Read Kosena Yóni 12 Bible Online

Yóni 12 - Kosena bible

Yóni 12

¹tíyótaasa í-tánón-kánáámá sáwíyankaꞌa túwana avaꞌmoraé-kanaa úwoi kwáyowana Ísu Pétáni-naopaꞌa kwéna pukómpinkemba usásinankarowai áwíꞌa Árásárásina naaópaꞌa kúwasa

²Ísuna toómbá agaimarówana Ísuwe Árásárásiye toómbó naíváꞌá máyóyana Mááta mintómbá maimái tímaꞌmaena kúwana

³Máríyaa áséi-kwiyumba úm-basawemba anón-ontankakemba meéyámbakena Ísu aísamairaꞌa sáwívaꞌa atímarena kwenaꞌnóntáunei uwaúwana mimbásáwén-kwíyúnkó anónkaꞌa naaúmpaꞌa iyúwana

⁴moóráwai áwíꞌa Yútási Isakéríóti séna nóra sénawa mimbásáwémbá ivátuwena anón-ontamba 300 kina mairéna ímo óísambo makáan-kwaasi taaín-timiyo séna mináímbó siráimba Ísuna kuntaruꞌó mayáníwaima séna

⁶íma óísan-iyaain-kwaasiti imáyáa éna séna kwemá Ísuna kwaásiti óntankaꞌa kárákwirondaꞌa umóyándáꞌá póna minóntámpínkémbá mayánáe séna mináímbá súwana

⁷Ísu séna minínímbá aúwéwana úwoi máíno. púwónanamo pésinkanintavena mirá kwéiye.

⁸ímo óísambo máráán-kwaasi keséma maíꞌmaiꞌa kwéiyaꞌa túwaꞌnaa ónáe séꞌa túwaꞌnaa ónááombanivo kemá keséma marapáꞌá íma maíꞌmaiꞌa ónaumne Ísu siráiye. Árásárásina ámááyu-aimba siráan-kwasai.

⁹súwasa Pétáni-naopaꞌa Ísu máyáiye sumbá sáwíva-kwaasi Yútaa-kwaasi isésa Árásárási pukówana usásinankarowainte kotuwánanae sésa kuráa.

¹⁰Árásárásimba usásinankarontavesa pósa Yútaa-kwaasima miwítí anón-kwaasi tiyuwésa Áánútunopakemba kunkáiwainopata kónáe sésa suntaváí mono-káwáá-kwáásí Árásárásina ámááyu-ainkwaraꞌa siráawe. Ísu Yérúsaremu-naopaꞌa kuráin-kwasai.

¹²tíndauraamba áséi-masawemba pérankomba póna ívékaamba Yérúsaremuvaꞌa Ísu kwétiyemo sumbá kwaásiyomba isésa

¹³taayánáma ayáiresa aampakémbá kogwéairesa anónkar-anonkaꞌa sésa Ísóigo aiꞌmáráísana kunkáiwaimba Áánútu kaweꞌá kwéumankaiye. kwená Ísareri-kwaasiti kawáánáꞌán-iye kwenáwíꞌa mósá kwémaraumne suwaná

¹⁴moórá-poima áwíꞌa tónkigo Ísumba ayááꞌmaena túmba

¹⁵naaóváꞌá Áánútun-aai aúváívimba agaimaréna sénaSáíyono-naopaken-kwaasi tááꞌa kaivó kentí kawáánáꞌá kwétiye. naanté-tónkígó ayááꞌmaena kwétiye agaimarénamo siróntemba miráumai Ísu tiráiye.

¹⁶mitáwai kwená kwayó-kwáásí íma imáyáama umái táákaꞌa makómba pósa Ísu pukómpinkemba kwíyómpaꞌa iyúnkaꞌa táákaꞌa marésa sésa aúváívimba kwáyáinkaꞌa póna mirán-iye siráawe.

