Read Kosena Yóni 7 Bible Online

Yóni 7 - Kosena bible

Yóni 7

¹minkákémbá Yútiyaa-ayampaken-kwaasi Ísumba tuvuwónáe kwésuntavena Ísuma Yútiyaa-ayampaꞌa íma kwénaaena Káríri-ayampaꞌa kwénaauwana

²Yútaa-kwaasimo kwááyu-nambo ésamo tanómbo kwégauvon-kanaama sáwíyankaꞌa túwasa

³Ísu áúnavaꞌmaaꞌa akáꞌáámba simánkesa sésa maanáyámpáꞌá tuwéma Yútiyaa-ayampaꞌa kwaási torupanááopaꞌa ená mayáímá komáénasa pósa ená kwaási ená kaweꞌ-máyáí awánanaaowe.

⁴amápa-kwaasi suwánanaaowe síyawaima íma aúpáꞌá mayáímá mayánááomba po amápa-kwaasi túrankaꞌa mayáí komayaaó sésa

⁵Ísun-áúnavaꞌmaaꞌa kwentávésa íma imáyáa ésa sésa Áánútunopakemba kunkáiye sésa mináímbá simámúwana

⁶Ísu simátimena séna amáparawai kesí ááimba suwánanaao-kanaama íma tiráivo kemá úwoi kwíyasa tuwánésa

⁷marapá-kwáásí kembá íma áwááꞌa tíkaavo miwíyávéꞌa séꞌa kentí mayáímá sáwíꞌa kwéowe súndayavesa kembá áwááꞌa síkaawe.

⁸tanómbo opaꞌá koró. amáparawai kesí ááimba suwánanaao-kanaama íma tisaꞌá ívéꞌa íma tanómbo opaꞌá kúmpo kemá koró séna

⁹Káríri-ayampaꞌa méraiye. Ísu Yérúsaremuvaꞌa kuráin-kwasai.

¹⁰Ísu máyomba áúnavaꞌmaaꞌa tanómbo upaꞌá kuwaná naaémba kwemá aúpáꞌá kúwasa

¹¹Yútaa-anon-kwaasi Ísumba kwéavakaa-esa sésa náávara máyáiyo sésa tísaa uwasá

¹²Ísuntavesa úwoi-kwaasi sáwívar-aimba iséise ésa sésa évakarawai sésa kawe-kwáásímán-iye suwasá évakarawai sésa ímanivo kampaꞌnaampa-kwáásímán-iye sésa

¹³Yútaa-anon-kwaasi sáwíꞌa umásínkáavo sésa íma avoraꞌá sumbá aúpáꞌá siráawe.

¹⁴Yútaa-kwaasimo kwááyu-nambo ésamo tanómbo kwégauvon-kanaama évareva kwáyowana avumpin-táwai Ísu anóm-bonoꞌ-naumpaꞌa uména kwenááima simátimuwasa

¹⁵Yútaa-anon-kwaasi isésa táátavai ésa tóipimba tiyáámba áákesa sésa monor-áímbó isópaꞌa íma koména ísaraimbanivo nórapakena ísaraiyo suwaná

¹⁶Ísu minímáyáámó umbá iséna séna kesí imáyáavinkemba íma simátimeꞌa Áánútu siꞌmákaiwaina imáyáavinkemba simátimune.

¹⁷keinárawaꞌa imáyáama éꞌa séꞌa náávaken-aina simásímakaiyo. kwená imáyáavinkenaꞌi. Áánútuna imáyáavinkenaꞌiyo-imayaama kwéowe. Áánútumo siráiniꞌa ónáe síyawai miwímó ésa simátimunda-ainkona ááimba isánááowe.

¹⁸kesáváí-ímáyáávínkén-áímbá síyawai kesúwíꞌa mósá maráígwáe sésa kentí imáyáavinkemba kwésevo tiꞌmákaiwai áwíꞌa mósá maránáe síyawai íma kampaꞌnaampáꞌá sembá árair-aimba kwésewe.

