Read Kosena Yóni 9 Bible Online

Yóni 9 - Kosena bible

Yóni 9

¹Ísu kúmba moóráwaimba anówama aúgavitamba maránkarowaimba awánésa

²kwená kwayó-kwáásí áísaa esa sésa anóndakoo nááwana sáwí-yantaakona anondáwa aúramba kavíkáiyo. kwendéígówáꞌi. anóvowineigowaꞌiyo suwaná

³Ísu séna íma kwená sáwí-yantaakon-ivo íma anóvowiti sáwí-yantaakon-ivo Áánútuna kaweꞌ-máyáí kwenaneꞌá paárínasa awánanaaontavena aúramba kavíkáiye.

⁴siꞌmákaiwaina mayáíyá máyáano. sámo kainkáꞌó mayáímó kwémayaawanamo noꞌwáámbo aúráísanamo mayáímó máyáan-kanaamo ánásaintemba miráumai mayáímá mayáúnda-kanaama ánásanimba póta ívéꞌa Áánútuna mayáíyá mayánaumne.

⁵marapáꞌó maúnda kwaási sáma kamátinkainaꞌa úne séna

⁶mararáꞌá awirááíma kwiꞌmaréna mindánei toiraambá úmarena aúrankaꞌa aꞌmaréna

⁷simámena séna nonkwaaúnkó áwíꞌa Síróamu-kwaaumpimba awaaꞌá koyoraaó súwana mirá uráiye. Síróamuwemo súmba kwenááivinkemba kwántámai séna aiꞌmaráí-kwáúné súwana koyotuwéna aúramba awánamai kaweꞌá éna túwasa

⁸kwená naaópaken-kwaasiye ókwaasiye awánésa sésa kwemá aampaꞌó ména óntantemo inaai síma simaꞌa indaráꞌiyo suwasá

⁹évakarawai sésa owé kwemán-iye suwasá évakarawai sésa ímanivo mimbórá-óíkwáráráꞌiyo suwaná kwemá séna ímanivo kemá úne súwasa

¹⁰áísaa esa sésa nóra ónana aúramba kaweꞌá iíyo suwaná

¹¹moóráwai áwíꞌa Ísuma kwemá awirááíma kwiꞌmaréna mindánei toiraaníꞌa úmarena súrankaꞌa aꞌmaréna simásimena séna Síróamu-kwaaumpimba awaaꞌá koyoraaó sisaꞌá iséꞌa suwaaꞌá koyoráúnana súramba kaweꞌán-iye súwasa

¹²áísaa esa sésa náávara kuráiyo suwaná íma awánáúmne siráiye.

¹³simátimuwasa áíꞌmaesa ámáán-kawaa-kwaasitopaꞌa máánkówana Ísuma toimá aúrankaꞌa aꞌmaréna aúramba kaweꞌá umánkaron-kanaama Yútaa-kwaasi monor-áímbá kwéison-kanaa mayáímá aambá áúmbakon-kanaama úwasa aúramba kaweꞌá umánkarowaimba áíꞌmaesa ámáán-kawaa-kwaasitopaꞌa máánkówasa

¹⁵áísaa esa sésa nóra ónana aúramba kaweꞌá iíyo suwaná toimá súrankaꞌa asínkáisaꞌa suwaaꞌá koyoráúnana súramba kaweꞌá umásínkáiye súwasa

¹⁶ámáán-kawaa-kwaasi évakaꞌa sésa agándaan-kanaaraꞌo mirá uráintavena íma Áánútunopakemba kunkáiye suwasá évakarawai sésa sáwí-imayaa-kwaasimo énaraankasi íma kanaán-umai kaweꞌ-máyáí-áwááméꞌá isinó suwasá imáyáama taaínkaaꞌa ésa

¹⁷sésa enaúramba kaweꞌá umánkaraivo kwentáváí nóin-imayaawa kwéono áísaa esa suwaná Áánútun-aai simátímíwaiman-iye súwasa

¹⁸ánivo miYútáá-ánón-kwáásí aúrambo kaweꞌó umánkontavesa íma imáyáa umbá anóvowi tááyowasa

¹⁹tuyasá tísaa esa sésa kenkáítí tááninaꞌiyo. ánivo aúgavitana maránkaraayanaꞌiyo. nóra ena aúramba awánamai kaweꞌá kwéiyo suwasaráí

²⁰kesááninkain-iye. maránkarauyamba aúgavitane.

