Read Kosena Yóni 6 Bible Online

Yóni 6 - Kosena bible

Yóni 6

¹naaóváꞌá Áánútu Yútaa-kwaasi tíyótaasa í-tánón-kánáá sáwíyankaꞌa tíníye kwéuwana Káríri-kwaaunkona menávápáꞌá Ísuma nompí-sípívímbá kwéna minkwáúnkóná moórá-awiꞌa Táípíriyasi nompáꞌá kúmba tíꞌo ún-kwaasiyomba asóvamatinkarowasa awánaresa pósa kwenánaaemba kwárówasa Ísuwe kwená kwayó-kwáásíyé nompí-sípívínkémbá marapáꞌá ásávesa omápaꞌa umáyówasa

²sáwíva-kwaasi Ísunopaꞌa kwéiyuwana tuwánéna imáyáama éna séna naaémba mirá ónaumpo aivaꞌá Vírípimba áísaa umai isánáe séna áísaa ena séna náávakena toómbá meéyámbaꞌmaiya tíménara nánááoo súwana

⁷Vírípima séna sáwívar-ontankaken-tomba 200 kinaaraken-tomba meéyámbaꞌmaiya timúnasaya naasinó súwana

⁸moórá-kwayo-kwaasi Sáímoni Pítaa áváko áwíꞌa Éndaru

⁹kwemá séna moórá-iyampoigo évaꞌaasei-tonkwara kaeꞌ-nóyáákwáráꞌá makáimbanivo sáwíva-kwaasi máyáawe súwana

¹⁰Ísu kwená kwayó-kwáásíyávéna séna maraꞌá máéro simátíméro súwasa simátímúwasa maraꞌá máúmba minkwáásívínkémbá sáwíva-kwaaima 5,000 kwaaima máyówana

¹¹Ísu mintómbá maisokéna Áánútuntavena súwi simásuwena toómbá topán-topan-umai kwená kwayó-kwáásíráꞌá timúwasa miwímá tímúwana toómbó nontenkáán-umai noyááꞌa miráumai nowaná tímúꞌa vówasa miwítí imáyáaomo úniꞌa uwaná

¹²kwená kwayó-kwáásíyávéna séna mintón-ayai íma úwoivaꞌa tuwéꞌa máyáaro súwasa

¹³évaꞌaasei-tompinkemba nésamo túwón-ayaivinkemba sísamaivakemba kaeꞌá kumbaimái-unampimba áítumai ógwitowasa

¹⁴Ísumo úmba awánésa sésa Áánútun-aai simátímíwaima íya awánáúnda-awaameꞌa isatá awánáúmne sésa kwéamuꞌmaraundawaiman-iye sésa

¹⁵kentáásí kawááíta íníyemo sumbá Ísu miwí tirumpimbó sun-áímbá iséna íma mirá ónaunasa sewé séna tiyuwéna omápaꞌa iráiye. Ísuma non-avóvomayaapaꞌa kuráin-kwasai.

¹⁶Ísu omápaꞌa umáyowasa enónkaꞌa kwená kwayó-kwáásí nonkwaúnkón-awampaꞌa kumésa

¹⁷Kápénéamuvaꞌa kónáe sésa nompí-sípívímbá usámaaisesa kuwaná Ísuma íma usauwerówana noꞌwáámba aúkúwana

¹⁸anón-undaoma kwétena nonkómá tuvántááva kwéuwasa

¹⁹tamayóꞌnei nombá tuwíntámaesa ayáátáákaꞌa kuwaná Ísu non-avóvomayaapaꞌa kwénaaena nompí-sípígóná egwaaꞌá túwasa awánésa táátavesa kwéuwana

²⁰Ísu séna kemá úmpo tááꞌa kaivó aáno máéro súwasa

²¹aamoí ésa sésa nompí-sípívímbá usámaaisaao suwaná avekáán-úwana nompí-sípígó non-awámpáꞌá kúpaꞌa kuráiye. Ísumba avakáá uráan-kwasai.

²²aaváyaavimba menávápáꞌá komáyón-kwaasi sésa tíndauma kímbora-nompi-sipima kwáyáísana Ísuma íma mimpímbá kwisasá kwená kwayó-kwáásí miwíyé suꞌmai kuráavo Ísuma náávara máyáiyo siráawe.

²³évaka-kwaasi nompí-sípívímbá Táípíriyasivakemba kwétoyo-esa tíndauraamba Ísu Áánútuntavena súwi súwasa kwaásiyomba toómbá néiron-ayampaꞌa tésa

²⁴Ísuwe kwená kwayó-kwáásíyé íma máyóntavesa tivakáá ónáe sésa mindómpí-sípívímbá usámaaisesa Kápénéamuvaꞌa kuráawe. Ísu maíꞌmaiꞌa ónááon-tomba úne siráin-kwasai.

²⁵Kápénéamu-ayampaꞌa kumbá Ísumba awánésa sésa kesí anóndakoo nósa-tawai maaváꞌá tiráano suwaná

²⁶Ísu séna maísáaro íma kawer-áwááméꞌá agaráátínkaraundayaveꞌa kwésivakaa-ovo toómbó naráantaveꞌa kwésivakaa-owe.

