Read Kosena Yóni 4 Bible Online

Yóni 4 - Kosena bible

Yóni 4

¹Yóni nombó pétinkarain-kwaasi Ísumo pétinkaraimba kóyaaitamai-kwaasi pétinkaraiye. ánivo Ísuma íma pétinkaraivo kwená kwayó-kwáásí pétinkaraawe. Yónimo kwévetinkain-kwaasi Ísumo kwévetinkaimba kóyaaitamai-kwaasi kwévetinkain-aimba ámáán-kawaa-kwaasimo ísón-aimba Ísu iséna Yútiyaa-ayampaꞌa tuwéna moórágwaraꞌa Káríri-ayampaꞌa kónáe séna

⁴Sámériyaa-ampaꞌa kónaumne séna

⁵kúmba Sámériyaa-ayampaꞌa Sáíkaa-naopaꞌa naaóváꞌó Yákópomo ááninko Yósépimbo ámakom-barama egwaaꞌá kwáyon-daopaꞌa kúmba

⁶Yákópo nombá uwíníyena uꞌmakóm-baiꞌa kwáyowana aampaꞌá kwéguwana Ísumba ávón-kówana mimbáíkáꞌá kwáyáꞌwái komáyowasa

⁷kwená kwayó-kwáásí toómbá meéyán-onae sésa naaópaꞌa kuwaná Sámériyaa-ininko nombá uwíníyena túwana Ísu séna nombá usimiyó súwana

⁹minínínkó séna emá Yútaa-kwaasi ómpo kemá Sámériyaa-inimba úmpo íma nombá usimiyó siyó siráiye. Yútaa-kwaasiye Sámériyaa-kwaasiye íma moórá-anavinkemba kwénaantavena íma nombá usimiyó siyó súwana

¹⁰Ísu séna Áánútumo kanaán-umaimo amínín-tantaaꞌa íma awánaraane. nombá usimiyómó súnda-kwaasigona ááimba íma suwánáánda-kwaasi úne. kesí ááimba suwánáándawairaankasi kwántámai se aasiyaasí maíꞌmaiꞌa ónááon-domba simiyó sénaꞌa amúsino súwana

¹¹minínínkó séna maandómbá avéúmpáꞌó kunkwáyáimba náán-anavina maíꞌmaiꞌo ónááon-domba uwíníyono.

¹²kentáá síkwáꞌnáoma Yákópoma maandóm-báíꞌá uꞌmaréna kwená sipisípiye kwená akúnté tímakaimba pósa maandómbá kwénaawe. kemó súnda emá timíníyonda-nonkoma Yákópo tímakain-donkomba íma usáyaaitaniye kwésune súwana

¹³Ísu séna maandómbó kwénaiyawaimo éna ókwaraꞌa nontávéna tinkánívo

¹⁴kemó tíménda-nombo náíyawaimo éna íma ókwaraꞌa nontávéna tinkáníye. kemó tíménda-nombo náíyawaimo éna tirumpimbá nonayumpinkémbó usausa intenkáámbá ínasa pósa aúnáiꞌa umái maíꞌmaiꞌa ónááowe súwana

¹⁵minínínkó séna emó sénda-nomba símínaꞌa naananá nontávéna íma sinkáínaꞌa íma maampínkémbá tauwónaumne súwana

¹⁶Ísu séna enawaikómbá koááyamai áíꞌmae tiyó súwana

¹⁷séna kesuwairíyaaimba úne súwana Ísu séna emá áraiꞌa séndamanivo

¹⁸évaꞌaasei-kwamba mairé miwísé maémaenda isamá ívéꞌo minkwáásígó emó máyaanda íma enawaiꞌá isamá po árair-aimba simásimene súwana

¹⁹minínínkó séna kemó imáyáamo únda Áánútun-aai simátimendanaꞌa óne.