²¹ánivo ívéꞌa nóra isaná aúramba kaweꞌá umái kwéawanaiyompo kwemá anómban-ivo áísaa íyana kweyááríkaꞌa simátimino sirááiye.

²²ááéma Yútaa-anon-kwaasi sésa Ísuntavesa Áánútumo usásinankaiwai kwéamuꞌmaraundawaiman-iye síyawai monoꞌ-náúmpáꞌá íma iyónááowe sumbá póna minánóvówí Yútaa-anon-kwaasiyavena tááꞌa kówasarai

²³sésarai anón-umaguraivo kwembá áísaa oro sirááiye.

²⁴simásúwóyasa ókwaraꞌa aúramba kaweꞌá umánkarowaimba ááyowana túwasa sésa minkwáásígó sáwí-imayaa kwéiye sewatá ísaraunda po Áánútu aúrankaꞌa arupí umái simásimiyo suwaná

²⁵sáwí-kwaasiyaꞌi. kawe-kwáásíyáꞌiyo. kemá íma isáúmne. moórá-yantaataveꞌa isáúnda súramba kavíkwimbanivo ívéꞌa súramba awánáúmne súwasa

²⁶nóraumai aúramba kaweꞌá umánkaraiyo áísaa esa suwaná

²⁷áꞌa simátimundanivo íma ísáawe. ókwaraꞌo simátimenaꞌo éꞌa isánááoo. kwenaráái kwaránáemo séꞌa kwená kwayó-kwáásí-íꞌa ónááowe súwasa

²⁸akáꞌáámba simánkesa sésa emá kwenaráái kwaráampo kesáámá Mósesi arááíya kwégwaraumne.

²⁹Áánútu Mósesimba aaí simámakaivo minkwáásí náávaken-kwaasiyaꞌiyo suwaná

³⁰mindáꞌá mirá séna kemá mirá sembánivo minkwáásí óꞌoran-kwaasin-iye. kemá súramba kaweꞌá umásínkaraisaꞌa súne.

³¹kwemó ímo Áánútunopakembo kunkénaraankasi íma mirá uráisino. Áánútuma sáwí-imayaa kwéowai tááima íma kwéisaivo kwená mayáímó máyáawai tááima kwéisaiye. Áánútu áwíꞌo mósá maráawai tááima kwéisaiye. maambárámó úmaronkakemba íma moórá-augavitan-kwaasi máyáísana kaweꞌá umánkaraiye sewaꞌá kwéisaumne súwasa

³⁴enanóma aampaꞌá maránkaraisa po úwoivaken-kwaasima éma enáái kentáá kawe-kwáásíyá kwésimasimendayaanivo monoꞌ-náúmpákémbá kunákárúwaao suwaná kunákárúwaraiye.

³⁵minkákémbá Ísu aiꞌmátukaan-aimba iséna avakáá-umai awánéna áísaa ena séna kwíyómpakemba kwaási úrandakona arááíya kwégwaraano súwana

³⁶Ísuntavena séna anóndakoo emó sénda nááwawaꞌiyo. simásímínaꞌa kwenaráái kwáráano súwana

³⁷Ísu séna áꞌo aúrambo suwánáánda kemá úne súwana

³⁸emá Ísóigoma óne séna kívairena kwená imáyáa mósá makáiye.

³⁹kwená imáyáa mósá marówana Ísu séna marapáꞌá kunkáunda pósa kwaási avuntambá taaínkaaꞌa ónááowe. túrambo kavíkáindawai túramba kaweꞌá umái awánáíyasa túrambo awánemayaiyawai túramba kaviyíníye súwasa

⁴⁰ámáán-kawaa-kwaasimo évakaꞌo máyówai isésa áísaa esa sésa ewá séwa kentááyavaiya túramba kavíkáiwai owéwá seénó suwaná

⁴¹Ísu séna túrambo kavíkáawaimo máyáankakai kentí sáwí-imayaagona meéyámbá íma kwáyáisino. áta awánáúmne sentávéna kentí sáwí-imayaagona meéyámbá kwáyáiye Ísu siráiye.