Read Kosena Yóni 5 Bible Online

Yóni 5 - Kosena bible

Yóni 5

¹aáno Yútaa-kwaasi monotávésa tanómba kaumakónkaꞌa Ísu Yérúsaremu-naopaꞌa kurái.

²Yérúsaremu-naokona óntan-kurivaꞌa ontamá kwáyomba áwíꞌa sipisípigona ontamá miwáná egwaaꞌá nonkwaaúmbá áwíꞌa Pétéséta-nonkwaaumba kwáyowana

³mindónkón-awampaꞌa kwááyu-namba évaꞌaasei-namba kwáyowasa mindáúmpátá tíꞌa ún-kwaasiyomba évakaꞌa túgavitan-kwaasiyonte tíyayaamba kararón-kwaasiyonte mésa [nonkómó pívíꞌnamaemo kúmba amuꞌmarésa máyówana

⁴moórá-mora-tawai kwíyómpakewaima nompímbá kumúwana nonkómá pívíꞌnamae kúwana aivaꞌá nompímbá kumúwaimba áíꞌa éránkaraiye.]

⁵tíꞌo ún-kwaasiyompimba moóráwai ména ayáátáákaꞌa 38 iraꞌa áíꞌa kwéun-kwaasi máyowana

⁶Ísu awánéna ayáátáákaꞌa áíꞌa kwéiye-imayaama éna áísaa ena séna embá asóvaiyavai kwéankaiyo súwana

⁷séna nonkómá pívíꞌnamae kwíndaraꞌa síꞌmaimo nompímbó sinkáníwaima íma máyáiye. kemá kumónáeꞌa úndanivo moóráwai kembá kumáyaaitena nompímbá aivaꞌá kúmísana kesíꞌa úwoi kwáyáiye súwana

⁸Ísu séna usásinaao. ená tuvaiꞌá maimaé kwaaó súwana

⁹avekáán-umai áíꞌa érankowana kwená tuvaiꞌá maimaéna kuráiye. Yútaa-kwaasi monor-áímbá kwéison-kanaaraꞌa mirá úwasa

¹⁰Yútaa-kawaa-kwaasi asóvamankon-kwaasiyavesa sésa ívéꞌa agándaan-kanaama po ená tuvaiꞌá maimaé kwégonda aambá áúmbakaawe suwaná

¹¹séna asóvamasinkaraiwaima séna ená tuvaiꞌá maimaé kwaaó siráiye súwasa

¹²miwí áísaa esa sésa ená tuvaiꞌá maimaé kwaaómó siráiwai nááwaꞌiyo suwaná

¹³sáwíva-kwaasivimba Ísuma áúyokuwana póna asóvamankarowai séna áwíꞌa íma isáúnda-kwaasiman-iye siráiye.

¹⁴simásuwena aáno anóm-bonoꞌ-naumpaꞌa iyúmba Ísuma avakáá-umai awánéna séna áíꞌa éránkáimba po sáwíyamba sínkáivo se sáwí-imayaa ivátuwaao súwana

¹⁵iséna Yútaa-kawaa-kwaasi kosimátimena séna asóvamasinkaraiwaima Ísuman-iye súwasa

¹⁶Yútaa-kwaasi monor-áímbá kwéison-kanaaraꞌa Ísuma asóvamankarontavesa Yútaa-kawaa-kwaasi Ísumba sáwíꞌa umánkámae íyúwana

¹⁷Ísu séna kesivo aasiyaasi-táwai mayáímá kwémayaimba póꞌa miráráán-umai mayáímá mayánaumne súwasa

¹⁸agándon-kanaaraꞌa asóvamankarontavaigwara Áánútuma kesivomán-iye siróntavaigwaraꞌa pósa Yútaa-kawaa-kwaasi sésa tuvuwónáe síma simaꞌa umbá Áánútuma kesivomán-iye sirónten-umai Áánútuwe kesé mimbóráíꞌa umái máyauye siráimba pósa Yútaa-kawaa-kwaasi sésa tuvuwónáe siráawe. avowáná kwaasái Ísu siráin-kwasai.

¹⁹suwaná Ísu simátimena séna áraiꞌa simátimeꞌa séꞌa ááninkoma póꞌa íma kesí imáyáavinkemba únda kesivomó imbá awánéꞌa mirá kwéune. kesivomó intembá ááninko kwéune.

²⁰kesivo ááninkomba arumbá siména amápa-tantaaꞌo kwéimba kwéagaraasinkaiye. usáyaaitanim-bayai agaráásinkainaꞌa mimbáyáí máyáanaꞌa táátavai ónááowe.

²¹kesivomá pukáampinkembo usásintinkaintemba ááninko kesí imáyáavinkemba usásintinkanaeꞌa kwéune.

²²kesivo séna íma aaivimbá maitinkánaumpo aaivimbó maitinkáním-bayai kesááninkomba ámakaumne siráiye.

²³aaivimbó maitínkáanda-mayai símakaimba pósa kesivo áwíꞌo mósá máráantemba ááninko súwíꞌa mósá maránááowe. kesúwíꞌo ímo mósá maráíyawaimo ésa kesivomá siꞌmákaiwai áwíꞌa íma mósá maránááowe.

