Read Kosena Yóni 8 Bible Online

Yóni 8 - Kosena bible

Yóni 8

²aaváyaavimba kuména anóm-bonoꞌ-naumpaꞌa umáyowasa kwaásiyomba kwenópaꞌa torupowaná maraꞌá ména kwenáái simátimuwasa

³ámáámba sun-kwáásíyé ámáán-kawaa-kwaasiye aaraí áíꞌmaesa minínínkó óꞌon-kwaasiye máyomba pósa áíꞌmai amáparawai túrankaꞌa ankésa

⁴Ísuntavesa sésa anóndakoo minínímbá óꞌon-kwaasiye máyáísata awánéta tátoꞌmai áíꞌmaeta túne.

⁵ámáán-auvaivimba Mósesi agaimaréna séna mirámó índawaimba óntandei tuvúwónanaya puwíníye agaimaréna siráiye. nóran-imayaa éwa seénó sésa

⁶Ísumba maka sésa mirá senaná paárínata kwembá aaivimbá mayankánáe sésa suwaná Ísu kívairena ayáánauviꞌnei mararáꞌá aúvái agaimarówasa

⁷áísaa aisaa uwaná usásinena simátimena séna imó sáwíꞌo uráindawai aivar-óntámbá maimé tuvuwíno simátimena

⁸moórágwaraꞌa kívairena ayáánauviꞌnei mararáꞌá aúvái agaimarówasa

⁹isésa moórá-mora-kwaasi kunákárúwasowana anón-kwaasi aivaꞌá kumúwasa miwán-ánaaemba kwaꞌmaésa kúmúwana minínínkówé suꞌmai Ísuwe máyowana

¹⁰usásinena áísaa ena séna náávara máyaao. amáparawai íma aaivimbá mayankánááoo súwana

¹¹owé íma aaivimbá maisinkánááowe súwana kegwáráꞌá íma aaivimbá mayankáúna kómpo moórágwaraꞌa íma mirán-uwo Ísu siráiye. kwaási sáma kamátinkainaꞌa úne Ísu siráin-kwasai.

¹²ókwaraꞌa Ísu kwenáái simátimena séna kwaási sáma kamátinkainaꞌa úne. kesínaaembo kwaráíyawai íma tunínívo sáma kamái maíꞌmaiꞌa ónááowe súwasa

¹³ámáán-kawaa-kwaasi sésa eyáá ená ááimba séndamanivo íma áraiꞌa kwésene suwaná

¹⁴Ísu séna ímanivo kesááigona ááimba áraiꞌa kwésune. áꞌa awánáúndavakemba kunkáundayavai áꞌa awánáúndavaꞌa iyónaunda póꞌa kemá súnda-aimba áraiꞌa kwésune. kesí ááimba íma suwánaraawe.

¹⁵marapá-kwáásí kentí imáyáavinkemba aaimá maisínkaavo kemá íma aaimá kwémaitinkaumne.

¹⁶kemó aaimó maitinkáundarakai arupí úsino. íma kewé suꞌmai aaivimbá maitinkánaumpo kesé kesivoé aaivimbá maitinkáyauye. miráumai kemó aaimó maitinkáundarakai arupí úsino.

¹⁷kentí ámáán-auvaivimba agaimaréna séna kae-kwáásíráí moórá-aimbo séyambo ékai mináímbá áraiꞌa kwéseye agaimaréna siráiye.

¹⁸miráumai kemá kesáváí simátimunana kesivoé kesé mimbórá-áímbá simátimuyamba póna árair-aimban-iye súwasa

¹⁹enavomá náávara máyáiyo áísaa esa suwaná kesí ááimbo ímo suwánaantavai kesivombá íma kwéawanaawe. kesí ááimbo suwánaankakenkai kesivombá awánaasino Ísu súmba

²⁰anóm-bonoꞌ-naumpaꞌa óntambo túwón-daumpaꞌa mináímbá simátimuwasa tátoranae sésa suwááesa kwená kanaamá íma túntavesa íma tátokaawe.

