Read Kosena Yóni 18 Bible Online

Yóni 18 - Kosena bible

Yóni 18

¹Ísu simásuwena kwená kwayó-kwáásíyé Kítáróni-nomba kóaatesa taai-kanáágúnévímbá komáyówana

²Ísuwe kwená kwayó-kwáásíyé mintáí-kánáágúnévímpáꞌá kóyo untavéna Yútási Ísuna kuntaru-kwáásí mintáí-kánáágúnéváꞌá awánéna

³miváꞌá kúmba ámáán-kawaa-kwaasiye mono-káwáá-kwáásíyé i-kwáásígwárá monoꞌ-nánkár-í-kwáásígwáráꞌá tiꞌmárówana Yútási tíꞌmaena taánasatagwara ánáyatankwaraꞌa maimaésa oómbá toꞌmaésa mintáí-kánáágúnéváꞌá kumbá

⁴Ísu kwenópaꞌo tínín-tantaakomba awánéna kwená kwaásivinkemba usásinena miwí túrampaꞌa koména tísaa ena séna nááwana avakáá-íya kwéoo súwasa

⁵Ísu Násáretivakewaintaveta kwéavakaa-une suwaná miwántávéꞌo sembá kemá úne súwana Yútási Ísuna kuntaru-kwáásímá póna miwísé máyomba

⁶kemá úne Ísu súwasa miwí tayauwérópaꞌa tanaambá vowaná

⁷Ísu moórágwaraꞌa tísaa ena séna nááwana avakáá-íya kwéoo súwasa Ísu Násáretivakewaintaveta kwéavakaa-une suwaná

⁸Ísu séna áꞌa simátimunda maandá kemá úne. kembó sivakáá ontavéꞌa maankwáásí étinkaiyasa koró Ísu súmba

⁹Áánútuntavai siráimba símakaanda-kwaasi íma sáwí-amba kwakáawe sirónkaꞌa póna paárumai mináímbá súwana

¹⁰Sáímoni Pítaa taánasatama ámúrandavinkemba taúꞌmaena aivaꞌ-mónó-káwáánákóná kwayó-kwáásí ááꞌa agáúsuwomba minkwáyó-kwáásígó áwíꞌa Márákáasi kwenááꞌa agáúsuwowana

¹¹Ísu Pítaantavena séna ená taánasatama ámúrandavimba kwiyuwó. síꞌa índaiꞌa umásinkanaaombanivo kesivoná mayáímá íma tuwánáúnda póꞌa mirámá ónaumne Ísu siráiye. Ísumba áíꞌmaesa Ánásinopaꞌa máánkaraan-kwasai.

¹²Ísu súwasa i-kwáásíyé miwítí anón-kwaasiye monoꞌ-nánkár-í-kwáásíyé Ísumba tátoꞌmai ayáánkaꞌa asááúmaesa

¹³áíꞌmaesa aivaꞌá moórá-kawaanaꞌa áwíꞌa Ánásinopaꞌa máánkówana kwemá Káyavaasi aísáánkoma póna minkánáámá Káyavaasima aivaꞌ-mónó-káwáánákómá póna

¹⁴ááéma simátimena séna Yútaa-kwaasi amápaꞌa púwóvo séna moóráwai puwíníye siráiwaina aísáánkonopaꞌa máánkaraawe. Pítaa íma awánáúnda-kwaasiye siráin-kwasai.

¹⁵máánkówasarai Ísuna kwayó-kwáásíráí moóráwai Sáímoni Pítaawe moóráwaiye Ísun-ánaaemba kwaꞌmaésarai kuyambá aivaꞌ-mónó-káwáánákó moóráwaimba awánasuwowana aaimá ísópaꞌa Ísumba ánkaropaꞌa umáyowana

¹⁶Pítaa aan-taaréívímbá máyowana aivaꞌ-mónó-káwáánákómá awánówaima usauweréna ontaráꞌóárákwiron-arasigontavena simámuwana ontá tiyankówana Pítaamba áíꞌmaena usáverowana

¹⁷minárásígó Pítaamba awánéna áísaa ena séna minkwáásígóná kwayó-kwáásíyáꞌono súwana Pítaa séna aꞌáo ke óꞌon-kwaasi úne súwasa

¹⁸táúgwitavesa ésa mayáí-kwáásíyé i-kwáásíyé iramá agaimarésa tiyáámba kwégauvuwana Pítaa mináímbá simásuwena iraráꞌá koména ayáámba kauráiye. aivaꞌ-mónó-káwáánákómá Ísumba áísaa uráin-kwasai.

