Read Kosena Yóni 14 Bible Online

Yóni 14 - Kosena bible

Yóni 14

¹Ísu simásuwena simátimena séna kentirumbá íma sáwíꞌa éꞌa íma anón-imayaa oró. Áánútuwe aráápamai méꞌa kesé aráápamai máéro. kentí imáyáa Áánútumpaꞌa tuwéꞌa Áánútuna imáyáa éꞌa ánivo kesí imáyáa oró.

²kesivoná naaópaꞌa sáwívaꞌ-maruꞌa kwéraiye. ímo mirámó uráinkakai íma simátimusino.

³kemó iyúnda kentí maruꞌá utoꞌmayaa umátinkanaeꞌa iyúne. usauwéꞌmaeꞌo kuntíꞌmaeꞌo íyónda kemó máyaundaraꞌa uménaaowe. mirá onaꞌá kesé ménaaowe.

⁴kemó iyúnda-amba áꞌa awánaawe súwana

⁵Tómáasi simámena séna anóndakoo emó iyónda-naopaꞌa íma awánáúmne. nááraumai minámbá awánanaumno súwana

⁶Ísu séna Áánútunopaꞌo iyónááon-amba kemá úne. kemá áraikona ááimba úne. kemá maíꞌmaiꞌa ónááowaina ááimba úne. kesivoná naaópaꞌa íma úwoi iyónááomba póꞌa kemá minámbá únda póꞌa iyónááowe.

⁷kesí ááimbo kwésuwanekai kesivombá awánaasino. ívéꞌa kwéawanaawe súwana

⁸Vírípi séna anóndakoo enavombá agaráásínkénanaya kentáá kanaa íno súwana

⁹Ísu séna ayáátáákaꞌa keséma máyaundanivo emá kesí ááimba íma kwésuwanaane. kesí ááimba suwánaawaima kesivombá áꞌa kwéawanaavo nóra isa enavombá agaráásinkaao seénó.

¹⁰kemá kesivoé tarúmai máyaunana kesivomá kesé tarúmai máyáiye. mináíntávéꞌa áraire seró. íma kesí imáyáavinkemba súmpo kesivomá kesé ména kwená mayáímá isaꞌá súne.

¹¹kemá kesivoé tarúmai máyaunana kesivomá kesé tarúmai máyáimba póꞌa mináíntávéꞌa áraire seró. ímo mirámó séꞌo éꞌa kesí mayáímá awánéꞌa séꞌa áraiꞌa kwíyómpakemba Áánútunopakemba kunkáiye seró.

¹²áraiꞌa simátimeꞌa séꞌa kentávéꞌa áraiꞌa Áánútunopakemba kunkáiye síyawaima kemó úndantem-bayai miwígwáráꞌá mayánááowe. kesivonópaꞌa iyéꞌa Áánútun-amamba aiꞌmáráándayavena miwítí mayáígó kesí mayáígómbá usáyaaitaniye.

¹³kesí imáyáamo éꞌo sísaa íyaꞌo éꞌa mirá ónaumpo kentávéꞌa ísámai kesivo áwíꞌa mósá maránááowe.

¹⁴kesí imáyáamo éꞌo sísaa íyaꞌo éꞌa kemá mirá ónaumne Ísu siráiye. Áánútun-amamba aiꞌmáráanana kumíníye siráin-kwasai.

¹⁵Ísu mináímbá simásuwena séna kentirumbó símakaambo éꞌa kesáái ísámai kaweꞌá ónááowe.

¹⁶kesivombá áísaa onaná karááꞌá tutinkáníwaimba aiꞌmaráínana kumbéna kesé aasiyaasí maíꞌmaiꞌa íníye. kwemá áraikona ááimban-iye.

¹⁷marapá-kwáásí kwembá íma awánésa kwenáái íma ísáamba pósa íma kanaán-umai sésa kesé tamaiyó sevó kesé ména kentirumpimbá maíꞌmaiꞌa imbá póꞌa kwembá kwéawanaawe.

¹⁸sáwíyankaꞌa tiyuwáúndanivo íma megusaamó ontembá ónááovo usauweránáumne.

¹⁹sáwíyankaꞌa marapá-kwáásí kembá íma suwánanaaombanivo keinárawaꞌa ókwaraꞌa suwánanaaowe. kesé ménaunda póꞌa kemá aúnáiꞌa umái ménaaowe.

²⁰minkánáámá tínímba póꞌa séꞌa áraiꞌa avowáe ména kesé máyáísata kwesé máyaumne mirá sénááowe.

²¹kesááimo taagwiyavésamo kaweꞌó kwéowai tirumbá kwésimewe. tirumbá simíyawaima kesivoé kesé sirunkáí timéyauye. kesirumbó timúndawaiyavaiye simái avoraꞌá paárumai ménaumne súwana

²²Yútási Isakéríóti aráámáómá áwíꞌa Yútási séna Ísóigoo nóintavaiye séwa úwoi-kwaasiyavaiye simái íma avoraꞌá paárumai ménaumne seénó. kentááyáváíyé simái avoraꞌá paárumai ménaumne seénó súwana

²³Ísu séna tirumbá símakaawaima kesáái ísámai kaweꞌá íyana kesivomá arumbá miwí timínakai kesé kesivoé miwísé kumbéyauye.

²⁴kesáái ísámai íma kaweꞌá kwéowai tirumbá íma símakaawe. súnda-aimba íma kesí imáyáavinken-aimban-ivo kesivo siꞌmákaiwaina imáyáavinken-aimban-iye.

²⁵kesé máyaundaraꞌa mináímbá kwésimatimune.

²⁶ánivo kesivomá kwenamambá kentí karáákómbá aiꞌmaráínana kumbéna kesí anondá éna amápa-tantaaꞌa agaráátinkena súnda-aimba timínaꞌa táákaꞌa maránááowe.

²⁷tiyuwéꞌa paru kwéumatinkeꞌa kentirumbó kwempaꞌó maráí-yántááꞌá kwétimune. marapá-kwáásí íma kwétimewaꞌanivo kesirumbó kwempaꞌó maráúndantemba miráumai kwétimune. mindáyavena kentirumbá íma sáwíꞌa éna íma tááꞌa kaíno.

²⁸tiyúwáandanivo kentópaꞌa usauweránaumnemo súnda áꞌa kwéisaawe. kentirumbó símakaambo éꞌa kesivonópaꞌa íyóndayaveꞌa aamoí ónááowe. kesivomá kembá usáyaaitaraintavaiye simái aamoí ónááowe.

²⁹íma paáruraisaꞌa simátimunda póna paárínaꞌa kentávéꞌa séꞌa áraiꞌa siráiye sénááowe.

³⁰Sáátáánigo maambáráráꞌá sáwí-kawaanaꞌa kwétimba póꞌa íma ayáátáákaꞌa aaimá simátimundanivo kwená asirayánkó íma kembá tátoraniye.

³¹kesivomá simásímakaimba mirá únda suwánésa sésa avowámbá arumbá ámakaiye sénááowe. usásinaiyata konó Ísu siráiye.