Read Kosena Yóni 16 Bible Online

Yóni 16 - Kosena bible

Yóni 16

¹naaémba kesááiyaveꞌa íma asiramái méꞌa siyúwáavo séꞌa mináímbá kwésimatimunda imáyáa oró.

²naaémba marapá-kwáásímó keinárawatavesamo monoꞌ-náúmpákémbá kwatuwánáemo sénááomba mindáyavesa sésa Ísuna kwayó-kwáásí tínkamiyawai Áánútuna mayáímá kwémayaawe kampaꞌá sénááowe.

³kenté kesivonté íma suwánaamba pósa miráumai sáwíꞌa umátinkanaaowe.

⁴ívéꞌa mináímbá kwésimatimunda póna mindá paárínaꞌa táákaꞌa maréꞌa séꞌa simásimakaimba kwévaariye sénááowe. mindáyaveꞌa kwésimatimune Ísu siráiye. Áánútun-amanko mayáímá kwémayain-kwasai. Ísu simásuwena séna keinárawate máyaunda póꞌa mináímbá íma simátímakeꞌa

⁵siꞌmákaiwainopaꞌa íyóndatavaiye séꞌa ívéꞌa simátímakaanaꞌa náávara iyónó séꞌa íma sísaa owaꞌá

⁶iyónaumne súnda-aimbo ísááwana tirunkó umbaí taisaꞌá póꞌa náávara iyónó séꞌa íma sísaa owe.

⁷áraiꞌa simátimeꞌa séꞌa ímo iyúndarakai kentí karááꞌá tutinkáníwaima íma kúmísino. iyéꞌa kwembá aiꞌmáráanana keinárawate kumbéna kaweꞌá umátinkaniye.

⁸kumbéna marapáꞌá máyáan-kwaasi kentí sáwí-imayaagona ááimba agaráátinkaniye. arupímo umáímo maígona ááimba agaráátinkaniye. Áánútumo aaivimbó maitinkáníwaina ááimba agaráátinkaniye.

⁹kesááiyavaimo ímo áraire síyawaiyavena simátimena séna kentí sáwí-imayaa úwoi kwáyáiye síníye.

¹⁰kesivonópaꞌa iyúnda íma suwánanaaomba póna kentí karááꞌá tutinkáníwaima arupí umái ménaaomba kunagaráátinkaniye.

¹¹maambáráráꞌá sáwí-kawaanaꞌa áꞌa aaivimbá mayánkaraimba póna Áánútu aaivimbá maitinkáníyema simátiminimbaniye.

¹²sáwívar-aimba simátimusina umbai-áímbá póꞌa ívéꞌa íma kanaán-umai isánááomba póꞌa naaémba isánááowe.

¹³Áánútun-amankoma kumbéna amápa-tantaatavena árair-aama vaꞌmái simátiminiye. íma kwená imáyáavinkemba simátiminivo simámakain-aimba simátimena aánomo paárinin-tantaaꞌa simátiminiye.

¹⁴súnda-aimba simátiminana kesúwíꞌa anómba íníye.

¹⁵amápar-aintomba kesivondéímá mindá kendéímán-iye. miráumai séꞌa simámakaunda-aimba Áánútun-amankoma simátiminiye Ísu siráiye. tirumbá umbaí tamái naaémba kaweꞌá uráin-kwasai.

¹⁶Ísu simásuwena séna sáwíyankaꞌa íma suwánéꞌa aáno suwánanaaowe súwasa

¹⁷kwená kwayó-kwáásívínkémbá évakarawai sésa kesivonópaꞌa iyúnda póꞌa sáwíyankaꞌa íma suwánéꞌa aáno suwánanaaowemo simbá nóintavaiya kwésiyo.

¹⁸sáwíyankaremo simbá mináínkóná ááimba íya kwéisaumne. nóintavaiye séna kwésiyo suwaná

¹⁹Ísu miwí tuwánarena áísaa ónáe kwéuwana simátimena séna sáwíyankaꞌa íma suwánéꞌa aáno suwánanaaowemo súnda-aintaveꞌa keinárawaꞌa ávááraumai kemó súnda-aintaveꞌa ísámae kwénaaowe.

²⁰áraiꞌa simátimeꞌa séꞌa keinárawaꞌa iviꞌá táíyasa marapá-kwáásí aamoí ónááombanivo kentirumbá umbaí tamái méꞌa naaémba kentirumbá etóyóí ónááowe.

²¹moórá-ininkomo iyámpóímo maránkarainda-kanaama tínanamo éna áíꞌo kwéuwanamo maránkaraintavaiye séna ísámai umbaí táínana naaémba miníyámpóí awánéna aamoí umánkaniye.

²²mirá ontembá kentirumbá ísámai umbaí téꞌa naaémba suwánéꞌa aamoí ónááowe. aamoimó ií-yántááꞌá íma maitiyuwánááowe.

²³minkánáá tínaꞌa íma sísaa ónááovo kesivombá áísaa íyamba kentávéꞌa ísámai áísaa íyantavena póna mirá umátinkaniye.

²⁴kesivombá íma áísaa uráavo ívéꞌa kentávéꞌa ísámai áísaa íyamba mirá umátinkainana kentirunkó anómba aamoí ínaꞌa máéro Ísu siráiye. marapá-tántááꞌá Ísu usáyaaitaraiye siráin-kwasai.

²⁵Ísu simásuwena séna kwántámai-aimba simátimunda póꞌa naaén-kanaama tínaꞌa kesivon-áái paárumai simátimenaumne.

²⁶minkánáámó tínaꞌa kesí imáyáa ontáváí kesivombá áísaa íyaꞌa kemá íma áísaa onaná

²⁷kwemá úwoi tiména kwenarumbá tímakaintavena póna úwoi timíníye. kentávéꞌa séꞌa Áánútunopakemba kunkáiye séꞌa tirumbá símakaantavena kesivomá arumbá tímakaiye.

²⁸kesivonópakemba marapáꞌá kumbáyaunda póꞌa ívéꞌa marapáꞌá tuwéꞌa kesivonópaꞌa iyónaumne Ísu súwasa

²⁹kwená kwayó-kwáásí sésa ívéꞌa íma kwántámai-aimpinkemba sémpo avoratá kwésimasimene.

³⁰kesáámá séta áísaa ónáisaye íma súnayaama emá ísaraandanaꞌa po paárumai kwésene. miráyá séta Áánútunopakemba kunkáane kwésune suwaná

³¹Ísu séna kentávéꞌa Áánútunopakemba kunkáiye sembánivo

³²sáwíyankaꞌa siyuwéꞌa kentí naaóꞌ-naoꞌa kóyáwé owaꞌá keyáá maúsina kesivomá kesé máyáiye.

³³mináímbá simátimunda póꞌa kesé tarúmai méꞌa aánoumai kwempaꞌá máéro. marapá-kwáásí akáꞌáámba simátinkesa sáwíꞌa umátinkanaaombanivo marapá-tántáákwárá kwaásigwaraꞌa usáyaaitaraunda póꞌa kentirumbá aamoí umái ménaaowe Ísu siráiye.