Read Kosena Yóni 15 Bible Online

Yóni 15 - Kosena bible

Yóni 15

¹Ísu simátimena séna áraiꞌa ándáma kemá úne. kesivomá minándáráꞌá tavíkáiwaiman-iye. ándáma kemá úne. ándágo amaimá kemán-owe. ímo arambó iyáínda-amaimo éna ayááisiyuwaniye. arambó iyáínda-amaimo éna ayááeꞌmarainana aráságáyó agaimái arambá iyáníye. ayááeꞌmaraintemba simátímakaunda-ainkoma mirá kwéena tirumbá arupí kwéiye. kesé tarúmai maíyaꞌa kemá kempáꞌá tarúmai máéno. amaiyé suꞌmaigomo éna íma arambá iyáníye. mirámó intembá kesémo ímo tarúmaimo maíyambo éna íma arambá iyáníye. kemá kesé tarúmai máénaꞌa póꞌa kesémo tarúmaimo maíyawaimo éꞌa sáwívar-aramba imái ménaaowe. kembó iváꞌó siyuwésamo ésa íma arambá imái ménaaowe.

⁶amaimó ayááisuwainda-amaimo aáyánkáíndamo éna aúꞌmái agaisuwáníye. kesémo ímo tarusíyawaima mirá íníye.

⁷kesémo tarúmaimo maíyawai kesááimo kentirumpimbó tátoꞌmaraiyawaima áísaa íyana póna mirá umátinkaniye.

⁸sáwívar-arambo imáímo maíyan-kwaasimo tuwánésamo ésa sésa Ísu arááíma kwáráan-kwaasin-owe síyana kesivo áwíkomo éna anómba íníye.

⁹kesivomó arumbó símakainten-umai kesirumbá kembá kwétimune. kemó éꞌa misírúntáváíyé simái máéro.

¹⁰kesivoná ámáámba ísámai kwenaruntaváíyé simái máyaundantemba kesí ámáámbo iséꞌo éꞌa kesiruntaváíyé simái ménaaowe.

¹¹mináímbá simátímakaunda póꞌa kesí aamoi-yántáákó kentirumpimbá anómba kwáyainaꞌa aamoí umái máéro.

¹²kesirumbó timúndantemba moórá-mora-umai tirumbá tíméro. mindá kesí ámáámba kwétimune.

¹³kentí kwaásiyavaiye simái kwétuwaꞌnaa-eꞌa puwónáe sésamo puwíyamba íma moórá-aimba simái usáyaaitamai tirumbá timénááowe.

¹⁴kesááimo isémáyayawaimo éꞌa kesí kwaási-iꞌa ónááowe.

¹⁵anón-kwaasigona kwayó-kwáásí anóndakona mayáí íma awánaraambanivo kwenávárawaisai kwená mayáí awánaraawe. mirámó ontávéꞌa póꞌa kesivomó amápar-aimbo simásímakaimba simátimunda póꞌa íma kesí kwayó-kwáásíyé sendá kesívárawaisaiye sénaumne.

¹⁶keinárawaꞌa íma kembá ításinkaawaꞌa kemá keinárawaꞌa ítátinkaunda póꞌa kwégweꞌa asirayán-árámbá koimái sáwívase umái máéro. kesí imáyáamo éꞌo kesivompáꞌó áísaa íyanamo éna mirá umátinkaniye.

¹⁷moórá-mora-umai tirumbá tíméro séꞌa mirán-ámáámbá simátímakaumne Ísu siráiye. marapá-kwáásí tíyámba umátínkaraan-kwasai.

¹⁸Ísu mináímbá simátimena séna marapá-kwáásímó keinárawatavesamo tíyámbo umátinkaiyaꞌo éꞌa táákaꞌa maréꞌa séꞌa aivaꞌá kentáásí Ísóigomba áyámba umánkaraawe sénááowe.

¹⁹kemá marapá-kwáásívínkémbá kembá ítátinkeꞌa kendéín-owe súnda pósa marapá-kwáásí tíyámba kwéumatinkaawe. kembó úwoimo marapá-kwáásímó onkákáí kentávésa sésa kenkáán-kwáásín-owe sésa tirumbá timésino.

²⁰kwayó-kwáásí miwítí anón-kwaasigomba íma usáyaaitaraawemo súnda imáyáama oró. kentí anóndako únasa pósa marapá-kwáásí akáꞌáámba simásinkesa sáwíꞌa umásínkáanten-umai keinárawaꞌa akáꞌáámba simátinkesa sáwíꞌa umátinkanaaovo kesááima ísámai kaweꞌá íyawai kentááima isánááowe.

²¹keinárawaꞌa kesí kwaási-iꞌa ombá pósa marapá-kwáásí akáꞌáámba simátinkesa sáwíꞌa umátinkanaaowe. siꞌmákaiwaimba íma awánaamba pósa sáwíꞌa umái mirá ónááowe.

²²kemó ímo kusimátimundarakai marapá-kwáásítí sáwí-imayaa úwoi aúpáꞌá kwáísino. kusimátimunasa miwítí sáwí-imayaama iváꞌá túwááraamba íma iváꞌá túwáawana úwoi kwáyáiye.

²³tíyámbo masinkáíyawai kesivonkwáráꞌá tíyámba kwéumankaawe.

²⁴kemó óꞌowimo usáyaaitamaimo ímo óꞌon-oꞌom-bayaimo mayáúndarakai marapá-kwáásítí sáwí-imayaa úwoi aúpáꞌá kwáísino. kesí mayáímá awánésa kenté kesivonté tíyámba kwéumasinkaawe.

²⁵Áánútun-aai aúváívimba agaimaréna séna úwoiyavesa kembá tíyámba kwéumasinkaawe siráinkaꞌa póna mináímbá ívéꞌa kwévaariye.

²⁶kesivonópaꞌa iyéꞌa kentí karááꞌá tutinkáníwaimba aiꞌmáráanana kesivonópakemba kwenamankó keinárawate kumbéna kwemá áraikona ááindaꞌa póna kentávéna amápa-tantaaꞌa kusimátiminiye.

²⁷kemó mayáímó ááimbo asááwándarakemba áꞌa suwánaraamba póꞌa kentáváígwárá kesí mayáíyáváígwáráꞌá simátímapaꞌa kónááowe.