Read Kosena aantá-kwaasi 15 Bible Online

aantá-kwaasi 15 - Kosena bible

aantá-kwaasi 15

¹Ántíoku-naopaꞌa máyóyasa évakarawai Yútiyaa-maravakemba Ántíoku-naopaꞌa komésa Ísun-aai ísówaiyavesa sésa Áánútumo Mósesimbo simámakon-amaambo ímo iséꞌo túraꞌo kárámaimo araaꞌénamo íyanamo éna Ísóigo sáwíꞌo umáímo máyáampinkemba kawer-ámpáꞌá íma métinkaniye suwasaráí

²Pórowe Páánápáasiye mináíntáváí áwááꞌa tiyésarai kwesimá kwesiman-esa Ántíokuvakewai Ísun-aai ísówai sésa Yérúsaremuvaꞌa aantá-kwaasiye Ísóigona kwaásiti anón-kwaasiye mináíntáváí kotísaa oró sésa Póronte Páánápásinte évaka-kwaasiye tiꞌmárówasa kuráawe.

³Ísóigona kwaási tiꞌmárówasa kweémesa Vínísiyaa-maravaꞌa Sámériyaa-maravaꞌa naaóꞌ-naoꞌa komáyówasa Ísun-aai ísówai torupamái máyówai simátimesa sésa óꞌonkaa-kwaasi Ísun-aai isésa áraire sésa kwempáꞌá tésa máyáawe suwasá isésa tirumbá kaweꞌá úwasa

⁴naaóꞌ-naoꞌa simátímatuwesa kweémesa Yérúsaremu-naopaꞌa komáyówasa aantá-kwaasiye Ísóigona kwaásiye miwítí anón-kwaasiye tiyáámba kwétimesa aamoí uwasá Áánútumo mayáímó tímakaim-bayaimo mairáan-aimba másimatimuwasa

⁵isésa évakarawai Ísun-aaiyavai áraire sumbánivo ámáán-kawaa-kwaasiti aampaꞌá kwéguwai usásinesa sésa óꞌonkaa-kwaasi Ísun-aaiyavai áraire kwésewai Mósesi simátímakon-amaamba isésa túraꞌa kárámai araaꞌéna orómá kosimátíméro suwasá

⁶aantá-kwaasiye anón-kwaasiye sésa mináímbá torupamái méta imáyáa umáíya senó siráawe.

⁷suwasá torupamái mésa ayáátáákaꞌa mináímbá suwaná Pítaa usásinena séna kesí kwaásiyono. óꞌonkaa-kwaasi áséi-kwasai isésa Ísun-aaiyavai áraire sígwáe séna ááéma Áánútu keinárawapinkemba usásisinkena siꞌmarówaꞌa kosimátimewanasa isésa áraire siráawe. kemá mináímbá áꞌa ísaraawe.

⁸Áánútu amápa-kwaasiti imáyáa tuwánéna óꞌonkaa-kwaasiyavena séna kesí kwaásiman-owe séna kwenamambó símakonten-umai miwímó tímakomba awánaraumne.

⁹Áánútu Yútaa-kwaasiya ór-amba íma agaráásinkenaya óꞌonkaa-kwaasi íma ór-amba agaráátinkena kwéivo Áánútu amápa-kwaasiya mimbórá-ámbá kwéagaraasinkaiye. miwí Ísun-aaiyavai áraire sunkákémbá miwítí sáwí-imayaa maitiyuwéna kawer-ímáyáá umátínkaraiye.

¹⁰Mósesin-aaigo kentáá síkwáꞌnáya umbaí tiyówasa íma kanaán-umai kwakáawe. kentáágwáráꞌá miráumai umbaí taisatá íya kanaán-umai kwakáumne. mindáyavai óꞌonkaa-kwaasi Ísuna aampaꞌá kowáíyáváímó Mósesin-aai kwáráaro síyasamo ésa umbai-ámbá kwaránááowe. mirámó íyanamo éna Áánútu áwááꞌa sínaꞌa póꞌa íma mirá ónááowe.