²⁷toómbó ímo kwaíkwaiꞌo índa-tontaveꞌo éꞌa íma mayáímá maéꞌa kwaási maíꞌmaiꞌo ónááon-tontaveꞌo éꞌa mayáímá máyáaro. mintómbó timénaunda kemá kwaási úrandaꞌa kumpaáruraundawai mintómbá timénaumne. Áánútu kesivomá kentávéna séna aamoí kwéumankaumne. kesí mayáímá mayaaó simbá póꞌa mintómbá timénaumne súwasa

²⁸áísaa esa sésa nóraumaiya Áánútuna mayáímá mayánaumno suwaná

²⁹Ísu séna kentávéꞌo séꞌo áraiꞌa Áánútuma aiꞌmákaisana kunkáiwai iyémó sembá mindá Áánútuna mayáímá maéꞌa sewé súwasa

³⁰nóra awaameraꞌi. ímo awánáúnda-awaameꞌo inatáámó éta awánétaamo éta séta áraiꞌa Áánútuma embá aiꞌmáráísama kunkáandawaima óne. nóim-bayai-awaamera íníyono sésa

³¹kentáá síkwáꞌnáma kavóná-maravaꞌa mésa kwíyómpaken-tomba áwíꞌa máána-tomba némáembanivo emó uráandawaimo éna íma mindá usáyaaitaraiye. naaóváꞌá Áánútun-aai aúváívimba agaimaréna séna kwíyómpaken-tomba timúwasa naráawe agaimaréna siráiye suwaná

³²Ísu séna maísáaro Mósesimo tímakon-tomba íma kwíyómpaken-tomban-iye. kesivomá kwíyómpaken-tomba kawe-tómbá kwétimiye.

³³kwíyómpakembo marapáꞌó kunkáiwaima kwemá Áánútuma kwétimin-tomban-iye. kwentávéꞌa póꞌa maíꞌmaiꞌa ónááowe súwasa

³⁴sésa sénda-tomba aasiyaasi-táwai simiyó suwaná

³⁵Ísu séna kemá maíꞌmaiꞌa ónááon-tomba úne. kesópaꞌa kwétiyawai íma tááima kwétinkaiye. kenkáꞌá aráápamai kwémaiyawai íma nontávéna kwétinkaiye.

³⁶áꞌa simátimeꞌa séꞌa kesí mayáí-áwááméꞌá awánaambanivo kesááiyaveꞌa íma áraire sésa kenkáꞌá íma aráápamai kwémaewe.

³⁷ánivo kesivomó kwésimin-kwaasimo éꞌa kesópaꞌa ténááowe. kesópaꞌo tíyan-kwaasiyaveꞌo éꞌa íma kóro sénaumne.

³⁸kesí imáyáa kwaránaundayaveꞌa kwíyómpakemba íma kumbáyaumpo siꞌmákaiwaina imáyáa kwaránaundayaveꞌa kumbáyaumne.

³⁹siꞌmákaiwaima simásimena séna amúnda-kwaasi sáwí-amba kwáráavo se kawááuwo. naaén-kanaama puwíyampinkemba usásintinkaano.

⁴⁰kesivomá simásimena séna kesááninkoo embá awánésa sésa Áánútu ááninkoman-iye síyawaima aúnáiꞌa umái maíꞌmaiꞌa ónááowe siráiye. naaén-kanaama puwíyampinkemba usásintinkanaumne Ísu siráiye.

⁴¹kemá kwíyómpaken-tomba úne Ísu súntavesa Yútaa-anon-kwaasi tirunkó sáwíꞌa kwéuwasa iséise kwéesa

⁴²sésa kwemá Ísuma Yósépi ááninkoman-iye. anóvowi átaamo tuwánáúndayaanivo nóra sénawa kwíyómpakemba kunkáumne kwésiyo suwaná

⁴³Ísu simátimena séna íma mirá iséise oró séna

⁴⁴kesópaꞌa íma úwoima ténááovo kesivo kembá siꞌmákaiwaima tááyainaꞌa kesópaꞌa tíyaꞌa naaén-kanaama puwíyampinkemba usásintinkanaumne.

⁴⁵mindáyavai naaóváꞌá Áánútun-aai simátímakowai agaimarésa sésa Áánútu amápa-kwaasi simái agaráátinkaniye siráawe. kesivon-áái ísámai kaweꞌá íyawai kesópaꞌa ténááowe.

⁴⁶kesivombá íma awánaraavo kemá Áánútunopakemba kunkáundawai keyááma kesivombá awánaraumpo kesivon-áái ísámai kaweꞌá íyawai kesópaꞌa ténááowe.

⁴⁷áraiꞌa simátimeꞌa séꞌa kesááiyavesa áraire sésa kenkáꞌá aráápamai kwémaewai aúnáiꞌa umái maíꞌmaiꞌa kwéomba ááimba kwéasaawe.

⁴⁸kemá maíꞌmaiꞌa ónááon-tomba úne.