²¹minkákémbá Ísu simátimena séna tiyuwéꞌa íyónaꞌa sivakáá uwááeꞌa íma suwánanaaowe. puwíyamba kentí sáwí-imayaa kwáyáinaꞌa puwónááowe. íyóndavaꞌa íma kanaán-umai iyónááowe súwasa

²²Yútaa-anon-kwaasi sésa kwemá séna íyóndavaꞌa íma kanaán-umai iyónááowe simbá póna kweyááríkara puwíndayavena siíyo suwaná

²³Ísu séna keinárawaꞌa maankákén-kwáásímán-ovo kemá sanaankéndáꞌá úne. keinárawaꞌa marapákén-kwáásímán-ovo kemá kwíyómpakendaꞌa úne.

²⁴simátimeꞌa séꞌa puwíyamba kentí sáwí-imayaa kwáyáinaꞌa puwónááowe. kemá kwíyómpakendaꞌa úmpo kentávéꞌo ímo áraire séꞌo éꞌa kentí sáwí-imayaa kwáyáinaꞌa puwónááowe súwasa

²⁵mináínkóná ááimba íma ísámai áísaa esa sésa nááwawa oónó suwaná Ísu séna aasiyaasi-táwai áꞌa simátímakaumne.

²⁶keinárawataveꞌa sáwívar-aimba kanaán-umai séꞌa aaivimbá maitinkáundanivo siꞌmákaiwaina aaiyé suꞌmai amáparawaiyaveꞌa kwésimatimune. kwemó arupí iwáín-áái kwésimatimune súwasa

²⁷Áánútun-aaima súmbanivo íma ísówana

²⁸mindáyavai Ísu séna kemá kwaási úrandaꞌa kumpaáruraundawai síꞌmaeꞌa taairaꞌá mói sínkamonaaomba póꞌa suwánéꞌa séꞌa kwemó siwáímá kwená imáyáavinkemba íma sivo avowamá simámakain-aimpinkemba siráiye mirá sénááowe.

²⁹siꞌmákaiwai aamoí ínkwáe-iꞌa úmae kwéiyunda póna íma siyuwéna kesé máyáiye súwasa

³⁰sáwíva-kwaasi isésa kwentávésa áraiꞌa kwíyómpakendaꞌan-iye siráawe. tátokaawanamo Ísu ayútínkáin-kwasai.

³¹Ísuma Yútaa-anon-kwaasi kwentávésa áraiꞌa kwíyómpakendaꞌa iyémó sirówaiyavena séna kesááimo ísámaimo kaweꞌó éꞌo éꞌa kesí kwaási aúꞌmái ménaaowe.

³²árair-aimba íséwana tátokaiyampinkemba mináráír-áínkó ayútinkaniye súwasa

³³Ááváramun-andaraken-kwaasi únda póta íma óꞌon-kwaasi tátokaawe. nóra se ayútinkaniye seénó suwaná

³⁴Ísu séna áraiꞌa simátimeꞌa séꞌa sáwíꞌo kwéowaima misáwíkómá kembá kwétatoraiye. kesí mayáí úwoi mayáígwáe sésa meéyámbaꞌmai tátokaantenkaan-kwaasin-owe.

³⁵mirán-kwáásí kawáánákóná naaúmpaꞌa íma maíꞌmaiꞌa ónááovo kwenáánimbaaꞌa maíꞌmaiꞌa ónááowe.

³⁶kemó Áánútu ááninkomo ayútínkáanaꞌo éꞌa ayútuweꞌa ménaaowe.

³⁷Ááváramun-andaraken-kwaasi ombánivo kesáái íma tirumpimbá kwáyáintaveꞌa tuvuwónáe kwésewe.

³⁸kesivo agaráásínkáin-aimba kwésumpo kentivomá simátímín-aimba kwésewe súwasa

³⁹Ááváramu kentáásivoman-iye suwaná Ááváramun-andarakewaimo ékai Ááváramumo úntemba mirá uráasino.