¹⁹Mósesi ámáámba simátímakombanivo íma ísámai kawer-urére sembá sínkamonae kwésewe súwasa

²⁰úwoi-kwaasiyomba sésa íma tuvuwónáe-imayaa kwéeta máyaumpo enarumpimbá taraváá-kwámbá máyáísa mirán-áímbá séne suwaná

²¹Ísu séna monor-áímbá kwéisaan-kanaaraꞌa íma awánaraan-awaameꞌa uráunda póꞌa kemá sáwívar-imayaa kwéowe.

²²kentíkwáꞌnárakemba sésa iyámpói matínkaraawasa avakaumboé-noꞌwaamba kwaésa túraꞌa araaꞌéna umái karánááowe suwaná naaémba Mósesi mináímbá agaimakómba pósa évaka-tawai monor-áímbá kwéisaan-kanaaraꞌa mirá kwéowe.

²³Mósesina ámáámba íma ankáíraamba póꞌa agándai-kanaaraꞌa mirám-báyáímá iyámpói túraꞌa kwéowe. ánivo agándai-kanaaraꞌa moóráwaimba asóvamankaraunda póꞌa mayáímá mayaánavo séꞌa áwááꞌa kwésiyewe.

²⁴íma awáné-aase aintáváí íma simátínkáaro. áraiꞌa awánáíyan-aintavai simátínkáaro Ísu siráiye.

²⁵Ísu simásuwowasa évakarawai Yérúsaremu-naopaken-kwaasi sésa minkwáásíyáváíya tuvuwónáewa kwéseo sésa

²⁶kwemá avoraꞌá kwenááima simátímísaꞌanivo íma aaivimbá mayánkaraawe. anón-kwaasiyomba sésawa kwemá Áánútumo usásinankawaima Káráísitiman-iye mirá kwéseo. íya kwéseo.

²⁷maankwáásígóná naaópaꞌa awánáúndanivo Áánútumo usásinankaiwaina naaópaꞌa íma awánáúndavakemba tíníye siráawe.

²⁸minkákémbá Ísu anóm-bonoꞌ-naumpaꞌa simátimena séna kembá ára suwánéra kesi máápaꞌa ára awánéra mirá kwéoo. íma kesí imáyáavinkemba kunkáumpo moóráwai siꞌmákaisaꞌa kunkáumne. kwemá áraite siwáímán-iye. kwembá íma awánaambanivo

²⁹kemá áꞌa awánáúnda siꞌmákaisaꞌa kwenópakemba kunkáumne súwasa

³⁰mináímbó súnkakemba tátoranae suwááesa kwená kanaamá íma tiróntavesa íma tátorowasa

³¹úwoi-kwaasivinkemba évakarawai sésa Áánútumo usásinankaiwaima tíndaraꞌa kwená mayáígóná awaamékoma amápaꞌ-mayaigomba usáyaaitaniye-imayaa kwéeta Ísuna mayáígómá mirám-báyáígómá póna Ísu Áánútumo usásinankaiwaiman-iye kwésune siráawe. Ísumba koyátoraaro sésa tiꞌmákaan-kwasai.

³²úwoi-kwaasiyomba mináímbá sumbá ámáán-kawaa-kwaasi isésa miwíyé mono-káwáá-kwáásíyé i-kwáásíyávésa sésa Ísumba koyátoraaro sésa tiꞌmárówasa kuwaná

³³Ísu séna sáwíyankaꞌa keinárawate méꞌa siꞌmákaiwainopaꞌa íyónaꞌa

³⁴sivakáá uwááeꞌa íma suwánéꞌa umáéndavaꞌa íma kanaán-umai iyónááowe súwasa

³⁵Yútaa-anon-kwaasi iséise ésa sésa náávara kwíndayavena síyómpo avakáá uwááeta íya awánanaumne. Kíríki-ayampara Yútaa-kwaasi máyáapara kwéna kwenáái simátiminiyo sésa

³⁶kwemá séna sivakáá uwááeꞌa íma suwánéꞌa umáéndavaꞌa íma iyónááowe simbá póta mináínkóná ááimba íma ísaraumne siráawe. maíꞌmaiꞌa ónááon-donkona kwaasái.

