Read Kosena Yóni 19 Bible Online

Yóni 19 - Kosena bible

Yóni 19

¹suwaná Páíráti i-kwáásí simátimuwasa Ísumba áwí-andanei áwírukuꞌ-nesa

²anón-kwaasiti kánumoꞌan-iye sésa áwí-andama owepamái Ísu aꞌnómpímbá kuvérankesa naaeyayán-únánkwátói anón-kwaasiti unáánkwátóiman-iye sésa umánkesa

³kanaárááꞌa ankésa moórá-mora-umai kwenópaꞌa tésa sésa Yútaa-kwaasiti kawáánáꞌá óne sésa tiyáándei tuvútoꞌna uráawe.

⁴tuvútoꞌna uwaná moórágwaraꞌa Páíráti kunákáruwena amápa-kwaasiyavena séna maísáaro. íma sáwíꞌa uráintaveꞌa áíꞌmaeꞌa túrankaꞌa máankaraanaꞌa awánaaro. íma sáwíꞌa uráiye súwana

⁵Ísu kunákáruwena aꞌnómpímbá áwí-andagwara naaeyayán-únánkwátóigwaraꞌa kunákárúwowana Páíráti simátimena séna minkwáásígómbá awánaaro súwasa

⁶mono-káwáá-kwáásíyé monoꞌ-nánkár-í-kwáásíyé awánésa anónkar-anonkaꞌa sésa taairaꞌá tuvuwíyana puwíno suwaná Páíráti séna kwemá íma sáwíꞌa uráimba póꞌa kemá íma tuvuwónaumpo keinárawaꞌa áíꞌmaeꞌa taairaꞌá máyuvuworo súwasa

⁷Yútaa-kwaasi sésa kwemá séna Áánútu áánimba úne seémáyaimbanivo kentáásí ámáánkoma séna mirámó síndawaimba tuvuwíyana puwíno símakaampimba póta tuvuwónaumne suwaná

⁸Áánútu áánimba úne siráin-aimba Páíráti isówana ávááraumai ááꞌa kówana

⁹naaúmpaꞌa kuntauweréna umaéna Ísumba áísaa ena séna náávakewaiyaꞌono súwana Ísu iséna íma aaí súwana

¹⁰Páíráti séna kemó áísaa únda nóra se íma aaí kwéseno. kemó aaimó senasamó ésa ayúrankanaaowe. kemó senasamó ésa taairaꞌá tuvuwíyama puwíníyone. minásíráyámbá tokáumne súwana

¹¹Ísu séna Áánútumo minásíráyámbó ímo ámakainkakai íma toráasino. Áánútu ámakaivo síꞌmaenamo enkáꞌó másínkaiwaina sáwí-mayaigoma ená sáwí-mayaigomba usáyaaitaraiye siráiye.

¹²Ísu súwana Páíráti mináímbá iséna séna nóraꞌiyo ke minkwáásí ayúrankanaeꞌa kwéune súwasa Yútaa-kwaasi anónkaꞌa sésa emó ayúrankemo éma íma Árómáani-kamaani-aiva-kawaanakona kwaási-iꞌa kwéone. Ísu séna kemá kawáánákómá úne siráintavai Árómáani-kamaani-aiva-kawaanakomba usáyaaitanae siráintavai mindáyavaiye séma íma ayúrankaao suwaná

¹³Páíráti mináímbá iséna Ísumba áíꞌmaena máápaꞌa óntan-ayaumá kwáyom-barupaꞌa Yútaa-kwaasi tááivinkemba áwíꞌa Kápata-marupimba kumbéna aaivimbá maitínkarom-barupaꞌa kumbéna Yútaa-kwaasiyavena séna kentí kawáánákómán-iye súwana tíyótaasa í-tánón-kánáámá aaváyaaraamba tíníye úwana ívékaamba kwáyáꞌwái sáwíyankaꞌa tíníye úwana Páíráti Yútaa-kwaasiyavena séna kentí kawáánákómán-iye súwasa

