Read Kosena Yóni 13 Bible Online

Yóni 13 - Kosena bible

Yóni 13

¹tíyótaasa í-tánón-kánáá aaváyaaraamba kwáyowana ívékaamba Ísu imáyáama éna séna marapáꞌá tuwéꞌa kesivonópaꞌa kuntauweréꞌa iyónaunda-kanaama kwétiye séna marapá-kwáásí kwenááima ísón-kwaasi ávááraumai imáyáama tiména miwíyáváíyé séna puwíníye súwana

²Sáátáánigo Sáímoni ááninkomba áwíꞌa Yútási Isakéríótimba Ísuna kuntaruꞌá uwó-ímáyáámá ámakowasa Ísuwe kwená kwayó-kwáásíyé toómbá kwénowana

³avowámá amápar-asirayamba ámakowana póna Áánútunopakemba kunkáunda póꞌa kuntauweréꞌa iyónaumne-imayaama Ísu éna póna

⁴toómbá némáyonkakemba usásinena paákákén-únánkwátói ayúꞌmarena táúri úsúmaena

⁵táávepimba nombá atímarena kwená kwayó-kwáásí tísamairaꞌa nombá pétinkena táúrinei uwátuwena

⁶Ísuma Sáímoni Pítaanopaꞌa túwana séna Ísóigoo íma kesísamairaꞌa nombá pésinkaao súwana

⁷Ísu séna kemó úndama ívéꞌa íma kwéisaanda po aáno isáníyone súwana

⁸Pítaa séna kesísamairaꞌo nombó pésinkendayaveꞌa aꞌáo síma simaꞌa ónaumne súwana Ísu séna enaísamairaꞌo ímo nombó pérankaanamo éma kesí kwaási-iꞌa íma íníyone súwana

⁹Pítaa séna Ísóigoo ená kwaási-iꞌa ónáe súmpo sísamairare suꞌmai íma pésinkenda síyayaampakwara siꞌnómpákwáráꞌá nombá pésinkaao súwana

¹⁰Ísu séna nombó pékaawaimo ésa íma amápa-kuvaꞌa nombá peránááovo tísamairare suꞌmai nombá peránááowe. keinárawaꞌa nombá pétasaawana kímborawai íma nombá pékaiye súmba

¹¹Ísu kwená kuntaru-kwáásígómbá ísarontavena séna keinárawaꞌa nombá pétasaawana kímborawai íma nombá pékaiye siráiye.

¹²Ísu simásuwena tísamairaꞌa nombá pétinkayuwena paákákén-únánkwátóimo ayúꞌmaromba maimái úmaena ménamo toómbó némáyopaꞌa kwéna tísaa ena séna kemó úndawaina ááimba ára kwéisaao.

¹³kentávéꞌa séꞌa amápa-tantaaꞌa agaráásinkaandawaima Ísóigoma ónemo sembá áraiꞌa mirán-kwáásímá úne.

¹⁴kemá kentí agaráátinkainaꞌa Ísóigoma póꞌa tísamairaꞌa nombá kwévetinkaundayaveꞌa kemá moórá-mora-umai nombá pétinkaaro.

¹⁵kemó kentí kwayóꞌó maráúndantemba keinárawakwaraꞌa mirán-oro.

¹⁶áraiꞌa simátimeꞌa séꞌa kwayó-kwáásímó ésa miwítí anón-kwaasigomba íma usáyaaitanaaowe. tiꞌmákaiwain-aai maimaésa kosimátímakaawaimo ésa tiꞌmákaiwaimba íma usáyaaitanaaowe.

¹⁷miráumai kemó uráunda áꞌa awánaraavo mirámó íyambo éꞌa tirumbá kaweꞌá ónááowe.

¹⁸keinárawapinkemba íma amáparawaiyaveꞌa súmpo ítátinkaunda-kwaasi áꞌa túyaraumne. Áánútun-aai aúváívimba agaimaréna séna kesé moórávinkembo toómbó naráiwaima kesí kuntaru-kwáásímán-iye agaimaréna siráimba áraiꞌa siráiye.

¹⁹íma paáruraisaꞌa simátimunda póna aánomo paárínaꞌa kentávéꞌa séꞌa áraiꞌa séna Áánútunopakemba kunkáiye sénááowe.