¹⁹Pítaa iraráꞌá kwégauvuwana aivaꞌ-mónó-káwáánákómá Ísuntavena séna simátímakaanda-aimba simásimiyo. ená kwayó-kwáásíyáváígwáráꞌá simásimiyo súwana

²⁰Ísu séna Yútaa-kwaasiti anóm-bonoꞌ-naumpare sáwíyam-bonoꞌ-naumpare simáti simati eémáyaunda avoraꞌá seémáyaunda íma aúpáꞌá simátimakaumpo

²¹nóintavai kwésisaa-ono. kesááimo ísaraawai tísaa inasá simátimakaunda-aimba ísaraamba pósa sénááowe súwana

²²monoꞌ-nánkár-í-kwáásígó Ísumba tuvuwéna séna aivaꞌ-mónó-káwáánákómó simpímbá íma mirá siyó súwana

²³Ísu séna sáwí-aimbo súndarakai misáwí-áímbá ááéma avoraꞌá isinó. kawer-áímbó súndayavai nóinkakena sínkamono súwana

²⁴Ánási aiꞌmarówasa ayáámpinken-anda íma ayútuwesa mindánankwaraꞌa áíꞌmaesa Káyavaasi aivaꞌ-mónó-káwáánákónópaꞌa máánkaraawe. Pítaa íma awánáúnda-kwaasiman-iye siráin-kwasai.

²⁵aivaꞌ-mónó-káwáánákónópaꞌa Ísumba máánkówana Pítaa iraráꞌá ména ayáámba kwégauvuwasa iraráꞌó máyón-kwaasi áísaa esa sésa egwárárá minkwáásígóná kwayó-kwáásí oónó suwaná mináímbá umémpaꞌa tuwéna séna ke ímaniye súwana

²⁶aivaꞌ-mónó-káwáánákóná kwayó-kwáásí Pítaantavena séna emá minkwáásígóe taai-kigáúváꞌá máyaayaꞌa tuwánaraunda áraira súno séna Pítaama ááꞌa agáúsukowai akún-ándárákéwáímá súwana

²⁷Pítaa moórágwaraꞌa séna ke ímaniye súwana kokórigo áái siráiye. Ísumba áíꞌmaesa Páírátinopaꞌa máánkaraan-kwasai.

²⁸kokórigo áái súwasa irataróꞌa Káyavaasina naaúmpakemba Ísumba áíꞌmaesa kámááni-anondakona pááimpaꞌa máankesa sésa íma Yútaa-kwaasiti naaúmpaꞌan-ivo óꞌon-kwaasiti naaúmpaꞌa iyéta tíyótaasa í-tánómbá íya náúnavaiyaawe sésa íma íyúwana

²⁹Árómáani-kamaani-kawaanako áwíꞌa Páíráti kunákárúwena kuntísaa ena séna minkwáásí nóinkakena aaivimbá mayankánáe séo súwasa

³⁰ímo sáwíꞌo uráinkakai íya áíꞌmaeta túsino suwaná

³¹Páíráti séna keyááríkaꞌa áíꞌmaeꞌa kentí ámáámbo makénten-umai simánkáaro súwasa miYútáá-ánón-kwáásí sésa Árómáani-kamaani-kwaasi moóráwaimbo tuvúꞌmáímo utaíyáváí aambá áúntukaawe sumbá

³²ááéma Ísu simátimena séna taairaꞌá mói sínkamiyaꞌa puwónáumne siráin-aimba paárúwasa áíꞌmaesamo kumbá mináíntávésa uwaná

³³Páíráti naaúmpaꞌa kuntauweréna iyéna Ísumba ááyena séna emá Yútaa-kwaasiti kawáánárá oónó súwana

³⁴Ísu séna ená imáyáavinkena sísaa ó. kwaási simámakaawa sísaa oónó súwana

³⁵Páíráti séna kemá íma Yútaa-kwaasima úne. ená kwaásiye mono-káwáá-kwáásíyé áíꞌmaesa kesópaꞌa tiráavo norá ónasawaꞌiyo súwana

³⁶Ísu séna kemó kawááíꞌo úndama íma marapáꞌá kwáyáiye. kemó kawááíꞌo úndamo marapáꞌó kwáyáinkakai kesí kwayó-kwáásí ááiꞌa tíyáásino. Yútaa-kwaasi kembá tátoraavo sésa ááiꞌa tíyáásino sésa tátokaawe. kemó kawááíꞌo úndama íma marapáꞌá kwáyáiye súwana

³⁷Páíráti áísaa ena séna kawáánárá oónó súwana Ísu séna áꞌa séne. mindáyaveꞌa marapáꞌá kumúnana masínkaraimba póꞌa arupí-aimba kwésimatimune. arupí-aintavesamo aamoimó owáí kesááima kwéisaawe súwana

³⁸Páíráti séna nói-aina arupí-aimban-iyo siráiye. Ísumba arááꞌa tuvúwóro siráin-kwasai.

³⁹tíyótaasa í-tánón-kánáá tintembá moórá-kwaasi ááyaawaꞌa ándávakemba ayúrankaundantemba minkánáámó tinkáꞌá Yútaa-kwaasiti kawáánárá ayúrankanaumno tísaa ena súwasa

⁴⁰anónkaꞌa sésa ímanivo kwembá íma ayúranke Párápásimba ayúrankaao suwaná Párápásima ááite tiyéna umóyánté in-kwáásímán-iye sésa kwembá ayúrankaao siráawe.