Read Kosena Yóni 17 Bible Online

Yóni 17 - Kosena bible

Yóni 17

¹Ísu simásuwena kwíyómpaꞌa awánéna séna kesivoó minkánáámá kwétiye. kesúwíꞌa anómba inaꞌá enáwíꞌa anómba umánkáano.

²amápa-kwaasi tavíkáundayavai asirayámbá símakaanda póꞌa símakaanda-kwaasi aúnáiꞌa umái maíꞌmaiꞌa umátinkaunda mindáyavai kesúwíꞌa anómba inaꞌá enáwíꞌa anómba umánkáano.

³eyááma árair-Isoigoma óne. kembá siꞌmákaandanaꞌa úne. empáré kempáré tésa kenkáísááima ísááwai aúnáiꞌa umái maíꞌmaiꞌa kwéowe.

⁴marapáꞌá enáwíꞌa anómba umái símakaanda-mayaima ánásaumne.

⁵kesivoó maramá íma taróruraandaraꞌa esé máyauyana kesúwíꞌa anómba kwáyáinkaꞌa po ókwaraꞌa mirán-ínkwáeꞌa kwésune.

⁶marapá-kwáásívínkémbá ená kwaási-iꞌa umátinke símakaandawaima entáváí mirándáꞌá máyáiye simái paárumatinkaunasa enáái kwéisaawe.

⁷símakaandayavesa sésa mintántááꞌá Áánútu ámakain-tantaare kwésewe.

⁸símakaanda-aimba simátimunda kwéisaawe. enópakemba kunkáunda-aimba isésa sésa Áánútu aiꞌmákaisana kunkáiye kwésewe.

⁹miwíyávéꞌa ísámai kwéaisaa-une. marapá-kwáásí úwoi-kwaasiyaveꞌa íma áísaa úmpo símakaanda-kwaasi ená kwaásiyaveꞌa ísámai kwéaisaa-une.

¹⁰ená kwaási kesí kwaásiman-owe. kesí kwaási ená kwaásima ésa kesúwíꞌa anómba kwéowe.

¹¹marapáꞌá íma máénda enópaꞌa íyóndanivo miwímá marapáꞌá ménaaowe. kawe-késívóo miwíráꞌá emá taviyénda pósa Áánútumbo ááyaan-kwaasi-iꞌa umái ménaaowe. esé kesémo tarúmaimo maúyantemba miwímá tarúmai ménaaowe.

¹²miwísé méꞌa tavíkáunda Áánútumbo ááyaan-kwaasi-iꞌa umái mésa íma sáwí-amba kwakáawe. ánivo moóráwai sáwí-amba kwaránímba póna mináímbá Áánútun-aai aúváívimba agaimaréna siráin-aimba paáriniye.

¹³enópaꞌa íma iyúnda marapáꞌá méꞌa miwí tirumpimbá kesí aamoi-yántáákó anómba kwégwaintavai mináímbá kwésimatimune.

¹⁴enáái simátímakaumne. kemó ímo áraiꞌo marapá-kwáásímó úndantemba miwímá íma áraiꞌa marapá-kwáásímá ombá pósa marapá-kwáásí úwoi-kwaasima tíyámba kwéumatinkaawe.

¹⁵íma séꞌa miwímá marapákémbá kuntiraaó súmpo Sáátáánigo sáwíꞌa umátínkáivo se taviyiyó kwésune.

¹⁶kemó ímo áraiꞌo marapá-kwáásímó úndanten-umai miwímá íma áraiꞌa marapá-kwáásímán-owe.

¹⁷enááima árair-aimba póna tirumpimbá kwáyainasa ená kwaási-iꞌa umái ménaaowe.

¹⁸kembó siꞌmaráánaꞌo marapáꞌó kunkáundantemba miwímá tiꞌmáráanasa marapá-kwáásívímbá ménaaowe.

¹⁹miwíyáváíyé séꞌa enarááíye suꞌmai kwaráúnda pósa enarááíye suꞌmai kwaránááowe.

²⁰íma maankwáásíyé suꞌmaiyaveꞌa áísaa eꞌa súmpo miwí táái isésa kentávésa sésa áraiꞌa Áánútunopakemba kunkáiye síyawaiyavaigwaraꞌa kwéaisaa-une.

²¹kesivoó áísaa eꞌa séꞌa esé kesémo tarúmaimo maúyantemba miwímá enté kentévaꞌa tarúmai ménaaowe. miwímá tarúmai máyáamba pósa marapá-kwáásí tuwánésa sésa áraiꞌa Áánútuma Ísumba aiꞌmákaisana kunkáiye sénááowe. mindáyaveꞌa námúnaavinkemba kwésimamune.

²²esé kesémo mimbóráíꞌo umáímo maúyantemba símakaanda-asirayamba tímakaunda pósa mimbóráíꞌa umái ménaaowe.

²³emá kesé tarúmai máénaꞌa kemá miwísé tarúmai máyaunda pósa miwímá tarúmai ménaaowe. marapá-kwáásí mindá tuwánésa sésa Áánútuma Ísumba aiꞌmákaisana kunkáiye sénááowe. enarumbá símakaandanten-umai miwígwáráꞌá tímakaanda pósa marapá-kwáásí tuwánésa sésa áraire sénááowe.

²⁴kesivoó maramá íma taróruronkaꞌa enarumbá siméma asirayámbá símakaane. símakaanda-kwaasi kesé maígwáe séꞌa súnda pósa kesí asirayámbá awánanaaowe.

²⁵kesivoó arupínako óne. marapá-kwáásí embá íma kwéawanaambanivo kemá awánáúnda símakaanda-kwaasi kentávésa sésa Áánútuma aiꞌmákaisana kunkáiwaiye kwésewe.

²⁶entáváí mirándáꞌá máyáiye simái paárumatimunasa enarumbó símakaandantemba miwí tirumbá simíyaꞌa miwísé ménaumne. entáváí mirándáꞌá máyáiye simái paárumatinkareꞌa paárunte kónaumne Ísu námúnaavinkemba mirá siráiye.