⁴⁰Áánútu árair-aimba simásímakaimba simátimundanivo tuvuwónáe kwésewe. Ááváramu íma mirá uráivo

⁴¹kentivomó uráintemba mirá kwéowe súwasa kesáámá íma kesinóma eénkwááírákémbá kentáá masínkaraiye. kentáásivoma mimbóráwáí Áánútuman-iye suwaná

⁴²Áánútunopakemba kunkáunda póꞌa Áánútu árááꞌo ékai kentirumbá simésino. íma kesí imáyáavinkemba kunkáumpo kwemá siꞌmáráísaꞌa kunkáumne.

⁴³kemó súnda nóra séra íma kwéisaao. kesááigo umbaí kwétiyaiye.

⁴⁴kemá Sáátáánigo árááꞌa póꞌa kwenarááíma kwaránáe kwésewe. kwemá ááinkakemba tuvúkáiwaiman-iye. áraiꞌo sií-yántááꞌá íma kwempímbá kwáyáísana kampaꞌnaampar-áínkómá avowaíꞌa kwéiye.

⁴⁵miráumai árair-aimba simátimundayavai árair-aimba iyémá íma kwésewe.

⁴⁶íma sáwíꞌa uráunda kwéisaawe. arupí-aimba simátimunaꞌanivo íma áraire kwésewe.

⁴⁷Áánútu árááꞌa pósa kwenáái isésa máyáavo keinárawaꞌa íma Áánútu árááꞌmaariꞌa uréꞌa póꞌa kwenáái íma ísaraawe Ísu siráiye.

⁴⁸Ísu simásuwowasa Yútaa-anon-kwaasi akáꞌáámba simánkesa sésa áraiꞌa séta Sámériyaa-kwaasi ónana taraváá-kwámbá enarumpimbá máyáísampo mináímbá siráane suwaná

⁴⁹Ísu séna taraváá-kwámbá íma kesirumpimbá máyáiye. kesivo áwíꞌa anómba úndanivo kesúwíꞌa sáwíꞌa umásínkáawe.

⁵⁰íma kesúwíꞌa anómba ónáe. Áánútu kentávéna séna kaweꞌ-máyáí mayáánda póꞌa enáwíꞌa mósá anómba umánkanaumne kwésiye.

⁵¹áraiꞌo senda-áímbá kesáái ísámai kaweꞌá íyawai íma puwónááowe súwasa

⁵²Yútaa-anon-kwaasi sésa sénda-aimba taraváá-kwámbó enarumpimbó máyáimba áta ísaraumne. Ááváramu puwúwasa Áánútun-aai simátímakowaima púwúmbanivo emá se kesáái ísámai kaweꞌá íyawai íma puwónááowe siráane.

⁵³kentáásivo Ááváramu puwúwasa Áánútun-aai simátímakowaima pukáambanivo miwí usáyaaitaniyono. emó sénda náávakendaraꞌono suwaná

⁵⁴Ísu séna kesúwíꞌo mósá maráúndarakai úwoi úsina. kesúwíꞌo mósá maránímba kesivomán-iye. kwentávéꞌa séꞌa kentáásí Ísóigoman-iye kwésewe.

⁵⁵kwembá kwéawanaumpo kemá íma awánaraawe. kemó séꞌo íma awánáúmnemo súndarakai kemó ontembá kampaꞌnáꞌá maúsino. áꞌa kwéawaneꞌa póꞌa kwenáái mósá kwémaraumne.

⁵⁶kentivo Ááváramu kemó marapáꞌó kumónaunda-aimba iséna aamoí éna kembá suwánéna kwenarunkó kaweꞌá uráiye súwasa

⁵⁷Yútaa-anon-kwaasi sésa emá ívé-kwaasi íma kae-kwááí umái siyáánkai-ima maisukáampo emá séma Ááváramumba awánaraumnewa seénó suwaná

⁵⁸áraiꞌa simátimeꞌa séꞌa Ááváramumbo ímo maránkaronkaꞌa kemá maémaundaniye súwasa

⁵⁹mináíntáváí tuvuwónáe sésa óntamba máyómbanivo Ísu aúpáꞌá anóm-bonoꞌ-naumpakemba kárúwaguraiye.