Read Kosena Yóni 21 Bible Online

Yóni 21 - Kosena bible

Yóni 21

¹naaémba Táípíriyasi-kwaaunkon-awampaꞌa Ísu miráumai paárúwasa kwená kwayó-kwáásí awánaraawe.

²kwená kwayó-kwáásí torupésa miwí túwíꞌa Sáímoni Pítaawe Tómáasi kwááyu-awiꞌa ávárawaawe moóráwai Káríri-ayampakemba Kéna-naopaken-kwaasi áwíꞌa Nátáníyowe Sépéti ááninkaiye óꞌon-kae-kwaasiye miráumai-kwaasi torupówana

³Sáímoni Pítaa simátimena séna noyááꞌa kotoránáeꞌa kúne súwasa kesáágwaraꞌa montá kónáeta kwéune sésa nompí-sípívímbá usámaaisesa kumbá noꞌwáámba noyááramai kwima-kwimar-umbá íma noyááꞌa torówana

⁴irataróꞌa Ísu nonawámpáꞌá máyowasa íma aúyowana

⁵Ísu séna iyámpóíyono. noyááꞌa tokááo súwasa ímaniye suwaná

⁶Ísu séna kwase-únámbá tiyáánúrapar-ayampaꞌa nompímbá túwéwana kumínaꞌa noyááꞌa asínáaro súwasa kwemó súnten-umai sáwívaꞌ-noyaaꞌa asínówana mindómpí-sípívímbá íma kanaán-umai márááraꞌnaraa éna ógwitowaꞌa

⁷kemá Pítaantaveꞌa séꞌa epínda Ísóigoman-iye séwánana Pítaa mináímbá iséna mayáímó mayáíndayavena paákákén-únánkwátói ayúꞌmaromba minúnánkwátói maimái úmaena nompí-sípí tuwéna nompímbá ásávena nonáámááívaꞌa kúwana

⁸nonáámááí egwaaꞌá kwáyowata óꞌon-kwaasiya mindómpí-sípí maimaéta kwase-únámbá tavisímaeta kówándaya

⁹nonáámááívaꞌa ásávaawandaya iramá kwégowana noyáákwara toónkwáráꞌá kwéagayowata awánaawananaya

¹⁰Ísu séna tóráan-doyaaꞌa évakaꞌa maimaéꞌa teró súwana

¹¹Sáímoni Pítaa nompí-sípívímbá usámaaisena kwase-únámbá tavisímaena nonáámááívaꞌa mámarowana anón-doyaaꞌa 153 noyááꞌa kwéna sáwívaꞌ-noyaaꞌa kwáyombanivo kwase-únámbá íma tararówana tavisímaena nonáámááívaꞌa mámarowana

¹²Ísu simásimenaya séna tamandaaró súwata nááwaꞌono séta áísaa ónáe séta ówándaya íma áísaa eta Ísóigoma iyé-ímáyáámá ówánanaya

¹³Ísu noyáákwara toónkwáráꞌá maimái símakaintaawe.

¹⁴Ísu pukómpinkemba usásinomba kaekáꞌá paárúmba ívékwarakaamba paárúwata awánaraundayaawe. Ísu Pítaantavena kesí kwaásiraꞌa taviyiyó siráin-kwasai.

¹⁵toómbá násuwowana Ísuma Sáímoni Pítaantavena séna Yóni ááninko Sáímoniyo. miwímá usáyaaitewa enarumbá kwésimeno súwana owé Ísóigoo ená imáyáamo umánkaunda áꞌa suwánaraane súwana Ísu séna kesí sipisípi-araakaꞌa taviyiyó séna

¹⁶ókwaraꞌa Ísu áísaa ena séna Yóni ááninko Sáímoniyo. kesí imáyáama kwéono súwana owé Ísóigoo ená imáyáamo umánkaunda áꞌa suwánaraane súwana Ísu séna kesí sipisípiraꞌa taviyiyó séna

¹⁷kaumboráꞌá Ísu áísaa ena séna Yóni ááninko Sáímoniyo. kesí imáyáama kwéono súwana kaumboráꞌá áísaa ena súntavena Pítaa arumbá umbaí tówana séna Ísóigoo amápa-tantaaꞌa áꞌa awánaraandayavai ená imáyáamo umánkaundagwaraꞌa áꞌa suwánaraane súwana Ísu séna kesí sipisípiraꞌa taviyiyó.

¹⁸áraiꞌa simámeꞌa séꞌa emá aú-kwaasima máyaanda po ená unáánkwátói aneꞌmaké ená imáyáavinkemba úwoi kwénaaempo anónuꞌmai kéma enayáámba árútuwenasa ímo embó arááímo táíndavaꞌa máankanaaowe Ísu séna

¹⁹mináímbó súmba Pítaamo miráumai taairaꞌá puwéna mindá Áánútu áwíꞌa mósá maráníye séna Pítaantavena séna kesirááíma kwaraaó siráiye. Ísunte Yóninte mindáraiti kwaásai.

²⁰Ísu Pítaantavena simásuwowana Pítaa kogwanténa moóráwaimba awánarai. ááéma toómbá narópaꞌa Ísun-aókáꞌá ména séna Ísóigoo nááwa ená kuntaru-kwáásí íníyo siráiwaimba

²¹Pítaa kogwanténa awánéna Ísuntavena áísaa ena séna Ísóigoo minkwáásíndó súwana

²²Ísu séna kemó súndamo éꞌo éꞌa kwemó éna úwoi maambárárá máyainaꞌa kemá kumónaumnemo súndamo énamo éna íma endéín-ivo kendéímán-iye. emá kesirááíma kwaraaó Ísu súwasa

²³kwená kwayó-kwáásí íma kaweꞌá umái ísónkakemba sésa kwemá íma puwíníye sésa simátímaꞌmae kuwaná kwemá íma puwíníye Ísu íma mirá siráimbanivo kwemó éna úwoi máyainaꞌa kemó kumónaumnemo súndamo énamo éna íma endéín-iye Ísu siráiye.

²⁴íma puwíníyemo siráan-kwaasi kemá Yóni úne. mináímbá kwésimatimatuweꞌa aúváívimba kwéagaisuwaunda mináímbá árair-aimban-iye.

²⁵Ísumo mairáim-bayaima évakaꞌa agaéꞌa évakaꞌa íma agairáunda póꞌa amápaꞌo agaisuwéꞌo éꞌa maranéí káátamaranaumpo náávara maránaumno séꞌa súne. kemá Yóni súnda-aimba ánásaiye.