Read Kosena aantá-kwaasi 1 Bible Online

aantá-kwaasi 1 - Kosena bible

aantá-kwaasi 1

¹Tíóvíráasiyo ívé-kwandaaivimba moórá-kwasai sénaumpo isaaó. aiva-kwándááívímbá Áánútu Ísumba aiꞌmarówana marapáꞌá kunkáin-ainkwara mayáímá kumbairáin-ainkwara aaimá siráin-ainkwara avumpimbá amápaꞌ-mayaima mairáinkwaraꞌa komaé tamae umái kwená mayáí marapáꞌá ánásowana

²Áánútu kunairówana kwíyómpaꞌa iráin-ainkwaraꞌa aiva-kwándááívímbá agaimakáunda isaꞌá ívé-kwandaaivinkwaraꞌa agaimaráúmpo isaaó. Ísu kesí aantá-kwaasiye séna ítámakaiye. Ísu íma kwíyómpaꞌa irónkaꞌa Áánútun-amankona asirayánkwáráꞌá ména aantá-kwaasi kwená ámáámba simátímakaiye.

³Ísu pukáimpinkemba usásinena kae-kwááí aíyayaan-kanaama 40 kanaama moórá-mora-tawai paárurena kwenáúma kaweꞌá umái agaráátinkowasa awánésa sésa áraiꞌa Ísu pukáimpinkemba usásinena máyáiye suwaná paáruronkaꞌa Áánútu kwená kwaásimo kawááin-aimba simátímaꞌmaena iráiye.

⁴moórá-tawai torupésa toómbá kwénowana Ísu paáréna séna maankáꞌá Yérúsaremu-naopaꞌa íma tuwéꞌa úwoi méꞌa kesivo kesimambá timénaumnemo asiramái siráimba kwéamuꞌmareꞌa máyáanana úwoi timíno. mináímbá áꞌa simátimeꞌa séꞌa

⁵Yóni nombá pétinkaraimbanivo sáwíyankaꞌa Áánútun-amanko kuména keinárawapimba anómba umátinkanivo amuꞌmaréꞌa máéro Ísu siráiye. Áánútu Ísumba kunairówana iráin-kwasai.

⁶Óríve-omapaꞌa Ísuwe aantá-kwaasiye torupésa Ísumba áísaa esa sésa Ísóigoo ívéra Árómáani-kamaani-kwaasi tiꞌmátuwewa Ísareri-kwaasiya kawáá íníyono suwaná

⁷Ísu séna moórá-kanaamo tínímba ívéraꞌi. aánowaꞌiyo. Áánútu kwená imáyáavinkemba mirá íníye. kawe-kánáámó sáwí-kanaamo paárinimba Áánútu kwená imáyáavinkemba mirá íníye. mirán-kánáámó tínímba sáwíyan-aimbanivo

⁸kemó sendá anón-aimbanivo ísáaro. Áánútun-amankoma kentópaꞌa kúmínimba kwená asirayámbá tirumpimbá anómba umátinkainaꞌa kesááigwara kentáváígwáráꞌá simátimeꞌa Yérúsaremu-naopare Yútiyaa-ayampare Sámériyaa-ayampare amápar-ayampare kosimátímaꞌmaeꞌa nááóro

⁹Ísu simásuwowasa awánomba Áánútu Ísumba kunairówana ainánkó Ísumba káátaguwasa íma awánowana

¹⁰Ísumo iyúmba kwíyómpaꞌa karátuwesa máyówasarai avekáán-umai kae-kwáásí kwayán-únánkwátói úmaesarai egwaaꞌá mésarai

¹¹sésarai Káríri-ayampaken-kwaasiyono. íma kwíyómpaꞌa karátuweꞌa máéro. awánaawanamo Áánútu kunairáísanamo kwíyómpaꞌo íyínten-umai ókwaraꞌa miráumai kumíníye sirááiye. Yútásina mayáíráꞌá usámairain-kwasai.