¹⁷Ísuma Árásárási pukómpinkemba usásinankomba awánésa évaka-kwaasi simátímúwasa

¹⁸isésa mindáyavesa pósa aampakémbá koáírówasa

¹⁹mono-káwáá-kwáásí iséise esa sésa amáparawai kentáámá siyuwésa kwenarááíye suꞌmai kwégwaraavo nóraya ónaumno siráawe. Kíríki-ayampaken-kwaasi Ísumba awánanae siráan-kwasai.

²⁰Yérúsaremu-naopaꞌa monor-áímbá isánáe sésa Yútaa-kwaasi kuwasá Kíríki-kwaasiye kwésa

²¹Vírípima Káríri-ayampaꞌa Pétésáítaa-naopaken-kwaasigonopaꞌa tésa sésa Ísumba awánanaeta túne suwaná

²²Vírípima Éndarumba kosimái áíꞌmaesarai Ísumba kosimámúyana

²³Ísu séna kemá kwaási úrandaꞌa kumpaáruraundawaimba póna kesúwíko anómbo índayavena ívéꞌa kwévaariye.

²⁴áraiꞌa simátimeꞌa séꞌa ánáyumbo úwoimo kwaíndamo éna íma arambá iyánívo ayumbá uꞌmáráawana aáyánkarena áruma kwiréna sáwívar-aramba imái ávu káníye.

²⁵mirámó ontembá tirááímo táíndaiꞌo ésa íma kaweꞌá umái ménaaovo maambárárákén-ímáyáámó tuwáíyawai aúnáiꞌa umái maíꞌmaiꞌa ónááowe.

²⁶kentávésa ená mayáímá mayánáe síyawai kesínaaemba kwáráaro. mirámó íyawai kesé ménaaowe. kesí mayáímó mayáíyawaima kesivo kentúwíꞌa mósá maráníye Ísu siráiye. Ísu kwemó puwúntavena siráin-kwasai.

²⁷Ísu simásuwena séna kesirunkómá umbaiyé taimbá póꞌa nóra sénaumno. kesivoó maanúmbáí-yántááꞌó kesópaꞌo tínímba maisiyuwaaó íma mirá sénaumpo kemá mindáyaveꞌa kunkáumne.

²⁸kesivoó enáwíko anómba íníye súwana kwíyómpakemba aaí séna áꞌa kesúwíꞌa anómba uráunda póꞌa moórágwaraꞌa ónaumne súwasa

²⁹máyón-kwaasiyomba isésa évakarawai sésa kwíyónaai siyé suwasá évakarawai sésa Áánútuna kwayóꞌnáꞌá kwíyómpakewai aaí kwésimamiye suwaná

³⁰Ísu simátimena séna mináímbó isáámba íma kembá kwésuwaꞌnaa-ivo kembá kwétuwaꞌnaa-iye.

³¹marapá-kwáásímó aaivimbó maitinkáín-kánáámá kwétiye. marapá-kwáásítí sáwí-kawaanaꞌa kwatiyuwánín-kanaama kwétiye.

³²taairaꞌá mói sinkánááon-tawaima amáparawaima imáyáama tíménasa kesópata ténááowe Ísu séna

³³mirámó siráimba taairaꞌá inkamíyana puwíníntavena súwasa

³⁴kwaásiyomba isésa sésa Áánútun-aai aúváívimba agaimaréna séna Áánútumo usásinankaiwaima aasiyaasí maíꞌmaiꞌa íníye siráivo emó sénda kemá kwaási úrandaꞌa kumpaáruraundawaimba pósa taairaꞌá mói sínkamiyaꞌa puwónaumne sémpo emá nááwa se ewá seénó suwaná

³⁵Ísu séna kwaási sáma kamátinkainaꞌa úndanivo sáwíyankaꞌa kesé ménaumne. kwaásimo túnín-ayampaꞌo kombá náávaraꞌi kwégowasa pósa íma kwéawanaawe. túnín-tantaako kesópaꞌa tivó séꞌa sáma kamátinkaipaꞌa máéro.

