Read Kosena Yóni 11 Bible Online

Yóni 11 - Kosena bible

Yóni 11

¹moóráwai áwíꞌa Árásárási Pétáni-naopaꞌa máyowana áíꞌa úwasarai ámánaakai túwíꞌa Máríyaae Máátaae mimbóráváꞌá mésaya

²Máríyaa óꞌon-tawai áséi-kwiyumba úm-basawemba Ísu aísamairaꞌa atímarena kwenaꞌnóntáunei uwátukai-ininko éna tiyóvígomba áíꞌa kwéuwasarai

³minúnándáráí moóráwaintavesarai sésarai Ísumba kosimáme se anóndakoo enarumbá ámakaandawaimba áíꞌa kwéiye kosimámiyo suyaná kosimámuwana

⁴Ísu iséna séna Árásárásimbo áíꞌo kwéimba íma puꞌmái ánásaindayavena áíꞌa kwéivo Áánútu áwíkwara ááninko súwíkwaraꞌo mósá maránááontavena áíꞌa kwéiye Ísu séna

⁵Máátaante Máríyaante Árásárásinte kwenarumbá tímakomba póna

⁶áíꞌa kwéun-aimba iséna kae-táwai aáno maéna

⁷minkáꞌá kwená kwayó-kwáásíyávéna séna ókwaraꞌa Yútiyaa-ayampata kónaumne súwasa

⁸sésa anóndakoo Yútaa-anon-kwaasi óntandei tuvuwónáe sésa kwéopaꞌa ókwaraꞌa mináyámpáꞌá kónáe kwésene suwaná

⁹Ísu miwí simátimena séna túnkwisasamo kombá íma sáma kaisasá pósa tanaambá kwévaavo sámo kaisasamó kombá íma tanaambá kwévaawe. mirámó ontembá isaꞌá ívé-kanaa kaweꞌá umái mayáímá mayánaumne Ísu séna

¹¹kentáásí kwaásigo Árásárási aúmá kwégwaimba póꞌa usásinankaandayaveꞌa kónaumne súmba

¹²Árásárási pukóntavena Ísu súmbanivo kwená kwayó-kwáásí imáyáa ésa aún-kwaiguráimba póna usásinaniye-imayaa ésa sésa anóndakoo kaweꞌá imbá póna áíꞌa érankaniye suwaná

¹⁴Ísu avoraꞌá séna Árásárási pukwiyé.

¹⁵áíꞌo ipaꞌá íma kwesé máyaunda kaweꞌá imbá póta kwenópataamo kondá suwánéꞌa kentáváí áraiꞌa Áánútumpakemba kunkáiye simásinkanaaowe súwana

¹⁶kwená kwayó-kwáásívínkémbá moóráwai áwíꞌa Tómáasi kwááyu áwíꞌa ávárawaama kwemá simátimena séna Yútaa-anon-kwaasi Ísumba inkamónááomba póta kweséya puwónáeta kónaumne Tómáasi siráiye. Ísuma puwíyampinkemba usásinanaaowaina ááimban-iye kwaasái.

¹⁷súwana Ísu Pétáni-naopaꞌa kúmba Árásárási puwúwasa utámárówana éíyaimba kwaúnkaꞌa Ísu koísaraiye.

¹⁸Pétáni-naoꞌa Yérúsaremuvaꞌa egwaaꞌá pósa

¹⁹Máátaante Máríyaante tiyóvígo pukóntavesa Yútaa-kwaasiyomba iviꞌá kogwétesa máyówana

²⁰Ísu kwétiyemo sumbá Mááta iséna kwétupaꞌa kúwana Máríyaa naaúmpaꞌa máyowana

²¹Mááta Ísuntavena koséna anóndakoo emó maankáꞌó máyaandarakai kesiyóvi íma púwísino.

²²ívéꞌo Áánútumbo áísaa inanamó éna mirá íníye-imayaa kwéune súwana

²³Ísu séna enayóvi pukáimpinkemba usásinaniye súwana

²⁴Mááta séna naaén-kanaama tínana pukáindavinkemba usásinaniye-imayaama kwéune súwana

²⁵Ísu séna púwómpinkemba kwéusasinaawemo sewáíná ááimba kemá úne. aúnáiꞌa umái maíꞌmaiꞌa ónááowaina ááimba kemá úne. kesááiyavesa áraire sésa kenkáꞌá agevamái máyáawaimo ésa puwónááombanivo usásinanaaowe.

²⁶mésa kesááiyavai áraire sésa kenkáꞌá agevamái máyáawaimo ésa íma puwónááowe. mindáyavai emá áraire kwéseno Ísu Máátaantavena súwana

²⁷Ísóigoo emá Áánútumo usásinankaiwai kwéamuꞌmaraundawai óne. Áánútu ááninko óne. marapáꞌá kumíníyondawai emá óne Mááta siráiye.