⁴⁹kentíkwáꞌnáma kavóná-maravaꞌa mésa máána-tomba neémesa úwoi putáráawe.

⁵⁰ánivo kwíyómpaken-tomba mirán-tómbá náíyawaima úwoi maíꞌmaiꞌa ónááowe.

⁵¹kemá kwíyómpaken-tomba maíꞌmaiꞌa ónááon-tomba úne. mintómbó nésamo ésa maíꞌmaiꞌa ónááowe. kesúma timúnaꞌa naantávéꞌa póꞌa maíꞌmaiꞌa ónááowe Ísu siráiye.

⁵²Ísu súwasa Yútaa-anon-kwaasi tirunkó sáwíꞌa kwéuwasa iséise ésa sésa nóra éna mindáꞌá kwenáúma simínata nánaumno suwaná

⁵³Ísu simátimena séna áraiꞌa súne. kemá kwaási úrandaꞌa kumpaáruraundawai póꞌa kesúmo ímo néꞌo kesí naaemó ímo néꞌo éꞌa íma maíꞌmaiꞌa ónááowe.

⁵⁴ánivo kesúma kesí naaemá naawáí aúnáiꞌa umái maíꞌmaiꞌa kwéomba ááimba kwéasaamba póꞌa naaén-kanaama puwíyampinkemba usásintinkanaumne.

⁵⁵kesúma kawe-tómbán-iye. kesí naaemá kaweꞌ-nómbán-iye.

⁵⁶kesúma kesí naaemá naawáí kesé tarúmai máyáawaꞌa kemá miwísé tarúmai máyaumne.

⁵⁷kesivo siꞌmákaiwaima maíꞌmaiꞌa kwéintaveꞌa kemá maíꞌmaiꞌa kwéune. kemá maíꞌmaiꞌa kwéundayaveꞌa póꞌa kesúma naawáí maíꞌmaiꞌa ónááowe.

⁵⁸kentíkwáꞌnáma toómbá neémesa úwoi putáráawe. kemá súnda-tomba kwíyómpaken-tomba íma mirán-tómbán-iye. kemó súnda-tomba mintómbá naawáí aasiyaasí maíꞌmaiꞌa ónááowe Ísu séna

⁵⁹Kápénéamu-naopaꞌa monoꞌ-náúmpáꞌá mináímbá simátímakaiye.

⁶⁰Ísu simásuwowasa kwenánaaemba kwakón-kwaasi tirunkó sáwíꞌa kwéuwasa ísámai iséise ésa sésa kwemó sin-áínkómá íya sinkáin-aimba póna umbaí kwétaiye suwaná Ísu arumpin-ímáyáámá éna simátimena séna mináíntávéꞌa kayókáawe.

⁶²kemó kwíyómpakembo kwaási úrandaꞌo kumpaáruraundawaimo kuntauweréꞌo íyónaꞌo suwánéꞌo éꞌa nóra imáyáawa ónááoo.

⁶³kwaásiti asirayánkó íma túwaꞌnaa ivo Áánútun-amanko aúnáiꞌa umái maíꞌmaiꞌa kwéumatinkaiwaiman-iye. mirámó intembá kemó súnda-aimba aúnáiꞌa umái maíꞌmaiꞌa ónááon-aimba imbánivo

⁶⁴évakarawaima kentávéꞌa séꞌa kampaꞌá siyé kwésewe Ísu súmba Ísuma kampaꞌá siyémó sun-áímbá kwená kuntaruꞌó íníwainkwaraꞌa naaóváꞌá ísaronkaꞌa póna évakarawai kentávéꞌa séꞌa kampaꞌá siyé kwésewe Ísu simásuwena

⁶⁵séna mindáyaveꞌa áꞌa simátimeꞌa séꞌa kesópaꞌa íma úwoima ténááovo kesivomó tááyainaꞌa ténááowe siráiye.

⁶⁶Ísu súwasa kwenánaaemba kwakón-kwaasi évakarawai Ísumba iváꞌá auwésa kwesé íma kwénaauwana

⁶⁷Ísu kwená kwayó-kwáásí sísamaivakemba kaeꞌá kumbaimái-kwaasiyavena séna kegwárárá iváꞌá kwésiyuwaao séna tísaa úwana

⁶⁸Sáímoni Pítaa séna anóndakoo nááwa ewa kónaunawa seénó. emá aúnáiꞌa umái maíꞌmaiꞌa ónaumne-aimba kwésene.

⁶⁹ívéꞌa entávéta séta áraiꞌa séne. Áánútunopakemba kaweꞌnáꞌá óneya kwésune súwana

⁷⁰Ísu simátimena séna kemá sísamaivakemba kaeꞌá kumbaimái-kwaasima ítátinkaundanivo keinárawapinkemba moórá sáwínaꞌa paáriniye súmba

⁷¹Sáímoni Isakéríóti ááninko áwíꞌa Yútásintavena séna Yútási kwemá kwená kwayó-kwáásí sísamaivakemba kaeꞌá kumbaimái-kwaasivinkemba Ísuna kuntaruꞌá mayáníwaiman-iye. kwentávéna mináímbá siráiye.