³⁶sáma kaimbá póꞌa kentávéꞌa séꞌa kentáásí ságayandaꞌa óne sembá póꞌa ságayanko árááꞌmaaꞌa aúꞌmái ménaaowe Ísu siráiye. Yútaa-anon-kwaasi Ísuntavesa íma áraire siráan-kwasai. Ísu simásuwena tiyuwéna aúpáꞌá méraiye.

³⁷túrankaꞌa kaweꞌ-máyáí íma awánaraan-awaameꞌa uráimbanivo kwentávésa íma áraiꞌa Áánútunopakemba kunkáiye siráawe.

³⁸mindáyavena naaóváꞌá Áánútun-aai simátímakowaima áwíꞌa Áísáya siráin-aimba áraiꞌa súmbaÍsóigoo kawer-áímbá kosimátimunasaya mináíntávésa íma áraire kwésewe. ená asirayámbá agaráátinkaandamanivo íma kwéawanaawe Áísáya agaimaréna siráiye.

³⁹Ísun-aaiyavesa íma áraire suntavéna naaóváꞌá Áísáya agaimaréna séna

⁴⁰Áánútuma túramba kavítúwáísasapósa túramba íma kwéawanaawe.Áánútuma tááꞌa kaúntinkaisasapósa íma kwéisaawe.Áánútumo simbá mirá uráundapósa kesópaꞌa íma tíyaꞌa sáwí-imayaamaitiyuwéꞌa kaweꞌá umátinkanaumne Áánútu siráiye Áísáya agaimaréna séna

⁴¹Ísuna ságayamba awánomba póna mináímbá agaimaréna siráiye.

⁴²Yútaa-anon-kwaasi évakaꞌa Ísuntavesa áraiꞌa Áánútunopakemba kunkáiye sésa ámáán-kawaa-kwaasi monoꞌ-náúmpáꞌá íyóvo sésa aambá áúmbaraavainiye sésa íma avoraꞌá sumbá

⁴³Áánútuma kesúwíꞌa mósá maráínkwáe-imayaama ímanovo kwaási évakarawai kesúwíta mósá maráígwáe-imayaama ésa mirán-ímáyáámá umbá pósa Ísuntavesa áraire íma avoraꞌá siráawe. Ísu simátimuwasa taaínkaaꞌa uráan-kwasai.

⁴⁴íma avoraꞌá suwaná Ísu anónkaꞌa séna kesááiyavesa áraire sésa kenkáꞌá agevamái máyáawai íma kentáváíyé suꞌmai kwésevo siꞌmákaiwaintavaigwaraꞌa áraire kwésewe.

⁴⁵kesí ááimbo suwánaawaimo ombá íma kené suꞌmai kwésuwanaavo siꞌmákaiwainkwaraꞌa kwéawanaawe.

⁴⁶marapáꞌó kumúnda kwaási sáma kamátinkainaꞌa únda pósa kenkáꞌá agevamái máyáawai íma túnín-ayampaꞌa ménaaowe.

⁴⁷kesááima ísámai íma kaweꞌá kwéowai aaivimbó maitinkáima íma kemá úne. marapá-kwáásí íma aaivimbá maitínkáandayaveꞌa kumúndanivo sáwíꞌo umáímo máyáampinkemba kawer-ámpáꞌá métinkanaeꞌa kunkáumne.

⁴⁸naaén-kanaaraꞌa kesáái isésa tínaaemba umásinkaiyawai sésa kawer-áímbá sínaaemba umámakaundaniye sénááowe.

⁴⁹íma kesí imáyáavinkemba súnda póꞌa kesivo siꞌmákaiwaima simásímakain-aimba súnda póꞌa naaén-kanaama tínasa sésa kawer-áímbá sínaaemba umámakaunda ímo oráámbá uráundaniye sénááowe.

⁵⁰kesivon-ááima aúnáiꞌa umái maíꞌmaiꞌa ónááon-aimban-iye. súnda-aimba kesivo simásímakain-aimba kwésimatimune Ísu siráiye.