¹¹Ísóigo Ísu úwoi súwaꞌnaa enaya sáwíꞌo umáímo máyaundavinkenta kawer-ámpáꞌá mégwésinkaintaawe. mináíntáváíyá áraireya sénáisae mirámó kwéintenta óꞌonkaa-kwaasigwaraꞌa mirá kwéiye Pítaa siráiye.

¹²Pítaa súwasa isésa amáparawai áraiꞌa siyé sésa íma aaí suwasaráí Pórowe Páánápáasiye Áánútu tímakaim-bayai óꞌonkaa-kwaasivimba mimbáyáí mairááyan-aimba simátimesarai Áánútuna mayáí ímo awánaraam-bayai kaweꞌ-máyáí mairááyan-aimba

¹³simátímatuwoyana Yémési séna kesí kwaásiyono. kesáái ísáaro.

¹⁴ááéma Áánútu óꞌonkaa-kwaasiyavena imáyáa éna minkwáásívínkémbá évakarawai usásintinkena séna kesí kwaásiman-owe siráin-aimba Pítaa ívéꞌa simásímakaiye.

¹⁵Áánútun-aai simátímakowai mináímbá aúváí-kwandaaivimba agaimarésa sésa

¹⁶Ísóigo séna naaémba kuméꞌa Tévítina naambá tawísíyukaan-damba kunumásuwanaumne. sáwí-yantaakwaraꞌa kaweꞌá kunumásuwanaunda pósa

¹⁷óꞌonkaa-kwaasi kesópaꞌa ténááowe. kesí kwaásiman-owe sendawáí kesópaꞌa ténááowe séna

¹⁸Ísóigo mináímbá naaóváꞌá sirómba póna ívékwaraꞌa mirá kwésiye Yémési siráiye.

¹⁹Yémési simásuwena séna Ísóigo siráin-aintaveꞌa imáyáa éꞌa séꞌa óꞌonkaa-kwaasi Áánútumpaꞌa kwéten-kwaasi umbai-máyáí íma timénaumpo

²⁰aúváíma agaimái timéta séta kampar-ísóígóntáváí imáyáa ésa póíꞌo umándaamba mimpóí íma naaró. aarai-úmóyámbá kwaai-úmóyámbá íma oró. póíma tuvúꞌnewana kwená naaemá ímo kumíndamo úwoimo kwáyáinaꞌa mimpóí íma naaró. naaegwáráꞌá íma naaró. mináímbá aúváí-kwandaaivimba agaimaráúmpo awánaaro.

²¹ááémo maémáén-kwaasiye ívéꞌo máyáan-kwaasiye ayáátáákaꞌa aasiyaasí monor-áímbá kwéisaan-kanaaraꞌa mináímbá Mósesin-aai simátímaꞌmaesa kuráawe. mindáyaveta aúváí-kwandaaivimba agaimaráúmpo awánaaro Yémési siráiye. aúvái agaimái óꞌonkaa-kwaasi tímakaan-kwasai.

²²súwasa aantá-kwaasiye Ísóigona kwaásiye miwítí anón-kwaasiye sésa kanaám-pota kentáávímbá évakarawaiye tiꞌmáráanasaya Pórowe Páánápáasiye Ántíokuvaꞌa kwíyapaꞌa miwísé kónááowe sésa miwítí avumpinkémbá kae-kwáásí túwíꞌa mósá makáan-kwaasirai túwíꞌa tombá moóráwai áwíꞌa Sáírási úwana moóráwai kaer-áwíꞌá Yútásiye Paasapasíyé umái

²³aúvái timésa tiꞌmárówasa kurá. mináúváívímbá agaimarésa maará sésa kesáá kentí kwaásiya úne. aantá-kwaasiye anón-kwaasiye moórá-aimba sénaumpo kentáásí kwaási ísáaro. óꞌonkaa-kwaasi Ántíoku-naopaꞌa Síriyaa-maravaꞌa Sírísiyaa-maravaꞌa máyáan-kwaasi ísáaro.