¹⁵ímaniye sésa anónkar-anonkaꞌa sésa taairaꞌá tuvuwíyana puwíno suwaná Páíráti tísaa ena séna kentí kawáánákómbá taairaꞌá tuvuwíyaneꞌa kwéowe súwasa mono-káwáá-kwáásí sésa Árómáani-kamaani-aiva-kawaanako kweyááma kentáásí kawáánákómán-iye suwaná

¹⁶Yútaa-kwaasi tááigo usáyaaitontavena Páíráti séna Ísumba taairaꞌá tuvúwóro séna tímakaiye. Ísumba arááꞌa tuvúkáan-kwasai.

¹⁷Páíráti timúwasa i-kwáásí Ísumba áíꞌmaesa taaimá tuvuwónááon-taima kwenkáꞌá ámúwana áúgwaataꞌmaena tuvuwónááon-ayampaꞌa kúmba mináyámpáré sésa áwíꞌa aꞌnómayaampare Yútaa-kwaasi tááivinkemba Kórígótaavare mináyámpáꞌá kúwasa

¹⁸taairaꞌá aíyayaampimba tuvúsúmaresa kae-kwáásíráí Ísuna évarevar-akwampaꞌa taairaꞌá tuvúsúmaresa Ísumba avumpimbá tuvúsúmarowana

¹⁹Páíráti kwená mayáí-kwáásíyávéna séna Ísu Násáretivakewaima Yútaa-kwaasiti kawáánáꞌán-iye séꞌa agaimái taairaꞌá aráápamankaaro súwasa

²⁰kaumbo-kwáásí tááivinkemba Yútaa-kwaasi tááivinkenkwara Árómáani-kwaasi tááivinkenkwara Kíríki-kwaasi tááivinkenkwaraꞌa agaimái aráápamankarowasa sáwíva-kwaasi awánomba tuvúwún-ayampaꞌa anón-daopaꞌa egwaaꞌá kwáyontavai sáwíva-kwaasi mináúváímá awánésa táámpamai ísówasa

²¹Yútaa-mono-kawaa-kwaasi Páírátintavesa sésa Yútaa-kwaasiti kawáánáꞌán-iye íma mirá simái agayáámpo kwemá séna Yútaa-kwaasiti kawáánáꞌá úne mirá simái agayaaó suwaná

²²Páíráti séna áꞌa agaimakáumne siráiye.

²³i-kwáásí Ísumba taairaꞌá aíyayaampimba tuvúsúmaronkaꞌa kwená unáánkwátói maimaésa éíyainkaꞌa taaímbaresa moórá-mora-i-kwaasi éíyain-kwaasi minúnánkwátói maimaésa moórá-ampaanta paákár-únánkwátói íma arúmakon-ampaantama maimaésa sésa

²⁴taráráivo séta aávéiya kwétiyaananaya nááwa usáyaaitena mayáníyo sumbá Áánútun-aai aúváívimba agaimaréna sénakesí unáánkwátói taaímbai maimaésa moórákesí ampaantarátávésa aávéima tiyaráawe sirónkaꞌa pósa i-kwáásí mirá uráawe.

²⁵i-kwáásí mirá uwasá Ísuna kwaási taairaꞌá tuvúkón-taigona ááimpimbo máúmba Ísumba anówa úwana kwenáúnko Kórópasi awainínkó áwíꞌa Máríyaa úwana Mágátáraa-naopaken-ininko áwíꞌa Máríyaa úwasa miráumai-inimba taaigoná ááimpimba máyówana

²⁶Ísu kwenanówamba awánéna kembá Yónimba suwánéna anówantavena séna mindá enáánimban-iye séna

²⁷kentávéna séna mindá enanóman-iye súwaꞌa iséꞌa kesí naaúmpaꞌa móankareꞌa kárákwiraumne. Ísuma pukáin-kwasai.