²⁰Sámériyaa-kwaasi kentáá síkwáꞌnáma sésa maanómákáꞌá Áánútuna imáyáa mósá máráaro siráawaꞌa keinárawaꞌa Yútaa-kwaasi séꞌa Yérúsaremu-naopaꞌa Áánútuna imáyáa mósá máráaro sewé súwana

²¹Ísu séna kemó sendamá áraire siyó. moórá-kanaamo tínímba maanómákákwárá Yérúsaremu-naopakwarare suꞌmainivo amápaꞌ-mapakwaraꞌa kesivoná imáyáa mósá maránááowe.

²²keinárawaꞌa Sámériyaa-kwaasi kwená imáyáa máráambanivo kwená ááimba íma awánareꞌa owe. Yútaa-kwaasiya kwená imáyáa mósá maréta kwená ááinta awánaraumne. Áánútu séna moóráwai sáwíꞌo umáímo máyáampinkemba kawer-ámpáꞌá métinkanae síníwai Yútaa-kwaasivinkemba paáriniye siráiye.

²³kesivo séna kesí imáyáama mósá maráíyamba íma tóikakemba éꞌa áraiꞌa tirunkakémbá kesí imáyáa mósá máráaro siráimba miráumai moórá-kanaama kwétisasamo áraiꞌo kesivoná imáyáamo mósá kwémaraiyawaima tirunkakémbá arupí umái kesivoná imáyáama mósá maránááowe.

²⁴Áánútumba áúma íma kwáyáísana amankómá máyáísasa pósa íma túrandei aneꞌá kwéawanaavo miráráán-umai Áánútuna imáyáamo mósá máráambo ombá kwenamankó túwaꞌnaa isasá tirunkakémbá kwená imáyáa mósá máráaro súwana

²⁵minínínkó séna Áánútumo usásinankaiwaima Káráísitiye sewáí kumíníye. kumíndaraꞌa amápa-tantaatavena simátiminiye sewaꞌá ísaraumne súwana

²⁶Ísu séna mináímbó séndawaima maandá kemá úne Ísu siráiye.

²⁷Ísu mináímbá súwasa kwená kwayó-kwáásí koyauwerésa Ísumo Sámériyaa-ininkontavena súmba Yútaa-kwaasiti namuro-ínínkóntávéna kwésuwana póna tááꞌa kówasa tirumpin-ímáyáámá ésa minínínkóntávéna nóintavaiya kwéankaisana íyó-imayaa ésa Ísuntavesa nóra séna minínínkóe kwésiyo-imayaa ésa íma taáísaa uwaná

²⁸minínínkómá kwená sawei-ánámá tuwéna naaópaꞌa kwéna simátimena séna

²⁹amápaꞌa uráunda-yantaaꞌa paárurain-kwaasi máyáiye. Áánútumo usásinankaiwaiyaꞌiya taawánaaro súwasa

³⁰naaópaꞌa tuwésa Ísunopaꞌa tumbá

³¹Ísuna kwayó-kwáásí Ísuntavesa sésa anóndakoo toómbá naaó amatááráꞌá suwaná

³²Ísu séna kemá íma awánaan-tomba makáumne súwasa

³³kwená kwayó-kwáásí keáímbá sésa nááwa toómbá maimaéna máámakaiyo suwaná

³⁴Ísu séna toóntávénamo tááimo kwétinkaintemba siꞌmákaiwain-aai iséꞌa kwená mayáímá maimaéꞌa kwégweꞌa ánásanaundayavai kwésinkaiye.

³⁵kígauvaꞌa kwáyáin-tontaveꞌa éíyain-kwiyomba ánásainana ávuma káínata ákáꞌmai torupánaumne kwésevo kemá séꞌa awánaaaro. ívéꞌa maankánáámá toómbó ávumo kaintembá miráráán-umai kwaásiyomba tíꞌmai Áánútunopaꞌa kwiyónááowe.

³⁶kwaásiyombo tíꞌmai Áánútunopaꞌa kwitinkáíyan-kwaasimo ésa miwí kaweꞌ-méyámbá mayáíyasa Áánútunopaꞌa tíyan-kwaasi aúnáiꞌa umái maíꞌmaiꞌa ónááowe kwésune. évakarawai kígau úmaraiyasa óꞌowima akaránááowe kwésewe. miráumai kígau íyawaigwara akaráíyawaigwaraꞌo ésarai aamoí ónááowe.