²⁴kentáávínkémbá évakarawai kentópaꞌa kwésa ímo simátímakaunda-aimba miwítí imáyáavinkemba kosimátímúwaꞌa iséꞌa tirumbá sáwíꞌa úwaꞌa umbaí taráanta iséta

²⁵torupamái méta imáyáa éta mimbórá-áímbá simái kae-kwáásí usásintinketa tiꞌmaráúnasaya Páánápáasiye Póroe migóiye. mindárai kesí kwaásiya siruntá tímakaundanaraiye sínkamiyakai puwúyavo-imayaa íma ésarai Ísóigo Ísu Káráísitina mayáí kwémayauye-imayaa ésarai asiramái kwémayaaiye.

²⁷Yútásinte Sáírásinte tiꞌmaráúnasarai migóíyamba pósarai aúváívinken-ainkwara simátimeyaaoi-ainkwaraꞌa mimbórá-áímbá pósarai kosimátimeyaaoiye.

²⁸Áánútun-amankowe kesááwé mimbórá-áímbá simáíya íma umbai-áímbá simátimumpo maanáúváívínkén-áímbá simátimundaya ísáaro.

²⁹kampar-ísóígóntáváí imáyáa ésa póíꞌo umándaamba mimpóí íma naaró. naaemá íma naaró. póímo tuvúꞌnewana kwená naaemó ímo kumíndamo úwoimo kwáyáinaꞌa mimpóí íma naaró. aarai-úmóyámbá kwaai-úmóyámbá íma oró. kesáámó súnda-aimbo éꞌo éꞌa kaweꞌá ónááowe. mináímbá ánásaiye. aúváíma agaimái timésa siráawe.

³⁰suwasá mináúváímá timésa tiꞌmárówasa maimaésa kweémesa Ántíoku-naopaꞌa kuwasá Ísóigona kwaási torupamái máyówasa mátímúwasa

³¹mináúváí-kwándááívínkémbá táápamai simátímúwasa kawer-áímbá isésa tirumbá kaweꞌá úwasarai

³²Yútásiye Sáírásiye Áánútun-aai simátímakoyan-kwaasi ayáátáákaꞌa simátimesarai miwítí imáyáa arupí umátímúyasa isésa asiramái máyówasarai

³³miwísé évakaꞌ-noꞌwaamba máyóyasa Ísun-aai ísówai sésa áꞌa kanaán-ivo tiꞌmákaan-kwaasitopaꞌa kawer-áímbá kosimátímékaiyo suwaná

³⁴Sáírási óꞌon-imayaa éna mindáópaꞌa máyowasarai

³⁵Pórowe Páánápáasiye ayáátáákaꞌa Ántíokuvaꞌa mésarai mindáraiye évakarawaiye mésa Ísóigon-aai simátímaꞌmaesa kuráawe. Pórowe Páánápáasiye tarákaaꞌa urááyan-kwasai.

³⁶naaémba Póro Páánápáasintavena séna naaóꞌ-naoꞌa Ísóigon-aaimo simátímakauyamba Ísun-aaimo ísaraawai kawerá umáíya máyáawa tuwánámaekai kóyauye Póro súwana

³⁷Páánápáasi séna Yóni Máákaamba áíꞌmekai kóyáe súwana

³⁸Póro séna kweséya téwáyana Pámpíriyaa-maravaꞌa kenkáí másiyuwena kwená naaópaꞌa tayauweréna kuráimba pókai íma áíꞌmekai kóyauye Póro súwasarai

³⁹mináíntáváí kayorésarai aaisambá simásuwesarai mindárai tarákaar-uyaná Páánápáasi Yóni Máákaamba áíꞌmaena nompí-sípí tátoꞌmai usáatesarai kweémesarai Sáíparasi-maravaꞌa kuyaná

⁴⁰Póro séna ke Sáírásimba airánaumne súwasa Ísun-aai ísówai námúnaa simásuwesa sésa Ísóigo úwoi kaweꞌá umátinkanivo kokaiyó suwaná Sáírásimba áíꞌmaena kúmba

⁴¹Síriyaa-maravaꞌa Sírísiyaa-maravaꞌa naaóꞌ-naoꞌa kwénaaesarai Ísóigona kwaási túwaꞌnaa úmaesarai kuyasá kaweꞌá umái méraawe.