³⁷Yútaa-kwaasi kwááyu-nambo ésamo tanómbo kwégauvon-kanaaraꞌa moórá-kanaama kwáyowana minkánáá anón-kanaama úwana minkánááráꞌá Ísu usásinena anónkaꞌa séna nontávénamo kwétinkaindawai kesópakemba tamandaaró.

³⁸Áánútun-aai aúváívimba agaimaréna siráintemba nonayumpinkémbó usausa intenkáámbó kesááiyavesa áraire síyawaima tirumpinkémbá nonayumpinkémbó intembá íníye Ísu súmba

³⁹Áánútun-amankontavena siráiye. Ísu íma kwíyómpaꞌa kuntauwékáintavena Áánútun-amanko íma kunkáiye. Ísu imáyáa éna séna kemá púwóndavinkemba usásineꞌa kesivonópaꞌa iyéꞌa Áánútun-amankomba aiꞌmáráanana kuména kesááiyavesa áraire síyawai tirumpimbá kumbéniye-imayaa éna Ísu mináímbá simátímakaiye. Ísuntavesa imáyáama taaínkaaꞌa uráan-kwasai.

⁴⁰Ísumo simátimumba kwaásiyomba isésa évakarawai sésa áraiꞌa kwemá Áánútun-aai simátímíwaiman-iye suwasá

⁴¹évakarawai sésa kwemá Áánútumo usásinankaiwaima kwéamuꞌmaraundawaiman-iye suwasá évakarawai sésa Áánútumo usásinankaiwaima íma Kárírivakemba tíníye.

⁴²naaóváꞌá Áánútun-aai aúváívimba agaimaréna séna Áánútumo usásinankaiwaima Tévítin-andarakemba Tévítina naaópaꞌa Pétáremuvaꞌa marankáníye agaimaréna siráiye sésa umbá

⁴³Ísuntavesa imáyáama taaínkaaꞌa ésa

⁴⁴évakarawai sésa tátoranae sumbánivo íma tátokaawe.

⁴⁵íma tátoresa i-kwáásí mono-káwáá-kwáásítópare ámáán-kawaa-kwaasitopare koyauwérówasa nóra séra íma tátoꞌmai áíꞌmaeꞌa teéó suwasá

⁴⁶i-kwáásí sésa kwenááigoma amápa-kwaasi tááigomba usáyaaitaraiye suwasá

⁴⁷ámáán-kawaa-kwaasi tísaa esa sésa kenkwáráꞌá kampaꞌá simátiyuwaisara kwéseo.

⁴⁸anón-kwaasiye kesáá ámáán-kawaa-kwaasiyaawe íma áraiꞌa kwíyómpakemba kunkáiye kwésumpo kegwáráꞌá mirá seró.

⁴⁹úwoi-kwaasiye suꞌmai áraire kwésewe. miwímá Mósesina ámáámba íma ísáamba póna Áánútu tínkaminiye suwaná

⁵⁰ámáán-kawaa-kwaasivinkemba moóráwai áwíꞌa Níkótimasi ááéma Ísunopaꞌa iráiwaima simátimena séna

⁵¹kentáásí ámáánko séna íma úwoi séꞌa sáwíꞌa uráiye séꞌa kwenááima ísareꞌa kwená mayáí awánéꞌa aaivimbá mayánkááro kentáásí ámáánko siráiye súwasa

⁵²Níkótimasimba akáꞌáámba simánkesa sésa Kárírivakewain-ánaaemba kwaráánó. Áánútun-aai aúváívimba awánamai kawer-uréo. Áánútun-aai simátímíwaima íma Kárírivakendaꞌan-ivo kwemá íma Áánútun-aai simátímíwaiman-iye sésa [

⁵³kentí naaóꞌ-naoꞌa kóyáwé uwaná Ísu Óríve-ompaꞌa iráiye.]