²⁰áraiꞌa simátimeꞌa séꞌa tiꞌmáráanasa kwíyawai táái ísámai kaweꞌá íyanten-umai kesáái ísámai kaweꞌá ónááowe. kesááimo isáíyanten-umai siꞌmákaiwain-aai isánááowe Ísu siráiye. moóráwai kesí kuntaruꞌá íníye Ísu siráin-kwasai.

²¹Ísu simásuwena kwenarumbá umbaí tówana séna áraiꞌa simátimeꞌa séꞌa keinárawapinkemba moóráwai kembá namuro-kwáásíráꞌá agaráátinkaniye súwata

²²kwená kwayó-kwáásí moórá-mora-umai méta kwenaúvínaayaivimba éta nááwantavena siíyó séta

²³kwená kwayó-kwáásí Ísuma kembá arumbá símakowaima Ísuna egwaaꞌá máyaawanana

²⁴Sáímoni Pítaa kentávéna aúwánáán-awaameꞌa éna séna nááwantavai seénó se áísaa uwo súwaꞌa

²⁵avakáá-umai áísaa eꞌa séꞌa Ísóigoo emó sénda nááwaꞌiyo séwánana

²⁶Ísu séna kemó toómbó nompí tuꞌmái aménaunda-kwaasi kwemán-iye séna toómbá maimaéna nompímbá tuꞌmái mindáꞌá Sáímoni Isakéríóti ááninko áwíꞌa Yútásimba amúwana

²⁷mintómbá mayówana Sáátáánigo kwenarumpimbá iyúwana Ísu simámena séna emó ónáe sindaíꞌa maaránkaꞌa uwó Ísu súwasa

²⁸toómbó kwénaapaꞌo máyón-kwaasi Ísumo sún-ainkona ááimba íma ísámai kawer-umbá

²⁹sésa Yútási óntankaꞌa tavíkówaintavena Ísu séna ímo óísambo makáan-kwaasi évakaꞌa timiyó Ísu siyé sésa tanómbo káúvón-kanaaratavai sésa toómbá meéyán-uwo Ísu siyé suwaná

³⁰Yútási Ísumo amún-tomba maimaéna avekáán-umai máápaꞌa kumúwana túnkuraiye. aúná-amaambo simátímakain-kwasai.

³¹Yútási máápaꞌa kumúwana Ísu séna ívéꞌa kwaási úrandako súwíꞌa anómba umái kwévaarisana kesí mayáígómá Áánútu áwíꞌa anómba umái kwévaariye.

³²kesí mayáígómá Áánútu áwíꞌa anómba intembá ívéꞌa Áánútu kesúwíꞌa anómba íníye.

³³kesí iyámpóíyono. sáwíyankaꞌa kesé méꞌa tiyúwáanaꞌa sivakáá ónááowe. Yútaa-kwaasiyaveꞌo áꞌo simátimeꞌo súndantemba kentávéꞌa séꞌa íyóndaraꞌa íma kanaán-umai iyónááowe.

³⁴aúná-amaamba simátíménaꞌa kesirumbó timúndanten-umai moórá-mora-umai kentirumbá tíméro.

³⁵moórá-mora-umaimo kentirumbó timíyasamo ésa tuwánésa sésa Ísuna kwayó-kwáásín-owe sénááowe Ísu siráiye. Pítaa ánaaemba umásinkaniye siráin-kwasai.

³⁶Ísu simásuwowana Sáímoni Pítaa áísaa ena séna Ísóigoo náávara iyíníyono súwana íyóndaraꞌa ívéꞌa íma sínaaemba kwaráníyompo aáno sínaaemba kwaráníyone súwana

³⁷Pítaa séna Ísóigoo nóintavaiya ívéꞌa íma ánaaemba kwaránaumno. íma póꞌa áwaꞌnaa umai púwónana kaweꞌá íníye súwana

³⁸Ísu séna áwaꞌnaa umai puwónaumnemo sénda kemá áraiꞌa simámeꞌa séꞌa kokórigomo ímo ááimo siráindaraꞌa kaumboráꞌá kentáváí séma íma awánáúnda-kwaasiye síníyone Ísu siráiye.