Read Kosena aantá-kwaasi 12 Bible Online

aantá-kwaasi 12 - Kosena bible

aantá-kwaasi 12

¹minkánáá Érótimba anówainkoma araámáó Érótima Yútaa-kwaasiti kawáánáꞌá kwemá Ísuna aampaꞌá kwéguwai évakarawai sáwíꞌa umátinkena

²moóráwaimba aiꞌmarówana Yóni awaaó áwíꞌa Yémésimba koyátoꞌmai anumarambá arátuwowana puwúwasa

³Yútaa-kwaasi Ísun-aaiyavesamo ímo áraire suwáí aamoí kwéuwana Éróti awánéna aamoí umásinkaigwae séna moóráwaimba aiꞌmarówana Pítaamba koyátokai. Yútaa-kwaasi ímo intóráin-tantaakwara-pereti kwéagayon-kanaavimba moórá-tawai Pítaamba koyátoꞌmaena

⁴ándávaꞌa máánkowasa siyáánkain-umai avaꞌmoraé-i-kwaasi kwenkáꞌá kárákwirowasa éíyain-eiyain-kwaasi anondánonda umái kárákwiyuwasa Éróti séna naaóváꞌá Áánútu Yútaa-kwaasi tíyótaasa í-tánón-kánáámá ánásainaꞌa Pítaamba áíꞌmaeꞌa Yútaa-kwaasi túrankaꞌa aaivimbá mayankéꞌa inkamónaumnemo kwésumba

⁵Pítaa ándávaꞌa máyombanivo Ísóigona kwaási Ísóigompaꞌa námúnaa simái Pítaamba áwaꞌnaa uráawe. Pítaamba ándávakemba ayúránkarain-kwasai.

⁶námúnaa kwésesa Pítaantavai ísámai áísaa uwaná aaváyaaraamba Éróti Yútaa-kwaasi túrankaꞌa Pítaamba aaivimbá mayankánaumne kwésuwana ívéꞌ-noꞌwaankaamba Pítaamba aíyayaankaꞌa asááúmakesa kaer-í-kwáásí évarevaꞌa máyóyana Pítaa aún-kwaigúwasarai kaer-í-kwáásí ontaráꞌá kárákwiroyana

⁷avekáámbá Ísóigona kwayóꞌnáꞌá kwíyómpakewai kumúwana ándá-naumpaꞌa sán-kówana Pítaamba ayoíráꞌá kwétuvuwena aúsuwana usásinowana séna avekáán-usásinaao kwésuwana Pítaa ayáámpinken-anda kweyááríkaꞌa ayúꞌmaena marapáꞌá kumúwana

⁸kwíyómpakewai séna enámúranda uré enaísamai ánáamba maimái uwó súwana mirá úmayowana ená paákákén-únánkwátói kuvéꞌmáenakai kesé kúmóyo súwana

⁹Pítaa ándá-naumpakemba kwenánaaemba kuména íma kwaásin-iye-imayaa éna kaaimbá kwéawanaumne-imayaa kwéena

¹⁰i-kwáásímó máyon-ontaraꞌa kunáyaaitesarai minkákémbá moórá-ontaraꞌa i-kwáásímó máyon-ontaraꞌa kunáyaaitesarai minkákémbá ándávakembo naaópaꞌo kónáesamo uwasamó titinkémáen-ontaraꞌa asirayán-óntáráꞌá kúmúyana kweyááríkaꞌa tigúwasarai kunákárúwagwesarai aampaꞌá kuyaná avekáán-úwana kwíyómpakewai Pítaamba auwéna aúyokuwana

¹¹Pítaa imáyáa éna séna íma kaaimbá awánáúmpo áraiꞌa Ísóigo kwená kwayóꞌnáꞌá aiꞌmáráísana kuména Éróti sínkamonae kwéisana ayáámpinkemba kuntavíyuwaisaꞌa túne. Yútaa-kwaasigwaraꞌa sínkamonaesamo ombá kuntavíyuwaisaꞌa túne Pítaa siráiye.