²⁴áraiꞌa simátimeꞌa séꞌa kesááimo isésamo áraiꞌa aiꞌmákaiwaima Áánútuma iyémó kwésiyawaima áꞌa ááimba ásámai aúnáiꞌa umái maíꞌmaiꞌa kwéowe. kwaási máyáawaina ááimba Áánútuna némpaꞌa kwaémáyaimba Áánútuna egwaaꞌá tamáyáamba póꞌa íma aaivimbá maitinkánaumne.

²⁵áraiꞌa simátimeꞌa séꞌa moórá-kanaa kwétinasa pukáiyan-kwaasi Áánútu ááninko-saai isánááowe. isáíyawaima usásinesa maíꞌmaiꞌa ónááowe.

²⁶kesivomá kwaási máyáawaina ááimban-iye. asirayámbá siména séna mirámó úndantemba kwaási máyáawaina ááimba óne siráiye.

²⁷kemá kwíyómpakemba kwaási úrandaꞌa kumpaáruraundawai únana póna kesivo kentávéna séna aaivimbó maitinkáníyonda-mayai amúne siráiye.

²⁸mináíntávéna íma tááꞌa kaíno. moórá-kanaamo tínímba utamátínkaren-kwaasi amápaꞌa kesáái isésa

²⁹utamátínkarepakemba usásinanaaowe. kaweꞌó uréwaimo usásinesa aúnáiꞌa umái maíꞌmaiꞌa ónááowe. sáwíꞌo uréwaimo usásinaiyaꞌa aaivimbá maitinkánaumne. mináíntávéna íma tááꞌa kaíno Ísu siráiye. Ísumba kwená ááin-kwasai.

³⁰Ísu simásuwena séna íma kesí imáyáavinkemba úndanivo siꞌmákaiwaima simásímakaintemba mirá kwéune. íma kesí imáyáavinkemba úndayaveꞌa arupí umái aaivimbá maitinkánaumne. kesivo simásímakainten-umai aaivimbá maitinkánaumne.

³¹keyáámo kesáváímó súndarakai kamparé sesinó.

³²moóráwaigwaraꞌo kentávénamo kwésimba áraiꞌa kwésiye.

³³keinárawaꞌa évakarawai tiꞌmárówasa Yóni nombá pétinkaiwaimba koáísaa uwaná Yóni kentávéna séna árai-kwaasiman-iye. kosimátíméro siráiye.

³⁴kesí ááimbo sénááontavai íma anón-imayaa úndanivo Yóni kentáváí siráin-aintavai áraire síyaꞌa sáwíꞌo umáímo máyáampinkemba kawer-ámpáꞌá métinkanae-imayaa kwéeꞌa mináímbá kwésimatimune.

³⁵oómbó aampaꞌó kúraꞌmae konten-umái Yóni kentí aampaꞌó kúratinkowaꞌa sáwíyankaꞌa aamoí uráawe.

³⁶moórá-yantaakoma Yónima kentávéna siráin-ainkomba usáyaaitaraiye. kesivomó simásímakaim-bayaima kwémayaunana mimbáyáígómá kesí ááimba kwévaariye. kesivomó siménamo siꞌmákaim-bayai kwémayaunasa kesí ááimba kwéawanaawe. mintántáákómá Yónima kentávéna siráin-ainkomba usáyaaitaraiye.

³⁷kesivo siꞌmákaiwaima kwegwáráꞌá kentávéna simbánivo kwenáái ísámai íma kaweꞌá éꞌa kwenaneꞌá íma awánaraawe.

³⁸siꞌmarówaꞌo kunkáundayaveꞌa íma áraire kwésemba póna Áánútun-aai íma tirumpimbá kwáyáiye.

³⁹keinárawaꞌa séꞌa aúnáiꞌa umái maíꞌmaiꞌa ónaumne séꞌa Áánútun-aai aúváívimba awána-awana kwéowe. mináúváívímbá kesí ááimba agaimárówaꞌanivo íma kaweꞌá umái ísaraawe.

⁴⁰kaweꞌó umáímo iséꞌo kesópaꞌo tékaankasi aúnáiꞌa umái maíꞌmaiꞌa osino.

⁴¹kwaási kesúwíꞌa anómba umásinkanaaowe-imayaa íma kwéune.

⁴²Áánútumbo ímo tirumbó áménkaꞌa kwétuwanaumne.

⁴³kesivomá simásímakaintaveꞌa kunkáundanivo íma kaweꞌá umásínkaraawe. ánivo moóráwaimbo kesivomó ímo simámakaindawaimo tínaꞌo éꞌa kaweꞌá umánkanaaowe.

⁴⁴keinárawaꞌa séꞌa kwaási kentáá súwíꞌa anómba umásinkanaaowe séꞌa póꞌa kesáái íma áraire kwésewe. Áánútuma kentáá súwíꞌa anómba umásinkaniye sékaankasi kentávéꞌa áraire sesinó.

⁴⁵kesivo aúrankaꞌa íma aaivimbá maitinkánaunda póna Mósesi naaóváꞌá ámáán-aimba agaimakáiwai aaivimbá maitinkáníye. Mósesi kwésuwaꞌnaa iyémó sewáímó éna kwemá aaivimbá maitinkáníye.

⁴⁶Mósesi kesáái agaimarómba póꞌa Mósesin-aaiyaveꞌo árairemo kwésekaai kesááiyaveꞌa áraire sesinó.

⁴⁷Mósesimo agaimakáin-aintaveꞌa íma áraire kwésemba póꞌa kesááiyaveꞌa íma áraire kwésewe Ísu siráiye.