíꞌmaiꞌa kwéomba pósa íma puwónááowe. kawáá úndavinkemba íma kanaán-umai tayaviyénááowe.

²⁹kesivomá símakaimba kwená asirayánkó amápar-asirayankomba usáyaaitaisasa kesivomá kawááimpinkemba íma kanaán-umai tayaviyénááowe.

³⁰kesé kesivoé mimbóráíꞌa kwéuye Ísu siráiye.

³¹súwasa Ísumo sún-aintavesa Yútaa-anon-kwaasi ókwaraꞌa tuvuwónáe sésa óntamba máyówana

³²Ísu simátimena séna kesivomá simásímakaim-bayai kaweꞌ-máyáímá kwémayaunaꞌa kwéawanaavo nóim-bayaiya mayáúndayavaiya sínkamonaaoo súwasa

³³íma kaweꞌ-máyáíyávéta inkamónáeta kwéumpo Áánútumba akáꞌáámba simánkaandayaveta inkamónaundayaawe. marapá-kwáásígómá séma Áánútuma úne séndayaveta inkamónaundayaawe suwaná

³⁴Ísu séna Áánútun-aai aúváívimba ímo kampar-áímbó kwáyáin-auvaivimba agaimaréna séna Áánútu séna ísóigoman-owe siráiye agaimaréna siráiye. Áánútun-aai simátímakowaiyavena séna ísóigoman-owe siráiye.

³⁶kesivomá ításinkena siꞌmákaisaꞌa marapáꞌá kunkáumpo Áánútu ááninko úne kwésundayaveꞌa Áánútumba íma akáꞌáámba kwésimankaumne.

³⁷kesivoná mayáímó ímo kwémayaundarakai kentávéꞌa kwíyómpakemba kunkáiye séꞌa íma áraire sesinó.

³⁸kwíyómpakemba kunkáiye séꞌa íma áraire sembánivo kesí mayáíyávéꞌa Áánútuna mayáímá kwémayaiye séꞌo éꞌa minkáꞌá séꞌa kwesé avowáe mimbóráíꞌa kwéoye sénááowe Ísu súwasa

³⁹moórágwaraꞌa tátoranae sésa umbá tátoꞌmai tovíráyuwowana kóuraiye.

⁴⁰Ísu miwí tiyuwéna Yótáni-nomba kóaatena ááéma Yóni nombá pétinkaropaꞌa komáyowasa

⁴¹kwaásiyomba torupésa sésa Yóni ímo awánáúnda-mayaima mairáimbanivo minkwáásíyávéna simásímakain-aimba árair-aimba siráiye suwasá

⁴²sáwíva-kwaasi Ísuntavesa áraiꞌa Áánútunopakemba kunkáiye siráawe.