²⁸minkákémbá Ísu imáyáama éna amápaꞌ-mayaima ánásaumne súmba sáwí-imayaagomo tátokaimpinkemba iyátinkaunda-mayai amápaꞌ-mayai ánásasuwaumne séna Ísun-aai Áánútuna aúváívinkemba paárinintavena Ísu séna nontáváí kwésinkaiye súwana

²⁹ándá-aran-domba ikaaꞌ-nómbá anavéúmpímbá kwáyowana paru-táyánáma mindómpímbá tuꞌmaéna oviyen-támayopimba kinúvaimaena naínkwáe séna Ísu óikaꞌa mósá marówana

³⁰Ísu néna séna amápaꞌ-mayaima ánásasuwaumne séna aꞌnómbá kívaimai avowa ayáámpimba kwenamambá toꞌmaréna pukáiye. Ísuna akwámpímbá kwaantáándéí agaivaráin-kwasai.

³¹Ísu kweyááríkaꞌa puwúwana Yútaa-kwaasima agándon-kanaama tíyótaasa í-tánón-kánáámá aaváyaaraamba tíníye úwasa pósa sésa agándai-kanaaraꞌa puwíyan-kwaasi taairaꞌá máévo sésa Páírátinopaꞌa tésa sésa puwíyan-kwaasi íma úwoi tiyúwéwasa taairaꞌá máéro. tísamaima ankaisíyasa ááéma puwíyasa taairakémbá marapáꞌá maitiyúwáaro suwaná

³²Páíráti owé súwasa i-kwáásí Ísuna évarevar-akwampaꞌa taairaꞌá tuvúsúmaron-kwaasi tísamaima koankaisésa

³³Ísunopaꞌa tumbá áꞌa pukóntavesa kwenaísamaima íma ankáísúmba

³⁴moórá-i-kwaasigo Ísuna akwámpímbá kwaantáándéí agaivówana naaegwárá nonkwáráꞌá kunkáiye.

³⁵mindámó awánáúndawaima simátímakaumne. awánéꞌa árair-aimba súnda póꞌa iséꞌa séꞌa áraire sénááowe.

³⁶Áánútun-aai aúváívimba agaimaréna séna kwenayáátámba íma ankaisíníye agaimaréna sirónkaꞌa pósa i-kwáásí mirá uráawe.

³⁷moórávaꞌa agaimaréna séna kwaantáándéímó agaiváíndawaimba avuwónááowe agaimaréna sirónkaꞌa póna paáruraiye. Ísumba utamánkaraan-kwasai.

³⁸Yósépima Árímátíyaa-naopakewaima Ísun-aai isówai póna Yútaa-anon-kwaasi táároi inkaiséna kwenáwíꞌa áúyotukomba póna Ísuma puwúnkaꞌa Páírátinopaꞌa téna séna Ísun-auma utánáivo simiyó súwana Páíráti séna kanaámpó mayáníyone súwana Yósépi Ísun-auma komayówana

³⁹Níkótimasima ááéma Ísunopaꞌa noꞌwáámba tiráiwai áséi-kwiyumba úm-basawemba anóm-basawemba kaeꞌá maimaéna Yósépimba kóáíꞌmaesarai

⁴⁰Ísun-auma komaimaésarai ampaantavímbá mináséí-kwíyúm-básáwénkwáráꞌá asááúmaesarai tésarai Yútaa-kwaasi miráumai utaantembá pósarai miráumai utarááiye.

⁴¹Ísumbo tuvúkáan-ayampaꞌa taai-kigáúmá kwáyowana utaráam-buri-aima ímo kwaási utaróm-buri-aima kwáyowasarai

⁴²agándai-kanaama sáwíyankaꞌa tíníye sésarai mimbúrí-áímá egwaaꞌá kwáyontavesarai Ísumba mimpímbá máutaraaiye.