²⁸Mááta simásuwena kwéna áúnkontavena aúpáꞌá áápimba simámena séna anóndako kwétena kwéaayaiye súwana

²⁹Máríyaa iséna avekáán-umai usásinena kwétupaꞌa kúmba

³⁰Ísuma Máátaamo taawánónkaꞌa ména íma naaópaꞌa túmba

³¹Máríyaa usásinenamo kúmba Yútaa-kwaasi iviꞌá ton-kwáásí awánésa imáyáa ésa sésa utamánkáapaꞌo iviꞌó táíndayavena kwiyé sésa kwaꞌmaésa kumbá

³²Ísu máyonkaꞌa Máríyaa kwéna anóndakoman-iye séna aísamaivimba kívairena séna Ísóigoo emó maankáꞌó máyaandarakai kesiyóvi íma púwísino súwasa

³³Máríyaae kwenánaaemba kwakón-kwaasiye iviꞌó tombá Ísu tuwánówana arumbá éna umbai-yántáákómá arumbá sáwíꞌa úwana

³⁴tísaa ena séna náánkara utamánkaraao súwasa anóndakoo taawánaao suwaná

³⁵Ísu iviꞌá tómba

³⁶Yútaa-kwaasi awánésa sésa pukáiwaimba aruntávéna umánkáiye suwasá

³⁷évakarawai sésa aúgavitan-kwaasi aúramba kaweꞌá umánkaraimbanivo nóra séna íma asóvamankaisana pukáiyo siráawe. Ísu Árásárásimba usásinankarain-kwasai.

³⁸suwaná Ísuna umbai-yántáákómá arumbá sáwíꞌa úwana utamánkaropaꞌa kúmba murí-áívímbá mámakesa óikaꞌa óntandei awáá umásúwówana Ísu koawánéna

³⁹séna óntamba akwátúwáaro súwana Mááta pukówai ámánaako séna Ísóigoo éíyain-tawai kwáímba póna ánkúte íníye súwana

⁴⁰Ísu séna áꞌa simámeꞌa súnda kesááiyavaimo áraire sémo kenkáꞌó agevamáímo mémo e Áánútuna kaweꞌ-máyáímá awánaniyone súwasa

⁴¹óntamba akwátúwówana Ísu kwíyómpaꞌa awánéna séna kesivoó kesáái kwéisaandayaveꞌa súwi súne.

⁴²kesáái kwéisaampo maanáímbá kwésunda pósa maankáꞌá máyaan-kwaasi kentávésa áraiꞌa Áánútu aiꞌmákaisana kunkáiye sénááowe simásuwena

⁴³anónkaꞌa séna Árásárásiyo iyuwó súwana

⁴⁴pukówaima iráimba ampaantanéí avakúmá ánáan-kwisuwesa aíyayaankaꞌa asááúmaresa aꞌnómpáꞌá káátamaresa mirán-úmakon-tantaakwaraꞌa iyúwana Ísu séna iyátúwéwana máíno siráiye. anón-kwaasi Ísuna ámááyu-aimba siráan-kwasai.

⁴⁵Yútaa-kwaasiyomba Máríyaanopaꞌa kun-kwáásí Ísumo úmba awánésa sésa áraiꞌa Áánútunopakemba kunkáiye suwasá

⁴⁶évakarawai ímaniye sésa ámáán-kawaa-kwaasitopaꞌa kosésa Ísumo ún-aimba simátímúwasa

⁴⁷mináímbá isésa ámáán-kawaa-kwaasiye mono-káwáá-kwáásíyé aaimó ísón-kwaasi tááyesa sésa íma awánáúnda-mayai maémáyáimba póta nóraya ónaumno.

⁴⁸úwoimo túwáananamo éna mirám-báyáímá maémáyainda pósa amáparawai kwenááiyavesa áraire sénááowe. minkáꞌá Árómáani-kamaani-kwaasi tésa anóm-bonoꞌ-namba tayawísíyuwesa kentáámá amáparawaima sáwíꞌa umásínkáávainivo nóraya ónaumno suwaná

⁴⁹moóráwai áwíꞌa Káyavaasi minkánáá aivaꞌ-mónó-káwáánáꞌá póna séna íma kaweꞌá umái kwéisaawe.

⁵⁰Yútaa-kwaasi amápaꞌa púwóvo séna moóráwai puwíníye Káyavaasi siráiye.

⁵¹mináímbó súmba íma kwená imáyáavinkemba siráivo minkánáá aivaꞌ-mónó-káwáánáꞌá máyontavena póna Áánútu imáyáama amúwana paárumai séna Yútaa-kwaasi amáparawaiyavena ísámai Ísu puwíníye.

⁵²íma Yútaa-kwaasiye suꞌmai Áánútu árááꞌa ovó óꞌon-oꞌom-baravaken-kwaasi mimbóráíꞌa umái méigwae séna Ísu puwíníye.

⁵³Káyavaasi mináímbá súwasa minkákémbá Yútaa-anon-kwaasi Ísuna ámááyu-aimba suwaná

⁵⁴mindáyavena Ísu íma Yútaa-anon-kwaasi túrankaꞌa kwéna tiyuwéna ugóná ayááíváꞌá Éváráímu-naopaꞌa kúmba kwená kwayó-kwáásíyé koméraawe.

⁵⁵komáyówana tíyótaasa í-tánón-kánáá sáwíyankaꞌa tínímba pósa tirumbó kaweꞌó íyanesa naaóꞌ-naokemba Yérúsaremu-naopaꞌa koyorupésa

⁵⁶Ísuntavesa mivá maavaꞌa awánésa anóm-bonoꞌ-naumpaꞌa torupésa sésa tanómbo opaꞌá tíní. íya tíníyo siráawe.

⁵⁷mono-káwáá-kwáásíyé ámáán-kawaa-kwaasiye sumbá Ísumbo awánésamo ésa simásimiyata tátóráano sumbá mindáyavesa úwoi-kwaasi sésa tanómbo opaꞌá tíní. íya tíníyo siráawe.