³⁸óꞌowima kígau úmakaamba isaꞌá kemá tiꞌmáráúnaꞌa óꞌowiti mayáívínkén-tómbá kwéakaraawe Ísu kwántámai-aimba simátímakaiye.

³⁹ánivo minínínkó séna amápaꞌa uráunda-yantaaꞌa paáruraiye siráin-aimba isésa pósa Sámériyaa-kwaasi mindáópaken-kwaasi Ísuntavesa sésa áraiꞌa Áánútumo usásinankaiwaiman-iye sésa

⁴⁰Ísunopaꞌa tésa sésa kentáásí naaópaꞌa tamaiyó suwaná Ísu kae-táwai koména

⁴¹aaí simátimuwasa isésa sáwíva-kwaasigwaraꞌa sésa áraiꞌa sáwíꞌo umáímo máyaundavinkenta kawer-ámpátá mésinkaniwaiman-iye sésa

⁴²minínínkómbá simámesa sésa íma enááiye suꞌmaiyavetaanivo kwenáái ísaraundayaveta séta marapá-kwáásí sáwíꞌo umáímo máyaundavinkemba kawer-ámpátá mésinkaniwaiman-iye siráawe. Ísu moórá-iyampoi asóvamankarain-kwasai.

⁴³Ísu kaeꞌ-nóꞌwáámbá kwaéna mindáópaꞌa tuwéna Káríri-ayampaꞌa kónáe séna kwéna

⁴⁴séna Áánútun-aai simátímíwain-awiꞌa kwenamááraa íma mósá máráavo áꞌon-daopaken-kwaasi kwenáwíꞌa mósá máráawe súwasa

⁴⁵miráumai Káríri-ayampaꞌa kúwasa mináyámpákén-kwáásí aamoí umánkaraawe. ááéma tíyótaasa í-tánón-kánááráꞌá miwí Yérúsaremu-naopaꞌa komésa Ísuna mayáímó mairáimba awánaraamba pósa aamoí umánkaraawe.

⁴⁶aamoí umánkówana Ísu Káríri-ayampaꞌa kwénaaena Kéna-naopaꞌa non-úranko ándá-aran-dombo kasúkáin-daopaꞌa kúmba kámááni-kwaasi Kápénéamu-naopaken-kwaasigo ááninkomba áíꞌa kwéuwana

⁴⁷Ísu Yútiyaa-ayampakemba Káríri-ayampaꞌa tiráin-aimba iséna Ísunopaꞌa téna séna kesááninko puwíndayavena kwéisaꞌa úmpo kesí naaópaꞌa kuré koasóvamankaniyono súwana

⁴⁸Ísu séna ímo óꞌom-bayai-awaameꞌo awánéꞌo éꞌa íma kesááiyaveꞌa áraire sénááowe súwana

⁴⁹anóndakoo kesáánimba puwíndayavena kwéimba avekáán-umai tiyó súwana

⁵⁰Ísu séna enáánimba asóvagwivo kwaaó súwana Ísun-aaiyavena áraire séna kúmba

⁵¹aampaꞌá kúmba kwená mayáí-kwáásí tésa sésa enáánimba áíꞌa éránkaraiye suwaná

⁵²tísaa ena séna kesáánimba nósa-tawaiya áíꞌa éránkaraiyo súwasa sésa tíndauma kwáyáꞌwái kokotámba éránkaraiye suwaná

⁵³avowámá imáyáa éna séna mitáwai enáánimba asóvagwiyemo siráimba áraiꞌa siráiye súmba pósa kwená akúmpákén-kwáásí amápaꞌa Ísun-aaiyavesa áraire siráawe.

⁵⁴Yútiyaa-ayampakemba Káríri-ayampaꞌa komáyomba moóráma kaweꞌ-máyáí-áwááméꞌá uréna minkáꞌá miníyámpóígómbá asóvamankowasa kwená akúmbá áraire siráawe.