¹²Pítaa simásuwena Máríyaana naambó kwáyopaꞌa kwéna Yóni Máákaamba anówana naambó kwáyopaꞌa kúwasa sáwíva-kwaasi mindáúmpáꞌá torupamái mésa Pítaantavai ísámai Ísóigompaꞌa námúnaa kwésuwana

¹³mindánkóná ontaráꞌá kotuwátuwar-úwana moórá-arasi mindáúmpáꞌá kígau ún-arasigo áwíꞌa Áróta ontaráꞌá kuména

¹⁴séna nááwaꞌono súwana Pítaa séna kemá úne súwana Pítaa amósámba iséna kunaamoí úmaena ímo ontamó tiyankómba isaaiséna sáwíva-kwaasitopaꞌa usimátimena séna Pítaa ontaráꞌá máyáiye súwasa

¹⁵miwí sésa emá uwoꞌaóꞌá éma kampaꞌá séne suwaná minárásígó ókwaraꞌa séna áraiꞌa Pítaa ontaráꞌá máyáiye súwasa miwí sésa Pítaan-amankon-iye

¹⁶kwésuwana Pítaa ontaráꞌá árimba tuván-tuvan-úwasa isésa onta kuntisuwésa awánomba kwemá Pítaa úwasa táátavai uwaná

¹⁷aaisékéwaꞌa simátíméno séna Ísóigo ándávakemba kembá síꞌmaena aampaꞌá mésiyuwaivo Yémésinte Ísun-aaimo ísáan-kwaasiye kosimátíméro Pítaa simátimena tiyuwéna óꞌon-daopaꞌa kuráiye.

¹⁸kúwasa irataróꞌa i-kwáásí Pítaamba kárákwirowai awánomba íma máyowasa kantúmbá ésa Pítaa náávara kóuraiyo suwaná

¹⁹Éróti iséna Pítaamba avakáá oró súwasa avakáá uwááesa tuwówana Éróti miní-kwáásí aaivimbá maitinkéna séna tínkamoro séna évakarawai tiꞌmarówasa tínkamuwasa púwúwana Éróti mirá umásuwena Yútiyaa-maravaꞌa tuwéna kumeémena Sísáriyaa-naopaꞌa kumbéraiye. Éróti pukáin-kwasai.

²⁰Éróti Sáítóni-naopaken-kwaasiye Táyaa-naopaken-kwaasiye ávááraumai áwááꞌa tiyúwasa minkáéꞌ-náópaken-kwaasi tayorupamái mésa sésa Érótimo kárákwirai-maravakemba kentáásí toómbá kwémayaundayaawe sésa mináímbá simái kawer-ónáe sésa Érótinopaꞌa tumbá kwená naakaꞌó kárákwirowai áwíꞌa Párásatasimba másimamuwana isówasa minááísámbá másimai tukáawe.

²¹minkákémbá Éróti anón-kanaa úwana kwenkáꞌó kárákwirowaina unáánkwátói úmaena kárákwirowai maéꞌmaer-únkaꞌa uména ayáátáár-aimba kwésuwasa

²²Érótimba simái arumbá iyaésa sésa íma kwaásigo kwésivo Ísóigo kwésiye anónkaꞌa suwaná

²³Éróti mináíntávéna íma Ísóigo úmpo úwoi-kwaasi úne séna aúpáꞌá tuwówana Ísóigona kwayóꞌnáꞌá kwíyómpakewai tuvuwúwana uvowánkó arumbá unkarówana pukáiye.

²⁴puwúwasa Ísóigona kwaási Áánútun-aai kosimátin-tasimatin-uwasá isésa áraire sésa Ísóigompaꞌa tésa méraawe.

²⁵Ántíokuvaken-kwaasi Yérúsaremuvaken-kwaasiyavesa óntamba timénaumne sirómba pósarai Páánápáasiye Sórowe kwétiꞌmatuwesarai mimbáyáí ánásowasarai ívé-kwaasigo áwíꞌa Yóni Máákaamba áíꞌmaesarai Yérúsaremuvaꞌa tuwésarai kweémesarai Ántíokuvaꞌa kurááiye.