¹²mindárai simásúwóyasa aantá-kwaasi Óríve-omapa Yérúsaremu-naor-egwaar-omapaꞌa tuwésa Yérúsaremu-naopaꞌa koyauwerésa

¹³máyón-daumpaꞌa ávúmayaatanaan-daumpaꞌa umésa miwímá Ísuna aantá-kwaasi moórá-morawai túwíꞌa Pítaawe Yóniye Yémésiye Éndaruwe Vírípiye Tómáasiye Pátóromuwe Mátíyuwe Árávíási ááninko áwíꞌa Yémésiye moóráwai kwemá Árómáani-kamaani-kwaasi tiꞌmátuwanae siráiwai áwíꞌa Sáímoniye moóráwai óꞌon-Yemesi ááninko áwíꞌa Yútásiye miráumai-kwaasi aantá-kwaasi

¹⁴tayorupontembá námúnaa seémáémbani. minkwáásíyónté évakar-inintone Ísumba anówawe Ísun-áváꞌawaawiye tayorupamái mésa námúnaa seémáémbani.

¹⁵námúnaa síma-sima kwéesa moórá-kanaama sáwíva-kwaasi 120 kwaasi Ísun-aaiyavesa áraire siráan-kwaasi tayorupamái máyówana Pítaa usásinena simátimena séna

¹⁶kesí kwaásiyono. naaóváꞌá Áánútun-amankoma kentáá síkwáꞌnáomba áwíꞌa Tévítimba simámena Yútási-aai súwana agaimakáimba póna mináímbá paáriniye. ááéma kentááyáváíyé Yútásintavaiye Ísu kesí mayáí máyáaro séna ításinkowata aantá-kwaasiti mayáí-íta umáíya mairáúndayaawe. naaémba Yútási tíꞌmaena Ísunopaꞌa túwasa tátoꞌmai áíꞌmaesa ándávimba ánkaraawe. [

¹⁸Yútási misáwí-máyáígóná meéyámbá óntamba mairéna maramá meéyán-umasuwena mimbáráváꞌá ándáma uréna kweyááríkaꞌa kwenanumarambá arátuwena ámúꞌa kuvánkaar-úwana ayánaruntomba marapátá kunturáíye.

¹⁹Yérúsaremuvaken-kwaasi isésa miwí tááivinkemba mimbárágó áwíꞌa Akeotaavaꞌan-iye sésa kwántámai-kwiꞌa naae-máráváꞌán-iye siráawe.]

²⁰ánivo monor-ímó agaimakón-auvai-kwandaaivimba Tévíti agaimaréna sénakwená naambá tuꞌnambá isasámimpímbá íma kwaási kwégwaewe agaimaréna séna moórávaꞌa agaimaréna sénakwená mayáíráꞌá moóráwai usámayaniye agaimaréna sirónkaꞌa póta

²¹moóráwai Yútásina mayáíráꞌá usámayaniwaimba avakáá-umaiya airánaundayaawe. Ísu Káráísitima pukáimpinkemba usásinkain-aimba kweséya tásáumai simátímaꞌmaeta kónaunda póta Yóni nombá kwévetinkowana Ísu mayáímá ááimba ásámai mayówata kuré-ire úmae kwénaaowananaya Áánútu Ísumba kunairówana kwíyómpaꞌa iyúwasa awánaraawaivinkemba moóráwaimba aíráananaya kwemá Yútásimo tukáim-bayai usámayaniye Pítaa simásuwowasa

²³isésa kae-kwáásí túwíꞌa tésa moóráwai kaumbo-kwíꞌá tamámakaawai moórá-awiꞌa Yósépi moórá-awiꞌa Paasapasí moórá-awiꞌa Yásátasi uwaná moóráwai áwíꞌa Mátáyáasi miráumai-kwaasirai túwíꞌa tamásuwesa

²⁴námúnaa sésa Ísóigoo amápa-kwaasiti imáyáa awáné tirumbá tuwáné minkáé-kwáásívínkémbá nááwa Yútásina mayáí aantá-kwaasiti mayáíráꞌá usámayaniyo. agaráásínkénata awánaano.

²⁵Yútási kwená mayáí ivátuwena puwéna kwená mayáígóná meéyámbá sáwí-marupaꞌa kunkáiye sésa

²⁶námúnaa simásuwesa kae-kwáásí túwíꞌa kae-kwándááívímbá agaimái anavéúmpímbá kuvéꞌmakowana moóráwai moórá-kwandaai mósá mairéna awánómba Mátáyáasiye sésa agaimakówana aantá-kwaasi sísamaivakemba moórá kumbaimái-kwaasivimba komayáí mairáiye.